الطفيلي
- الطفيليون .. هم جماعة بترددوا علي موائد الامراء والتجار .. عشان يفوزوا بي وجبة او عطية ..!
- تاريخ الادب ذكر قصصهم وطرائفهم في الحتة دي
- اكتر واحد اشتهر في هذا المجال "اشعب"
- اشعب ده زمان قرينا ليهو قصة بي عنوان "أشعب الاكول"
- الكلام ده زمن كان المدارس بتقري وبتعلم ..!
- هسة المدارس بقت بتهري وبتألم ...!
- الادب العربي اتناول حياة "الطفيلين" ديل بالتفصيل .. وذكر تعاملهم مع الولائم التي يقيمها هولاء الامراء والتجار .. فكانوا مرة يطردونهم ومرة يقربونهم ليضحكوا من طرائفهم ..!
- الشئ الماذكروا لينا التاريخ هو كيفية تعامل هولاء الطفيلون مع هذه الدعوات قبل اوانها وبعدها
- يعني التاريخ ماذكر لنا كيف يتعامل اشعب مع الدعوة لوليمة قبل ان يحين وقتها كيف يستعد وماذا يقول وماذا يعد لها من ملابس وخلافه ..
- وكذلك ايضا لم يذكر لنا التاريخ رد فعل الطفيلي بعد انتهاء الوليمة
- نحسب ان هذه الاشياء التي لم يذكرها التاريخ وهي اصداء ماقبل وما بعد الوليمة .. نحسب ان التاريخ قد اغفل شيئا مهما في حياة هولاء الطفيلين ..!
- والتطفل مازال الي يومنا هذا موجود والطفيلين ليهم مجتمعهم وشللياتهم وليهم لغتهم فهم مجتمع قائم بذاته وان كان لا ينفصل عن المجتمع
- الطفيلي هل يولد طفيلي ام ان المجتمع من حوله والظروف التي يعيشها تجعل منه طفيليا ..؟
- بغض النظر عن الاجابة علي هذا السوال فالطفيلي له نكهته ووجوده في المناسبات والولائم يضيف اليها شيئا من الطرافة واللطافة ويذهب ملل الحاضرين .. !
- يعني مثلا .. مثلا بس .. خاصة لو اخدنا الجانب بتاع اللطف والظرافة واذهاب الملل .. ممكن نقدر نقول انو الناس في الزمن ده اهملت دور الطفيلي واستعانت بفرق "النكات" ..؟
- لاحظ انا بقول مثلا بس..!
- عموما "التاريخ الادبي" ماذكر لينا انو في طفيلي دفع قروش عشان يعزموه لي وليمة .. بل المعروف وان الطفيلي كان يكرم ويقدمون له اصناف الطعام والشراب ثم يعطونه نصيبا من المال ومنهم من يجود عليه ببعض الملابس والاحذية ومنهم من ("يلف" له شوية الحمامتين الفضلن للعيال)
- انتو معاي ولاّ سرحتو مع "شوية الحمامتين" دول ..؟
- في الاخبار ان فريق المريخ دفع 12 مليار من اجل اللعب مع بايرن ميونخ ..!
- بس الشئ الماذكرتو هذه الاخبار ان هذه ال12 مليار هل هي بالهزيمة ام بدون هزيمة ... ام ان تحديد هذا الامر ترك لاقدام اللاعبين ..!
- يبدو لي ان امر نتيجة المباراة ترك ليحسمه "جوز بله جابر" وتمريرات هيثم قارورة .. وطلعات ساكواها الهجومية ..!
- هسة في حد ربط الموضوع ده بالتطفل ..؟
- هسة في زول قال المريخ متطفل ؟
- بس طفيلي يدفع عشان يعزموه .. دي اصلو ما لاقتني ..!
- هسة ال 12 مليار دي بتعمل ليها كم وليمة ؟
- وليمة في عينك ..!
- مكنات غسيل الكلي كل مرة واقفة انت تسال عن الوليمة ؟
- الدعم رفعوه .. وانت تسأل عن الوليمة ؟
- الناس في ميدان جاكسون مالاقية مواصلات .. انت تسال عن الوليمة؟
- كم من مريض ما لاقي حق الدواء انت تسال عن الوليمة ؟
- غايتو في ناس كده بتعمل حاجااااات .. حاجات غريبة يا "جدع"
- مثل
:
الفلهمة "العورا" وشيل البطارية في "القمرة"
و
و
و
أتفلهمي .. هس ولاكلمة ..!
|