راكوبة المجادعات.. النمة والدوباي

[فيصل سعد]

المشاركة الأصلية كتبت بواسطة سجمان

يانعات في الفروع هب النسيم صافاهن
في بطن الفريق كضب البقول لافاهن
مدخورن في السماح نقعنو بي مصفاهن
اقدامي المروق لي شوفتن حفاهن

سلام يا باذخ..
وين الزول الجميل دا ياخ
ان عندك ليهو درب عليك الله امرقو لينا جاي

من منصور المفتاح الى
محمد صديق "سجمان" :

(Faisal Saad

سلم الله سجمان فى العالمين وسلمك كذلك وقل له كلامك سمح والله يسهل القواسى)

[فيصل سعد]

سمعنا بيك وجينا
تسوقنا ليك الفرحة
وصلنا لقينا تدمير
و الجثث منطرحة
غايتو حسب افادات
الشهود والجرحى
قالوا الماتوا ديل ساعة
عدلتي الطرحة
😳😱

"ملطوش اسفيريا 😜😅“

[فيصل سعد]

التَقَرَة المِتِل
فرس الرِهان بِتقَلِّبْ
و فى جوف العشوق
نار الغرام بتعَلِّب
يات من شافها قال
فى غى هواها بِتَلّبْ
و للمفتى الوقور
فد ثانيه ليهو تَشَلِّبْ

"منصور"

[Abdullahi Gaafar]

هادي قعدة
ودايرة ليها فنجان قهوة
وان شاء ليها رجعة ورجعة للقراية والمشاركة

عبد الله جعفر

[فيصل سعد]

إنعرط اللزوم
ساعة الدناقِر دقّن
و دار النَقْزة فوق
أُمات ضميرنْ رقّن
بَرٌاق السنون
نجَف الكهارب بقّن
و سمح القول عسل
ورثنو صافى ملقّن

"منصور"

[فيصل سعد]

سمح الدعاش فرحت
عجولو و عاطن
و نقز القمرى فوق
سنط الكبور الجاطن
سمح الوليد جدع
الصديرى و باطن
و داير الرخصة
ما بدور الكويق الشاطن

"منصور"

[سجمان]

المشاركة الأصلية كتبت بواسطة Abdullahi Gaafar

هادي قعدة
ودايرة ليها فنجان قهوة
وان شاء ليها رجعة ورجعة للقراية والمشاركة

عبد الله جعفر

والله انه لشرف ..
والنعمنو بقينا ما عندنا قدرة للكتابة وراحت مننا
لكن تعال تُورِب ونحن نعاك

[فيصل سعد]

مطمورة العروض المن درك ممنوعة
كان رقص الجبل ما برقصنلو فروعا
قمرى شنو البهز المن ثبات مزروعة
زى قايد الديوش البى الرتب مرصوعة

"منصور"

[سجمان]

المشاركة الأصلية كتبت بواسطة فيصل سعد

مطمورة العروض المن درك ممنوعة
كان رقص الجبل ما برقصنلو فروعا
قمرى شنو البهز المن ثبات مزروعة
زى قايد الديوش البى الرتب مرصوعة

"منصور"

بعد الكبر والشيب نشل تنشيني
شقق شراييني شبشوبا شراو شالّيني
بالشوق الوشل من الرموش شاويني
شقيش منشده بي شوف نشاو شافيني

[سجمان]

المشاركة الأصلية كتبت بواسطة فيصل سعد

التَقَرَة المِتِل
فرس الرِهان بِتقَلِّبْ
و فى جوف العشوق
نار الغرام بتعَلِّب
يات من شافها قال
فى غى هواها بِتَلّبْ
و للمفتى الوقور
فد ثانيه ليهو تَشَلِّبْ

"منصور"

دُغُس هجرن مراويدن
فوسيبات جرف دهج العَيُون غرويدن
من مغايس الفرقة والشوق والسهرفي ريدن
أب دمام والقلب والكبدة بان قدّيدن

[سجمان]

المشاركة الأصلية كتبت بواسطة فيصل سعد

من منصور المفتاح الى
محمد صديق "سجمان" :

(Faisal Saad

سلم الله سجمان فى العالمين وسلمك كذلك وقل له كلامك سمح والله يسهل القواسى)

سلمك الله انت والمنصور وعذر دعووووول في تاخير الرد
الفترة الفاتت العصرة حاصلة..
والزول السمح دا امرقو لينا لا برا