التونسية

[شبارقة]

الخطوط التونسية في فترة من الفترات كانت واحدة من أكثر الخطوط وجاهة ً ودقة ً في المواعيد وفي جميع أنواع الخدمات .. وكان لا يستغل خط (الخرطوم – تونس) في ذاك الوقت إلا وجهاء القوم من السفراء والدبلوماسيين والعرسان المقتدرين وبعض السياح من ذوي اليسار .. وكان هناك خط طويل للتونسية يربط ما بين (الخرطوم – جدة – القاهرة – تونس) .. ونالت الخطوط الجوية التونسية شهرتها وسمعتها الطيبة في ذاك الزمن الجميل (نهاية السبعينيات وحتى منتصف الثمانينيات) مثلها مثل الخطوط الأثيوبية..

حكي لي أحدهم أنه في واحدة من مدن السودان إتخذ بعض من إبتلاهم الله بفقدان العقل بصا ً متهالكا ً قديما ً قابعا ً على الأرض إتخذوهوا مقرا ً لهم يجتمعون فيه دائما ً ليلا ً ونهارا ً .. وكـُتـِب بالخط العريض على جوانب ذاك الباص (الخطوط التونسية) تيمنا ً بالخطوط التونسية وشهرتها في ذاك الوقت وأصبح ذاك الباص المتهالك مشهورا ً بالتونسية ... وأصبح الناس ينعتون كل من أصابه الله بفقدان العقل بأنه ركب مع الجماعة في التونسية (والمقصود الباص طبعا ً) وأصبحت تلك الجملة متداوله على نطاق واسع في السودان على شاكلة: أركـّبك التونسية .. أو ح تركـّبنا التونسية .. إلخ وهي كناية عن فقدان العقل.

ما دعاني للتوضيح أعلاه هو كثرة إستخدام هذا التعبير (التونسية) في منتدانا هذا وفي كثير من المواقع أو إستخدامنا للكثير من التعابير دون أن ندرك معناها أو دلالاتها .. الأمر الذي قد يوقعنا في الحرج أحيانا ً.

شكرا ً لكم ،،،

[أبوبكر عباس]

سلام يا شبارقة
أول مرة أعرف إنها تستعمل كناية عن فقدان العقل!
كنت أتخيل انو الإستعمال مربوط بسرعة الخطوط التونسية ودقتها، مثلا:
- واحد مكيس واحدة، وجاء واحد تاني حلّ محله، طوالي بقولوا ليك: فلان داك، ركبو التونسية، كنت أعتقد أنها تعني طفشوهو بسرعة ودقة!
- المادة الصعبة بالكلية الممكن تفصل الطلاب، يقولوا ليك: أعمل حسابك من المادة دي، بتركبك التونسية، كنت أعتقد إنها تعني بترجعك أهلك بسرعة وفي الزمن!

[كيشو]

المشاركة الأصلية كتبت بواسطة شبارقة

وأصبح الناس ينعتون كل من أصابه الله بفقدان العقل بأنه ركب مع الجماعة في التونسية (والمقصود الباص طبعا ً) وأصبحت تلك الجملة متداوله على نطاق واسع في السودان على شاكلة: أركـّبك التونسية .. أو ح تركـّبنا التونسية .. إلخ وهي كناية عن فقدان العقل.

ما دعاني للتوضيح أعلاه هو كثرة إستخدام هذا التعبير (التونسية) في منتدانا هذا وفي كثير من المواقع أو إستخدامنا للكثير من التعابير دون أن ندرك معناها أو دلالاتها .. الأمر الذي قد يوقعنا في الحرج أحيانا ً.

شكرا ً لكم ،،،

سلام يا شبارقة
وشكراً على التوضيح
غايتو في منتدانا دا يجوز استخدام التونسية خاصة بعد التوضيح
يعني الحكاية حتزيد

[فتح العليم]

سلام واحترام ياشبارقة
وشكرا لك على اعادة تلك الذكريات .
وشوف الحكاية دي عن التونسية التى تفنن فيها الجميع .
عريس مغترب ركبوهو التونسيه
دي قصه واقعيه حصلت لي احد المغتربين بالخليج .. زي اغلب المغتربين اخونا كان بفكر في الزواج وكالعاده رسلو ليهو شريط عرس عشان يشوف ويختار (تقول داير يشتري شوال رز) قام لقط ليهو واحده كدا خطفت قلبو من اول نظره وقال بس دي شكلها كدا بت عسل قام كلم اهلو ومشو اتقدمو لي اهلا والبت عندها اختها اكبر منها لسا ما جاها النصيب قامو اهلا قالو يعرسو البت الكبيره عشان ما تبور وعملو العرس ورسلوها (كالعاده زي الطرد) للعريس القاعد منتظر في المطار مستني يشوف العروس المرتقبه لما وصلت بالسلامه العريس من شدة الخلعه عيونو مرقت متر بره قام قاليها انتي ما العروس الانا شفتك في الصوره ؟؟؟؟ ردت قالت : اي انا اختا واهلي عرسوني ليك بدل اختي (تقول قاليهم شوفو لي اي بت منكم اعرسا ورسيلوها ) قام قليها شوفي يابت الطياره الجيتي بيها ترجعي بيها سريع .
قالت ليهو اخوي والله انا ما عندي ذنب دي امي العملت الحركه دي وهي غلطانه وانت معاك حق لكن انا منظري بكون بايخ شديد لمن ارجع طوالي كدا والناس حيقولو شنو (دايرا تحنكو .. ان كيدهن عظيم ) خليني اقعد يومين وبعدين رجعني شويه اهون من رجعة طوالي دي قام صاحبنا حنا ورأف بها قام ساقا البيت .............................. لليوم دا لسا ما رجعت

اخد عليها ورضا بيها كيف الله اعلم ( الستات بعملو المستحيل ) سبحان الله دا نصيبا

[كيشو]

المشاركة الأصلية كتبت بواسطة فتح العليم الإمام

سلام واحترام ياشبارقة
وشكرا لك على اعادة تلك الذكريات .
وشوف الحكاية دي عن التونسية التى تفنن فيها الجميع .
عريس مغترب ركبوهو التونسيه
دي قصه واقعيه حصلت لي احد المغتربين بالخليج .. زي اغلب المغتربين اخونا كان بفكر في الزواج وكالعاده رسلو ليهو شريط عرس عشان يشوف ويختار (تقول داير يشتري شوال رز) قام لقط ليهو واحده كدا خطفت قلبو من اول نظره وقال بس دي شكلها كدا بت عسل قام كلم اهلو ومشو اتقدمو لي اهلا والبت عندها اختها اكبر منها لسا ما جاها النصيب قامو اهلا قالو يعرسو البت الكبيره عشان ما تبور وعملو العرس ورسلوها (كالعاده زي الطرد) للعريس القاعد منتظر في المطار مستني يشوف العروس المرتقبه لما وصلت بالسلامه العريس من شدة الخلعه عيونو مرقت متر بره قام قاليها انتي ما العروس الانا شفتك في الصوره ؟؟؟؟ ردت قالت : اي انا اختا واهلي عرسوني ليك بدل اختي (تقول قاليهم شوفو لي اي بت منكم اعرسا ورسيلوها ) قام قليها شوفي يابت الطياره الجيتي بيها ترجعي بيها سريع .
قالت ليهو اخوي والله انا ما عندي ذنب دي امي العملت الحركه دي وهي غلطانه وانت معاك حق لكن انا منظري بكون بايخ شديد لمن ارجع طوالي كدا والناس حيقولو شنو (دايرا تحنكو .. ان كيدهن عظيم ) خليني اقعد يومين وبعدين رجعني شويه اهون من رجعة طوالي دي قام صاحبنا حنا ورأف بها قام ساقا البيت .............................. لليوم دا لسا ما رجعت

اخد عليها ورضا بيها كيف الله اعلم ( الستات بعملو المستحيل ) سبحان الله دا نصيبا

سلام يا فتح العليم
الزول دا ما كان يختها في أمانات المطار طالما هي طرد
غايتو دا لو كنت أنا كنت حأرجعا حتى لو كانت هي الأجمل، جني وجن سياسة الأمر الواقع دي
هسي الزواج دا كيف من الناحية الشرعية والقانونية؟

[فتح العليم]

المشاركة الأصلية كتبت بواسطة كيشو

سلام يا فتح العليم
الزول دا ما كان يختها في أمانات المطار طالما هي طرد
غايتو دا لو كنت أنا كنت حأرجعا حتى لو كانت هي الأجمل، جني وجن سياسة الأمر الواقع دي
هسي الزواج دا كيف من الناحية الشرعية والقانونية؟

مرحبا كيشو
لو قمنا اتلكمنا عن الناحية الشرعية والقانونية حا نخرب بوست شبارقة الراجل الطيب خلينا في نكهة التونسية ، وامكن نعمل بوست مستقبلا مستقل عن هذا الموضوع .
احترامي وتقديري

[رأفت ميلاد]

سلامات يا شبارقة

جميل جداً نتملك قصة ميلاد المثل .. لكن تطور المثل عن الحقيقة ليهو عوامل كثيرة منها النقل وتلاعب الظرفاء فيه فى مختلف الأحداث. لكن ما أعتقد مشكة إذا شرح المعنى المقصود .. زى أغلبنا يقول (وأتت جهينة بالخبر البقين) وأنا من الناس العرف الأسم جهيزة هنا .. وأصل المثل (قطعت جهيزة قول كل خطيب) .. وبرضو قصة المثل ما معروفة للجميع .. لكن بتأدى المطلوب

أنا سمعت قصة (سنة) البقولوها زمان .. قالوا حصلت فى بانت فى مدنى فى البيوت المبنية على الخيران .. الحيطة من برة بطول الخور ومن جوة قصيرة .. قالوا الحرامى صحوا بيهو قام نط الحيطة بكل رشاقة .. طلعوا الشارع لقوهو مكوم .. واحد قال صاحبك لامن دق الواطة قال سنة يا الحيطة

[شبارقة]

المشاركة الأصلية كتبت بواسطة بابكر عباس

سلام يا شبارقة
أول مرة أعرف إنها تستعمل كناية عن فقدان العقل!

هلا ومرحبا بدكتورنا بابكر

نعم فالكثيرون يستعملون هذا الرمز (التونسية) أو يمر عليهم (وبالذات في الأسافير) وهم لا يدركون معناه أو مناسبته .

الغريبة يا د. بابكر بنستعمل مصطلحات أو ألفاظ كثيرة ونحن ما عارفين أصلها أو معناها ... مثال : الما عارف يقول عدس ... تستخدم كثيرا ً وإذا سألت أحدهم عن قصة المثل تلقاهو ما عارف ... علما ً بأننا لو عرفنا القصة الحقيقية لأمتنعنا عن ترديد هذه المقولة وتوارينا خجلا ً منها.

شكرا ً لك على إثراء الحوار

[شبارقة]

المشاركة الأصلية كتبت بواسطة كيشو

سلام يا شبارقة
وشكراً على التوضيح
غايتو في منتدانا دا يجوز استخدام التونسية خاصة بعد التوضيح
يعني الحكاية حتزيد

وعليكم السلام يا مولانا

بـُعد الشر على ناس المنتدى ياخ .. لكن بيني وبينك الراكبين التونسية ماهم شوية

بالمناسبة يا عصام أنا في يوم من الأيام ركبت التونسية .. التونسية الأصل ما الباص ياخ .. مشيت بيها من الخرطوم إلى القاهرة عن طريق جدة في العام 1984م.. عشان كده حكيت عن إنطباعي لمن قلت في المداخلة الأولى إنو الخطوط التونسية واحدة من أكثر الخطوط وجاهة ً ودقة ً في المواعيد وفي جميع أنواع الخدمات.

تشكر يا كيشو .

[شبارقة]

المشاركة الأصلية كتبت بواسطة فتح العليم الإمام

سلام واحترام ياشبارقة
وشكرا لك على اعادة تلك الذكريات .
وشوف الحكاية دي عن التونسية التى تفنن فيها الجميع .

المشاركة الأصلية كتبت بواسطة كيشو

غايتو دا لو كنت أنا كنت حأرجعا حتى لو كانت هي الأجمل، جني وجن سياسة الأمر الواقع دي
هسي الزواج دا كيف من الناحية الشرعية والقانونية؟

المشاركة الأصلية كتبت بواسطة فتح العليم الإمام

مرحبا كيشو
لو قمنا اتلكمنا عن الناحية الشرعية والقانونية حا نخرب بوست شبارقة الراجل الطيب خلينا في نكهة التونسية ، وامكن نعمل بوست مستقبلا مستقل عن هذا الموضوع .
احترامي وتقديري

حباب أخونا فتح العليم .. الرجل الذي تشرفنا بمعرفته عن قرب

ياخوي البوست قضى غرضو إتكلمو ساي إنت وكيشو عن النواحي الشرعية والقانونية .

شكرا ً يا غالي ،،،

[زول الله]

المشاركة الأصلية كتبت بواسطة رأفت ميلاد

لكن تطور المثل عن الحقيقة ليهو عوامل كثيرة منها النقل وتلاعب الظرفاء فيه فى مختلف الأحداث. لكن ما أعتقد مشكة إذا شرح المعنى المقصود ..

والله يامقدس باقيلي اذا شرحنا قصة التونسية زي ماوصلتنا ح تبقى مشكلة
ف قلنا نخلي الناس تعرفا بي شرح شبارقة المحترم دا
اهو في النهاية كلو ترحيل

سنة يالحيطة






اقول قولي هذا واستغفر الله لي..................

[AMAL]

شبارقة والبوستات ذات الطعم واللون والرائحة
ياخ شكرا ليك
كنت فاكرة بقصدوا زول مشي ومابرجع تاني زي بن علي كدا


شكرا ابو البنات

[شبارقة]

المشاركة الأصلية كتبت بواسطة رأفت ميلاد

أنا سمعت قصة (سنة) البقولوها زمان .. قالوا حصلت فى بانت فى مدنى فى البيوت المبنية على الخيران .. الحيطة من برة بطول الخور ومن جوة قصيرة .. قالوا الحرامى صحوا بيهو قام نط الحيطة بكل رشاقة .. طلعوا الشارع لقوهو مكوم .. واحد قال صاحبك لامن دق الواطة قال سنة يا الحيطة

سلامات حبيبنا ود ميلاد

قصتك صحيحة ولكن نحن سمعناها بأنو الحرامي لما نط الحيطة تلب ليهو في مستراح محفور جديد ولسه ما أنعرش (أقل حاجة عمقو يكون 7 أمتار) .. دي حيطة شنو دي ؟

وبمناسبة سنة دي .. زماااان وأنا طالب في تانية ثانوي (في حلفا الجديدة) وأول مرة أشاغل في حياتي شاغلت لي طالبة جميلة في الشارع وأنا جاي من المدرسة قلت ليها : سنة يا أنا .. ومن الخوف ما أستنيت ردة فعلها .. المهم كانت أول وآخر مرة وعشان كدة كلما أسمع (سنة) بتذكر الموقف داك .. براءة وزمن جميل ياخ.

شكرت يا رأفت ياخ .. أثرت شجوننا ،،،

[الرشيد اسماعيل محمود]

سلامات يا شبارقة،، ومبروك البوست الجديد (بعد غيبة)
في منتدي كوورة سودانية في عضو فاتح نفس البوست دا، وفي النهاية نوّه لي إنو البوست فاتحو شبارقة في سودانيات وهو قام بنقله للفائدة العامّة، في البداية أنا قلت يمكن شبارقة دا، مشترك في منتدي كوورة وهلالابي كمان.
في رأي إتكتب في نفس البوست ومخالف للرواية الإنت جبتها كاتبو عضو مسمّي نفسو (أبو عكّاز) بقول:

لا ياحبيب ،،
التونسية عبارة كانت مكتوبة في كومر الشرطة المستخدم في الكشات في القسم الشمالي بالخرطوم ((قسم المديرية ))في السبعينات ،، و يبدو أن كاتبها شرطي معجب بتونس أو بتونسية ،، و كان هذا الكومر يستخدم في كشات السوق العربي ، و عندما يقبض على شخص الناس كانت بتقول ركبوهو التونسية ،، نظراً للكلمة الكانت مكتوبة في الكومر
و قد حصل أن تم عمل تحقيق صحفي مشهور في جريدة الصحافة و جابو صورة نفس الكومر ،، و مكتوب عليه من الخلف كلمة ( التونسية ) ،،
دي القصة الحقيقية يا حبيب

دة الرابط:
http://forum.kooora.com/f.aspx?t=32719379

[شبارقة]

المشاركة الأصلية كتبت بواسطة زول الله

والله يامقدس باقيلي اذا شرحنا قصة التونسية زي ماوصلتنا ح تبقى مشكلة
ف قلنا نخلي الناس تعرفا بي شرح شبارقة المحترم دا

سلامات أخونا خلف

زمااان ناسنا حكو قصة الصقر الكان طائر ومحلق في سماء القدنبلية وشايل دبيب في خشمو وبعدين الدبيب وقع منو .. وقع منو في لوري مليان ناس .. قام الدبيب عضه ليك واحد من الناس ديل والزول مات في الحال .. والناس يحكو في القصة دي بإنفعال طفولي وشايلاهم الهاشمية وهم يتطرقو للقصة دي .. المهم في الموضوع أنا سمعت القصة دي يمكن عشرين مرة بعد داك وكلو واحد يحكيها يديها كوز ويقول ليك حصلت في بلدنا

المهم قصتي حقت التونسية دي هي المقبولة والمعقولة لأنو مافي غيرها في زماننا ذاك.