خنساء السودان والدة الشهيد علاءالجاك ترثي ولدها

[Hassan Farah]

10-03-2013 06:02 PM
عمر الفاروق عبد الله

هاهي خنساء السودان والدة الشهيد علاء الدين الجاك ترثي ولدها وتقدمه فدا للسودان

ونحن نقول لها دم ابنك ان شاء الله لن يضيع هدر بل هو مهر لسودان جديد بإذن الله سودان الحرية والعزة والعيش الكريم

والدة الشهيد علاء الدين الجاك : حبابو الحر ولدي ما احتار وقف بين بين اختار الشعب ابوه والشرفا والطيبين



والدة الشهيد علاء الدين الجاك ترثيه
يا حلال العقد
هداي هوام الليل
لحاق الضعيف
الحملو هدا الحيل
فراج الكرب
زاد حملي أضحى تقيل
وضاق واسع الفضاء
كتر اﻷسى والويل
جود بالجود والطف
الدم دفر زي السيل
جناااااااي…
كت داخراهو للعوجة والزمان الشين
وكت راجياه سند لي وضي العين
رضعتو السماح الزين جنا الزينين
وسقيتو الحنين ولدي الشفوق وحنين
وريتو الصح بي وين
ووين الكضب والشين
حبابو الحر ولدي
ما احتار وقف بين بين
اختار الشعب ابوه
والشرفا والطيبين
وليييييدي….
ما سويت عوج قصدوك يا جنايا
وما اندسيت جريت ما جبنت يا عشايا
وكت يوم شليق لقوك بعصايا
ولدا زين سمح ما احتجت لي وصايا
سرج خيلك مشيت للشمسو ضوايا
عافيالك جناي بلقاك في الجايا
حاكمنا…
الراعي اﻷمين بعرف هموم الناس
مليان بأساهم مو صنج عديم احساس
بحكم بالعدل مي قنبلة ورصاص
بعد السرقة ليش كتلت وﻻد الناس
يا ريس البلد حاكمنا في الخرتوم
ما ضاق فقد الجنا وجعوا البيحمي النوم
وﻻ حرقة حشا اﻷمات والمظلوم
لو كت بشر كت طلقتو حكما شوم
محتار الشعب فيك والحي والقيوم.