شــــزوفرينيا ...

[3mk-Tango]

زوايا مختلفة .. اختلاف لغة الحوار والمواقف والمبادئ ...

كل الاحداث تدور خلال اسبوع واحد :

في منزلة مع والده :

الاب : يا كمال نتيجة الامتحانات كيف ؟؟
كمال : والله كويسة.
الاب : كيف يعني كويسة ؟؟ انا سالتك قلت ليك عندها ملاريا ؟
كمال متلعثما : لا .. بس قصدي نجحت في كل المواد الا مادتين .
الاب : مافي حاجة اسمها نجحت في كل المواد الا مادتين يا نجحت ولا رسبت
كمال : ....
الاب : زي البغل قاعد تاكل وتشرب وتنوم عندك شنو في الدنيا دي غير القراية
وبعد كدا ما نافع فيها .. انتو شباب ما بتعرفو حاجة غير الهجيج ..
كمال : .... ...

مع امه :

كمال : يا حاجة جيبك كيف ؟
الام مبتسمة : جيبي مخيت .
كمال : كدي فكي الخيت دا وانفحينا بي حاجة منو .
الام : امشي لي ابوك شيل منو ..
كمال : ما شايفة الحاج بنقنق من الصباح كيف ؟
الام : كلامو كلو صحي ..
كمال : كدي خلي كلامو .. انا جيتك انتي شوفي لي حاجة عليك الله ..
الام : جيب لي كيسي داك طيب .

مع اخته :

كمال : انا مش قلت ليك لو جو ضيوف هنا ما اشوفك تتلولحي بي جاي ؟
كوثر : ضيوف منو ديل ؟؟
كمال : ما تعملي لي فيها ما فاهمه .. امس لمن كانو ناس احمد قاعدين هنا الجابك ماشة بي جاي شنو ؟
كوثر : كيف يعني الجابني شنو ؟ كنت ماشة البرندا اجيب المروحة .
كمال : والمروحة ما حلت ليك الا لما الناس قاعدين . .. لاخر مرة بحذرك .. بكسر ليك كرعينك ديل انا ..
كوثر : ......
كمال : واول امس شايفك واقفة مع ابتسام .. انا مش قلت ليك البت دي تاني ما اشوفك معاها ؟
كوثر : انا اسوي ليها شنو .. هي جاتنا في البيت وقدمتها للباب يعني ما اتكلم معاها ..
كمال : أي ما تتكلمي معاها لانو كلامي كان واضح ..
كوثر : .....
كمال : عملتي شنو في الهدوم الاديتك ليها امبارح :
كوثر : هديك في الاوضة مكوية. .


مع اصحابه :

احمد : وين يا مان ؟
كمال : اوووووووووو ويييين يا رفدة ؟
احمد : تمام قاعدين وميتينا طالع ...
كمال : ميتينك طالع من الفلس يا معفن .. وعامل فيها الود حبيب كمان .. يا دين ما قلنا ليك من زمان
خارج نفسك من ( الجاحة ) الماسك فيها دي .. .. ياخي انا ابتسام دي ما بشتريها بي قرش ..
احمد : عليك الله الجاحة دي ما احسن من القيامة بتاعتك مني الوهم ... هههههه ..
كمال : يا لو ...... ي ... ما انت عارف مني دي انا عاملة تسليكة بس وتمشية للزمن
انت عارف اخوك واقع وين .... نشوي ياخ.. اخ انا من نشوي بس خلي الامور تسلك .. لكن مني مطلعة ديني وحاكاها معاي شديد ياخ ..
احمد : مني بيعها يا معلم
كمال : والله بفكر في كدا برضو ..


مع ( الجاحة ) مني :

مني : اها يا كمال حتعمل شنو في الموضوع بتاعنا الفتحناهو المرة الفاتت
كمال : مني ياخي انتي ما عارفة أي حاجة بس روقي لي شوية خليني اخلص موضوع
المواد الواقفة لي قدامي دي .
مني : كمال ان عارف لكن الجماعة ديل ضاغطني شديد والزول دا جاهز ..
كمال : معقول يامني .. انتي الحتعرسي بالطريقة دي ؟ وين الحب البينا ووين الوعود ووين
ريدتي ليك بس ؟
مني : كمال انت عارف الحاجات دي كلها لكن لازم تتحرك ما ممكن تكون قاعد في الجامعة 8 سنة ؟
انا اتخرجت واشتغلت وانت لسة كل سنة تربت .
كمال : والله يامني انا الدنيا دي من غيرك ما تسوي أي حاجة .. عليك الله اصبري لي شوية ...

مع مجموعة حداثية من بينهم نشوي :

كمال : اعتقد تطور الأحداث الاخيرة كان واضح وجلي اننا كشباب يجب ان نتعامل مع الامور بكل جدية
وان نخرج بحركة ثقافية تروج لافكار شبابية جديدة تجد موقعها في خارطة حركة الوطن ..
ويجب علي كل الفعاليات المتواجدة حاليا ان تكثف الجهود وان تدعو للترابط الفكري الخ الخ .....
الخ .... الخ ..... ...

تصفيق ويغلق الستار ...

[3mk-Tango]

نقد زاتي :

لا اعفي نفسي احيانا من تغيير لغة الحوار بتغير الاشخاص فنحن ابناء البيئة
لا اتحدث مع صديق الطفولة كما اتحدث مع شخص غريب ..

هل تصح هنا مقولة : لكل مقام مقال ؟

وهل نعيش في شيزوفرينيا جماعية ؟؟






.

[خالد الحاج]

تنقو يا نديدي
أولآ ده بوست جميل بحق
فكرة غير تقليدية

بخصوص "الشيزوفرينيا"

حقيقي لكل مقام مقال وهذا لا يعني أن يكون للشخص عدة مواقف
يبقي الموقف واحد وتتغير طريقة التقديم.. والإختلاف بإختلاف المتلقي.


أتذكر الفلم المصري "لا أكذب ولكني أتجمل" ؟

بعض الناس يطبقون علي أسلوب تعاملهم مع الآخرين المثل "المجبور يملح بالعسل"
ولا يكون العسل في مقام الملح يا خالد .. مطلقآ... ولكنه "فقه اللحظة" ...

أجمل الناس عندي هم من لا يحوجوني للتجمل أمامهم... أكون نفسي فقط.

يديك العافية.

[haneena]

سلام عم تنقو

للأسف دي واقع يومي يحدث بنفس التفاصيل الذكرتها

لا أعرف كيف يعيش إنسان في الدنيا دي بعدة عقليات
عقليةلكل موقف
عقلية لكل إنسان
يبدل العقليات أكثر مما يبدل ملابسه

و الشيزوفرينيا تعريفها العلمي في مجمله هو الإنفصام تمامآ عن البيئة المحيطة Dissociation of the surroundings مع تشويش في التفكير و السلوك و المزاج و ليس المفهوم السائد إنه الإنسان يعيش بعدة شخصيات كدكتور جيكيل و مستر هايد
تعريف السلوكبتاع كمال يقع تحت الHypocrisy أو النفاق

عليك الله شوف كمال دة كم مرة (بينفصم)..؟؟!!!
و الله يا خالد بعض المتحدثين بإسم المجددين و المستنيرين عندما تتعرف علي تصرفاتهم الخاصة و بين أسرهم تأخذك الصدمة كالصاعقة
و الله الواحد شاف في الدنيا دي وقائع تشيب لها الولدان

وقانا الله و إياكم شر الإنفصام و المنفصمين و المنافقين

بجيك بي كم قصة كدة
أصبر لي

[3mk-Tango]

تحياتي نديدي ..

"فقه اللحظة"

أجمل الناس عندي هم من لا يحوجوني للتجمل أمامهم...

افهمك تماما .. احيانا نحاول ان نتجمل ... او كما قلت لكل مقام مقال ... الي هنا متفق معك ..

النموذج الاعلي ملئ بالمتناقضات يا خالد ... مثل هذا ما نسمية انفصام الشخصية ..
عندما يفلت الامر من مجرد مقال الي عمل او حتي الي مقال بعيد عن الشخص الاول ..

اكبر افه عندنا هو هذا الانفصام .. السياسي يعيش حياتين او شخصيتين واحيانا اكثر
الفنان يعيش شخصيتين ..
رجل الدين يعيش شخصية ليليه وشخصية صباحية .. ومنا ظهر مثل .. ( باليل يسبح وبالصباح يضبح )0
وهكذا الي اخر قائمة الشحصيات ...

ما الحل وما العلاج ؟؟؟

[Osman Hamad]

الله عليك ياتنقو
الله يخدر ضراعك الكلام دا سمح بالجد

[3mk-Tango]

حنينة جاييك ..
وخليني اهئ لي مداخلتي ( بعد الاستراحة في العمل ) بي سؤال
وهو :

هل هذا التناقض مفيد احيانا ؟؟؟؟

عندي اجابتين ..


لي بعدين ...

[عبد العظيم الطاهر]

فعلا يا تنقو ...... نحنا السودانيين في شي غلط في تربيتنا ...

كتير من الناس زي صاحبنا كمال ده .... يصلح لكل زمان و مكان

[أبومناهل]

العزيز / خالد تنقو
أولاً: دعني أبدى إعجابي بطريقة عرضك للموضوع بهذه الطريقة . .
ثانياً : الظهور بعدة وجوه حسب متطلبات الموقف . . تكون مضطر أحياناً له وذلك بسبب طبيعة تربيتنا في البيئة السودانية . . فلكل شخص في حياتك طريقة محددة للتعامل معه . . وبسبب عدة عوامل في الغالب الأعم يكون الطرف الآخر هو من يحدد طبيعة شخصيتك معه . . وبالتالي لا يكون هنالك أي خيار لك إلا أن تكون تلك الشخصية المرسومة لك وعليك أن تجتهد لإبراز الشخصية حسب التصور الموضوع لها . . فيأتي من هنا الإنفصام في الشخصية من موقف لآخر .
إعتقادي الشخصي أنه يجب على الشخص أن يحدد أسلوب حياته ويفرضه على البئية المحيطة به وبشجاعة تامة مهما كان رفض البيئة لطبيعة أسلوب الحياة أو السلوك . . لأن هذه الطريقة تعطي الشخص ( أمان داخلي ) بينه وبين نفسه مما يحفزه للإنطلاق بنجاح في الطريق أو المسار الذي حدده لحياته .
الإنفصام لإرضاء الآخرين على حساب المصلحة الشخصية نجد له عدة صورة مثل الطالب الذي يدرس في مجال معين لأن أهله ( عايزين كده ) . . أو الفتاة التي تتزوج من يختاره أهلها أو تحرم من العيش مع شخص تحبه لرفض الأهل له . . والعديد من المواقف التي تجعلنا نحس أننا مجرد ممثلين على خشبة مسرح نؤدي أدوار مفروضة علينا .

[ناصر يوسف]

لا كمال بتاعك ده

بااااااااااااااااااالغ فيها عدييييييييييييييييييل كده

معك أضحك وخلفك أقول فيك العجب

أمام المير ألمع له طاولة مكتبه
ومع زملائي أكيل له السباب والشتائم

عفاك الله الحبيب عمك تنقو وعافانا جميعا من مثل ذلك

[3mk-Tango]

حنينة
تحياتي

ردا علي سوالي : هل هذا التناقض مفيد احيانا ؟؟؟؟

مثل كل شئ في يمكن استخلاص الجميل والقبيح ...قد يكون مفيدا علي مستوي المجاملات فقط
ولكن التناقض في المبادي او التصرفات العامة والهامه دائما قبيح
ولا يمكن وجود اي جانب مشرق يميزة ..

بعض الممثلين احيانا يصاب بانهيار عصبي عند تجسيدة لاحدي الشخصيات .. وهذا يخبرنا بصعوبة الامر
عند الانسان الطبيعي علما ان الممثل يكون قد تدرب كثيرا علي تادية الدور وتجسيده ولكن ادخال شخصية
علي شخصيتة الحقيقة ايضا يجعله في وضع نفسي سئ . ولنا ان نتخيل من يقوم بتادية عدة ادور علي مسرح
الحياة دون ان يرمش له جفن ..

تعودنا كثيرا علي ممارسة التمثيل علي بعضنا البعض وادعاء ما ليس فينا او التظاهر بما ليس فينا ...

سؤال لأثراء الحوار :

الخط الفاصل بين التجمل وبين الأنفصام كيف يمكن ان نرسمه ؟؟؟ ..


.

[3mk-Tango]

عثمان حمد الزول الكتاب .. مرحبا بك بعد غيبة ..

الكلام سمح لكن دايرلو تقعيد ... وجايين نوهطو شوية شوية .. امكن نقدر نفهم انفسنا ..

لك الود

[3mk-Tango]

الاخ عبدالعظيم الطاهر مرحبتين سلام ...

هل التربية يا عبدالعظيم لها دور في ذلك او هي حالة نمارسها بلا وعي فقط
ام هي ضرورة اجتماعية ( لتمشية المسائل ) علي قول ناس المشروع الحضاري ...

؟؟؟

[عجب الفيا]

فكرة جميلة يا عمو
وتكنيك ولغة الحوار ممتاز جدا لديك موهبة سنيارست كبير


ما في شك الارث الاجتماعي يفرض علينا ان نمارس نوع من السلوك شبيه بانفصام الشخصية

[3mk-Tango]

العزيز ابو مناهل .. يغشاك السلام ...

.. واحاول ان افهم متي وكيف نحتاج الي ذلك .. وهل كل بقية البشر مرضي بهذا الداء ام الامر محصور علينا نحن فقط نسبة لطبيعة مجتمعنا السوداني ...

نمتاز بمجتمع مفتوح .. في علاقاتنا مع بعضنا البعض نختلف عن كثير من المجتمعات الاخري حتي المجاورة لنا .... نهتم كثيرا برائ الاخرين فينا ونحاول بقدر الامكان ان نضع الاقنعة المختلفة ... هذا يصعب كثيرا مهمة ان تكون نفسك ... الكل يبحث عن النموذج الامثل الذي يجب ان يعتقده الناس فيه .. احيانا تكون صفات معينة في الانسان نعمه ولكن بأردائة للقانع يكون قد اضاعها ...

النموذج اعلاه ( كمال ) هذا الشاب لم يستطيع حتي علي المستوي الاكاديمي ان ينجز شئ مهم ونراه يتحدث عن الوطن والحركة الثقافية بلسان العالم الفقيه ... ومثل هذه الشاب نراه كثيرا ..

مزيد من النقاط والحوار قد يجعل المرايا مصقولة جيدا ...