تألم انت في السودان...

[مرافي]

ان تكون سوداني لابد ان تتالم (وتنجلط)
حقيقة تملكتني الحيرة كيف يجابه الانسان كل هذا الكم من المعاناة
ما ان يقابلك احد وقبل السلام الشكوى من الغلاء الفاحش الحياة القاسية
والمعاناة في كل شيء الاكل الشرب التعليم
حكت محدثتي (زمان كان المسكين بياكل السخينة حسع ماقادر عليها اقل بصل بي خمسة الف الزيت قدر ظروفك الدكوة ما بتنهبش بس الله في)
كنت في زيارة خاطفة للسودان الاسبوع المنصرم وهالني بل (فقع مرارتي) كم المعاناة التي
يعيشها انسان بلادي اول يوم كانت هناك ازمة غاز!!!!0 الشوارع متكدسة بارتال البشر
الباحثين عن مقعد في حافلة أو بص...!!! الغلاء لايصدق !!لا يصدق
الوجوه كالحة تكسوها سحنات من معاناة وضيم وقلة حيلة...
هناك معادلة انهكتني ولم اجد لها تفسير كيف يوازي الانسان بين منصرفه ودخله بين احتياجاته الملحة وذاك الغلاء الطاحن..!!!
الناس اختصرت وجبة الغداء وصارت الوجبات فطور وعشاء كيف الغداء وكيلو اللحم في بلد درسونا ان من ثرواته ومصدر دخله الماشية؟؟!!!
الكيلو للعجالي 45 الف !!!!
والضان 60 الف !!!!! بالله دا كلام
ياخ والله حرام حرااام
وآخر بدعة ربط الجمرة الخبيثة بي فاتورة الموية
يعني لو قطعت كهربتك وفي جيبك مافي غير قريشات ماعندك طريقة ترجع كهربتك الا تدفع فاتورة الموية والقرار دا تضرر منه كثيرين كما تم تسريح جميع جباة فواتير الموية..!!!

[مرافي]

والله قضيت سبعة ايام تألمت ومنذ أن وطأت قدماي ارض بلادي ومن المطار!!!
وتلك الوجوه العابسة لك كان بينك وبينها تار
تخرج من مطارات الامارات تتبعك البسمات والامنيات بسفرية سعيدة تمشي اهلك يصروا ليك الوش ويعاملوك بمنتهى عدم الانسانية...
حزينة ليك ياوطن وحزينة ليك عزيزي المواطن
وحزني الاكثر لاطفال بلادي الذين تحرمهم احوال بلادي من ابسط شيء وهو كوب الحليب الذي اضحي ليس بمقدور الكثيرين توفيره لهم !!!!
تعرف ان اكثر الامراض الشائعة الان في السودان الجلطة والذبحة...!!!
لله دركم اهل بلادي...

[مرافي]

في الطريق من المطار والى المنزل الكثير من البنايات التي تطاولت
حين اصبح ذاك الليل ضحكت بيني ونفسي فلقد تطاول البنيان وتقاصر الانسان
لعمري تلك من المفارقات المبكية...

[مرافي]

كثرت الجلطات والذبحات من كثر ما يحمل القلب من المعاناة والالم
للتشخيص لابد من الصور المقطعية هل تعرف ان الصور المقطعية تبدأ من مليون
مليووون وحتى 500 الف والمرض لايصيب الا الكادحين المعدمين وتلك ايضاً من المفارقات المبكية المحزنة التي يشهدها ويتعايش معها مرضى بلادي
ولاصحاب الغسيل الكلوي قصص وقصص تدمي القلب
الانسان في بلادي غررريب في وادي الذئاب..!!!

[مرافي]

الى متى يا ساسة..؟؟؟؟
الى متى يموت الانسان فقراً ومرضا ؟؟؟؟
في المستشفيات قصص تراجيدية تفوق الافلام الهندية حبكة
كثر اللصوص وماعاد هناك امان..؟؟
تُرى لماذا كثر اللصوص...؟؟؟
هل عدم الامن أم الجوع والفاقه؟؟؟
تنوعت اساليب الغش والكذب والتحايل!!!
الكل يضع سماعة على اذنيه سألت لماذا؟؟؟
لأن هناك عصابات متخصصة في خطف الموبايلات قبل ان يرتد طرفك
موبايلك يروح في حق الله...
يا نجوى ابقي عشرة على موبايلك...!!!

[معتصم الطاهر]

مرافى
سلامة العمة ..

و حمد لله على سلامة الرجوع ..

( ما ضاق الوطن بس كبرت الزنزانة ) ..

[بله محمد الفاضل]

أهوال موجعة
وأحوال لن تستقم والظل أعوج
وإن شئنا الدقة فإنه لا يوجد ظل من أصلو


هيه يا مرافئ
...


سلامات للعمة وعوداً حميداً...

[رأفت ميلاد]

والله يا مرافى أنتى والمعاك كضابين جنس كضب .. شوفى كلام الرجال

المشاركة الأصلية كتبت بواسطة ود الخير

[/COLOR]
سلام يا دكتور حسن
حرمتنا الغربة من ان نستمتع بالازدهار
والتنمية الشهدها السودان بعد توقيع السلام
مع دولة الجنوب وتدفق البترول.... الآن وبعد
تباشير السلام ألفي الأفق وفي أخبار عن وصول
البترول بعد الاتفاق الأخير الي بورتسودان،
وهذه القصيدة أتمنى ان يرفع الله قدم كل من
فى نيته العودة مؤقتاً أو العودة النهائية، وأنا منهم
أتمنى ان يرفع الله القدم وان نستمتع مع أهلنا بالسودان
بالخير القادم، وان يجنبنا الله شر الفتن ما ظهر منها وما بطن.

[علاءالدين عبدالله الاحمر]

هو شنو الحاصل ياإخوانا البجي البلد كلو يكورك زينا يعني ماتجو ولا شنو ، أمس يأمدام عمنا بابكر مخير بشتكي من تعب البلد دي لدرجة أنو ضحكنا في أنو لما وصل نزل مع قاسم بدري قال أنا بس بعاين للبعمل فيه قاسم فترتة انتو مستحملين الحال ده كيف

[زول الله]

سلامات للعمة يامرافي وماتشوف شر انشاءالله
الفقد عظيم ياخوانا
الفقد بلد بي حالو
والناس الفي النص الله يكون في عونهم
------
------
جايين ياعلاء
نكورك ونجوط وننعل سلسفيل اي حاجة لكن برضو ياها بلدنا ونحن اسيادا
جايين تب لو الله مد في العمر




اقول قولي هذا واستغفر الله لي..............

[مرافي]

المشاركة الأصلية كتبت بواسطة معتصم الطاهر

مرافى
سلامة العمة ..

و حمد لله على سلامة الرجوع ..

( ما ضاق الوطن بس كبرت الزنزانة ) ..

سلام عليك يا ايها الباش
ربنا يسلمك من كل شر
والله يا معتصم ماضاق الوطن ولكن ضاقت الجيوب وكبرت المعاناة ..
مودتي

[مرافي]

المشاركة الأصلية كتبت بواسطة بله محمد الفاضل

أهوال موجعة
وأحوال لن تستقم والظل أعوج
وإن شئنا الدقة فإنه لا يوجد ظل من أصلو


هيه يا مرافئ
...


سلامات للعمة وعوداً حميداً...

تسلم يا بلة
والله الظل شدة ما اعوج لمن لافي صينية
الانسان يا بلة ارهق ويعاني ما يعاني فقط من اجل لقمة العيش
الكسرة والملاح بس
دعك من الكماليات
والفاكهة والسلطة تدخل في بند من استطاع اليها سبيلا..
هيييه يابلة الوجع كبير في قلب الوطن...
مودتي

[مرافي]

المشاركة الأصلية كتبت بواسطة رأفت ميلاد

والله يا مرافى أنتى والمعاك كضابين جنس كضب .. شوفى كلام الرجال

سلام يا رأفت
والله ود الخير متفائل وربنا يتم ليهو تفاؤلو
وكلنا لينا امل في الاوطان سمح ولكن...
يصدمنا الواقع حين نحط على ارضه الميمونة
فالواقع مرير مرير
وود الخير ربنا يوفقو فيما نوى ,,,,
بس اهمس ليهو ما تحرق كل سفن الآياب فلربما تحتاجها يوماً
كأني بود الخير يقول اصلكم ااابتطمنو...

مودتي ليك رأفت ولود الخير

[مرافي]

المشاركة الأصلية كتبت بواسطة علاءالدين عبدالله الاحمر

هو شنو الحاصل ياإخوانا البجي البلد كلو يكورك زينا يعني ماتجو ولا شنو ، أمس يأمدام عمنا بابكر مخير بشتكي من تعب البلد دي لدرجة أنو ضحكنا في أنو لما وصل نزل مع قاسم بدري قال أنا بس بعاين للبعمل فيه قاسم فترتة انتو مستحملين الحال ده كيف

تحياتي علاء
والله انا زاتي كنت بسأل اختي انتو عايشين كيف..؟؟؟
فالمعادلة ابداً ما بتظبط بين الدخل والمنصرف
بس نقول الناس ماشه بالبركة...
والله يا علاء لو الواحد عاش في احدى دول الخليج يشوف كيف انو الناس ما بتعاني ولابتتعب
ياخ اي شيء يجيبو ليك البقال لغاية عندك لامليمة لا تعريفة
ناس البلد دي شدة ما راحات شوف عيني الصيدلية يكونوا رافعين القزاز ويجيء الصيدلي لي عندهم ويشيل الروشته ويجيب الدواء والزبون من عربيتو ما ينزل..!!!وهكذا في كل مكان بيع...دار امان ما بعدو امان
تقولي شنو وتقولي منو...
اللهم ارفع البلاء والغلاء عن بلادنا وجنبها الفتن
واجعلنا مواطنين نتمتع بحقوقنا كاااملة بلا تعب ولا معاناة
قول آمين
الذ حاجة وكنا متجهين للمطار وقفنا في بقالة نشتري موية
توقعت يجيء البائع جري للعربية ويجيب العايزنو قت لاخوي يعني بتاع البقالة
مابجيء الا تنزل قام رمقني باستغراب ...وتعجب !!!!!
والله انتي طبعك خرب خلااااص...

[مرافي]

المشاركة الأصلية كتبت بواسطة زول الله

سلامات للعمة يامرافي وماتشوف شر انشاءالله
الفقد عظيم ياخوانا
الفقد بلد بي حالو
والناس الفي النص الله يكون في عونهم
------
------
جايين ياعلاء
نكورك ونجوط وننعل سلسفيل اي حاجة لكن برضو ياها بلدنا ونحن اسيادا
جايين تب لو الله مد في العمر




اقول قولي هذا واستغفر الله لي..............

الله يسلمك يا زول الله
ووالله زي ما قت الفقد كبييير
البلد بلدنا لكن ما نحنا اسيادا انحنا اغراب فيها
ياخ انحنا الاحترام البنلقاهو في دول الاغتراب في بلدنا ما بنلقاهو
وشئون المغتربين تشهد...
ياخ ناس مادايرة تشتغل لييه ما يكون الشغل نظام شفتات
وعارفين الجاي في اجازة دا وقتو محدد والله عندهم موظفات كدا شيء عجيب
ورايت امامي كم حالة مستعجلة ورفضن الشغل بحجة الدوام زمنو انتهى
انتهرت احدى المتعاملين انت شايفني حسع شغالة وبيدها كأنه طفل امشي انتظر هناك
فالموظفة المصونه ماكانت في المكتب كانت بره والله غلطان هو ماينتظر مؤدب
ويستناها تكمل الونسة والحوامه بره المكتب عشان بعدين تقوليهو المواعيد انتهت...
ياخ والله المغتربين دي فيها جنس اذلال لبني الغربة لاحُكيت ولا قيلت
برضو تقولي بلدنا وما عارف شنو...!!!!