قاموس المفردات العامية فى اشعار حميد

[ماريل]

والضو تَنَى ..
عضَّ اصْبَعُو
عضَّابو حِسْ الطائرات
عضَّابُو قُدْرَتُو تنتهي .. عضابو يرجى المعجزات
عضابو صبْرُو وطول رَجَا
.. وَيْْ .. أبونا جا
.. ويْ .. يال القِمِيرا .. أبونا جَا
وجرُوا كالفراشات شُفْعُو
جروا منُّو غادي وفلَّعُوا
أدُّوا البحر .. أدُّوا الحجار ..
ساعةَ الحَضانْقُول يجْدَعُوا .. برَّاقْ عيونُن يشْلَعُوا
تالا القميرا يصنْقِعُوا ...
يا الطالع الشجرة جيب ليْ معاك خِيمة
تستُرْ من المطرة إن كبَّت الغيمة

جيب لك معاك قمحات
قمحاتنا في الشيمة
وغنم الحَلِب رايحات
ضلَّمْنَا ضِلِّيمة

- خيمة السعودية دَفُو ماب تَدَفِيكا
ولبن اليهودية بلدك ينسِّيكا
قمحاً من امريكا خاذوق رِكب فيكا
غير خير بواديكا مافي اليكفِّيكا

يا طالع الشجرة من خيمتك التوبة
جيب لك فروع خضرا أو جافَّة يادوبة
في الحرَّة في المطرة في عِزْ بَرِدْ طوبة
نمْرُق مـن الوَكَرة وتبْقالنا .. راكوبة


يا طالع الشجرة قبِّل على الحِلَّة
قول ليها يوم بكرة كُـرْبتْنا تِنْحلَّه
ننزِل نضوِّيكي ضِرْعاتنا مادِلَّة
قادرين نسوِّيكي عُقْبان عَلِي الله


يا طالع الشجرة
طوْلنا يا والله

أنزل هيا ويلاَّ
إندلَّى نِنْدلَّى
نِنْدلَّى حلتنا
حلتنا مادِلَّة
.................................................. .
عض اصبعو:كناية عن الغيط او الندم
القميرا:تصغير للقمرة
جرو منو غادى:ابتعدوا عنه
الحضانقول:الحجر
كربتنا:مصيبتنا
اندلى:انزل باتجاه البحر وفى هذه الحالة مقصود باتجاه الحلة لان الناس طلعت الصحراء عندما ضايقها البحرمادله:

[ماريل]

نندلَّى ما دام الأسف ، والجهجات ماب ينفعُو
ثبِّت يَقِينك ،، يا ولد .. الناس مصيرُن يرجعُو
ما شال عزيمتنا الهوا
والبنْدِقْ المربوط سوَى .. مافي أيِّ ريح بتفرْزِعُو
إنت وأنا ..
نار السعق كان ولَّعت بيناتنا ما تِسْتهْوَنا
الجوْ شرارة تَوَلِعُو
الزول بَحِنْ ..
حِنّ يا ولد ..
حِناً يقَدِمَك أتْبعُو
وتِشْ عينو دجَّال الضلال
قبَّال يَمِدَ لك أصْبَعو

حِنّ .. يا .. ولدْ
والضو يقالد من طَرَفْ .. ناس البلد قبَّال يقالْدُو يَدمِّعو
دمع السواد الانزرف .. لوْ الدموع بِيَرَجِعُو
في عَمَّة .. في بِتْ .. في ولَدْ
شمََّّ البلدْ .
ناضَمْ قبيلتو ووانَسا
هبْهَبْ دموعُن ويبَّسا
نقْنَاق حِبَيْبِين القَسا
طرَّاهُو حِس الطائرات
والضو نِسى
قوز الرماد ، والفوقو ، فوق قوز الأسى
الْفي المدرسة .
- شُفْنَا .. أيِّ شِي .. وما شُفْنَا شِي
مِعْزَاتنا كَدَّن للحصى .. شُفَّعنا بيَّتُوا للقَوَى
وجع البطون ..
درن العيون ..
الهلْوَسَة

موية الغنم والدود ، وموية الناس سَوَا
المستراحات الخَلاَ
الله يجازي الكان سبب . . ما نلْقَى عافِي ولا دَوَا
ما نلْقى غير النسْنَسَة .. وكاوِيقْ كلام شالو الهَوَا
حال .. ماها حال
وقْعَتْنا تبقى على الجبال .

[ماريل]

غلُّوا البضاعة .. العِنْدُو سِلعِة عِرفْ لها
غلُّوا القمح
غلُّوا اللحم
غلُّوا الخَدار
حتَّى .. الملح !
دسُّوا اللبن
دسُّوا العَدس والصلصة
دسُّوا الإسبرين ..
دسُّوا المعايش كلَّها
_ حاكومة وين .. واللجنة وين .. في عديلة راكْبَة محلَّها
اللجنة حلَّيتا .. المصيبة الجامْدّة شِنْ بِيَحِلَّها ؟؟

حال .. ماها حال
وقْعَتْنا تبقى على العدو .. الفيها تبقى على الجبال
قَدَرْ الله .. يا بِت الحلال
لع .. يا العَشِي .. قَدَرْ الرجال .. اللابْ تخاف الله وتتوب لابْ تِخْتَشِي
وأنا لجْنَة غرَّقت البلد .. أرجع وأجيك بي يات وشِي ؟؟!!؟؟
_وغلاَّ البضاعة .. الْفِي إيدُو مفتاح البضاعة ..
الأرزقي المايِصْ عَرَقْنا ومِتْحشِي ..
وما ضرَّ غير أبَّان دقون فيها الضلالة معشْعِشِي
وفِقَراً تَغُشْ في الله .. تخُشْ بيتو وتسرْقُوا ورا العِشي
كُرْ .. من ضمير ناس .. هان قَدُرْ .. تجْلِب بِلاده وتِتْرَشِي
كُرْ .. من عَوَارْضِك يا بلدنا .. الناس تَشُوف ومَدَعْمِشِي
تسمع سماع .. ومَطَنِّشِي !!
وحاكْمَانا في اشنو .. وشان شِنُو ؟
حاكُومة ما خابْرالنا شِي ؟!؟
حِسْ أمَّها المَهَرِيِة همْ ، يجي من بعيد
يا أمُّونَة بتِّي شِن الشَكِي
ما حاشُو في الطين الرُخُسْ .. ينحاش فِ أرْضِ مَكَرِكِي

[ماريل]

حَرْمان عليكي تقولي لا
مجبورة يا خادْمَ الفَكِي .. مجْبُورة إنتِي على الصلاة
لا تأذِي جرحو تحَكْحِكِي
وجاييك مَلَكْلَك من تِحتْ .. يا أمّونة تاني تَلَكْلِكِي
شيلي الحَرف داك رشْرِشِي
قوم يا عشاي .. قوم للعَشي
قوم .. واِنتَكِي
وقام واِنتَكَى
ويلقى الحسن في صفْحَتو وقِدَّامْ وَشِي
- إن جيت بلدنا إنكسِّرت
_ أيِِّّ .. آ .. الحسن
- كَسَرَا البحر ؟
_ أيِِّّ .. آ .. الحسن
- يابا البحر دا .. بحرْ بلدنا ؟
_ أيِِّّ .. آ .. الحسن
- الزول يكسِّر بلدو ؟؟
والضو .. سكَتْ .. طقْطَق أصابِع ولدو
.... فِسْْ .. إنجِلِسْ
... فِسْْ .. إنجِلِسْ
- يابا المدارس اندمَّرت ؟؟ صاح والجوامع اِنكسَّرت ؟؟
_ أيِِّّ .. آ .. الحسن
- يابا .. الجوامع .. هيل مِنُو ؟
_ هِيل الله .. نُــوم ..
- حتَّى المدارس حقَّتُو ؟؟
_ لا لا الْلتْ الحاكومة .. نوم ..
- هُو الزول يكسِّر حقُّو كيف ؟؟ !!؟؟
والضو يَطَلْوِحْ بُو اِندهاشْ .. ما يلقى قيف
.. لا بان لُو .. بَرْ .
وأمُّونَة صُوتا من البعيد ..
نوم .. يا .. قَشَرْ
- صِحْ يابا في الجامع ، جا تمساح واِنبَطَحْ ؟؟
_ أيِِّّ .. آ .. الحسن
- يابا التماسيح .. مسلمين ؟
_ لا مجرمين
- لابسين دقون .. لافِّين طِرحْ ؟؟

_ ..........

- ما تَضْرَبُوهُن بالسلاحْ ، وتَكَتِلُوهُن .. تاحْ .. تَرَحْ ؟
والضوْ .. سرحْ
وأمُّونة صوته من البعيد .. حَلِقَه إنجَرَحْ
: نوم يا قَشَرْ .. : نوم قبْل أجيك
- يابا البحر دا ولَدْ مِنو ؟
_ ولد المطر
- ويابا المطر ؟
_ بت السحاب
- ويابا السحاب ؟
_ خير للبشر
- ويابا البشر ؟
_ هُول ربَّنا
- ونان ربـ
وأمُّونة تجري من البعيد ..يقطع كلامو وتنْحَسُو
تَجْبِدْ أضانُو وتقْرُصُو
لا تقْلِدُو .. جيب القَشَر دا علي رفاقتو نرَقِدُو
أمُّونة هَزَّتَا تمْغِسُو
- أنا دايْر أنوم في صدر أبوي .. شان البحر
وقام إنحشر .. في صدر أبوهُو وحدَّثُو :-
في مرَّة جُونا .. رجال كبار .. كبآر
غَمَتُولِي في إيدِي .. قروش كتار .. كتآر
أمُّونة شالتا فنَّتا..
الراجِل أبْ دِقناً كبير .. سبَّاله دنْقَر لقَّطَا
وأنا قُم بكيت
أمُّونة فكَّت صُرَّتَا .. وأدتني صندوق بسكَوِيت
_ بعدين ؟
- سكَتّ .. وأمُّونة قامت .. شَوّ .. بَكَت
وتلْفَح نعالَه .. وتَفْلَعُو ..
نوم .. يا .. قَشَرْ
نوم .. قَبْلَ أجيك
- أنا داير أنوم في صدر أبوي .. شان البحر
وقام إنحشَرْ .. في صدرَ أبو
ونام الحسنْ ..

[ماريل]

في آخر المسا
وصنَّت عيون النوم يجيها بعد تعَبْ ..
سرْسارو داخل المدرسة .
والضو غَمَد
صِحَى .. بِي صياح الأمهات .. وأطفالَه مِنطلْقِين بِكِي
كل فردِة تبكِي على بلد
بكَّاهَا حِسْ الطائرات .
والضو .. ضحك ..
لمَّا البنات قالَن لُو طُقَّهَا بِي حَجَرْ !
يا الضو تَطُقَّهَا بي حجرْ .. في الجو ..
تَرمِّي لنا الخِيام ..
يا قطْرَِةَ التَرَاكُومَا ..
يا سكَّرْ .. دقيق .. ومعلبات .
ومنام .. منام
جات البلد .. تَعَتِبْ .. جراحَه مَسَبَبات
لون القمح ..
طعم التُمُرْ ..
ريحةَ الطَلِحْ ..
ضُل البرندات القُدام
البُرتُكان .. والمنقة .. والليمون
يجوهو .. منام .. منام
طُورِيْتُو .. فِطْنَ الكونْشِبِر .. مرْكُوزة تالا السام
تجيهو .. منام .. منام
المُشْرَع .. البنْطُون معَدِّي .. ودوْشَةَ العمال .. تجيهو .. منام .. منام
الروضة والأطفال .. بنات الإبتدائي .. العام .. تجيهو .. منام .. منام
الشارع الوسطاني .. والزاوية .. الَسَلام والناسْ ..
يجوهو .. منام .. منام
الصَفْقَة .. والطنْبُور .. ووِزَّاً عام .. يجيهو .. منام .. منام
الناس تقاومْ في البحرْ .. مرْيُوقَة .. مِتْماسكِين تمام ..
في القيف يجوهو منام .. منام
الأرْزَقِي أرباب البنوك .. شُلَّةْ حَرامِيْةَ الضلام
المُلُّسْ .. السادة الكرام .. لافِّين عليهُن زيْ غَفَر .. قاشْرِين
يجوهو طُمام .. طُمام
السُوق .. غَلاها .. الشُفَّع الأيتام ..
يجوهو .. دِيوش .. دِيوش ..
وبلا قروش .
اللجنة .. تجَّار الرصيف .. المسْخَرة .. الهدَّام ..
يجوهو .. كروش .. كروش
والضو يدُوش !
أصبح صباحِك .. يا البلد
واللاَّ العَفاريت أصبحت
يصْبِحْ صباحِك يا البلد
تَبْرِي وجرحْ بالك برد ..
والضو يعافِر في الجبل
مرُّوا بُو سابع يوم وِلاد
يا الضو حمارْتكْ .. طفَّحَت
أمِس الكلاب بَعَجَنَّهَا
كلبةْ مدينِة .. وديكا .. عِيك .
دحشك .. معاهُو دحيش غريب
خلِّينا فوق قوز الرماد
أدِّينا عيش وصبيط تَمُرْ .. يبقالو زاد
إسبوع يعيش كان الله اراد
أنا بُكْرَة صادْ .. كان الله راد
والضو خنس .. قنَّب حكَى
حكَى للوِلاد قصَّة تساب كم واربعين
حكَى بي مَغَسْ ..
كيف جِدُّو فات الدنيا .. فاكر الإنجليز ضربُوا البحر بالطائرات
شان يشْرَق المشروع يموت والأمَّة تنْشَتت .. شتات
قال وإنتكَى ..
" الإنجليز أذنابَه في .. وكم وأربعين مويات وجات"
صنَّة و بكى
بكى ما بكى
بكَّاهُو حِسْ الطائرات
بكَّاهُو قُدْرَتُو تنتهي
بكَّاهُو يرْجَى المعجزات
__________________

[ماريل]

...السرة بت عوض الكريم..

جات داخلة زي مرقة غضب
من جوف حليم في زمن
صعبْ رمت السلام ..
زي شنطة من كتف المسافر بي تعب
زي ردخة "رررب"
الله يا رب
قعدت علي طرف العنقريب المحازي الواطة
ضايرت التراب كسر العويش الفوقو شالت باصبعا وشختت شخيت
الله يا ربْ
عاينا فيها نكوس سبب للكفرنة وفورة الزهج
من دورة البال الوهيط
ما عودتنا تدس عوج تكتم فرح زي حالة الزول البسيط
صنقعنا في قعدتنا راجعت الوشوش
دنقرنا عن رفعة وشيها المتعب الجاد الرحيم
الطيب السمح المعافى رهاب رهاب ينشاف وسيم
اتوهطت فوق العنقريب القديم
من تاني ضايرت التراب كسر العويش الفوقو
شالت باصبعا وشختت شخيت قالت
تصدقوا آولاد ...
بقيت أبيت الليل أفكر
... في التميرات القدر
.... فوق راسا ما شالت سبيط غلبا الجرورة الفوق ضهرنا تنزلا
تطلق ضهرنا مع الجماعة
شن دهانا ؟
دي كم سنة ؟
والحال وقف
جف وحلف
ما فيهو من نقاط بسيط
كان بوشنا في حش التمور الليلة دوشنا مع اللقيط
أي لا حكت دي ولا بقت
ما كنا قايلين في حياتنا بيجينا أقسى من المضى
ساعة مروق الإنجليز قلنا الظلم راح وانقضى
تاريهو كمتر قام دقون حلفا وعُشر ... عميوق و نال دمسييس ... ضريسا شوك جمال ******************************** رُدخة:مقدار من القمح او التمر مثلا يكون ملفوف داخل كيس
المحازى الواطة:كناية عن قِصر العنقريب
العويش:غالبا كُسار جريد النخيل
الكفرنة:تعكير البال
عوج:كناية عن الحال المايل
رهاب:بعيد
الجرورة:الدَيَن
شن دهانا:ماذا حدث لنا
بوشنا:هو الاحتفال الذى تصاحبه الذبائح وشد المريسة قد يكون زواج ختان وغالبا ما يقام فى موسم حش التمر لان المال يكون وفير
اللقيط:جمع التمر المتناثر على الارض والفرق بينه وبين حش التمر ان الحش يكون للسبيطة من امها النخلة اما اللقيط فهو جمع ما تناثر من بلح حول النخلة
اى لا حكت دى ولا بقت:جملة متداولة تفسيرها ان هذا الشئ (لا سمعناهو لا شفناهو) كمتر،عميوق،نال،دمسيس،ضريسا،شوك جمال:كلها انواع من النباتات الطفيلية

[ماريل]

اللـــــــــــــــــــــــــــــه يا رب العالمين
الما جحدنا نعمتو فى الشوف والسمع ..راحة الولاده ولا قلوبنا عمن ولا غييرنا دين
فى الجابو ماقصر حمد
فى الشالو ماقلنالو وين ماشيبو وين

عدلت نعال مقلوبه فى الجيهه اليمين ..
حدرت شمال
زمنا مو ده .. الحيكومه كانت بت حلال
بى حالا .. بى حرب الجنوب .. بى قلة المال فى الجيوب
كانت رخيه العيشى .. الا ترا العوين الكبرو كبرو ملييسين
علمن يطير
ان كان هو ماصلح العوج
مافادنا شى ومحق القبيل لمينا هين .. فى هين
يا حليل رجالا سكتن قدرا غشاهم بالقفا .. وللليلى سيفن فى الجراب يهرج سنين
دا زمن قواسى زمن ضلاله ..اونطجيه زمن مهين
لاقين هواكم ضرو ضر ..يا عسكريا ماانتعظ ..كتل الرقاب بيودى وين
ضر .. يا جلاليبا رهاف ذمما خفاف .. ضر ياضرر .. ضر .. يادقين
متصلبتين عرق النبى ..وبالنار بتلعبو يا عوين
لى الحول قريب درب السلامه .. تخوجوبى درب الحرب ؟
غتى القلب .. ولا الحرب .. بقرة حلب .. والارض صين
ماكان عمل ماكن ده دين
يا ارزقيه تخمجو دم .. والدم مو مويه .. ومانا طين
متصلطين فى الناس دحين .. لامن يجى اليوم الفصل والحق يبين
وين تمشو .. وين تنسلو ..وين
كان طال وكان قصر الزمان .. الحين بحين...والحق ببين
***********************************
محق:بدد وضيع
هين:مقدار قبضة اليد وهنا كناية عن القلة
يهرج:الهَرِج هو الحديث الغاضب بصوت مرتفع
تخوجو:المشى فى الماء او الطين

[دياب الشاهر]

ماريل أو د هاجر احلاهما اليك تحيتي لك من النادر ان يهتم أحدهم لاعادة الأرواح الراحلة معنويا اشكرك لكتابتك الكرة هذه
مودتي لك‎ ‎

[ماريل]

كل الشكر أخ دياب
نعود لدوحة الحبيب (حميد)

[ماريل]

كَب يا رجالاً
سكّتُن
غدراً غشاهُن بالقَفا
ولليلِة سيفُن
في الجُراب
يهرجِ سنين ؟!
...
...
وإتاوَّهت ..
وحسِّيت
بأعماق الشوارع
والتواريخ المجيدة
إتأوّهت
وأدَّتني عين !
صنَّت شِوَيْتِْين ..
كُوركَت ..
يا بت ..
شمشنا إندهدَهَت
هُوي
يا بِنيِّة وِكتنا راح
شُوفِيلي
شافِع بت فطين
جاء من الطحين ؟!
الله !!
فترنا من الطحين !!؟
...
...
وكان الوكت
زالَف عصر
عين الشمش
مشدوهة
بي دوْشَة سحاب
عرَق المراكبيِّة
البعاد
راحِل
معَ ريحة التساب
ما تدري مارقِة
من البيوت
الحلِّة
ولاّ من التراب !؟
التاس تقول
مدقُوقَة
طالعِة على الحُقاب
مفلوقة
بي حجر الصعاب
المُرَّة
نازلِة على البحر
مشروقة
بي موية السراب
الفرَّ
مشنوقة عقاب ؟
يا الحُرَّة
كيف بِقت الرُقاب
مسْيوقة
بي قيد السلاب
وإنشرَّ
من نشر الحجاب
في عروقَه
أشكدِّي الخراب ؟!
من بعدِ
ما انبلج الفرج
من ضِْيقتا
خدعوها بي حيلة كتاب
رفعوهو فوق
سِن الحراب
ودهت الهزائم
خِلْقَتا
فالناس بدَل
عن نِقَّتا
التلقى فكَّة ريقتا
وبدل القصور
الفي الخيال
التبقى ماهلِة
كِرِْيرْقَتَا !!
وما جاتَه راحةً
طَلَقَتا
إلاَّ التعمِّر
طَلْقَته
في بندقيةً
حقَّتا
وبي ها الشوارع
وبقَّتا
تنسدَّ منَّك
دقَّتا
ودم فلْقَتا
ومُر شرْقَتا
ونار شنْقَتا
يا دقن
دينك سرْقَتا !!؟

[عادل عسوم]

سلام يادكتورة...
أترحم على روح الراحل حميد سائلا رحمن الدنيا والآخرة ورحيمهما ان يغفر له ويرحمه ويجعل الفردوس الاعلى مثواه...
ان الله وليُّ ذلك والقادر عليه
...
أثمّن عاليا هذا الجُهد النبيل وارى بأنه يستحق بأن يُبرز عاليا على سارية البانر كي يمر عليه قراء سودانيات رائحين وغادين ليمتعوا الأعين ويشنفوا الآذان وينال الوجدان منهم ريّا وتنتاب الارواح هدأة بين يدي هذه الكلمات البديعة والمعاني الجذلة والسياق الطروب ...
لعلي اقول -بين يديك-باني استصحب نية الكتابة عن حميد زمانا...لكنها الغصة ما فتئت تنتابني كلما استرجعت في ذاكرتي سنوات خلت -وانا حينها على اعتاب الجامعة...
يتبدى لي الرجل في ردهات هيئة الموانئ البحرية مقابل مدرسة جمال عبدالناصر وجامعة النيلين الحالية يأكل الفول ويحرص على دفع قيمة الشاي لكل زملائه ومن زارهم مثلي ...بين يدي قفشات له تسوقك سوقا فتجعلك:
(واقف فوق راس ميضنة...
لترقب:
جري الكلب في اللوبي)
الله يرحمك ياحميد
الله يرحمك ياحبيب
اقسم باني قد دمعت عيناي وانتابت حلقي غصة...
(لعلي اعود يا ماريل يابنت عمي)

[محمد إنسان جديد]

ياخ و الله شكراً دي حبببببه
خيط من أجمل ما يكون ..
هو السبب الخلاني سجلت في المنتدى عشان اقدر اوصل صوتي و اقول شكراً ..
..
ما تقيفو حميدو بحرو بلا ساحل ..
..
و عشان الناس كلها تستفيد ..
اقترح تعديل بسيييييييييط في العنوان و هو اضافة اسم الشاعر الكامل عشان الناس البتفتش في قوقل تقدر تشوف الخيط دا في النتائج الاولى للبحث لانو مهم شديد