نعي أليم - فيصل سعد في ذمة الله !!! عكــود

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > منتـــــــــدى الحـــــوار

إضافة رد
 
أدوات الموضوع انواع عرض الموضوع
قديم 24-12-2005, 05:08 PM   #[1]
3mk-Tango
:: كــاتب نشــط::
الصورة الرمزية 3mk-Tango
 
افتراضي شاهين .. الأعمال الكاملة ...

قبل فترة كنت قد قررت ان اجمع اعمال الحبيب عصمت العالم في بوست واحد
وقد صعب الامر علي اولا لتدفق عصمت العالم الغزير الذي يصيبني بالخوف احيانا
علي الرجل واشفق عليه .. وثانيا لخروج الامر عن يدي حيث تقدمت كتابات عصمت
العالم علي الفكرة واصبح الامر صعب في العودة الي الخلف لضيق الزمن ..

منذ فترة قليله تابعت كتابات الاخ / شاهين محمد سليمان ... ووجدت بها لغة خاصة
فهي نثر موزون .. او شعر منثور .. ووجدت انه من الافضل جمعها في بوست واحد
قد تختلف الموضوعات ولكن تظل روح الكاتب موجودة ولغته ايضا ..
بالطبع هذا لا يعني تحجيم بوستاته بل هو تخليد لاجمالي كتاباته المميزة في بوست

تحية للاخ شاهين .. لك ان تتجلي في موضوعاتك ولي ان اجمعها في مرجع واحد ..


[align=center]زول اهبل ... اهبل جدا (1)[/align]

فى الحب انا زيك زول اهبل ... اهبل جدا ... و رومانسى و زول حساس خالص ... خالص جدا ... الزيى و زيك يا وردة فى الزمن القاسى ... ده زول اهبل وعوير جدا ... جدا , جدا ... فيروزة شاطى احلامى ... نتعاور فى الوطن الاهبل ... اهبل جدا ... نحلم بى بكرة وعارفنو حيكون اكعب من امبارح ... اكعب جدا ... نتعب منه ... نلعب بالمنطق حد نصله صارم جدا ... جدا , جدا ... شافع يا شافعة يا عضاضة ... يا السارقة حلاوة لبان منى ... بسرق من جيبك تفاحة ... اديك كرملة و مصاصة ... وبطوطحك فى المرجيحة كمان ... ما العيد بكرة ... يوم بكرة بعيد عننا جدا ... جدا , جدا ... وبحبك انا بالجد جدا ... اهبل متخلف عقليا ... يا عويرة و فيروزة فى شاطى ... نتحدى المنطق والواقع ... ده الواقع فى بلدنا السمحة اسود جدا ... جدا , جدا

الكلاكلة صنقعت



التوقيع: كلما اتسعت الرؤيا ضاقت العبارة ..

..الامام النفري ....
3mk-Tango غير متصل   رد مع اقتباس
قديم 24-12-2005, 05:09 PM   #[2]
3mk-Tango
:: كــاتب نشــط::
الصورة الرمزية 3mk-Tango
 
افتراضي

[align=center]لما الباب امبارح دقا (2) [/align]

بين كباية قهوة ... وصرخة شافع بال على نفسه , لباسه اتبلبل , اتذكرتك ... والكمسارى بيهرش فينى عشان الباقى , اتذكرتك ... لما النور فى الحلة بيقطع ... والكتاحة تغبر بيتنا ... فى الحنفية الموية تنقط زى صوت حسك , اتذكرتك ... كنتا بخط السفة صغيرة دون ما تلاحظى ... وانتى بتكرهى ريحة خشمى لما اسف ... يعنى خلاص هاجرتى بعدتى فى امريكا ... يااااه ... كنتى بتكرهى فى الضهرية نمشى كتير ... تزعلى مرة , ومرة بتصرخى , مرة تصهينى ... وانا بستهبل واضغط نهدك دون ما اقصد ... ( طبعا قاصد يا مستهبل ) ... حوش جيرانا الفاضى فيهو حضنتك ... لما بناؤه , اتذكرتك ... يوم خمسنا سيجارة بينسون ... طول اليوم قعدتى تكحى ... هل تتذكرى ؟ انا بتذكر ... كنتى قصيرة لامن احضن , راسك كان بيكون فى بطنى ... هل ما زلتى لسه بيعوة ؟ ولا طولتى ؟ ... انا قصرنى الوجع الغالب ... هل تتصورى ؟ رغم قطار العمر الاوغل ... لسه بمارس قلة ادبى ... وبعد سنين الغيبة الطالت ... هل تتخيلى ؟ ... لما الباب امبارح دقا ... اتوقعتك .
الكلاكلة صنقعت .


.
.



التوقيع: كلما اتسعت الرؤيا ضاقت العبارة ..

..الامام النفري ....
3mk-Tango غير متصل   رد مع اقتباس
قديم 24-12-2005, 05:11 PM   #[3]
3mk-Tango
:: كــاتب نشــط::
الصورة الرمزية 3mk-Tango
 
افتراضي

[align=center]العسكري السكران ... اصبح امام مختوم (3) [/align]


أأأأأه ممدودة محروقة وبتحرق ... داود نبى ... موسى نبى ... عيسى نبى ... ومحمد المعصوم نبى ... وكل من ليهو نبى يقراء صلاتو على النبى ... بوذا حكيم ... محمود حكيم ... ما الفرق ما بين الصعود الى السماء بمشنقة , او بالصليب ؟ ... محمود رضى الله عنه وعن بنيه ... ( جمهورى ) يا الطالع السماء ... جيب لى معاك شجرة ... فى ضلها اتكلم , اقنع واتدقا ... او جيب معاك نبقة الفقرا بارونى ... احسن تجيب بقرة , تحلب وتسقينى ... لبن الحكم يا حكيم ... الجهلاء خذلونى ... محمودنا شن القول ... دين الله دين محمول , حمال وجوه و وجوه ... من اسمو كان الزين , من اسمو كان الشين ... دهب السكوت لمتين ؟ ... فضة كلامك ماس ... تمن الكلام الراس ... يا الفة فى الكراس ... اكتبنى هرجلتا ... سكك الكلام خطرة ... والزول ده راجل جد ... هو الجرجر السلبة , ما السلبة هى البتجر ... سلبة مشانقكم وهبت حياتو الجد ... تعظيم سلام يا بوم ... قاضى السجم والشؤم ... دين الله , دين محمول ... والعسكرى السكران ... اصبح امام مختوم ... ترزية القانون ... هذا البتاع مسطول ... يا بنقو يا افيون ... سبتمبر الملعون ... نص كم قوانينيك ... خيم الطؤارى وين ؟ ملعون ابو سنينك ... هذا او الطوفان ... ذل الرجال ذلة ... قطع الفقير خسة ... فضح النساء علة ... الاخذ بالشبهات قلة عقل بدعة ... سلخانة الجبهة , صمت الرجال مذموم ... لما الرجالة تنوم , محمود بيصرخ لا ... شان الرجالة تقوم ... جزار بنى خيبان ... تشريعك التعبان ... كرسى الحكم هلكان ... شوف ليك صمغ ولبان ... يا قاضى يا فاضى ... دم البشر غالى ... دين مين ؟ يا ود يا ظريف ... شافع يدين عالم ... دين كيف ؟ يا قاضى ضليع ... قطع اليدين ووعيد ... معذور رئيسكم جد ... دخل الديانة جديد ... داير العبيد تخضع , لحكم نار وحديد ... عيسى ولد مريم ... محمود ولد فاطنة ... عيسى نبى ... محمود حكيم ... محمود رضى الله عنه وعن بنيه ... ويهوذا لعنة الله فيه ... محمود حبيب الله ... حبيبى يا حبيب ... عاشق جمال عقلك ... كتب فكرك ... نهايتك , لما تنزل من سماء الله , لتبداء من جديد ... بوذا حكيم .
الكلاكلة صنقعت



التوقيع: كلما اتسعت الرؤيا ضاقت العبارة ..

..الامام النفري ....
3mk-Tango غير متصل   رد مع اقتباس
قديم 24-12-2005, 05:13 PM   #[4]
3mk-Tango
:: كــاتب نشــط::
الصورة الرمزية 3mk-Tango
 
افتراضي

[align=center]بحب فيك اعتزازك بالمسيحية (4)[/align]

اشرقتى يا شمس الله فى ضل الحيط ... زى لمسة ايدك يا مسيح العاطفة فى جوى حيت ... وحات العذراء والانجيل ... بحب وشم الصليب فى الايد ... بحب دهب الصليب فى الجيد ... وصوت جرس الكنايس فى الاحد والعيد ... وحات سيدى المسيح خليك وما تهاجرى ... سحابة صيف وبتعدى ... جميل يا لوحة زيتية ابعادك ثلاثية ... مسيحية , سودانية , قبطية ... بنات اقباط , عصافير زينة فى الشجرات ... اخت الايد على القرأن واهتف ( اننى اقسم باسم الله بناتكم يا مسيح سمحات ) ... على الخرطوم مسرة , وحزمة من انوار ... واقباط فى الشوارع ماشية بالالاف ... سحابة صيف وبتعدى , وحتعدى , وحب زاركم وما بعدى ... انا المسلم على راس الملاء اعلن ( بحبك يا مسيحية ) ... واكتر ما بحب فيكى ... بحب فيكى اعتزازك بالمسيحية .

الكلاكلة صنقعت .


.



التوقيع: كلما اتسعت الرؤيا ضاقت العبارة ..

..الامام النفري ....
3mk-Tango غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 06:06 AM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.