وجع الرحيل .. نص
وجع الرحيل
لافاني ليل نَفَسَكْ
وكت ضمّيت عيون
وجع الرحيل
وقت السفر
هاجر معانا الطير
وخايف من وقوع النيل
ومن تقل السحاب
الشال همومنا
وضاق عذابات المقيل
يا يمة ..
وين ماشي العمر
شايل فناجين قهوتك
لافينا بي ريحة البخور
والبُنّ يطقطق في حشاك
ضلعك جمر
ما قلت ليك أنا من زمان
خليني أبداهو السفر
قلتي زفة ..
وقلتي .. زغرودة ومطر
قلت ليك شان الوجع
خليني أبداهو السفر
لا يمة ردت
لا بديت .. أنا .. لا المطر
وجيت أحكي ليك
شايلة الدفاتر والعَلَم
رسلت ليك ..
يوم شلت كفن الأمنيات
ما قلت ليك دايراك تجي ؟
ما قلت ليك أنا والدموع
قاعدين علي رمل الشتات
جلسة أدب
في ضل طقوس الإغتراب
نقرا العذاب
في ركعة الحرف الألف
والريح تجيب لينا الرزاز
ونندفن
يفضل طرف توب الدموع
مكتوب عليهو :
لامن تجي ..
أكتب علي القبر النحيب
"أمونة" يا ليل الخراب
"أمونة" يا بت من ألِف
ولسة بتقول أضحكي!
كيف الضحك
وسط الهموم
الحايمة ترسم في الوشوش
خطين سحاب
والخدود غرقانة دم
العيون خامة التراب
وأمونة بين كل السجون
كايسالها باب
محبوسة بي تهمة شرف
مكتوب كتاب
كيف الضحك ؟
وأمونة من يوم ما وعت
لابسة الهموم ومكدرة
وساعة الفرح تلقى الدموع
نازلها بأنينها تذكرها
تهمس تقول ما تفرحي ..
ما تضحكي ..
الفرحة جات متأخرة
أنسيها خليك في الخراب
عايني الغيوم ما أكترها
شوفي العيال
نص الطريق رامينهم
شوفي البراءة مكسره
آآآآه ..
أمونة كان ضحكت بيبكي منو ؟
|