البعاتى

[رأفت ميلاد]

البعاتى

البعاتى فى (الحجا) هو الإنسان الذى يموت ويقوم من الموت .. من سيمائهم إى (البعاعيت) ليس لهم أقدام بل لهم حوافر حمير

حجاوى البعاتى أقلقت منامنا كأطفال وأدخلت خوف فى قلوبنا من المقابر .. تخلصت من الخوف من الظلمة والبعاتى بالنوم فى مقابر البكرى عندما كنا فى المسالمة وفى أمدرمان كنا نتحدى بالمبيت فى الخرابات التى كانوا يقولون أنها مسكونة بالشياطين

المصريين قالوا (البخاف من البعبع بطلعلو)

سبب طرق الموضوع ده أفلام الـ(Zombie) المجتاحة السينما العالمية السخيقة جداً .. وليس هذا الموضوع ولكن الخوف ..

الموضوع له بقية

[شوقي بدري]

القريب الي القلب لك التحية ، والي العائلة . ابن اختي الطبيب المهدي مالك عمل في الدمازين في اول ايامه . كان هنالك موظف شاب اسمه عثمان عاجباه نفسه ويتعامل مع اهل البلد بتعالي ويتعمد اسائتهم ويتحرش بالنساء بالمفتوح. المهدي كان مؤدبا جدا ومحبوب عن الناس لا يدخن ولا يشرب وهو رقيق العود يكره المشاكل . وكان ينصح عثمان بان يتعامل مع الناس بلطف وهم يسكنون في نفس الميز .
وعثمان جاي من الحلة كالعادة في الليلن يطلع ليه البعاتي في الخور. ملفلف بالكفن وريحته عفنة . ويقول ليه ازيك يا عثمان . يقوم جاري جري شديد . يقيف لياخد نفس البعاتي يكون منتظره ويقول ليه جاري مالك يا عثمان ؟ نفس الريحه الكريهة والنخنخة . عثمان حصل ليه انهيار تام . وارجعوه الخرطوم للعلاج .
المهدي عرف من ناس البلد . انها حيلة بتلفلفوا كم شاب وكل واحد شايل جدادة ميتة او عضم عفن . وبيكونوا في اماكن متفرقة . وطبعا الانسان لو ما عنده الخلفية ما بيخاف .

[البديري]

ههههههههههه
رأفتنا...بعاتى الكيزان


غايتو البوست دا لو علمى بجيك راجع ان شاءالله، ولو سياسى، يكون هذا فراق بينى وبين هذا البوست

[رأفت ميلاد]

المشاركة الأصلية كتبت بواسطة البديري

ههههههههههه
رأفتنا...بعاتى الكيزان


غايتو البوست دا لو علمى بجيك راجع ان شاءالله، ولو سياسى، يكون هذا فراق بينى وبين هذا البوست

يا البديرى (علمى) دى علمى وعلمك .. بس ممكن يجيب حتى من القوقل أو ذات تجربة أو دراية .. الموضوع (الخوف) .. أقول ليك سر أنا كان خيرونى يختونى فى قفص مغلق مع كلب أو أسد يمكن أختار الأسد

لدى صديق جسور ولكن نقطة ضعفو فى (صارقيلة)

السؤال: كيف بتولّد الخوف داخلنا ويقضى على الشجاعة

ملحوظة:
مجرى البوست يجيب ما يجيب ومافى تحجيب لأى مسار .. والسياسة واردة

[حسين عبدالجليل]

تحياتي أخ رأفت :

أثناء بحثي في اللغة المصرية القديمة(هيروغولفية) عن معني الكلمة القرانية "هيت " ( وقالت هيت لك) والتي وجدت أنها تعني "تعريت , أصبحت عارية" وذكرت ذلك في بوست سابق, أثناء ذلك البحث في الأنترنت عرفت أن كلمة " بع " كانت تعني , عند المصريين القدماء , حاجة قريبة من "بع آتي- بعاتي " حقتنا .

It would leave the body at the time of death. During the days the Ba would make itself useful, at night it would return to the tomb. At this time, it would look for the person to which it belonged. This would be the mummy

ترجمة الكلام الفوق المنقول من "الرموز والتعريفات المصرية"
http://www.egyptartsite.com/symlst.html

"ال بع يخرج من جسد الميت لحظة الوفاة , يهيم و يتجول في النهار و في المساء يعود البع للمقبرة و يبحث عن جسد المتوفي التابع له "

منقول من "مثلوجيا المصريين القدماء."
http://www.egyptianmyths.net/ba.htm
هذه هي رموزال ال بع :


ياخ ثقافتنا السودانية المتمثلة في لغتنا اليومية المحكية تذخر برموز تاريخية هامة لم يفكك أغلبها بعد و كثير مما ينسب للمصريين القدماء هو في الاصل نابع من حضارتنا النوبية و التي أصبحت اللهجة السودانية و عاء لها .

يعني أهلنا أضافوا آتي ل بع للتصبح بعاتي ومازالت الذاكرة الجمعية السودانية المتمثلة في اللغة تذخر بالكثير الذي لم يتم اكتشافه بعد .

[شوقي بدري]

الاستاذ حسن لك التحية .البعاتي اتت من كلمة البعث .بمعني ان الانسان يبعث حيا بعد موته . وانه يخرج من القبر وهو ينخنخ لان انفه ينكسر بسبب ضغط القبر . ويقولون هم ترب البنية. وان البعض قد اودع صبية عند النبي صلي الله عليه وسلم. وعندما عادوا وجدوها قد ماتت . فقالوا ان النبي صلي الله عليه وسلم قد فرط في الوداعة . فدعي الله . وبعثت الصبية , ولكن ذريتها صارت تخرج من القبر . وهذه الخرافات التي يؤمن بها بعض السودانيين . ولكن حدث كثيرا ان البعض اصيب بالتخشب . واعتبره حتي الاطباء من الموتي . ولكنه صحصح وقام واكل الطعام .
البعض كان يداعب البعثيين ويسمي البعثي بالبعاتي .

[فيصل سعد]

رأفت أفندي ميلاد،، كيفنك يا خواجة يا بتاع الجرجير و العطرون،،، قلت لي بتلاوز من بوبي صاحبنا و أخونا و زميلنا في بيت المال يوسف عماد الدين خاطر كان و لا يزال بلاوز من الكديسة،، و كان بيشارك في برنامج جنة الأطفال، و كان اشولنجي حريف قدم و طائرة و تنس، في نادي الشاطئ زمان لو داير تكسب منافسته في تنس الطاولة خلي زول يجدع ليه عضم عضمين مقرشة و يلم كدايس النادي حول الطربيزة و البرندة، وشوا بحمر و اعصابو بتبوظ، و دي الطريقة الوحيدة البيها ممكن تغلبوا و تطقطقوا و تكسب

ما الفرق بين البعاتي و السحار و ود امبعلو و شيطان الكوشة؟؟؟

[رأفت ميلاد]

المشاركة الأصلية كتبت بواسطة حسين عبدالجليل

تحياتي أخ رأفت :

أثناء بحثي في اللغة المصرية القديمة(هيروغولفية) عن معني الكلمة القرانية "هيت " ( وقالت هيت لك) والتي وجدت أنها تعني "تعريت , أصبحت عارية" وذكرت ذلك في بوست سابق, أثناء ذلك البحث في الأنترنت عرفت أن كلمة " بع " كانت تعني , عند المصريين القدماء , حاجة قريبة من "بع آتي- بعاتي " حقتنا .

It would leave the body at the time of death. During the days the Ba would make itself useful, at night it would return to the tomb. At this time, it would look for the person to which it belonged. This would be the mummy

ترجمة الكلام الفوق المنقول من "الرموز والتعريفات المصرية"
http://www.egyptartsite.com/symlst.html

"ال بع يخرج من جسد الميت لحظة الوفاة , يهيم و يتجول في النهار و في المساء يعود البع للمقبرة و يبحث عن جسد المتوفي التابع له "

منقول من "مثلوجيا المصريين القدماء."
http://www.egyptianmyths.net/ba.htm
هذه هي رموزال ال بع :


ياخ ثقافتنا السودانية المتمثلة في لغتنا اليومية المحكية تذخر برموز تاريخية هامة لم يفكك أغلبها بعد و كثير مما ينسب للمصريين القدماء هو في الاصل نابع من حضارتنا النوبية و التي أصبحت اللهجة السودانية و عاء لها .

يعني أهلنا أضافوا آتي ل بع للتصبح بعاتي ومازالت الذاكرة الجمعية السودانية المتمثلة في اللغة تذخر بالكثير الذي لم يتم اكتشافه بعد .

سلامات يا حسين

تعرف اللغة الهروغلوفية دايرة خبير آثار نوبى يتعمق فيها .. أعتقد الهروغلوفية هى النوبية مكتوبة ..

زمان صاحبى محسى رحمه الله شرح لى إسم توت عنخ آمون وقال لى النطق الصحيح على ما أذكر (دود عنج آمو) حاجة ليها دخل بالموية ما متذكر .. المهم التكوين من اللغة النوبية يحمل نفس موسيقى الإسم

لكن يا حسين ليه كلمة (هيت) لك أعتبرتها واردة من اللغة المصرية القديمة والقراآن عربى .. لكن غريبة النتيجة الغير غريبة عن الحدث (تعريت)

[البديري]

المشاركة الأصلية كتبت بواسطة رأفت ميلاد

السؤال: كيف بتولّد الخوف داخلنا ويقضى على الشجاعة

كويس يا حبيبنا،
إنت جبت خُلاصة البوست وهي ;''كيف بتولّد الخوف داخلنا ويقضى على الشجاعة''!
اولاً ;التربية
تانياً ;التربية
ثالثاً ;التربية
دى من ناحية سلوكية، من ما الشخص يتولد وحتى يموت!
نحن للآسف كسودانيين، إتربينا على ; إنو السودانى ممكن يضارب قبيلة لى وحدو!...لكن بخاف من الكلب!!!
السودانى ممكن يخوف بلد!
ولكن بخاف من صوت كيس النايلون المُشربك فى السلك الشايك بتاع الحيطة!!!
السودانى ممكن يفرتك حفلة عرس!
لكن ما ممكن يفرتك شريط كست إتشربك فى ''هيد'' المُسجل!!! لانو بخاف ينقطع!!!!
نحن إتربينا فقط على مواجهة الواقع، والخوف من المجهول للآسف!!!
يتبع.......

[البديري]

من ناحية علمية يا حبيب;
الشجاعة والخوف عبارة عن غُدد، تتمركز فى المخيخ وتحت الكبدة لكل البشر!
وسبحان الله الحيوانات بتحسها وبتشمها من على البُعد، وبتعرف الزول دا خايف ولا مؤستانس (مؤستانس دى صاح بتتكتب كدا؟).. ما علينا،،
يا حبيب، نحن إتربينا على الخوف من المجهول! والخوف من مابعد المجهول! والخوف من الاستقرار فى هذا المجهول!!!
فنتجت تراكمات لا حصر لها من الخوف من هذا المجهول!!!
فمثلاً; لماذا نخاف من الموت؟ والميتين؟!
سا احكى لك قصصى فى المشارح من رومانيا وحتى هولندا..!!
سيتبع باذن الله...وتصبحون على خير ان شاءالله

[رأفت ميلاد]

المشاركة الأصلية كتبت بواسطة شوقي بدري

القريب الي القلب لك التحية ، والي العائلة . ابن اختي الطبيب المهدي مالك عمل في الدمازين في اول ايامه . كان هنالك موظف شاب اسمه عثمان عاجباه نفسه ويتعامل مع اهل البلد بتعالي ويتعمد اسائتهم ويتحرش بالنساء بالمفتوح. المهدي كان مؤدبا جدا ومحبوب عن الناس لا يدخن ولا يشرب وهو رقيق العود يكره المشاكل . وكان ينصح عثمان بان يتعامل مع الناس بلطف وهم يسكنون في نفس الميز .
وعثمان جاي من الحلة كالعادة في الليلن يطلع ليه البعاتي في الخور. ملفلف بالكفن وريحته عفنة . ويقول ليه ازيك يا عثمان . يقوم جاري جري شديد . يقيف لياخد نفس البعاتي يكون منتظره ويقول ليه جاري مالك يا عثمان ؟ نفس الريحه الكريهة والنخنخة . عثمان حصل ليه انهيار تام . وارجعوه الخرطوم للعلاج .
المهدي عرف من ناس البلد . انها حيلة بتلفلفوا كم شاب وكل واحد شايل جدادة ميتة او عضم عفن . وبيكونوا في اماكن متفرقة . وطبعا الانسان لو ما عنده الخلفية ما بيخاف .

حبيبنا شوقى بدرى طلتك تفتح النفس والله

فعلاً مواصفات البعاتى الفاتنى أذكرها هى (الريحة العفتة وهو نخناخ* فى الكلام) الموضوع فعلاً هنا عن (الخوف) وإنسان زى عثمان ده أكيد جبان وبعوض جبنو فى حقارة الآخر خاصة إذا كان الآخر بسماحة ناس الدمازين (فى حينها) وأعتذر لناس الدمازين على الإضافة الإستدراكية لأن الزمن ما عاد الزمن .. عندما سمعت بعمليات تصفية جسدية فى الدلنج أصبت بصدمة .. تلك الأرض التى كانت قطعة من الجنة حينما زرتها

لب الموضع يحتاج حضورك يا حبيبنا

*نخناخ إذا كان إستعمال المفردة قد أندثر معناها كما المتحدث وأنفه مغلقة