اللهم أرض عن الجيلي... و ...آلــه...
.
صديقي المتهم بالسختة القلبية، المعروف بين الناس بالجيلي أحمد، بعد عقد من المعرفة الإسفيرية و الصداقة السايبرية شممتُ عنقه في سلام فيه كرفة و قلدة يوم إفطار رمضان السودانياتي بالوافر...تبادلنا الأخبار و أرقام الهواتف معه و مع نصفه الأحلى..و لم يتركني الجيلي الجميل لإحباطات السودان حيث يمكن لوكيل عريف أن يقرر ماذا يفعل الناس في حياتهم.. هاتفني أمس الأول داعيآ شخصي لشاي المغرب قابلته البارح تحت البناية و ألفيته متسربلآ بالجلباب السوداني و الطاقية من أعلى ناصيته الخاطئة المسخوتة إلى أسفل قدمه التي تسعى بين الناس ببسط الود الشامل...دلفنا لبيته العامر بالوهاد و الإلفة...Nice Couple ...كابهى ما يكون التزاوج...و بعد الضيافة التقليدية من خبيز ناعم و مدغلب و حلاوة عرديب باذخةٍ لاذعةٍ طاعمة...جاء قدح الدعوة البديعMain Dish ..كأس أنيق جدآ حد الفندقــة..و به خليط/مزيج من ملذات التحلية..و كان خاتفآ لألوان عديدة تتراوح بين الأبيض الحليبي و البيج الكريمي الحنكوشي و البن الحبشي و ثمة topping قشدته صفراء فاقع لونها تسر الناظرين.. كان بائنآ من طريقة الجيلي في الأكل أنه متعوووود دااااايمآ...و بدا لي مثل التلميذ البايت في العام الدراسي يستهين بالمفاجآت الأكاديمية و لا يحفل بالشرح الذي تفننت فيه ست البيت..أقول لها إن التحلية بها Cheese Cake فتقول لا..لا..لا..يجتهد الجيلي هذه المرة و يقول جوز هند؟؟ فتقول لا..لا..لا..تعاودني الشلاقة فأقول فيها قشدة أكيد فتقول لا..لا..لا..و حين شعر المسخوت بهزيمة فريقنا قال لي: المهم فيها سكر و حليب..بس خلاث..و ضحكنا ضحك طفلين معآ..و أكلنا..تـُـقرأ (لهطنا).. جاء جارهم داخلآ علينا...قيل إن إسمه معمر القذافي..و كان يحمل كتابآ أخضرآ.. خاطبني بلهجة آمرة: غني لينا يا زول قلت : ما أنا بمطرب و بلا وعي مني إنسابت الكلمات..نانا يا نانا..نانا عاجبانا...و لدهشة الحضور تحولت بقية ساعات الزيارة لإحتفاء بالأغنية التي لم أترنم بها قبلآ أبدآ!! يسالني الجيلي عن لقاء الصادق و البشير فأردد ..نانا يا نانا..نانا عاجبانا...ثم تأتي وهاد، أكرم المضيفين منذ وفاة حاتم الطائي، تسألني عن سكر الشاي: كم ملعقة يا جنابو؟ فأترنم ..نانا يا نانا..نانا عاجبانا...و يبرر الجيلي (حالي) بأنه جذبة صوفية إثر أغنية جميلة لم تمهله طويلآ.. ..نانا يا نانا..نانا عاجبانا... كان القذافي مثقفآ و وناسآ...يجيد الحكي مثل أي شايقي ممسك بتلابيب اللغة...وسيم العبارة رشيق الحرف..لكنه لا يخلو من سخرية أهلنا فقال حين أعجبني إبريق الشاي و عبرت عن إعجابي بطريقة الفيس بوك Like Like Like قال إن الكباية تشبه القرع و إن حافتها لا تساعد على شرب الشاي... قال لي النسيم بكل رقة دعاش الطرفة و ندى الجبهة...الليل أليل ياخ إنت ما ح تغني؟؟ و انطلق الدرويش في داخلي يردد وردآ حفظه (قلبة و عدلة) ..نانا يا نانا..نانا عاجبانا... و حينما أزفت ساعة الصفر و لفظت الثلاثاء آخر ثوانيها شكرت المضيف العزيز و زوجته اللطيفة و القذافي و الأغنية..و قلت لنفسي لا أذكر أنني زرت أي شخص لثلاث ساعات متصلة... لكن كمان دة الجيلي و دي و هاد أغني ليكم؟؟ ..نانا يا نانا..نانا عاجبانا... . |
بسم الله الرحمن الرحيم
ياخى الله يعدلا عليك وين ما تقبل ، كتابة ترتب الزول وتعدل المزاج ،، يمين لمتكم دى أحسن لينا من إجتماع الشباب ديك ،، :D شكراً يا جنابو ، أهدينى لحظات ممتعة ،، الجيلى ووهاد ، والله مشتاقين ،، |
لا ادرى هل اشاركك الفرحة بطوافك بهذه الجنة
ام ابكى لانى لم اكن من بين اللاهطين ساكون عادلة ولو الى حين لك ولهم ولمن حولهم كل المحبة ات آ الطيب نسيتنى:confused::confused: ما علينا انسى فانهم كثر |
.
ياااا هلا و مرحبا بالسعادة أهلين سيد النور ياخ و الله يسعدني أنك مبتدر هذا التواصل الحميم أشكرك يا زول يا كيف كتابتي تستمد ألق حرفها من طلتك أغني ليك؟ . |
.
سارة..ياااااا أعزّ الناس حبايبك نحن فاتتك تحلية يا سارة عاوزة شاعر وصـّـاف الجيلي و وهاد ديل لمن يعزموك كلميني ع شان ألهط معاك أنساك كيف لو الكتاب...نسختك محجوزة بالأوامر...لكن لسه بالمطبعة لو شيء تاني لازم تقولي لي النعمني ما متابع... آخر عهدي بيك الحج و العمرة و الزي الأسود و قبله بيتكم العامر بالشعبية و ندى و سالي تاني لغتك الحميمة حيت تنتقي مفردة ممعنة في الدارج.. تقول جاية من ريفي طابت لوووول |
حاسدك عديييل يا جنابو:D
|
.
إبرا يا إبرا قلت لي وشــّـــو و لا قفا؟ حسد عديييييل من خشمك لأضاني؟ لا فهمت الكلام غلط لا نقل كلام لا غيرو طق طق؟؟.. و الله يا إبرا بيني و بينك هي جلسة ما بتتعوض و أحسدني يا زول .... عافي ليك أغني ليك؟ :D . |
اقتباس:
شفت الغنا العلي اصوله:D:p |
الكلام ده كان متين يا الطيب ؟ غايتو لو ايام العيد النتيجة والمحصلة اللخرانية بالنسبة لى بتكون فى هيئة الترابة دى فى خشمى لأنه أنا مشيت عيدت فى السودان السودان الحزنان وبرضو مليان حنان وتانى كان الله مد فى الأيام المجدبة دى ماش فى العيد الكبير، لشوفة الخلان والحبان وتضامنا مع الخرفان يمين بالله أنا الجيلى ده مبرك ليهو الفقرا كونه يصادف تكون انت وهو مع بعض فى بقعة جغرافية لا حواجز فيها على ظهر هذا الكوكب، دى غايتو الا الزول يختها فى لستة طلبات ليلة القدر القادمة رمضان الجاى متين ؟ المهم يا الطيب تاكل تستاهل والعاقبة ان شاء الله عندى أنا فى الملمات والمسرات الخ اللات كلها وارقدو عافية اجمعين يا سمحين |
سلامات أخ الطيب والحضور،
الجيلي زول من شده ما راقي لمن بطرب لي نينا سيمون ياخي، إنسان دغري ومتصالح مع نفسه و "صاحي" حاسدنك يا أخ الطيب على هذه العزومه والتحايا لهذا الرجل الجميل وحرمه. |
اقتباس:
خطوة عزيزة و يوم موعـــــــود....الخلاك تطرانا تعود و تسأل فينا..و تجي حارتنا...الحـظ جانا و غـشـا سـكـتـنـا جانا و جابك...لينا هديــــّـــة يا الهليت...فرحت قلوبنا... إحتفاء بزيارة الجميل أيما إحتفاء... . |
اقتباس:
يا حبيبي ظمئت روحي و حنت للقاء زي بتاع السوق الشعبي داك... الجيلي دة ..يستاهل يبركوا ليهو الفقرا...و قد ارهقني صعودا..بس لميت فيهو أولتمبارح بالليل في بيتو الجميل و معه وهاد الأجمل.. قلت لي (تاكل ...تستاهل)...كلام السيجة و المنقلة دة عاوز مذكرة تفسيرية لكثير من الأعضاء ..ياخ بالجد كان يوم بديع ...يوم يساهم في ترسيخ فكرة أن (الدنيا لا تزال بخير) ..و ممكن ملاقاة الإبتسام و الفرح و السماح.. في عيد الأضحى أنا مافي...و الجيلي مافي سنرجع لمهاجرنا..غير ضحايا و لا مفتونين نتمنى لك شواء طيبآ مباركآ فيه و يبقى بيناتنا المسافة ...و تنسيق اللقاءات الجاية قلت لي رمضان الجايي متين؟؟ لووووول ناس الحكومة قالوا الخريف فاجأنا إنت ليلة القدر بتجيك..و بتكوس ليك..لو نايم بتصحيك أدع لنا ربك يبين لنا ماهياتنا الغالبانا الليه يخليك و يعليك فوق الدايرك و المابيك . |
اقتباس:
مرحبتين بالعزيز عبدالله علي موسى إنت كدة لخصت الجيلي و البوســـــت إنسان دغري ومتصالح مع نفسه و "صاحي" هو كذلك... و مافي أحـســـن من ذلك و بالذات ما بين القوســـين ربنا يديهو الصحة و العافية أشكر مرورك و تفضلك بالتعليق تبلغ تحاياك للحبيب الجيلي فبيننا موعـــد شـيـشـــة حان قطافه..و إني لصاحبه . |
أى طيف زار بالأمس خيالى
|
.
أهلين جيلي القوم....الخاتي اللوم أغني ليك؟؟ . |
| الساعة الآن 09:56 PM. |
Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.