عـِيـَنْ الخريف

[شبارقة]

الخريف على الأبواب .. والخريف وما أدراك ما الخريف لكل أهلنا في السودان من جميع سهول وبوادي البطانة في شرق ووسط السودان إلى بوادي كردفان ودارفور ... إلخ

أهلنا في البادية ومن زمن قديم قاموا بتقسيم فصل الخريف إلى مراحل أو ما يعرف بـ العِيـَنْ ومفردها (عـِينة) وهي تعني (مرحلة) أو ما شابه ذلك .

يقال أن الأسد في الزمن الماضي كان موجود في معظم سهول وأودية السودان.. والأسد هو ملك الحيوانات وأكثرها هيبة بلا شك.. أها الهيبة والقوة دي هي الخلت أهلنا زمان يشبهون عـِيـَنْ الخريف ببعض أعضاء الأسد أو تصرفاته (حسب قوة العضو أو شدة التصرف).. وكل عينة مدتها 13 يوم (ماعدا عينة واحدة مدتها 14يوم) والكلام ده لو تحققنا منه لوجدناه مربوط بعلوم الفلك والجغرافيا ودراسات الأرصاد الجوي والتي لم تكن متاحة في ذاك الوقت... في المداخلة القادمة سنبدأ بأول عينة وذلك حسب ترتيب العـِين وتواريخها ... الكلام ده متاح في النت بعضه منقول نقل من غير إجتهاد في تصويبه أو تنقيحه وبعضه غير صحيح ...ولأنو الخريف ده عندنا مربوط في الذاكرة بأجواء لاتينية رهيبة ونسائم وبروده وهمبريب ودعاشات معشعشة في الدواخل فسأحاول في هذا البوست التعريفي (بالذات لناس شهادة عربية ) أن أطرح المعلومات بشكل مغاير لا يخلو من السمبر وبعض الرباعيات والدوبيت (مع الترجمة) وبعض المعلومات البيولوجية الحياتية المربوطة بالخريف من عشق وشبق وتكاثر وبعض من الكلام الدقاقة .

[شبارقة]

قبل ما بنبدأ بالعينة الأولى عاوز أضيف إضافة بسيطة مرتبطة بالعـِيـَنْ وهي إنو ليس الخريف فقط هو المقسـّم لعـِيـَنْ .. بل السنة كلها مقسمة إلي عـِيـَن.

والإضافة الفوق دي بتقودنا لتعريف دقيق للعـِيـَنة وهي أنها عدد من الأيام خلال السنة - في فترة محددة - تتميز بطقس مختلف عن غيره من العـِيـَنْ.

حساب العـِيـَنْ ده قد يتغير قليلا ً عند الناس الذين يحسبون بالشهور العربية.

[شبارقة]

العـِيـَنة الأولى : الضـُراع

كل التسميات التي نحن بصددها كما أسلفنا مربوطة بالأسد وهي هنا تشير لضـُراع الأسد .. ويبدأ الضـُراع من يوم 7 يوليو الى يوم 21 منه .. ويقال عنه: إن صح خريف وإن بطل صيف ... يعني الـ 13 يوم دي لو كانت ممطرة فإن الخريف سيكون رائعا ً من حيث الزرع والضرع... وإلا فإنه سيكون صيف

[شبارقة]

ﺩُﻋﺎﺵ ﺑﺮﻕ ﺍﻟﻀـُﺮﺍﻉ ﺍﻟﻔﻲ ﺍﻟﺴﺤﺎﺑﺔ ﺑﻼﻭﻱ
ﺟــــــﺎﺏ ﻟﻰ ﺭﻳﺤﺔ ﻣﻦ ﺍﻟﻠﻲ ﺃﺫﺍﻱ ﺑﺘﺪﺍﻭﻯ

[عكــود]

سلام يا شبارقة وتصوم وتفطر على خير،

موضوعك ليهو دعاش ورذاذ، وشيَق.

الخالد (عليه الرحمة) كان له موضوع مشابه عن الغزل بمرابيع النجوم والشاعر ود شوراني، وما تأتي به إضافة توثيقية مهمَة لذلك الموضوع الممتع؛
فاقدل وأخد راحتك، فإنَا لك من المتابعين.

[الرشيد اسماعيل محمود]

سلامات شبارقة ورمضان كريم،،
دا موضوع مهم وعندي أسئلة كتيرة فيهو، بس عليك الله واصل لينا من غير يتبع
وما تنسى لينا عين الشتاء معاك لو ممكن تتباصر. التساؤل بتاعي هل توجد عينة قبل الضراع؟

[شبارقة]

المشاركة الأصلية كتبت بواسطة عكــود

فاقدل وأخد راحتك، فإنَا لك من المتابعين.

تصوم وتفطر على خير يا عمدة

شكرا ً لك على الدعم وعلى إيراد رابط بوست فقيدنا الغالي خالد الحاج والذي سأقطف منه بعض المرابيع الشعرية وبالذات عندما نتحدث عن كل عيـِنـَة وخواصها وصفاتها.

[حافظ حسين]

المشاركة الأصلية كتبت بواسطة شبارقة

العـِيـَنة الأولى : الضـُراع

كل التسميات التي نحن بصددها كما أسلفنا مربوطة بالأسد وهي هنا تشير لضـُراع الأسد .. ويبدأ الضـُراع من يوم 7 يوليو الى يوم 21 منه .. ويقال عنه: إن صح خريف وإن بطل صيف ... يعني الـ 13 يوم دي لو كانت ممطرة فإن الخريف سيكون رائعا ً من حيث الزرع والضرع... وإلا فإنه سيكون صيف

شبارقة سلام يا خي و رمضان كريم و تصوموا علي خير
بالجد من البوستات الجميلة جداً و كان الله أدانا العافية بنجي نخرف* معاك في
البوست دا ....

و الضراع و ما أدراك ما الضراع ...... عينة الضراع دا عينة فيها الجوء ملائم جديد للإنبات (المسوك)..... اضافة الي ذلك في عينة الضراع ما في اي آفات زراعية مثل الحشرات و الطير و البحات .....
عشان كدا و تأكيد لكلامك الفوق (إن صح خريف وإن بطل صيف).... يعني الفلاحين بكونوا مهلوعين جداً و لازم يزرعوا في خلال ال 13 يوم و دا و الا جات نترة الطير و الحشرات .....
و حد فهمي أن إسم (الضراع) ليه مدلوله الاقتصادي يقول ليك كسرت ضراعي.... ضراعك أخدر و شد الضراع ذاتو

[شبارقة]

المشاركة الأصلية كتبت بواسطة حافظ حسين

شبارقة سلام يا خي و رمضان كريم و تصوموا علي خير
بالجد من البوستات الجميلة جداً و كان الله أدانا العافية بنجي نخرف* معاك في
البوست دا ....

و الضراع و ما أدراك ما الضراع ...... عينة الضراع دا عينة فيها الجوء ملائم جديد للإنبات (المسوك)..... اضافة الي ذلك في عينة الضراع ما في اي آفات زراعية مثل الحشرات و الطير و البحات .....
عشان كدا و تأكيد لكلامك الفوق (إن صح خريف وإن بطل صيف).... يعني الفلاحين بكونوا مهلوعين جداً و لازم يزرعوا في خلال ال 13 يوم و دا و الا جات نترة الطير و الحشرات .....
و حد فهمي أن إسم (الضراع) ليه مدلوله الاقتصادي يقول ليك كسرت ضراعي.... ضراعك أخدر و شد الضراع ذاتو

يا سلام ياخي .. حافظ حسين معانا بي جاي ؟ والله ده يوم سعيد

حبابك .. وكل عام وأنتم بخير .. تشكر على الإضافة الحقيقية والثرة

وجودك وباقي الأحبة المعانا هنا إثراء حقيقي للبوست .. تسلم.

[حافظ حسين]

العكير أخوي تعال بسراع.......
العكير أخوي ما يفوتك الضراع.....

هذه الترنيمة نغنيها أنا و أختي الكبري, و شقيقي الأصغر و ابناء عمي و بناته, نغني بهذه الترنيمة نبدأ بذر الأرض بعد ان يدمدم ابي ببعض الادعية لم أحفظها و حد علمي ان فا ت علي فوات استرجاعها مرة أخري , بعد أدعية أبي أختي الكبري تبدأ ببذر أول بذرة و قدرت ما أجتهدت عشان أحظي ببذر البذرة الأولى بئت بفشل كبير .... و القصة زي ما بيقولوا اولاد الزمن ديل .... القصة مأكله معاي جنبة شديد .... مرة أحتجت لأمي قلت ليه ايش معني هي عشان أبوي يديها اول البذار (الفرعة)... أمي شكلها زعلانة منها و من أبوي في لحظتها بإستياء كدا كان ردها (أبوك بيقول بخيته .... لكن باختتها دي ما ظهرت علي ابوكم دا)
المهم بعديها بديت اعمل تيرسنق لموضوع بخاتتة أختي ليه بخيتة لكن ما لقيت أي إجابة بس بعد كبرت عرفت أن الوالد كان يمارس negative discrimination
اها واقفين وين ؟
ايوة نغنا لأخونا العكير و بعدها نبدأ الزراعة و ندعو رب الضراع يجيب المطر و لو ما جاء الضحك شرطنا .... لكن بكرة بنمشي مع أبوي المرة دي بلاد عمي و بنعمل نفس الحركة .... الأغنية .... البذرة الأولي و حكمة الله برضو بتبذرها بت عمي ما ولد .... شكلها بخاتة قايمة علي النوع gender base luck
ما عارف عمي دايما وقت الزراعة بيكون ما في ما عارفه بمشي وين ....
و نرجع لعينة الضراع .... العينة دي تحديداً بتخش الضحي و بدأت تغيرات واضحة في السحب .... سحب سوداء سريعة الحركة ..... مجموعة من النسور تسبح لله في السماء .... الجو بتغير بوضوح ... بعدين العينة بتخش دون اي مقدمات يعني تنوم تصحي تلقي نفسك في الضراع
و لحد ما نجي راجعين
للنترة السقاية
الطرفة البكاية
الجبهة النداية
الخرسان اليتم مجان
العوي و السماك
و يا سما امسك ماك
و يا بحر بقفاك
و لو في العمر بقية مرة تاني بجي

شكراً شبارقة علي هذه السياحة

[شبارقة]

المشاركة الأصلية كتبت بواسطة شبارقة

أن أطرح المعلومات بشكل مغاير لا يخلو من السمبر

قد يتسآل البعض شنو علاقة السمبر بالبوست ده؟

السمبر (إسم جمع لطائر معروف) نطلق على أنثاه السمبرية ولكنني لا أعرف إسم المفرد لمذكره (هل فيكم من يعرف؟)

السمبر ينتشر ويتواجد بكثرة من بداية فصل الخريف وحتى نهايتة .. وكان الناس يفرحون بتحليق السمبر في أجوائهم فهو إشارة إنو خريفهم صادق الوعد لأن السمبر وبعض الطيور الأخرى ومن خلال بحثها الدائم تعرف مراتع الكلاء والماء وبمجرد ظهور هذه الطيور في المنطقة فهو دليل وبشارة على صحة الخريف.

[الجيلى أحمد]

كعادة شبارقة.. شغل جميل

منتظر باقى العين

[شبارقة]

المشاركة الأصلية كتبت بواسطة الجيلى أحمد

كعادة شبارقة.. شغل جميل

منتظر باقى العين

حبيبنا الذي بمانشستر هذا الأيام .. كل عام وأنتم بخير .. رمضان يتبارك عليكم وعلينا

والله كلامكم ده هو البشجع الزول وبيدفعوا للأمام ويخليهوا يتوهط في البيت الوسيع ده (على قول أخونا ناصر) وهو صادق في ذلك.

باقي العـِيـَنْ في الطريق .. بإذن الله.

وجودكم هنا بمثابة وقود لمحركاتنا .. تسلم،،،

[طلال دفع الله]

نحتاج للتركيز على زمن و خواص كل عِينة من عينات الخريف،
إبداعياً وظفها ود شروني، فأرجو أن يرفدنا مَن يملك المزيد.
التحايا للجميع و طيب الأمنيات.

[شبارقة]

المشاركة الأصلية كتبت بواسطة طلال دفع الله

نحتاج للتركيز على زمن و خواص كل عِينة من عينات الخريف،
إبداعياً وظفها ود شروني، فأرجو أن يرفدنا مَن يملك المزيد.
التحايا للجميع و طيب الأمنيات.

حبابك أخونا طلال ومرحب بيك في سودانيات

زمن أو توقيت العـِيـَنة هو الأساس في تحديد دخول العينة وهو بالتأكيد له علاقة بالنجوم والسماء ولذلك نحن حريصين في هذا البوست على تحديد الزمن وعدد الأيام

أما بخصوص الخواص .. نعم فاتنا أن نذكر بأن مطر الضراع والنترة هو مطر غزير يروي الأرض و يقفل الشقوق وبسبب تسرب المويه لباطن الأرض تبدأ بعض حشرات الأرض في الظهور وتتكاثر بسرعة وبالذات في النترة .. وصوت الرعد بيكون ليس بتلك الشدة التي تزيد في العين التي تليها.