(إن تحمل عليه يلهث أو تتركه يلهث)

[الفاتح]

وَلَوْ شِئْنَا لَرَفَعْنَاهُ بِهَا وَلَكِنَّهُ أَخْلَدَ إِلَى الْأَرْضِ وَاتَّبَعَ هَوَاهُ فَمَثَلُهُ كَمَثَلِ الْكَلْبِ إِنْ تَحْمِلْ عَلَيْهِ يَلْهَثْ أَوْ تَتْرُكْهُ يَلْهَثْ ذَلِكَ مَثَلُ الْقَوْمِ الَّذِينَ كَذَّبُوا بِآياتِنَا فَاقْصُصِ الْقَصَصَ لَعَلَّهُمْ يَتَفَكَّرُونَ)
الأعراف 176



البوست ده لتشريح حالة اللهاث في كتابات ماجد تاج ، وتوظيف الكلب في الآية الكريمه ما لإغتيال شخصيتو العلى العليها مهزوزة بل لتبيان إنو الكلب لو قمت بطردو أو ما قمت بطردو ما حيتوقف لهاثو ، ولتبيان كيفية تصاعد وتيرة لهاثو لمن يكون دائر حول نفسو محاولاً إنو يحصًل ضنبو (ذاتو) المشوهه ، وذاتو الكايس ليها في السايبر بقصد إنو تهندمو وتعيد ليهو الثقة شويه. تناول البوست ده حيكون من زاوية نفسية تعنى بالهدر والقهر
أي مداخلة نقدية تجد مني القبول والإحترام ، أي مداخلة خارج الإطار ده ما حأعيرها أي إهتمام.. هذا مع الإحترام

[الفاتح]

الإنسان إبن بيئته



البيئة الأوجدت ماجد تاج هي البيئة البينشأ فيها التطرف والإلغاء والهدر ، ودي ما بيئة إستثنائية بالمناسبه ، بل بتستشري في كل الدول الناميه اللي بتنعدم فيها كل وسائل الديمقراطية ، وبتتيح للفرد إنو يعبًر عن ذاتو ويفجًر طاقاتو.. فلمن مديرك في الشغل يهرشك ، إنت بتهرش مرتك ، وهي بتهرش أطفالك ، فأطفالك بالتالي بيحملوا نواة القهر وبالتالي حتنعدم أي فرصة بتاعة إنتاج تنهض بمجتمعهم بل ويتعاظم القهر ده ويصل لمرحلة الهدر .


والهدر هو أوسع مدى من القهر بيتخذ أشكال كتيره من بينها إنو بيتخذ طابع تحويل الإنسان إلى أداه لخدمة أغراض الإستبداد ، بيضحى بيهو بإعتبارو الوقود البيغذى إشتعالها وهو الأداة البتخدم أغراض المستبد ، زي ما هو حاصل حاليا في تحالفو مع عسوم وود الخير الكادر الأمني للمستبد..


ولا يمكن التعرض للقهر الإتعرض ليهو ماجد إلا بعد هدر قيمتو وإستباحة كيانو في الإخضاع والإتباع.. فالمؤسسة الجايي منها بتعتم في الأساس على إلغاء البني آدم ، وأول ما يجب معرفتو إنك (كُهنه) ما عليك إلا تنفذ الأوامر للخلف در ، ولليمين در ، وكما كت ، فالحاجه دي بتترسخ جواهو وتخليهو يعيد إنتاج الهدر ذاتو من خلال آليات الدفاع البتتمثل في التماهي بسلوك المتسلط.. بمعنى زي ما كان المتسلط بيطلًع عيني ، لازم أحاكيهو في سلوكو وأحكامو.


وبكده بيكون الوجود ما قابل للإحتمال والمواجهه وبتطلع كل آليات الدفاع السلبية البتكرًس للهدر والقهر وبتعيد إنتاجها ، ويلف ويدور ماجد تاج في حلقة مفرغه يهرب من هدرو وقهرو بوسائل دفاعية سلبية.

[الفاتح]

هدر المرأه في كتابات ماجد تاج


المرأه أكتر شريحة بتتعرض للهدر ، سواء على المستوى الكياني أو على مستوى الطاقات والوعي ، فعلى مستوى هدر كيان المرأه في كتابات ماجد تاج بنلقاهو بيختزل وجودها وبيتعامل معاها كأداه من أدوات الإنجاب (1) وبيهدر كيانها من خلال تحويلها لإسطورة الضعف والعار ، وهو في النهاية بيستخدمها كموضوع لإسقاط ضعفو وهدرو عليها عشان يكتسب شوية توازن وقيمة تعويضية من خلال الإسقاط ده ، تربًت على كتف خاطرو شويه.


إتمثل توظيف المرأه كموضوع لإسقاط ضعفو وهدرو عليها ، على المرأه المصادمة إللي قدرت تفرض وجودها في الساحة السياسية والإجتماعية في بوست نساء الحزب الشيوعي (2) ، إللي أدار دفة البوست عشان يواري عقدتو تجاه المرأه.
إختزل ماجد تاج كيان المرأه من خلال تصويرها كزوله غاويه/غانية (3) ويهدر كينونتها الإنسانية ويحد من عطاؤها وحقها في التساؤل والكتابة أياً كان تساؤلها ..بل بلغ بيهو الهدر إنو يفصًل فساتين(4) تتماشى مع خصر تفكيرو الضيق ،
يحدد فيها الخطوات المفروض تمشيها هل تمشي الهوينا كما يمشي الوجي الوحل ، وللا تمشي وتتدبًُ وهي بتتلمس طريقها في العالم الذكوري الملغًم بلاءات كتيره.


حيظل ماجد تاج يلهث وراء حياكة فساتين تحد من خطوات المرأه ، وحتظل المرأه تنشب بأضافرينا في حائط مبكاهو في إنو ما بتكترث ليهو لأنو هو حيواصل لهاثو في الهدر متى ما أتيحت ليهو الظروف.. وده عنف متفجًر نقيض تماماً لكل طاقات البناء وهو تدمير يشكًل إنتقام نزوة الوجود على الحاجه الحلًت عليها من هدر وموات كياني.
------------------------

المراجع :
1/ أدوات لازمة ومهمة في شهر العسل
http://sudanyat.org/vb/showthread.php?t=25077
2/ نساء الحزب الشيوعي
http://sudanyat.org/vb/showthread.php?t=27170
3/ الجنس من منظور أنثوي
http://sudanyat.info/vb/showthread.php?p=486787
4/ فساتين
http://sudanyat.org/vb/showthread.php?t=25187

[الفاتح]

روح القطيع والتعامل مع الخارج


اللهاث وراء تصنيف إنو ده كويس ومطقًم مع أفكاري ووضعي الوجودي ، والزول البرًه مراح القطيع بتاعنا ده زول غيًاظ بيعمل على إنو العلاقة بين الداخل والخارج تكون مختلًه لأنو مافي تنافس وصراع خلاًق.. فكل قطيع بيشوف في التاني إنو بيمثُل ليهو تهديد لكيانو وعقبة وجودية لابد من إزاحتها.. لذلك بتنشأ التحالفات بقصد الحفاظ على كينونتها ..


فاللافت للنظر إنو منتدى الحوار كمثال قل فيهو الحوار لعدة أشهر وإنشغل الناس بتقسيم معسكر سودانيات لمعسكر يميني ويساري ، علماً بإنو لايزال المتسلًط موجود ، وبيستمد وجودو من شاكلة صراعات جانبية .. وفي نفس الوكت نشاط العقل الإنساني ما بينقطع في الهدم والبناء.. هدم القديم وبناء الجديد على أطلال الأفكار القديمة..
شاكلة اللهاث وراء قطيع يعزز من (أناي ) ويوفًر لي الحماية ، ويخليني أقدًم تنازلات عن أفكاري ومعتقداتي ، نظراً لإنو ال (هم) (1) السايبريين ديل أعادو لي الثقة في ذاتي المهدورة ، بيعمل على نقص المناعة الوطنية ..نعم.. تقل المناعه الوطنية زي الترتيب ، وتبقى( ذاتك) عرضة لكل أمراض السلطة من ( إقصاء وإلغاء وهدر)..


بيتخذ الهدر في روح القطيع عدة أشكال ، واحد من الأشكال ثقافة الولاء ودي حاجه بديهية طالما إنها قايمة على التعصب.. وبيتخذ الهدر في روح القطيع التبعية وأخلاق الطاعه دي القبول المشروط ، بمعنى إذا وافقت إنك تكون في القطيع ده لازم ترضخ للقطيع ، لف يمين ، لف يمين لأنك بتكون معرًض للنبذ والإقصاء.. فبينشأ هنا الرضوخ ، تعاين لسجًانك (2) بنظرة مشوبه بالخيبه ، وبالتالي يكون القبول المشروط المدخل الأساسي للإضطراب الذاتي تلاحقو سلوكيات مضطربه تتمثل في القلق، الإحباط ، الإكتئاب، ، الإنهزامية ، العدوانية ، السلوكيات التدميرية للذات وللآخرين وبالتالي هدر الذات وهدر الآخرين.

--------------------------
(1) المقصود ب ال (هُم ) : العلاقة السايبرية النشأت بين ماجد تاج المفصول من الخدمة ، ومفصول من منتدى تاني وعسوم ود الخير البيمثلو السلطة/ المستبد
() المقصود ود الخير ، بإعتبارو يمثل السلطة ، نفس السلطة الفصلت ماجد تاج من الخدمة

[عادل عسوم]

تنويه للقراء من خارج سودانيات:
السيد شليل -باللغة والسياق والمفردات طي هذا المفترع- هو المشرف المسئول عن منتديات (نوافذ) في سودانيات...
ونوافذ هذه بها كل ما يرفد عصب الثقافة والابداع من منتديات كمنتدى القصة والكلمة والشعر وغير ذلك كثير...
اي باختصار (شليل) هو المشرف على الثقافة والابداع في سودانيات
تأمّل (الحقوق محفوظة لاصحابها)

[ماجد تاج]

المشاركة الأصلية كتبت بواسطة شليل

هدر المرأه في كتابات ماجد تاج

المراجع :
1/ أدوات لازمة ومهمة في شهر العسل

http://sudanyat.org/vb/showthread.php?t=25077

ـ



مرحب يا شليل وكيف أحوالك ..

عليك الله البوست دا تحديداً طلعوا من حساباتك باخ ..

دا كان محاولة لإعادة انتاج بوست مشابه كتبته في منتدى سودانت * إهداء لصديق كان مقبل على زواج

دا رابطه :

http://www.sudanforum.net/showthread.php?t=158894

اسمو ( نصائح ذهبية .. للحصول على ليلة دخلة وردية .. للعريس أبا ذر
)

هناك البوست كان دموا خفيف جداً ومضحك وفيه ونسات جميلة جداً حول موضوع العرس وتفاصيله

يمكن لأنو الناس هناك مختلفين شوية عن الموجودين

ويمكن لأنو الالفة بينهم كبيرة ، لذلك البوست نجح نجاح مطلق هناك .. لكن هنا ما لقى رواج

اتداخل فيه بعض الاخوان بطريقة واضح أنهم ما فهموه أو ما انتظروا يفهمو لذلك خليته



ــــــــــــــــــــــــــــ


* هناك بكتب بإسم ود عطا الله بالمناسبة

ممكن برضو في إطار حملتك الترويجية دي تراجع بوستاتي هناك

يمكن تساعدك في التحليل دا ..

تحياتي .. وشكراً على الوقت الاستنزفتوا في قراية كتاباتي يا حبيب



ـ

[الفاتح]

مقارنة بين سايكلوجية الكلاب وسايكولوجية ماجد تاج


الكائنات الحية محكومة في سلوكها ونمط حياتها بالمحيط الحواليها وببني جلدتها ، وبقانونها الوراثي البيخليها ثابته في تصرفاتها وردود فعلها وأشكال علاقاتها.. فالعدوانية عند الكلب مثلاً ما بتتعدى الصراع على الأكل ، التزاوج ، حماية جريواتها.. وخارج المحاذير دي ما بتمارس عدوانيتها إلا في إطار ضيق جداً..


لكن ماجد تاج ككائن (إسفيري) حي عدوانيتو بتتجاوز عدوانية الكلاب ، بيتفنن في إقصاء محاورو ، لمجرد إنو الآخر ما بيتفق معاهو في طرحو ، السلك الشايك المسوًر بيهو قلاعو النفسية مردًو عدم ثقتو في ال ( أنا) بتاعتو وفي ال ( هو ) (1)
إللي كان ليها أكبر الأثر في إنو تخليهو يتغرًب عن روحو.. وضحت عدم ثقتو في روحو بفتحو بوستين بيحملو نعش تغريبو عن ذاتو ( أنا جاسوس ) (2) ( أنا بقيت مشهور ) (3)..
المطوحة بتاعة ال ( أنا) الإتطوطحتها ذات ماجد تاج في الأسافير بين كونو مشهور ، وبين كونو جاسوس ، غرًبتو أكتر من ( أناهو) المحتاجه لترتيب ، وخلتو يتمرًد أكتر على ال(هم).. واللاواعي بتاع غربتو النفسية طفحت بشكل يدعو للرثاء في بوست هاجم فيهو أخوانو/ أخواتو في الإسفير المجاني ده ببوست ( مغتربي السعودية ، وعلاقات الأسافير.. قبح الوحده والغربه )..
إنت يا ماجد تاج ساكن في ضاحية ريفي الجاموسي ، ومتوازن! ما إنت هسي مغترب وبتخلق وعلاقاتك ما بتخرج من الأسافير ، بالإضافة لكونك متغرًب من ذاتك.. التناقض ده بيكشف عن الجانب ال psychotic الأكتر قتامة فيك.. وضعيتك دي بيقولو عليها علماء النفس وضعية سادومازوشيه.. فالسادي هو البيتلذذ بإنو يعذب ال(هو/هم) والمازوشي هو البيتلذذ بتعذيب (ذاتو)..

ماجد تاج بيعيش قلقو الوجودي في إنو يمظهر ذاتو الملانه بثقوب بمظهر الغلادييتر لكن نسى في غمرة نشوتو السايبرية دي إنو الماسكو في إيدو سيف عشر.. بينكسر بمجرد ما تعمل ساين آوت.. عشان ترثي روحك وتجلدها ، وتعبيها بعدوانية تجاه محيطك مثلك (كَمَثَلِ الْكَلْبِ إِنْ تَحْمِلْ عَلَيْهِ يَلْهَثْ أَوْ تَتْرُكْهُ يَلْهَثْ) بيجمعك مع الكلب اللهاث واللعاب البيسيل وإنت بتمجًد في ذاتك مع إنو الكلب برئ من عدوانيتك ، و( كالتيس في قراع الخطوب ) 5
---------------------------

1 / السلطة
2/ أنا جاسوس
http://sudanyat.org/vb/showthread.php?t=25859
3/ أنا بقيت مشهور
http://sudanyat.org/vb/showthread.php?t=25549
4/ / مغتربي السعودية وعلاقات الأسافير.. قبح الوحده والغربه
http://sudanyat.org/vb/showthread.php?t=25881
5/ علي بن الجهم

[ماجد تاج]

المشاركة الأصلية كتبت بواسطة شليل

3/ أنا بقيت مشهور
http://sudanyat.org/vb/showthread.php?t=25549

ـ


مرحب تاني يا شلو

البوست دا انت ما فهمته واللا شنو ؟

كدي عيد قراءته تاني عليك الله لأنو مضمونه مختلف خالص ياخ

الجماعة أيام بوستات أم التيمان ديك شبكوني عايز تشتهر عايز تشهتر حيروني

قلت الشهرة في سودانيات دي معناها شنو .. كتبت البوست المعني

عيد قراءته وح تطلعو برضو من مراجعك لأنه بيضعف ليك ما أنت بصدده


ـ


ذكرتني : في حتة هدر المرأة

لو المرأة دي ما بتشمل

( سارة .. سماح .. مي هاشم .. حجة آمنة .. همس الشوق .. أمال ، وبقية العقد الفريد عافي ليك )

ولو المرأة عندك منحصرة في

( أم التيمان .. لنا جعفر ، برضو عافي ليك )

دوم * بخير يا حبيب

ــــــــــــــــــــــــــــ
* الصحيح دُم لكن مع تحليلاتك ال بتعرج وتتنى وماشة بالقلبة دي

قلت يمكن تقوم تطلع ماجد تاج دموي كمان ..



ـ

[ماجد تاج]

ـ


شليل

بعد ما تخلص لو أمكن تسمح لي أقول ليك بعض الاعراض الاخرى التي أعاني منها

ويمكن تكون فاتت عليك .. عسى ولعل ربنا يسهل العلاج على يدك ..

واصل ولما تخلص كلمني



ـ

[الفاتح]

اللبيدو.. مالو إتأخر بريدو



تتخذ نزوة السطوة عن ماجد تاج طابع الأتاوات ، بفرض رأيو على محاورو أو بطابع المداورة على الناس وبالتالي ما بتقيم وزنا لكيانم ، وبيتحول محاورو إلى مجرد أدوات أو عقبات أو أعباء ،وما بيدخل الناس في حسابو إلا كأدوات يرمم بيها ذاتو المبنيه من جالوص .

ديل هم الحاشيه / الحواريين البيعبًدو ليهو طريق الوصول لواو المفقودة 1 ، أما الناس الما بيوافقوهو في الرأي فهم عقبة كأداء في طريقو يكون كل همو إنو يقصيهم عشان يقدر يمدد كرعينو أبعد من لحافو.. يمارس سلوكو ده بدون ما تحرًكو مشارع الذنب الذاتيه إللي بتصنع حدود للتصرفات العدوانية..
وهنا بتظهر نرجسيتو في حزية واحده عشان تساند السطوة إللي إكتسبها سايبريا من إقصاء للآخر.. فمفهوم النرجسية بيعمل على تركيز طاقة اللبيدو 2 في ال( أنا ).. لأنو في الحالات الطبيعية اللبيدو/ طاقة الحب ، بتتوزع ما بين تقدير الذات ، وبين التعلق بال(هو/هم ) والقيام بما يلزم من أجل إرضائهم.. فتوزيع اللبيدو بيكون متساوي بين الذات والآخرين والقضايا العامه.. ده الوضع المُعافى..


لكن في حالة النرجسية بيتم سحب التوظيف العاطفي من الآخرين ويتمركز في الذات ، وبمقدار السحب والتمركز بتتعاظم الذات .. فبالتالي يتمكيج ماجد تاج قدام مرآية ذاتو.. المرايه الما بتظهر إلا صورتو ، وتلغي وجود التاني.. فبمقدار ما طالت مدة وقوفو قدًام مراية ذاتو بمقدار ماغاب ( الهم) عن واقعو .


على المستوى الداخلي بتتحول نرجيستو لأنا مثالي ، بيظهر في حالات بتاعة ذهان ، متخذ طابع العظمة الفاكيها في روحو ، والغرق في الذات من الناحية التانية.. وعندها بيتخذ طابع التماهي البطولي 3 أو التماهي بناس تانين عندهم كينونتم المستقلة.


الأنا المثالي المنفلت من حوجتو للإعتراف بالناس الحواليهو بيفتح أمامو باب إنو يهدر كيان أي زول يقول ليهو (بغم) بشكل آلي.. لأنو مافي حاجه بتتكافأ مع عظمة أناهو المسًعفه سايبرياً.. وبالتالي مافي حاجه بتقيف قدًام عظمتو ، بل مافي قيمة لمحاورينو ولأي قيمة وجودية إلا بمقدار خدمة الحاله المرضيه دي..
فإلغاء ال (هم) دي حاجه بديهية ، فإذا ظهر أي صوت بيمثًل تهديد للصورة المضخًمة ، يبقى بعد داك مافي حل غير إزاحة التهديد ده 4


طيب.. القطيع إللي معاهو دورو شنو ؟
دورو إنو يحمل الدفوف والدلاليك عشان يعزز من نرجسيتو إللي رفعت بحمده تعالى إلى مرتبة الأنا المثالي 5.. حاملي الدفوف والدلاليك دورهم الوظيفي تبعاً لدراسة سلوكياتهم ما بيقتصر على إنو يلبو الحاجه الدايره منهم، بل يحاولوا يستنتجوا إنو الزول ده ناقصو شنو.. شافوهو أون لاين يقوموا يرفعوا البوستات إللي السيد الأنا المثالي يقوم يطيب ليهم على خاطرهم بكم نفخه هنا وهناك ، وهم ما عارفين إنو السيد ( الأنا المثالي ) لو شاف ظل خصمو أون لاين بيعمل ساين آوت زي الترتيب..


يقوم القطيع بدورو على أكمل وجه بشطيف رجلين ( الأنا المثالي ) برفع البوستات ، وإرسال الرسائل الداخلية ، فهم البيعجبوا بأيتها حرف يخطو ، وهم البيتحولو لأدوات رصد لرغباتو ويتطاقشو في تنفيذها..
وكإكرامية منو .. يقوم السيد الأنا المثالي يديهم مساحة تحرك من المبادرة عشان يتحملو شوية وزر ،ما ممكن السيد ( الأنا المثالي) يحمل أثقال أوزارو براهو.

هنا.. بيكون الإستلاب هنا في أعلى مستوياتو..
السيد (الأنا الأعلى) خت ليهو أيقونه خضرا.. القطيع ينفجر بالضحك..
الأنا الأعلى زهجان ، القطيع برضو زهجان..
المافي شنو - على قول قيقا-
الحاجه البتخليهم يتجردوا من ذواتهم إبتغاء مرضاة سي السيد.

فبمقدار تلصًق القطيع والزبانيه حوالينو بمقدار ما يلطط من نشوة العظمة وإنو ليس كمثله شيء ..


ده الدور الوظيفي للقطيع على المستوى النفساني.. وعلى المستوى السياسي ينشط ذات القطيع ، ويتبارى في حمل الدفوف والدلاليك لسي السيد بهدف تشتيت الناس عن قضاياهم ، وبقصد هتك نسيج المعارضه العلى العليهو مهلهل..


وضعية زي دي بيحلم بيها سي السيد الأعلى من السيد الأعلى.. اللي هو النظام .. فطالما إنو فتريتة المشاكل مشتته وما على الجداد الإكتروني إلا إنو يتكاثر مع الديوك المكتنزة بالعقد النفسية ، عشان يفقس بيضة فوضاهو ، وتحل اللعنه على المعارضه وعلى اليوم الجاب المعارضه ذاتو

------------------------------------
1/ واو المفقوده : البارادايس في كتابات إبراهيم الكوني ، والمقصود هنا ذاتو الضايعه.
2/ اللبيدو : طاقة الحب
3/ أنا ما حأسيبك ، أنا حأوريك ، أنا الأسد النتر هيييع ، وغيرها من الأنا هات/ الأناقات البتهندمو سايبريا ، وما بتقدر تسعًف غرفة من غرف روحو
4/ أ - المحاولات البتدعو للرثاء في ربط إسم شليل ، بمشرف منتدى نوافذ ، والكتابة الصبيانية حول هل تعلم أن شليل هو مشرف منتدى نوافذ ، وهل تعلم أنو الطياره ما عندها بوري.
ب – المجاهره لمهند الطاهر ، وللنا ، ولشليل بالإستقالة بإعتبارهم عقبة كأداء في طريقو
ج - بل وفتح بوست ( عقبة كأداء ) كان أي زول بيتحاور معاهو كان بيمثًل عقبة كأداء ليهو
د – وأخيرا وليس آخراً لأنو لهاثو ما حينقطع إن حملت عليه أو تركته بوست الآلهة القديمة
5- عادل عسوم وود الخير

[ماجد تاج]

ـ


شليل ( المهتاج ) كيف أحوالك ياخ ..

أول حاجة عذراً انشغلت شوية ..


ـ


للحق بعد قريت بوست كانديك الاخير ، وقبله طبعاً بوست النقد الذاتي للاخ الجيلي وقفت شوية فيما يجري

وطلعت بتقييم ماااا كويس للقصة كلها أجمل ليك خلاصة ما وصلت ليه فيما يلي :

1 - ما ستؤول اليه كل القصة دي ( فيما يتعلق بالعبط الدائر بيني وبينك دا ) ما ممكن يكون فيه مكسب لواحد فينا ، أي نعم ممكن أتقدم عليك كم خطوة ـ لأني عرفت بالضبط كيف ومتين ممكن أدورك وأخليك تظهر الجوانب القبيحة فيك ـ لكن في النهاية عند المار بي هنا القصة ح تكون مختصرة في خلاف بين ماجد وشليل .. ودا بيطلع أي جهد أبذله في سبيل إظهارك بمظهر الزول الانفعالي وال ممكن يطلع من طوره ببساطة جهد مهدور فيما لا طائل منه .

2 - لو واصلت معاك في نهاية القصة ح أدفعك للانسحاب من المنتدى سواء طائعاً أو من خلال جرك للوقوع في شرك التوقيف مرة بعد مرة ـ ودي ساهلة زي ما شايف لأنك ما عندك ليمت تقيف عنده حال تهيجك ـ ودا أنا ما ح أستفيد منه كتير ، لكن ممكن بعض الامور ال بتهمني تتأثر بيه ( زي المهمة الموكلة ليك اصلاً ، والمهمة القاع تحاول تنتزع شرف تدويرها ، ودي أنا ح ادعمك فيها بالفعل بإذن الله ( أقصد مشروع افطار طالب ) .

3 - أنا ما كان عندي نزاع معاك خلافاً للاخوان مهند ولنا ونبراس ( ديل بفتكر أنهم اتغولو على حق ما حقهم ـ الانتخابات ) ومع أنها رؤيتي الشخصية للغاية لكن المهم أني ما كنت شايف ليك دور فيها ، لذلك ما اتخذتك خصم هنا ، وانت ما كنت يوم بتشكل لي قضية بأي شكل من الاشكال لذلك الاستمرار معاك في سكة التهاتر دي ما عنده معنى وما لاقي ليه قوة دفع كافية للحق والله .

4 - البوست الاخير اللي اعتقدت فيه ( بفعل بابكر عباس أنك المعني بهُبل ) ما كان بيخصك ، وما ح يقرب منك ، بدليل أنك عندي أقل من أن أشبهك حتى بإله وثني قديم .. كما أنو هُبل كان أكبر الالهة ودي صفة في أي مجال حولك أو انت فيه ما أظن تنطبق عليك لذلك ما في سبب يثير تحسسك من البوست ، البوست دا ما بيعنيك وما ح ترد فيه حاجة تهمك أو ع الاقل تمسك في شخصك .

5 - التعليق الانت اتخذته سبب للانفعال الحالي في بوست الادارة في الخاص ما كان منطوي على فهم سطحي زي الوصل ليك لأنو ببساطة انت ما عندك أدنى قيمة عندي شان أخت على ضوءها حواجز تدفعني لغتغتة أي كلام عايز أوجهه ليك ، بسبب استباحاتك السابقة أنا بالمقابل ممكن ( زي ما حصل قبل كدا ) أكتب ليك أو أقول ليك أسوأ ما يمكن دون أن أشعر بأدنى أسف أو حياء .. لذلك بقولها ليك بالواضح ما كنت قاصد أنك قليل أدب ..لما قصدتها قلتها ليك عديل .

فااا دحين يا اخوي لو واصلنا في السكة دي أنا بقلبها ليك كوميديا سوداء ومهما كانت مكانتك عالية عند الاخرين أنا قادر ـ من خلال دفعك وإثارتك ـ على إظهار الجوانب التي لا تحب أن يراها الاخرين فيك .

لذلك يا أخي : حقو نكون عاقلين .. وكل واحد فينا قدر سنه ومكانته .. ونوقف القصة دي لحدي هنا

أنا ما عندي دافع أسوق بيه المكاجرة ، لكن ممكن أستمده من كتاباتك .

أقيف لحدي هنا ، وانصرف للشئون التي يمكن أن تثمر .. أولى وأفضل لك ولي وللمتابعين ..

تحياتي واحترامي ...




ـ

[أبوبكر عباس]

المشاركة الأصلية كتبت بواسطة ماجد تاج

4 - البوست الاخير اللي اعتقدت فيه ( بفعل بابكر عباس أنك المعني بهُبل ) ما كان بيخصك ، وما ح يقرب منك ، بدليل

هُبل طبعاً معروف لكن لن أورد إسمه الان صراحة حتى لا يسهم انفلاته وتهوره في فتل البوست مبكراً
ماجد

طبعا معروف!
وبعد دا، فات علينا كلنا!
يبدو انو فعلا كورتنا فكت!
وحات سيدي الحسن، يا ماجد، تثبت لي ولو بنسبة 20% انو هُبل ممكن يكون معني بيهو زول غير شليل، وحات سيدي الحسن، تاني المنتديات دي، ما أقرب ليها.

[زول الله]

المشاركة الأصلية كتبت بواسطة بابكر عباس

طبعا معروف!
وبعد دا، فات علينا كلنا!
يبدو انو فعلا كورتنا فكت!
وحات سيدي الحسن، يا ماجد، تثبت لي ولو بنسبة 20% انو هُبل ممكن يكون معني بيهو زول غير شليل، وحات سيدي الحسن، تاني المنتديات دي، ما أقرب ليها.

في منفاخ كدا ب ينفخو بيهو الفحم عشان يولع
عندنا هنا اسمو "الكير"
عندكم في اللمارات بتسموهو شنو؟؟؟
سؤال بريء والله





اقول قولي هذا واستغفر الله لي.................

[أبوبكر عباس]

هُبل طبعاً معروف لكن لن أورد إسمه الان صراحة حتى لا يسهم انفلاته وتهوره في فتل البوست مبكراً
ماجد

نفترض انو الخيار بتاع انو هبل مقصود بيهو مهند الخطيب ككبير للآلهه؟؟
زول داير ينقد الأمين العام؟ البضيرو شنو من إنفاعل الأمين العام وتهوره وفتل البوست؟؟

[كيشو]

المشاركة الأصلية كتبت بواسطة بابكر عباس

طبعا معروف!
وبعد دا، فات علينا كلنا!
يبدو انو فعلا كورتنا فكت!
وحات سيدي الحسن، يا ماجد، تثبت لي ولو بنسبة 20% انو هُبل ممكن يكون معني بيهو زول غير شليل، وحات سيدي الحسن، تاني المنتديات دي، ما أقرب ليها.

عليكم الله شوفو الزول دا !
تربط نفسك بي تفسيرات الآخرين وأمزجتهم ؟ إتا يا زول ركبت التونسية ؟
هسي تلقى عبد المنعم يفتش في تلفون ماجد تاج عشان يخلص منك