لماذا لم يضحك السمك؟! او مدخل نحو حقيقة الانسان كيس شايلو الهواء

[أسعد]

يضحكني جدا تلك العقيدة البشرية بامتلاكهم حرية الارادة، ورسمهم لبورتريه عن المدينة الفاضلة في خيالهم المريض ومن ثم سعيهم الحثيث لتحقيق تلك الاحلام الموهمة …
متناسين انهم عبارة عن كائنات تطورية تتطور بحسب البيئة الموفور لها…
هذه الخاطرة خطرت ببالي وانا اطالع صفحات من كتاب (نظام التفاهة) وهو ينتقد تردي الطبائع البشرية بسبب استيلاء اشباه المثقفين على وظائف تعليمية…

المهم طبعا عموما انا الحنك ده بعمل لي "كورة شراب هنا" على قول ربيع طه…

علشان كدة ح اعمل البوست ده ورجغة علشان اثبت بيهو انو الانسان كائن تطوري سااااي
متخذا من تحليل ماهية الضحك وانها سلوك تطوري اكتسبه الانسان وليست ميزة اتميز بيها على الحيوانات

[أسعد]

زيتونة البوست ده انه الضحك هو سلوك انفعالي تطوري مقابل للسلوك الانفعالي بتاع الخوف والغضب…
ففي الليمبيك سيستيم بتاع الحيوانات كان هو جهاز في عقل الحيوانات بغرض غريزة البقاء، ففي حالة وجود اي مؤشرات عن مهددات ح يقوم الجهاز الحوفي يفرز مواد كيميائية يخلي الحيوان يتخذ حالة الطواري علشان يحمي نفسه (القتال او الهروب)

لاحقا لما الانسان الاول حصلت له طفرة جينية وتطور دماغيا وتكونت عنده القشرة الدماغية وساعتها امتلك قدرة التجريد والتخيل …
ولكن القدرة على التجريد والتخيل ح تعمل مشاكل مع الليمبيك سيستيم، لانو كل مرة ح تتخيل حاجة معناه الليمبيك سيستيم ح يقعد يفرز نفس المواد الكيميائية بتاعة الخوف والشغلة دي ح تمرضك وتقتلك …
هنا الدماغ وبوازع من غريزة البقاء طور حاجة جديدة وهي في حالة ان الليمبيك سيستيم استلم اشارات من الدماغ عن صور حسية متخيلة، هنا ما ح يفرز هرمون الكورتيزول، بل ابتكر حاجة جديدة وهي هورمون السعادة (الدوبامين)….
وزي ما كان الغضب والخوف والتوتر هي انفعالات بتحصل لما الدماغ يفرز الكورتيزول…
لاحقا الدماغ ابتكر الضحك والفرح والمتعة كانفعالات لهرمون الدوبامين…

علشان كدة مثلا بنلقى النكتة لو كان فيها اهانة شخصية ح يكون رد الفعل غضب وخوف وتوتر

بينما النكتة اللي ما فيها اهانة شخصية يكون رد فعل متعة وضحك

لان الاولى تعتبر تهديد والثانية مجرد خيالات لمهددات غير واقعية

[أسعد]

هل لاحظت ان جيل الالفية الثانية بضحك ضحك هيستيري؟!
لاحظ اي شاب في العشرينات او ما دون ذلك ح تلقاهم بضحكوا ضحك هيستيري
بينما الجيل اللي يسبقهم يكون اقل حدة في مستوى ضحكه
وجيل الثمانينات اعلى حدة في هيستيرية الضحك من جيل السبعينات
وهكذا من علاقة طردية، كلما تقادم الزمان كلما ازداد حدة الضحك الهيستيري

لحدي ما توصل الى زمن انسان الغاب اللي ما كان بضحك نهائيًا
والسبب ببساطة هو ادمان الدوبامين
فكل جيل يفرز دوبامين ح يضحك، ح يجي الجيل الذي يليه ح يكون مستوى ضحكته اعلى لان فرزه للدوبامين اعلى…

[أسعد]

ولعل ذلك يقودنا نحو الحديث الشريف (لا تكثروا الضحك، فان كثرة الضحك تميت القلب)
فالناظر للحديث ح يشوف انه حديث متطرف وان الضحك نعمة من نعم الحياة
ولكن في حقيقة الامر ان هذا الحديث من الوصايا العظيمة التي تجعل الانسان يحافظ على وعيه ويعيش حياة اصيلة كما وصفها هايدغر…

لان الضحك هو افراز لهرمون الدوبامين، وهذا الفعل في حقيقة الامر هو سلوك ادماني يميت الوعي كما وصفه النبي في قوله (يميت القلب)
اذ ان القلب مقصود به درجة الوعي والادراك

[أسعد]

ما هي الالية التي تجعل الانسان يقرقر
الانسان بضحك لما يشوف او يتخيل حاجة مختلفة عن المعتاد ولكن هذا الشيء المختلف يجب ان لا يكون مهددا لغريزة البقاء…
لان اي شيء مختلف عن المعتاد لو فيهو تهديد ساعتها العقل سيفرز هرمون التوتر كما اسلفنا سابقا…

مثال:
لو قلت لك (فلانة ام قرون)
الان اللي بحصل عندك انو عقلك ح يبدا يجسد الوصف اعلاه ويتخيل فلانة هذي وعندها قرون في رأسها…
لو كان هذا الوصف واقعا، ساعتها انت ح تخاف لانو مافي بشر طبيعي في راسو قرون…
لكن لو الوصف كان تجريدي كتشبيه لشناة فلانة او كجارها وقوة رأسها…
ساعتها عقلك ح يفرز الدوبامين وح تموت ضحك من الوصف ده…

كمان في اشتراطات تانية ح تحدد رد فعلك للوصف اعلاه، مثلا لو كانت فلانة دي زميلة منتدى وبينك وبينها صراع اسفيري ح يصيبك حالة هيستيرية من الضحك…
لكن لو كانت امك او اختك او زوجتك ساعتها عفاريت الدنيا ح تتنطط في وشك لانو ساعتها تعتبر تهديد داخل منطقة الامان بتاعتك…

[أسعد]

مثال تاني
انك تكون ماشي كدة وفجأة واحد قدامك يقع
الوقعة دي تعتبر مختلفة عن المعتاد، حيث ان الطبيعي الانسان ما ينزلق ويقع

الان ردود الفعل عندك ح تعتمد بناء على طبيعة السيناريو
فلو اللي وقع قدامك صغير في السن ح تضحك، لكن لو كبير في السن ما ح تضحك وبل ح تجري تساعده…
عدم ضحكك وبل سعيك نحو مساعدة الكبير الناس بتستوهمها بحتة الاخلاق واحترام الكبير والكلام ده وهم ساااي…
الانسان لما ما بضحك على الكبير وبل بحاول مساعدته هي مجرد عملية (تعاطف)
والتعاطف في جوهره هو انك تتخيل نفسك مكانه. وبالتالي انت بتحاول تساعد نفسك المتمثلة في شخص الكبير اللي ممكن يوما ما تكون في مكانه…

لكن ح تضحك على الصغير، لانك لا يمكن انك تكون في مكانه، لانك تجاوزت المرحلة دي عمريا… هنا ممكن تساعده لانك ممكن تتعاطف معاه في حتة انو ممكن ولدك يكون في مكانه….
لكن في نفس الوقت ح تضحك عليهو لانو موقف الصغير لا يعتبر مهدد لك شخصيا على عكس حال الكبير…
وبالتالي العقل ح يفرز هرمون التوتر عند سقوط الرجل الكبير ويفرز هرمون السعادة عند سقوط الصغير…

كمثال توضيحي اكثر
لو امك/ابوك/اخوك الكبير/اختك الكبيرة
واحد منهم وقع ما ح تضحك بل ح تزعل وتخاف لانو الجماعة ديل مصدر امانك

لكن لو اخوك الاصغر منك وقع
ح تضحك عليهو لانو لا يعتبر مصدر امان شخصي لك، لانك انت مصدر امانه

وكدة يعني

[أسعد]

الان نجي نشوف النكتة ح نلقاها بتعتمد على عنصر المفاجاة
يعني بتكون في قصة قصيرة ولكن القفلة بتاعتها بتكون مختلفة عن المتوقع

كمثال ناخد نكتة الفكي والاسود القديمة
قال ليك في تلاتة اسود كانوا مجهجهين الحلة جهجهة شديدة
كل يوم اسد ناطي في الحلة وخطف منهم غنماية
اها قاموا جابوا فكي كارب علشان يفكهم من الاسود دي
في اليوم الاول الفكي قابل الاسد الاول وقرأ عليهو قام الاسد داخ والفكي قام قتلو، تاني يوم الفكي قابل الاسد التاني وبقى الفكي يقرا فيهو لمن الاسد داخ وقتلو
اها تالت يوم الفكي قابل الاسد التالت وعلى قدر ما الفكي يقرأ في الاسد، الاسد يقرب على الفكي اكتر، المهم الفكي يمكن قرأ الكرسي مية مرة والاسد كل مرة بقرب على الفكي لمن الاسد قتل الفكي وأكلو

في اللحظة دي كان في قردين براقبوا الحاصل ده، قام القرد الاول قال للتاني (ما قلت ليك الاطرش ده بضيعو)

الان ال setup بتاعة القصة عن صراع البشر ضد الاسود
وكانت القصة عادية وطبيعية جدا علشان كدة ما كانت مضحكة
لكن ال Punch line بتاع القرد وهو يوضح ان الاسد اطرش
عملت تويست كبير لمسار القصة فكانت المفاجاة المضحكة...

[أسعد]

الان اللي بحصل في عقل الانسان انو بعمل تجسيد حسي للنكتة دي
من الفص الامامي للجداري ومن ثم الصدغي بيعمل تجسيد للحلة والاسود والفكي
ويتعاطف مع الفكي في صراعه ضد الاسود وكيف الاسد الاخير اكلو، وهنا العقل ح يكون في وضع مأساوي اذ كيف ان الفكي قدر يحوط اسدين وعجز عن الثالث
فيجيهو البنش لاين بتاع القرد ويعمل له تويسنينغ قوي
ليتفاجأ بان الاسد كان اطرش، وهنا العقل ح يحل حالة غموض عدم سريان التحويطة من الفكي…
وهنا العقل ح ينبسط لانو لقى الحل لسبب موت الفكي، والانبساطة دي ح يقوم العقل يفرز هرمون السعادة ويضحك الزول بدون ما يضحك السمك…

[أسعد]

الان اتخيل اني قلت ليك النكتة دي حقيقية وحصلت امس في حلتكم….
هنا ما ح تضحك، لانو عقلك ح يشوف القصة دي انها مهدد ليك لانو في اسد بهدد حلتكم….
وساعتها العقل ح يفرز هرمون التوتر لانو القصة في تهديد مباشر ليك….

[أسعد]

مثال عن تعاطي العقل مع المواقف المضحكة على حسب وضعها اذا كان فيها تهديد مباشر ما ح تكون مضحكة
بتذكر قبل سنوات كان الممثل الكويتي حسن البلام عمل اسكتش سوداني، اي نعم البلام كتر المحلبية شوية عن كسلنا في رقاد العناقريب، لكن عموما الكوميديا بتعتمد على Overrated ولو المحلبية ما كترت ما ح تكون كوميديا
المهم الاسكتش داك فيهو هاج وازبد التايملاين السوداني ضد حسن البلام ووصف بالعنصري وبل ذهب البعض في سب الكوايتة وعيييييك من قصص

في نفس الوقت كان حسن البلام بتناول الشخصية المصرية باسلوب ساخر، والتايملاين المصري ما جايب خبر للبلام….
ده اذا ما كان بعض المصاروة ضحك من تجسيد البلام لهم….

الان السوال لماذا الشخصية السودانية تتحسس مسدسها عند اي عمل كوميدي يتناولها؟!
الاجابة لاننا لسة فينا طبع البداوة ولم نتمردغ يوما بنعيم المدنية اللي تخلي عقلنا يتطور ويتقبل النكتة الساخرة منه ولا يعتبرها مهدد لكينونته….

يعني مثلا لو نشوف الخواجات ح نلقى الامريكان يسخروا من الطليان، والبريطانيين يسخروا من الفرنسيين والجميع يتقبل السخرية بروح مرحة
لماذا؟!
لانو الرجل الابيض تجاوز مرحلة السورفايفل بطبيعة حياته المدنية حيث توفر له المأمن والمأكل والمشرب واصبحت احتياجاته سايكولوجية اكثر من انها فسيولوجية

[أسعد]

الان لو جينا نتأمل تاريخ الضحك لدى الشخصية السودانية
ح نلقى التاريخ ده بدأ مع شخصية ود نفاش
وما قبل ذلك كانت شخصية متجهمة تعتبر الضحك قلة أدب
وعموما ممكن نلاحظ انه تاريخ الضحك عالميا بدأ في مطلع القرن العشرين
مع الكوميديا الحركية بتاعة شارلي شابلن….

المهم نرجع للشخصية السودانية وزي ما قلنا ان تاريخ الضحك بذأ مع شخصية ود نفاش، وممكن نعتبر هزيمة كريري كانت كسرة نفس للشخصية السودانية، وبالتالي كان لابد من دخول عالم السخرية لكي تخرج من مأساتها دي…

فكانت كوميديا الموقف بتاعة ود نفاش
من المواقف المضحكة قال ليك ود نفاش كان بزور احد اصدقائه المرضى
اها صديقه المريض ده كان بشكي لود نفاش عن ازدياد دقات قلبه
فقام رد ود نفاش انو كلنا قلبنا ده دقاتو زايدة خصوصا لو شاف مرة سمحة

المهم ظلت الشخصية السودانية غارقة في كوميديا الموقف
حتى عقد السبعينات فانفتحت عليها نكات القصيرة بتاعة شكوكو وحمادة سلطان وغيرهم….
فظلت طوال عهد السبعينات والثمانينات والتسعينات متورطة في كاسيتات النكت المصرية….
في مطلع الالفية الثانية تنفتح علينا ماسورة الفرق الكوميدية تيراب وناس محمد موسى وود الجاك وغيرهم…
ومع دخول عصر السوشيال ميديا ينتهي بها الحال حاليا مع كوميديا (الميم)
واعتقد بعد عدة سنوات ح ينتهي بها الحال مع كوميديا الايموجي او الاكواد البرمجية….
فالان لم تعد النكتة كمادة مثيرة للضحك عند الشباب
فلو حكيت نكتة ح تعتبر زول بايخ ودمك تقيل
مهما كانت النكتة مضحكة ح تعتبر بايخة….

علشان كدة لو عملت بحث عن نكتة سودانية في تويتر
ح تلقى اخر نكتة اتحكت هناك كانت قبل تلاتة او اربعة سنوات


والحنك ده تقريبا حاصل غلوبالي كدة

وبالتامل في تاريخ الضحك بشريا، ح نلقاهو يتميز بالتطور
حيث تتغير انواع الماتيريال الكوميدية الضاحكة بحسب تأثر العقل البشري بالبيئة المحيطة بيهو

[جيجي]

سلام ياشيخنا
😎

[أسعد]

المشاركة الأصلية كتبت بواسطة جيجي

سلام ياشيخنا
😎

مرحب مرحب يا هلال
أهلا أهلا كيف الحال؟
قد غبت وإليك اشتقنا
وانتهى بعدك صار وصال
نعطي صبرا نأخذ أجرا
والله يرانا ويسمعنا
والله يرانا ويسمعنا
والله يرانا ويسمعنا