خريطــــة جغرافيـــة لأعضــاء ســـــودانيات

[علاءالدين عبدالله الاحمر]

المشاركة الأصلية كتبت بواسطة مهند الجيلي بادي

مهند الجيلي بادي
تابع لي كوم العزااااااااااابة (أبو الحسين المرقك يمرقنا)
رفااااااااعة بلدي الحنينة والجميلة

اد درمان

تعااااااااااااالوا الشهداء أم درمان وتلقوا نص بورداب الداخل
لمة حنينة
وإلفة ما عادية
وكبابي الجبنة والشاي تطاقش
في منتدى إخلاص العائلي لبورداب سودانيات واصدقائهم


المواظبين على المنتدى العائلي :
جمال تاج السر
مهند الجيلي بادي
ناصر يوسف
الرباطابي (فاااااااااقدنك والله)
مااااااااايم (دا راجل محطاتو مشتركة وما بطلع جملة مفيدة)
المهندس (زي هلال رمضان)
سجيمان (فلتة الزمان)
عبد الغني محمد (بتااااااااوق مرة مرة)

ياخي فترت من الكتابة ...
المهم تعالوا بس


مرفق :
كل الحب
بـــــادي

سنه وادي السليكون ظهر بهنا
والله يامهند الجيلي قديتو الشهدا عديل انت والباقر ومأمون التلب ... وانا ذي قريب منك في البوسته حي الرباطاب عشان كده ما تستغرب المساخة الفيني
ودمت بخير

[خالد الأيوبي]

دكتور نـــزار

تشــــرفنا بمعرفتك يا راجل ...... و هذا دليل علي نجاح فكرة البوســــت.

في نهاية هذا الشهر ان شاء الله سأكون بمدينة شيكاغو لحضور مؤتمر علمي وحسب التساهيل سأزور فرجينيا أتمنى ان نلتقي هنالك كما أتمنى ان التقي ببورداب شيكاغو وقبلها ارجو ان التقي بالرائع قارسيا ورفاقة بورداب لندن،،،

بإذن الله (التســـــاهيل) حتكون في صفنا و ســـــوف تأخذ بك من يدك و تحضرك إلينا في فرجينيا و تســـــــعدنا بزيارتك

بس إنت خلي النية قوية.

لي صديق في شـــــيكاغو .. ســـــنخبره بحضورك و ســـيكون لك خير معين.

و ســـيكون بيننا إتصال قريب قبل حضورك إن شاء الله

[منعم ابراهيم]

أنتو الجكسي ..وين ..شايفو زايغ ....


يلرب ساكن ..في بيوت الشعر ..بكسر الشين...والله آآه

لزوم الاكواد....

لكن شفرة دافنشي ماخطيرة


لك التحية العزيز خالد الايوبي :

والزيارة دي وعد مؤجل ...والبلد لو مانفعت معاك ..

تلب بي جاي البلد سمحة ...


فرجينيا شهريا كنت ازورها...ولدي أصدقاء روائع فيها


عاطف انيس

صلاح الزين

حسن مبارك(ككو)

خطاب حسن أحمد

عوض ابو جديري

نور الدايم عبد الوهاب
(حسن هينو)

[Garcia]

ارجو ان التقي بالرائع قارسيا ورفاقة بورداب لندن،،،

الاخ نزار
مرحب بيك وتشرفنا فى اى وقت , اسكن على بعد محطتين فقط من ..
مطار هيثرو , بس ورينا جاى متين ؟
ولك كل الود والتقدير ...

------------------------------------

أخوكم في الله : محمد ابراهيم قرض ..
صور - سلطنة عمان ... هاتف جوال
0096899770915

ياقرض يعنى اركب واصلك هناك طوالى
اصلوا امنيتى من زمان اشوف صلالة

[iman mohamed hussien]

سلامات

تسلم يا خالد الايوبي علي هذه الفكره الرائعه من فتره صادف ان التقيت مجموعه محترمه من سودانيات في هولندا كنت سعيده جدا بهذا اللقاء
انا ايمان محمد حسين اقيم في بلجيكا
ام 3 اطفال
مي 9 سنين
اليسار 6 سنين
داني 3 سنين
الاصل من مدينه كوستي اب عن جد

[سارة]

يقوم هسى الواحد يجيكم تقول ليهو الدخلك بيت العزابة شنو

عالم تغيظ

اها انا اول الجكس وبعدين ناس عبد المنعم ابراهيم يمتنعون

بس يا عبد المنعم ما دايرة معاك اى كلام

دايرين تعرفوا انا منو وانا وين؟؟

قادر الله

انا سارة الضارة واللقب أمينة

من مواليد بحرى الاملاك بس اتربيت فى الغرة ام خيرا جوة وبرا

حاليا فى اوسلو النرويج شغاللة وبدرس قراية الكبر بعيد عنكم بس آخر سنة ان شاء الله

اى واحد ولا واحدة داير تلفونى يكتب على الخاص وعلى راسى

فى ناس ممنوعين من الصرف حتى لو قالوا الروووب


لكم جميعا بورداب سودانيات فى اى مكان مودتى وتقديرى

[منعم ابراهيم]

فى ناس ممنوعين من الصرف حتى لو قالوا الروووب

ياربي ديل نحنا!!؟


_ اللبن الرايب ...

رب ضارة نافعة...(مثل من أوسلو)

[نبيل عبد الرحيم]

الأخ خالد الأيوبى
أحيك على المبادرة وهذا ماطلبتة من أسرة سودانيات أن تقوم بهذى المبادرة وأرى أنها فكرة رائعة وتؤدى للتواصل بين أسرة سودانيات وتقضى على الشللية ولولاحظت فى مداخلتى فى بوست حنينة فى زيارتها لقارسيا طالبت بذلك .
الأسم نبيل عبد الرحيم
الأقامة لندن فى قلب العاصمة
حلفاوى
تليفون 00447961194256
أشكرك
نبيل

[الوليد عمر]

العزيز : خالد الأيوبى ...
صاحب الفكرة الرائعة ..:


وكل ناس بيتنا فى سودانيات (البيت الكبير)...


الذى ينتهى به مطاف الجميع .... وتفئ إليه كل الطيور المهاجرة ... بحثا عن ظلال الوطن فى أقلام من أحبه وّامن به ... سودانيات ذلك الملتقى الأليف الذى يمدنا بالدفء .. والإنتماء ..ذلك الظل الوريف الذى يحتضن أمالنا وألامنا فى اّن ...

(ففى الإلتقاء تكمن جميع الحلول ...)

حينما تقرأ لأحدهم فى سودانيات .... تشدك إليه كلماته .. وتربطك به معانيه ... وتبدأ بينك وبين نفسك فى معرفته من خلال ما يسطر ... كأن ملائكة ما ترسم لك ملامحه بين الكلمات وتعينك للتواصل معه من خلال الحروف .. فتمنحه فى ذهنك كل الأمكنة تصويرا وتجسيما وأخيلة ...هلك تظفر برؤيته ولو فى خيالك وحسب ... وياله من شعور حميم ... ينتابك حينها وأنت تمنحه إعجابك حينا ... وتمده بتحفظك حينا ... وفى كل الأحوال فإنك لا تقايض إبتسامته بشئ ....


تلك هى سودانيات بالنسبة لى ....(بيتنا الكبير ) ... حيث أبدأ قيلولتى تحت شجرة النيمة الظليلة فى إنتظار الجميع ... لنلتقى على فنجان القهوة المنكهة ... ثم نحول الأخيلة إلى لقاء أكيد .. ونبدأ بمعرفة بعضنا البعض ...(من قريب) .




( الوليد عمر)....هو إسمى الحقيقى ...

مقيم فى مدينة (دبى) ... بدولة الإمارات العربية المتحدة ...
أعمل لدى (بلدية دبى) فى مجال الرقابة على الأغذية ...

من شلة العذابة ..

أصلا من حلة صغيرة فى الجزيرة إسمها (ود عشا ) تابعة لمحلية بركات جنوب واد مدنى ...


يعنى المعنى من (عريب الجزيرة اليبيعو الزيوت ) ....

أها والمسعول منى فى ناس سودانيات .. ترى عمنا (عكود) ... باقى نعمنو قريب منى فى الإمارات ... أكان درتو الزيادة حبابكم ألف ... و شرفونا بالطلة ...


مع فائق ...الود و الإحترام ..

ودمتم ..

[نبيل عبد الرحيم]

الأخ خالد الأيوبى
والسادة المتداخلين
عندى إقتراح وهو أن يقوم الأعضاء بكتابة محل الأقامة مع الصورة الشخصية لأن هذا البوست بعد أن يرفع سوف ننسى كل كل شيىء
أن يسجل المشرفين هذى المعلومات وتحفظ ويقوم تعارف بين الأعضاء فى كل بلد.
نبيل

[د.سيد عبدالقادر قنات]

i tried to write in arabic but the mouse + key board failed to help me

my full name Elsayed Abdelgadir Yousif Gannat

M y phone is 00249912355920

All of U dont Hesitate to Call at any thme

my phone is open all the day

when the keyboard works in arabic

i will re write in Arabic in details

[أبو العز الجنوبي]

العزيز خالد الأبوبي
تحياتي لك كثيرا، والشكر أجزله على هذا البوست الرائع كروعة صاحبه...
الفكرة عظيمة واعضد ما قاله نبيل عبد الرحيم من تثبيت العنوان جانب الصورة كما كان سابقا، وحاليا يوجد بعض الأعضاء مثبت عنوانهم......
شكرا ليك نبيل، لأني كنت ماشي انتهي من قراية الردود عشان اقول نفس مقترحك ولنفس السبب وكأنما هناك تواصل غير مرئي في التفكير.... بالمناسبة ، سلامتك، وكفارة ليكم، طبعا ما كنت عارف انك بلندن، بس لو كنت عارف ما كنت قلت ليك رأيي في تشجيعك للفريق الانجليزي....والفضل في المعرفة دي يرجع لود الأيوبي...
الأسم : المعز محمد احمد
المهنة: محام
اللقب : ابو العز الجنوبي، أو الصيني بالعربي والانجليزي..
السكن حاليا: الكلاكلة القبة ، قريب جدا من اللفة، انا عارف ناس امدرمان وحي البوستة حيقولوا لي : ياااخ انت قايل نفسك ساكن في العاصمة؟؟؟ يا اخوانا انا عارف اني ساكن في الضهاري في محافظة جبل اولياء...
الأصل: دنقلاوي، من لبب وجزيزة بنه، ومن اوربي.. ومن ناحية تانية جبل ام علي (حبوبتي جعلية) اجدادنا رحلوا زمان لأمدرمان، ودنوباوي شارع الدومة(طبعا يا قارسيا ممكن نعرف اهل بعض كان اتونسنا شوية)... لكن اتولدت بشمال اعالي النيل، القيقر، ونشأت هناك...
افتكر كده كفاية....
اها نسيت التلفون: 0912220387

[حمدي اب جقادو]

المشاركة الأصلية كتبت بواسطة أبو العز الجنوبي

الأصل: دنقلاوي، من لبب وجزيزة بنه، ومن اوربي.. ومن ناحية تانية جبل ام علي (حبوبتي جعلية) اجدادنا رحلوا زمان لأمدرمان، ودنوباوي شارع الدومة(طبعا يا قارسيا ممكن نعرف اهل بعض كان اتونسنا شوية)... لكن اتولدت بشمال اعالي النيل، القيقر، ونشأت هناك...

ابو العز انت كان تقول انا سوداني وخلاص

لكن يامعلم المحيرني الجاب لبب لي جزيرة بنا لي اوربي شنو ؟؟؟ يامان جدك وابوك شكلهم كانو حوامين خلاص بس ان شا الله انت تكون طالع ليهم

حبي الكبير

خالد الايوبي
ماتقول علي متهرب من الرد لكن والل انا بس متابع واكيد بجي تاني للبوست الروعه ده

جقجق

[أبو العز الجنوبي]

العزيز اب جقادو
تحياتي لك كثيرا، وطولت ما عبرتنا ، لكن ظهرت انك عنصري وبتاع قبليات، يعني كان ما قلت دنقلاوي ما كان كتبت، مش كده؟؟؟
والله صحيح كلامك، كانوا حوامين بشكل رهيب، جدنا سعد كان تاجر ويمتلك كثير من المراكب، عشان كده الحوامة رقدت هبطرش.... ما تقول لي كمان الجاب لبب، وبنه، واوربي لجبل ام علي شنو؟؟؟ ما دي الحوامة... الحوامة الخلتني اتولد في الجنوب.....
تسلم يا عزيزي
مع ودي

[Garcia]

(طبعا يا قارسيا ممكن نعرف اهل بعض كان اتونسنا شوية)...

ابوالعز
اكيد دة لو ما طلعنا معرفة كمان , وعلى فكرة تجمع بيننا صفتين
اصولنا دناقلة ايضا , درست قانون بجامعة القاهرة / الفرع ..
دنقلا طبعا شفتها فى الخريطة , فقد هاجر اجدادى لامدرمان
منذ فترة طويلة ..