سودانيات إلى أين ؟؟

[أبومناهل]

قبل فترة ليست بعيدة كان المنتدى ( يغلي ) بموضوع يتعلق بما إعتبره البعض إساءة للزميلات
في سودانيات وعلى الرغم أن أصل الموضوع كان يدور خارج المنتدى ولم تنطلق شرارته في المنتدى ورغم أن بعض أطرافه لم يكونوا أعضاء هنا ولكن رغم ذلك تم إغراق المنتدى بالبوستات التي تشجب وتدين والتي تؤيد وتدافع وتحمي . . ومع تباين وجهات النظر بين الطرفين
حاولت التداخل وتلطيف الجو ببوست فكاهي .. لم يمضي على إنزال البوست أكثر من ( 4 ) دقائق إلا وهاتفني الأمين العام الأستاذ / النور يوسف . . والشهادة لله كان ( راجياً ) لا آمراً أن أوافقه على سحب البوست لأن الموقف لا يحتمل .
ورغم بساطة فكرة البوست وطابعه الفكاهي . . آثرت أن أوافقه على طلبه وقلت أنني ربما لا أدرك كل أبعاد القصة . . ولكن حزنت لأن الناس في سودانيات أصبحت تحمل المواضيع فوق ما تحتمل .
تذكرت هذا الموقف وأنا أتابع ما وصلت إليه الحال في بوست سمراء . . ورغم فرحي عند قراءة الصفحات الأوائل في البوست بروح الزملاء وعودة بعض الأقلام الجميلة ومنيت نفسي بعودة روح سودانيات .
ولكن كالعادة تحول الموضوع لوصاية وفرض رأي وتوجيه و . . و . . و ... إلخ .
أدركت حينها لماذا يبتعد البعض . . ولكن هل الإبتعاد هو الحل ؟؟

[سمراء]

صديقنا ابو مناهل

لا اخرج عن كلامك كثير فقط اود ان تتزكر شى يا ابو مناهل
ليه بقينا بنزعل بسرعة عندما نواجه براى مخالف !!
اليس من الطبيعى ان يحدث خلاف او اختلاف بين الاخوة ، خصوصا الاخوة الذين ارتضو
علاقاتهم بكامل اختيارهم ، وليست علاقات مفروضة كالاخوة فى المنزل !!

ليه بقينا نحّمل اى خلاف او اختلاف راى فوق مايحتمل ؟

انا اعتقد عشان نطلع من الدائرة دى ، مفترض اى انسان يراجع نفسو وعلاقاتو مع الاخر- او الاخرين ، اقلاها بنعرف بعداك حدود امكانية تقبل كلامهم جوانا !!

ياريت نراجع علاقاتنا بكل حيادية ...

[المليجي]

المشاركة الأصلية كتبت بواسطة أبومناهل

أدركت حينها لماذا يبتعد البعض . . ولكن هل الإبتعاد هو الحل ؟؟

العزيز ابو مناهل
مساء الخير
الابتعاد من وجهة نظري حل مؤقت
المشكلة بترجع لقوة الراس اسي لو لاحظت اي مشكلة بتحصل
كل زول عايز يثبت انو هو الصح مهما كلف الامر وحتى لما ينصاع تلاقيهو بنصاع في بوست
متفرع يعني بغلبو الانصياع في نفس المكان الكان بكابر فيهو والكلام دا معمم لمعظم مشاكل البورداب في وجهات النظر المختلفة بينهم والبتكبر وتبقى تحديات حتى وان كانت مجرد كلام في الاخير بجرح شخص ماليهو ذنب بكل الحاصل.
ربنا يهدي النفوس
مودتي لك

[أبوبكر عباس]

المشاركة الأصلية كتبت بواسطة أبومناهل

تذكرت هذا الموقف وأنا أتابع ما وصلت إليه الحال في بوست سمراء . . ورغم فرحي عند قراءة الصفحات الأوائل في البوست بروح الزملاء وعودة بعض الأقلام الجميلة ومنيت نفسي بعودة روح سودانيات .
ولكن كالعادة تحول الموضوع لوصاية وفرض رأي وتوجيه و . . و . . و ... إلخ .
أدركت حينها لماذا يبتعد البعض . . ولكن هل الإبتعاد هو الحل ؟؟

العود أبو مناهل
كيف حالك؟ و إزيك؟
سعيد جدا برجوعك
سودانيات بخير كثير و ماشه بشكل جيد
يا أخي عليك الله شوف البوست بتاع محسن خالد الأخير دا! و الله تمشي كلية دراما ما تلقى ليك تحليل عظيم زي دا ..
بوست سمرا الأخير دا من البوستات الجيدة
كدي عليك الله شوف المداخلات بتاعة خالد الحاج في البوست دا و اللنكات الجابها، دا شئ ممتاز...
مداخلات رأفت و عبد الجليل كانت عظيمة
صحي في هنات جات في بعض المداخلات، لكنها كانت خفيفة و حتى لما سارا إعترضت عليها، إعترضت بإسلوب راقي جدا و تبرع معتصم بإعتذار و أعتقد سارا فوتت الموضوع
ما عارف! لكن المنتدى جيد و الإختلاف ظاهرة صحية..

[أبومناهل]

المشاركة الأصلية كتبت بواسطة سمراء

صديقنا ابو مناهل

لا اخرج عن كلامك كثير فقط اود ان تتزكر شى يا ابو مناهل
ليه بقينا بنزعل بسرعة عندما نواجه براى مخالف !!
اليس من الطبيعى ان يحدث خلاف او اختلاف بين الاخوة ، خصوصا الاخوة الذين ارتضو
علاقاتهم بكامل اختيارهم ، وليست علاقات مفروضة كالاخوة فى المنزل !!

ليه بقينا نحّمل اى خلاف او اختلاف راى فوق مايحتمل ؟

انا اعتقد عشان نطلع من الدائرة دى ، مفترض اى انسان يراجع نفسو وعلاقاتو مع الاخر- او الاخرين ، اقلاها بنعرف بعداك حدود امكانية تقبل كلامهم جوانا !!

ياريت نراجع علاقاتنا بكل حيادية ...

معليش ياسمراء على فهمي لكن بصراحة مداخلتك الفوق دي كلها مافهمت منها شئ
غايتو الشئ الوحيد الوحيد القدرت أفهمو حكاية ليه بنزعل عندما نواجه برأي مخالف ( ده لو ما كان فهمي ليها خاطئ برضو )
القال ليك منو ياسمراء أنا زعلان ؟؟؟

[نبراس السيد الدمرداش]

صباحاتك خير
ازيك و مشتاقين

مرات الابتعاد او الاصح الصمت بكون حل
حفاظا على حبل الود بين الناس
والابتعاد او الصمت ما ضعف ولا هروب
فقط حتى تهدأ النفوس

زي ما قالت سمراء انا اخترت فلان و فلان عشان يكونو اصدقاء و مقربين مني
بالتالي مفترض اكون بفهمهم كويس و بعرف بقصدو من كلامهم معاي ولي شنو
حتى لو كان الكلام حار ,, و افكر منو و شنو الادا فلان مساحة قدر دي
تسمح ليهو ينصحني و يوجهني بل يوبخني ,, يبقى يا نتحمل بعض او نراجع هذه العلاقات

بوست سمراء اعتقد انو وصل الفكرة الاساسية منو
انا واحده من الناس ضحكت جدا و استمتعت ببعض القفشات فيه و امتعضت من بعضها
لانو يا ابو مناهل ما يصلح لان تتداوله انت و الجيلي و عثمان وكل قبيلة الرجال لا يصلح ان يقال كله في العام و نحن معاكم هنا ,, نحن برضو عندنا ونستنا الدقاقه زيكم بس ما كلها بتسمعوها لانو زي ما قال معتصم ما للعام للعام وما للخاص للخاص

[ام التيمان]

سودانيات بخير
المشكلة فى الشللية
و خاصة النساء
اكثر من الرجال

[سمراء]

المشاركة الأصلية كتبت بواسطة أبومناهل

معليش ياسمراء على فهمي لكن بصراحة مداخلتك الفوق دي كلها مافهمت منها شئ
غايتو الشئ الوحيد الوحيد القدرت أفهمو حكاية ليه بنزعل عندما نواجه برأي مخالف ( ده لو ما كان فهمي ليها خاطئ برضو )
القال ليك منو ياسمراء أنا زعلان ؟؟؟

ابو مناهل انت ليه داخل الليلة وبتشخصن فى كلامى !!!
ياخ انا معليش حبيت ازيد واوسع فى ماعون فهمك اقول رائى بس !!

وعموما انا مامختلفة معاك ولا واقفة ضدك فى شى !! وبتكل على العموم !
وكلامى ما اعتقد فيهو شفرة عشان يكون ماواضح

غايتو جنس غايتو

[أبومناهل]

المشاركة الأصلية كتبت بواسطة المليجي

العزيز ابو مناهل
مساء الخير
الابتعاد من وجهة نظري حل مؤقت
المشكلة بترجع لقوة الراس اسي لو لاحظت اي مشكلة بتحصل
كل زول عايز يثبت انو هو الصح مهما كلف الامر وحتى لما ينصاع تلاقيهو بنصاع في بوست
متفرع يعني بغلبو الانصياع في نفس المكان الكان بكابر فيهو والكلام دا معمم لمعظم مشاكل البورداب في وجهات النظر المختلفة بينهم والبتكبر وتبقى تحديات حتى وان كانت مجرد كلام في الاخير بجرح شخص ماليهو ذنب بكل الحاصل.
ربنا يهدي النفوس
مودتي لك

شكراً يامليجي
لكن ليه نحن دوماً أي نقاش أو حوار عايزين يكون فيه فائز ومهزوم ؟؟
ليه لازم واحد ينصاع ؟؟ وعلى الإطلاق ما شرط أن أي موضوع يطرح الناس لازم تصل فيه
لنقطة إتفاق ينصاع لها الجميع .. المهم كل واحد يطرح رأيه وصاحب العقل يميز .

[أبومناهل]

المشاركة الأصلية كتبت بواسطة بابكر عباس

العود أبو مناهل
كيف حالك؟ و إزيك؟
سعيد جدا برجوعك
سودانيات بخير كثير و ماشه بشكل جيد
يا أخي عليك الله شوف البوست بتاع محسن خالد الأخير دا! و الله تمشي كلية دراما ما تلقى ليك تحليل عظيم زي دا ..
بوست سمرا الأخير دا من البوستات الجيدة
كدي عليك الله شوف المداخلات بتاعة خالد الحاج في البوست دا و اللنكات الجابها، دا شئ ممتاز...
مداخلات رأفت و عبد الجليل كانت عظيمة
صحي في هنات جات في بعض المداخلات، لكنها كانت خفيفة و حتى لما سارا إعترضت عليها، إعترضت بإسلوب راقي جدا و تبرع معتصم بإعتذار و أعتقد سارا فوتت الموضوع
ما عارف! لكن المنتدى جيد و الإختلاف ظاهرة صحية..

بكور ( ولا ما أدلعك )
تحياتي
سودانيات دي بيتنا الجميل .. رغم إنو كبير وواسع لكن بتحس إنك بتعرف كل أركانه
بس ياخ في الفترة الأخيرة أصبحت الشغلانية كأنها ( محاكمة نوايا ) .
من زمان الناس تكتب وتختلف ولم يصدر أحدهم حكماً يلزم به الآخرين .. دي مسألة جديدة وصعب التعايش معها .
والإختلاف مش ظاهرة صحية وبس بل أن أعتبره مهم جداً ولا غنى عنه وكلما إختلفت الأراء وتعددت كلما كانت الفائدة أعظم وعندما تتعدد الأراء والأفكار بلاشك تتفتح مداركنا لآفاق أرحب .

[المليجي]

المشاركة الأصلية كتبت بواسطة أبومناهل

[color=#4169E1 المهم كل واحد يطرح رأيه وصاحب العقل يميز .[/color]

بالضبط كدا

..
حاجه تانية
رجاء بسيط ممكن تصححوني فيهو لو غلطان
البوست البكون محموم او مشحون اتمنى باقي الاعضاء تديهو الطرشا
دا اقتراح مني ممكن يكون على صواب وممكن يكون خطاء ودي طريقتي.
دياما الغرض من المشاركات بتكون عايزة تخمد النارفي حالة التلاسن الغير محبوب
بس بحصل العكس في اغلب الاحيان والجاي يطفيها تلاقيهو اتكوى بيها ويزيد الطين بلا

[بدر الدين اسحاق احمد]

المشاركة الأصلية كتبت بواسطة أبومناهل

شكراً يامليجي
لكن ليه نحن دوماً أي نقاش أو حوار عايزين يكون فيه فائز ومهزوم ؟؟
ليه لازم واحد ينصاع ؟؟ وعلى الإطلاق ما شرط أن أي موضوع يطرح الناس لازم تصل فيه
لنقطة إتفاق ينصاع لها الجميع .. المهم كل واحد يطرح رأيه وصاحب العقل يميز .

كلام ذى الدهــب

[تجـــاني]

المشاركة الأصلية كتبت بواسطة أبومناهل

ولكن كالعادة تحول الموضوع لوصاية وفرض رأي وتوجيه و . . و . . و ... إلخ .
أدركت حينها لماذا يبتعد البعض . . ولكن هل الإبتعاد هو الحل ؟؟

المشاركة الأصلية كتبت بواسطة أبومناهل

ليه لازم واحد ينصاع ؟؟ وعلى الإطلاق ما شرط أن أي موضوع يطرح الناس لازم تصل فيه
لنقطة إتفاق ينصاع لها الجميع .. المهم كل واحد يطرح رأيه وصاحب العقل يميز .

سلامات يا ابو مناهل ...
أبو مناهل كلامك الأول انت بنيتو على أساس في وجهة نظر مخالفة للجميع في البوست المعنى ، وسبحان الله كلامك التاني نقض غريب للكلام الاول...
شنو اللى بخلى كلامك انت ابو مناهل في البداية اعتراض على وصاية وتجي بنفسك وتقرر للناس فى المداخلة التانية بقولك (المهم كل واحد يطرح رأيه وصاحب العقل يميز) ؟؟؟ يعني الناس لما وجهت وبقت وصية (على حد قولك) خطأ !!!
وتجي بعضمة كيبوردك تقول لينا كل واحد يطرح وصاحب العقل يميز الاقتباسين الفوق ديل بقدر ما انا والله قدرت اقارن بينهم لقيت انى ما قادر أفهم انت عايز من الناس شنو !!! زول جاء كتب رأيه انت قلت دي وصاية وتاني قلت المهم اى زول يطرح رأيه ...
اها نعمل شنو نكتب رأينا وتبقى وصاية وتوجية ولّ المهم أى زول يطرح رأيه وصاحب العقل يميز !!!!!!!!!!!!!!!!!!!!!!!!!!!!!!1

فتك بعافية

[أبومناهل]

المشاركة الأصلية كتبت بواسطة نبراس السيد الدمرداش

صباحاتك خير
ازيك و مشتاقين

مرات الابتعاد او الاصح الصمت بكون حل
حفاظا على حبل الود بين الناس
والابتعاد او الصمت ما ضعف ولا هروب
فقط حتى تهدأ النفوس

زي ما قالت سمراء انا اخترت فلان و فلان عشان يكونو اصدقاء و مقربين مني
بالتالي مفترض اكون بفهمهم كويس و بعرف بقصدو من كلامهم معاي ولي شنو
حتى لو كان الكلام حار ,, و افكر منو و شنو الادا فلان مساحة قدر دي
تسمح ليهو ينصحني و يوجهني بل يوبخني ,, يبقى يا نتحمل بعض او نراجع هذه العلاقات

بوست سمراء اعتقد انو وصل الفكرة الاساسية منو
انا واحده من الناس ضحكت جدا و استمتعت ببعض القفشات فيه و امتعضت من بعضها
لانو يا ابو مناهل ما يصلح لان تتداوله انت و الجيلي و عثمان وكل قبيلة الرجال لا يصلح ان يقال كله في العام و نحن معاكم هنا ,, نحن برضو عندنا ونستنا الدقاقه زيكم بس ما كلها بتسمعوها لانو زي ما قال معتصم ما للعام للعام وما للخاص للخاص

تحياتي يانبراس
الإبتعاد عمرو ما كان حل وعمرو ما ح يهدي النفوس ليه ؟؟؟ تفتكري لو في واحد أسأ ليك أو أغلظ في القول هل إبتعادك يريحك أم سيظل شئ في نفسك ؟؟
بنفس القدر عندما أدافع عن فكرة ( ما ) ويقابلني شخص ذو منطق يستطيع أن يقلب حقائق الأشياء وأتواصل معه في سجال يمتد إلى صفحات هل أنسحب ؟؟
الإنسحاب في الحالة دي أنا بعتبره واحد من إتنين إما أن يكون كفر بالفكرة التي تم طرحها أو تحقير للطرف الآخر لا غير .
لك مودتي وتقديري

[أبومناهل]

المشاركة الأصلية كتبت بواسطة المليجي

بالضبط كدا

..
حاجه تانية
رجاء بسيط ممكن تصححوني فيهو لو غلطان
البوست البكون محموم او مشحون اتمنى باقي الاعضاء تديهو الطرشا
دا اقتراح مني ممكن يكون على صواب وممكن يكون خطاء ودي طريقتي.
دياما الغرض من المشاركات بتكون عايزة تخمد النارفي حالة التلاسن الغير محبوب
بس بحصل العكس في اغلب الاحيان والجاي يطفيها تلاقيهو اتكوى بيها ويزيد الطين بلا

والله كلامك ده على حسب موضوع البوست ومدى مشاركتك فيهو يمكن يكون جزئياً صاح بمعني إن لم تشارك فيه يمكنك عدم التداخل خصوصاً إن كان الموضوع لا يعنيك وإن كانت مداخلتك غير مؤثرة على مسار النقاش لكن لايمكن تطرح ليك كلام تخلي الناس تعافر وتنسحب أي بمعنى كلامك ( تديهو الطرشا ) ده أنا شخصياً بعتبره تحقير للمحاور أياً كان درجة إختلافك معاهو وإلى أي درجة ممكن يصل هذا الخلاف .