نعي أليم - فيصل سعد في ذمة الله !!! عكــود

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > منتـــــــــدى الحـــــوار

إضافة رد
 
أدوات الموضوع انواع عرض الموضوع
قديم 14-05-2013, 07:08 AM   #[1]
يازولyazoalيازول
:: كــاتب جديـــد ::
الصورة الرمزية يازولyazoalيازول
 
افتراضي ما رأيكم فى هذه القصيدة؟

أخواني فيهم قوة فيهم نخوة فيهم راس
وفى مجلس رفاقا عزاز بساط وظراف
مازى زولكم الزهجى الظلوم الظق
خادم الباشا دقاق المساكين دق
تيلات جدو فى التركية فيه مرق
لا بحس بالكرامة ولا بهمو الحق

يشتم فى البشر أموات على أحياء
ويشتم كل مغضوب منو فى الوزراء
وحتى الماتو أذكروا كيف اليهم أساء
وعاد يبكيهم التمساح وأى وفاء

غلطانين وصدقنا
الوعود الخانا
لامن شفنا ازداد
بى ورانا تخانا
عندو أمور تحت
أسأل بهاء وسخانا
مافى معاها مادامت
أمل فى رخانا

ثروات بحرنا الأحمر
تنازل فيها
زى مويتنا ما عبود
تبرمك بيها
عجبن لى حراميها
وصبح حاميها
يقهرنا ويقول للغير
أهجموا عليها

أسرع يا سليم
ساعد أخوك عدنان
وهات الشيك
وهيك ملعون أبو السودان

خبراتنا العزيزة
الطاشة فى البلدان
طفشا بى عمايل
ما بتسر انسان

يابايع الوطن للغير
أريت لو بعتو
بالتمن النقول
يمكن يطابق نحتو
كل صاحب جنيهين
أجنبى وطمعتو
بالهوبلى خم وقال
أريتكم جعتو

ماكان العشم قط
يا الأبوك مسكين
تتكى الشعب
تدنا عليه بالسكين
باكر تفنى لكن
تبقى فينا سنين
آثار فعلتك
شوف البسامحك مين

برطعت وعتيت صار
شعب البلاد شحات
بددت الأمل
والمال نصيبنا فتات
وليك انت النياشين
ترقش الدهبات

سبحتو من حبال
المشنقة المرفوعة
جلابيتو من كفن
الشهيد مقطوعة
صحة عضلو
من مرض الأهالى وجوعا
الفاتورة من لبن
الرضيع مدفوعا

الرحمة بتكورك فى بلاد الغربة
والرحمة بتكورك والعمايل كعبة
فاكر رحمة الله يا أب مشانق لعبة
ولا الرب رهو منك بتدخلو رهبة

سبحان مكرو اسمو المنتقم لعبادو
واسمو شديد عقاب ويل للذين تمادو
يمهل حبلو داك سلبة وطويلن مادو
ما بهمل وقط ظلم النفوس ما واردو

يا سفاح عشان تهنأ وتعيش فرعون
يا داسى الجثث يا الفى الفجر ملعون
يا سارق الفقير مانع على الماعون
يا عارض عرض فوق البلد طاعون

قولة أضربوهم
(قالها للجامعة هنا لو تتذكروا)

قولة أضربوهم كيف يرجعا فوك
وين تلقى العدالة ودا العهدنا سلوك
أحكام ظل بلا بينة وحكم متروك
لا للمادة لكن لى مزاج صعلوك

متهمك يشر دمو وأمام القاضى
يضربو فيه بكفيهم وفخامتك راضى
كيف يتهنا جفنك ساعة بالاغماضى
من يوم يندهوك ويواجهوك بالماضى

ما تتحوى بى آيات عزل معزولة
ما تغشك سبح متسولات بى قولا
ما فيش اليقيك وكتين تجيك فى تولا
نوح نوحن كثير وأطرأ القيامة وهولا

أعزل لى دجل آية وتفادى الأخرى
قالت آخر الظلم الجحيم فى الأخرى
يا العاجباك أمارتك تنقز فخرا
ربك كيدو أكبر يوم يزنقك تخرا

خلى الدين بعيد ما تجروا توب فى دنيتك
ما قال ليك جوعو عبى فى صينيتك
ما قال ليك أسرف وسف وعلّى بنيتك
وعربد وعير وعاند وخلى انسانيتك

خلى الدين بعيد ماتزيد جرايمك سيئة
راعى وبسألوك كيفن ظلمت رعية
يا الحمل الأمانة ظلوم جهول مادية
بتجيب الخبر عند البيقرا النية

إنت المُلهِم الملهَم دوام تتوطح
ما بين مهبط الحكمة وتقوم تتفولح
وين إلهامك؟ البلد التراهو ملولح
غشك ثعلبان حاجتو إنقضت واترورح

فى ضهرك طلع وطلعت إنت فى ضهرو
شيلنى وأشيلك السايس بغاير مُهرو
ينفخك إنت ناصر وإنت تيتو ونهرو
باكر تمشى فى غيرك يمارس عهرو

وين إلهامك؟ الفكر القفلت دروبو
ولا شقاوة الشعب النفضت جيوبو
ولا سقوط قيم فى جيل مفرهد دوبو
حسب الشايفو قدامو بيتم تدريبو

وين إلهامك؟ إلا إن كان كذب وأونطة
أمل الشعب فيك راح زى قتيلة الشنطة
مشدوه بى مواقفك نطة عكست نطة
زى قرد الطلح يوم يسألوك رطنت

صدق القالو منصور
نصرة ضد آمالنا
ضد أولادنا
ضد أحفادنا ضد عمالنا
ضد الشعب كلو القالو مالك ومالنا
حلال بلة من القيد يكون حلالنا

صدق السمّا قائد
للخراب والفرقة
للخلق الرزيل
لى بيع عرض للسرقة
لى سف التراب
للمحقة يوت للحُرقة
زى إبليس يقود
الساقطين للحَرقة

زى السامرى ما برضو قائد ملهم
شال عجل الدهب
قال موسى خائن مجرم
وزى قائد الضلال
مذموم صحائح مسلم
قائد ماشى وين؟؟
دربك ملولو ومظلم

رئيس لى عصابة
حاكم بالعضل بالبنية بالدبابة
تبت إيدو يحكم بى شريعة غابة
بالجمهورى صائل
فى تعابة غلابة

الأخ الرئيس
كل يوم يفاجىء شعبو
بى شيتن يمحن للبعيد والجمبو
مرماه الوحيد كيفن يوهط صلبو
فى كرسى الحكم والباقى شن يعملبو

تمثيلية فينا رئاسة بعد رئاسة
قايل الشعب بى قمبورو ولا دباسة
ماناقصلو غير يعمل عمل بوكاسا
سبورة بعضل متأبط الحداثة

ربنا وابتلانا عشان نخش الجنة
نزل لينا دجال ايدو ماكنة مكنا
جانا فى شكل منقذ مرفعين ضللنا
بى فروة حمل لمن أمِنا أكلنا

انظر نابو بى دم الشباب كيف دامى
وانظر جسمو بى تنميتو كيف متنامى
وانظر مخلبو الفوق المساكين رامى
واسمع عوتو جيعان ولا جنن رامي

ما مابين علي زولا عمل ارباحو
و ما بننكر علي ذي همة عالية نجاحو
لكن نحن ضد ، يبلع وطن تمساحو
و الجاهل الصغير يصبح عضم في ملاحو

صلاح أحمد أبراهيم



يازولyazoalيازول غير متصل   رد مع اقتباس
قديم 14-05-2013, 10:12 AM   #[2]
معتصم الطاهر
:: كــاتب نشــط::
الصورة الرمزية معتصم الطاهر
 
افتراضي

أشك فى أن الكاتب صلاح
فهناك خلل فى الوزن فى كثير من الأبيات

ثم ..

مفردات " الكياشة*" .. متوفرة فى هذه النصوص.






* مفردات الكياشة يستخدمها الشعراء و كتاب الشعر المستجدون و قليلوا الذخيرة.



التوقيع:
أنــــا صف الحبايب فيك ..
و كـــــــــــل العاشقين خلفي
معتصم الطاهر غير متصل   رد مع اقتباس
قديم 14-05-2013, 10:15 AM   #[3]
معتصم الطاهر
:: كــاتب نشــط::
الصورة الرمزية معتصم الطاهر
 
افتراضي

أو أن بعض الابيات قبل التنقيح ..



التوقيع:
أنــــا صف الحبايب فيك ..
و كـــــــــــل العاشقين خلفي
معتصم الطاهر غير متصل   رد مع اقتباس
قديم 14-05-2013, 10:33 AM   #[4]
يازولyazoalيازول
:: كــاتب جديـــد ::
الصورة الرمزية يازولyazoalيازول
 
افتراضي

أستاذنا الجليل معتصم الطاهر

أشكرك على المشاركة فى هذا الخيط وللحقيقة والتاريخ فإنى قد سمعت القصيدة من فم شاعرها مباشرة رحمة الله عليه أستاذنا الجليل الراحل المقيم صلاح أحمد أبراهيم فى ندوة فى جامعة الخرطوم بعد الإنتفاضة وقد تم تسجيلها وقد نقلتها من المسجل إلى الورق وقد فاتت علىّ بعض الكلمات بسبب الضجيج والهتاف المستمر مما أضعف القصيدة ، يا ليتك لو أعدت قراءتها مرة أخرى فستحس بها لغة صلاح العظيمة علماً بأنها من المرات القليلة النى يكتب فيها صلاح باللغة الدارجة بسبب الغبن الذى أصابه جراء العهد الذى تعرفه وكيف تم ضرب الشيوعيين وقتها وقتلهم وتشريدهم فى الأرض ، أكرر التحايا ، أخوكم هشام شيخ الدين



يازولyazoalيازول غير متصل   رد مع اقتباس
قديم 14-05-2013, 10:36 AM   #[5]
عادل عسوم
:: كــاتب نشــط::
الصورة الرمزية عادل عسوم
 
افتراضي

اقتباس:
المشاركة الأصلية كتبت بواسطة معتصم الطاهر مشاهدة المشاركة
أشك فى أن الكاتب صلاح
فهناك خلل فى الوزن فى كثير من الأبيات

ثم ..

مفردات " الكياشة*" .. متوفرة فى هذه النصوص.






* مفردات الكياشة يستخدمها الشعراء و كتاب الشعر المستجدون و قليلوا الذخيرة.
أثنِّي هذا الراي
...
لا أدري لِمَ تذكرتُ قصيدة كتبها زميل دراسة في سنار الثانوية ونسبها للشاعر السفير صلاح أحمد ابراهيم!
احتفى الناس بالقصيدة وكان مآلها أن أمر المدير بضمها الى مواضيع الجريدة الحائطية القادمة...فضحك زميلي وقال بأنها من تاليفه

عذرا أخي الفاضل يازول لايراد القصة
مودتي



التوقيع: المرء أن كان مخبوءا في لسانه فإنه - في عوالم هذه الأسافير - لمخبوء في (كيبورده)
عادل عسوم غير متصل   رد مع اقتباس
قديم 14-05-2013, 01:01 PM   #[6]
زول الله
:: كــاتب نشــط::
الصورة الرمزية زول الله
 
افتراضي

اقتباس:
المشاركة الأصلية كتبت بواسطة يازولyazoalيازول مشاهدة المشاركة
أستاذنا الجليل معتصم الطاهر
أشكرك على المشاركة فى هذا الخيط وللحقيقة والتاريخ فإنى قد سمعت القصيدة من فم شاعرها مباشرة رحمة الله عليه أستاذنا الجليل الراحل المقيم صلاح أحمد أبراهيم فى ندوة فى جامعة الخرطوم بعد الإنتفاضة وقد تم تسجيلها وقد نقلتها من المسجل إلى الورق وقد فاتت علىّ بعض الكلمات بسبب الضجيج والهتاف المستمر مما أضعف القصيدة ، يا ليتك لو أعدت قراءتها مرة أخرى فستحس بها لغة صلاح العظيمة علماً بأنها من المرات القليلة النى يكتب فيها صلاح باللغة الدارجة بسبب الغبن الذى أصابه جراء العهد الذى تعرفه وكيف تم ضرب الشيوعيين وقتها وقتلهم وتشريدهم فى الأرض ، أكرر التحايا ، أخوكم هشام شيخ الدين
لأول مرة يحسبها القاريء مكتوبة فوق البشير
وبعد يتمعن يلقى بين طياتها جعفر النميري
الغريبة انها لافقة مع المشير الحي اكتر من لفقانها مع المشير الميت المكتوبة فوقو
شكراً يازول





اقول قولي هذا واستغفر الله لي.................



التوقيع:

انا يوماتي أردد إسمِك بعد الحمدو "مكان الآية"
لما وحاتِك -من أشواقي- حِفِظ القول خيط المُـصلاية



أبــداً ماهُنـتَ ياســـوداننا يـومـاً علـينا

زول الله غير متصل   رد مع اقتباس
قديم 14-05-2013, 01:14 PM   #[7]
النور يوسف محمد
:: كــاتب نشــط::
الصورة الرمزية النور يوسف محمد
 
افتراضي

اقتباس:
المشاركة الأصلية كتبت بواسطة زول الله مشاهدة المشاركة


لأول مرة يحسبها القاريء مكتوبة فوق البشير
وبعد يتمعن يلقى بين طياتها جعفر النميري
الغريبة انها لافقة مع المشير الحي اكتر من لفقانها مع المشير الميت المكتوبة فوقو
شكراً يازول

اقول قولي هذا واستغفر الله لي.................
بسم الله الرحمن الرحيم



تعرف يا زول الله الحاكم الجاى تلفق معاهو ،،
ياخوى جينات السلطة ـ ويا دنيا مافيك إلا أنا ـ دى متوارثة ،،

نحنا شعب كربونى ياخ ،،

إنا لله ،،



النور يوسف محمد غير متصل   رد مع اقتباس
قديم 14-05-2013, 03:31 PM   #[8]
معتصم الطاهر
:: كــاتب نشــط::
الصورة الرمزية معتصم الطاهر
 
افتراضي

اقتباس:
المشاركة الأصلية كتبت بواسطة يازولyazoalيازول مشاهدة المشاركة
وقد نقلتها من المسجل إلى الورق وقد فاتت علىّ بعض الكلمات بسبب الضجيج والهتاف المستمر مما أضعف القصيدة ،
أخونا هشام

روح ذلك الزمن موجود فى القصيدة
لكن ضعف القصيدة ظاهر
1- ( تلحيق السوق)
2- القصايد الهتافية
3- المجاراة

هي من ألد أعداء الانتاج الفني ..



التوقيع:
أنــــا صف الحبايب فيك ..
و كـــــــــــل العاشقين خلفي
معتصم الطاهر غير متصل   رد مع اقتباس
قديم 14-05-2013, 05:19 PM   #[9]
أحمد طه
:: كــاتب نشــط::
 
افتراضي

اقتباس:
صدق القالو منصور
نصرة ضد آمالنا
ضد أولادنا
ضد أحفادنا ضد عمالنا
ضد الشعب كلو القالو مالك ومالنا
حلال بلة من القيد يكون حلالنا
آمين يارب العالمين

رحم الله صلاح أحمد إبراهيم و أحسن إليه ، القصيدة بلا شك من شعره و تشبهه
وهي من ضمن قصائده في ديوانه المطبوع في الثمانينات (محاكمة الشاعر للسلطان الجائر)
ربما كانت هناك بعض الأخطاء في النقل أدت إلى خلل الوزن في بعض أبيات المربعات ،
أما القصيدة ككل فهي بلا ريب للراحل الأديب صلاح أحمد إبراهيم

شكراً يا (يا زول)

كسرة / ياخي اسمك دا كده متعب ، ماتشوف ليهو مباصرة تانية



أحمد طه غير متصل   رد مع اقتباس
قديم 14-05-2013, 08:04 PM   #[10]
فيصل سعد
:: كــاتب نشــط::
الصورة الرمزية فيصل سعد
 
افتراضي

سلامات يا هشام و الف مرحبا بك في سودانيات
و طاب مقامك يا حبوب .. و نهديك و الاحباب
القصيدة صوت و صورة :






التوقيع: اللهم اغفر لعبدك خالد الحاج و
تغمده بواسع رحمتك..

سيبقى رغم سجن الموت
غير محدود الاقامة
فيصل سعد غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 10:14 AM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.