مواقفي مع الشحدة والشحادين

[جمال تاج السر]

[align=justify]
بحكم عملي في السوق هذه عدة مواقف تخص الشحادين مرت بي، والغريبة أنو في واحد مر بي أسي، وده الخلاني أكتب البوست ده
1- جاني شخص من جنوبنا الحبيب يحمل (صورة) من أشهاد شرعي يحمل أمضاء القاضي وختم المحكمة، يوضح الأشهاد تحويل أسمه من (بيتر) إلي (أحمد). طلب مني هذا الشخص أن أقدم له ما أستطيع حتى يتمكن من تكلمة إجراءات تحويل أسمه واستخراج جنسية جديدة تحمل الاسم الجديد (وهي تكلف مبلغ خمسة وعشون الف جنيه)، وبالفعل قدمت له ما باستطاعتي, وشكرني وانصرف.
مرت الأيام والشهور وبعد حوالي أربعة أشهر مر بي مرة أخري وقدم لي نفس الورقة لكنها بتاريخ جديد وقال لي نفس الكلام الذي ذكره المرة السابقة، وقبل تكملة حديثة قاطعته وحكيت له باقي قصته كما رواها لي المرة السابقة فضحك كثيراً وقال لي (طيب أنت ما ناقش الوهمة) وأنصرف.
2- مر ت بي (قبل حوالي شهرين) إمراة في عقدها الخامس تحمل روشته طبية وقالت لي (ولدي الصغير عندو غسيل كلى، طبعاً الغسيل مجاني لكن في الحقنه غالية، بي مية وخمسين الف، لفيت السوق جمعت جزء كبير من المبلغ لكن نقصت لي 18 الف، طالبه منك المساعدة) تأثرت كثيراً لموقفها وأخرجت من جيبي الف جنيه وقال ليها (دي الف جنيه يا خالة يكون باقي 17 الف) شكرتي وانصرفت.
اليوم عادت لي مرة أخري وقالت لي نفس الكلام السابق بحذافيره(و ذكرت لي مبلغ الـ 18 الف)، فقلت لها ما عندك أي مشكلة يا خالة قروشك ناقصة 18 الف مش؟؟!! فأجابت نعم. فقلت لها أنا لا أمتلك قروش لأساعدك بها لكنني يمكنني أنا أذهب معك للصيدلية المجاورة لنا وندفع له ما عندك وأنا أتعهد له بإحضار باقي المبلغ (الـ 18.000)...
فذهبت مني مسرعة جداً وقالت لي لا لا عفيتك عفيتك... وانصرفت ولم أجد لها أثر.
3- يمر بنا (في منطقة امدرمان الشهداء) يومياً حوالي عشرة من حفظة القران الكريم يحملون ألواحاً يطلبون المساعدة وهم أطفال تتراوح أعمارهم بين (9 – 12 سنة)، في أحدي المرات ناديت اثنان منهم وسألتهم:
انتو بتقرو في ياتو خلوة؟: نحنا بنقرا في خلوة شيخ إدريس في أمبدة.
كم طالب أنتو؟: نحنا كتااااار زي 220 طالب.
وبتشحدو ليه؟: نحنا الصباح الشيخ بفكنا كنا عشان نلقط قروش وكل واحد مطالب يجي نهاية اليوم ومعاهو مبلغ 3000 جنيه،
القروش دي بتدوها لي منو؟: بنديها للشيخ، والما بيجيب التلاته الف، الشيخ ما بدخلوا الخلوة بالليل وبيجلدو. ونحنا كلنا بنوزع نفسنا ناس يمشو يشحدوا في الشهداء وناس في السوق وناس في المولد ... الخ.

ونواصل المحن...[/align]