اقتباس:
المشاركة الأصلية كتبت بواسطة خالد غالي
لو صاحبتني مكسب ليك طبعا 
صاحبك ده ايامو الهنا انا بذلت مجهود خرافي عشان اقنعو مايتهور
اتخيل فلسفتو شنو؟ قال داير يجرب!!
قلت ليهو تجرب في روحك؟! ياهم ديل الناس الجربو قاعدين يشكو ويبكو الليل والنهار
قال لي اي زول زاوية شوفو مختلفة!!
قلت ليهو سمح، انت فلسفتك دي كان ماجابت اجلك اصلو مابترتاح!، طيب اها لو بعدين زاوية شوفك طلعت زي زاوية شوف الباقين تسوي شنو؟
سكت ودنقر راسو، عاينت في عيونو لقين نظرة زول خلاص بقى مامالك زمام امرو!
فقمت طبطبت علي كتفو وطلبت ليهو من الله الرحمة 
المهم
انت ذاتك اسي شايفك قايم ليك في فلقصة وفلسفة كده ماعاجباني، دحين النكلمك من بدري بدري
اتفلقص زي ماداير لكن ابعد من العرس
اهو كلمتك عشان بعدين ماتقول كنت ماعارف  |
شكلو صاحبك رضخ لضغوط المجتمع المتوهمة...
زهج من كترة الاسئلة بتاعة (أها العرس متين؟)
وارهقته فعل المقارنة مع رفقاء دربه الذين عبروا للضفة الأخرى
وعلي كدة قام اتهور واتورط
يصبح الزواج ماسورة حين نعتقد أنه الحل... فالزواج تكليف وليس ترطيبة
أها صاحبك دا بكون برضو اغرته جلاليب السادة المتزوجين النضيفة ومكوية، فاعتقد انو الزواج هو الترطيبة
زي خديعة المغتربين للناس القاعدين في السودان، الناس القاعدين في السودان يشوفوا المغتربين جلاليبهم نضيفة وعطور ولمعة فيحسب الناس ان الاغتراب هو الترطيبة... لكن الحقيقة هي انو الاغتراب تكليف وليس ترطيبة زي الزواج بالضبط ...
اها صاحبك كونو جاهو عقد عمل وامبارح مشى القنصلية المأذونية ووثق عقدوا ودق تاشيرته وفرحاااااان انو خلاص ح يغترب ويرطب... لذلك خليهو يسافر وقبل ما ينتهي شهر العسل ح يكتشف الوجه الآخر للاغتراب لمن كفيلتو تلبس ليهو وش الكرتون
بتذكر زمان في طفولتنا في الخريف وتكون مياه الامطار عاملة برك في الشوارع، أها نحن نكون حايمين بالليل، أها الزول البكون ماشي قدام لو لقى نفسو اتلكك في الطين ما ح يقيف ويقوم ينبه اصحابه عشان ما يتملو طين... بالعكس ح يقوم يواصل في مشيهو وهو يغني ويصفر... عشان اصحابو وراهو يفجخوا الطين والشر يعم وكدة... القصد من الحركة دي عشان مافي زول يضحك على التاني.... أها الحركة دي انا كنت قايلها خاصة بي فترة الطفولة... اتاريها الحركة دي خاصة بجميع اطوار الانسان... والدليل أهو السادة المتزوجين بدل يقيفوا ويقولوا للرشيد دا اعمل حسابك ارجع ويحذروهو... بالعكس عاملين الوضع طبيعي وحاجة جميلة خالص خالص عشان عاوزينو يتورط زيهم ... غايتو يا اسامة معاوية دغالتك لا حكت لا بقت ياخ كان تحذر صاحبك دا ياخ
