عرس بتو لموقابي

[حافظ حسين]

قال ليكم يوم الجمعة الفاتت زيمبابوي دي رابة ربة
عرس بت موقابي الوحيدة إسمها بونا و العريس طيار
أها قال ليكم العرس كلف 5 مليون دولار امريكي بالجديد
شفتو كيف؟
و العريس دا السنة الفاتت فتح الخشم دافع 35 الف دولار و 15 بقرة .... هسي البقر لزومهم شنو يا الجيلي؟
ما كدا بس عملة زيمبابوي كالاتي:
الدولار الامريكي بعادل ما بين 3-4 ترليون دولار زيمبابوبي
دا معلومة ختوها ساي كدا
في 7 مليون مواطن زيمبابوي محتاجين لأغذية حسب قوالة برنامج الغذاء العالمي
يعني بالعربي كدا جعانين

http://www.akhbarak.net/articles/149...8A%D9%88%D9%85

[حافظ حسين]

ما كدا بس موقابي دا قبل شهرين عمل عيد ميلاده ال 90 ( الشي دبيب), و كلفه مليون دولار امريكي , و بعدين عشان ما في واحد يجي يقول كدا و لا كدا الخمسة مليون دولار بتاعت العرس إضافة للمليون بتاع عيد الميلاد كلها بتقي ستة, دي موقابي دافعها من حر مال ابوه , لانو جنكم تتهموا الدكتاتوريين بالفساد .....
أها قال ليكم البت عرست طيار و هو بكون طيار زيمبابوي الوحيد


و الدكتاتوريون الله يكتلني بقروا من كتاب واحد ......

يلا يا فرد داير نشتغل في الشغل دا بعيد عن السياسية من لحظة فتح الخشم لحد العرس الكلف 5 مليون دولار دا .... بالله يدكم معانا

[حافظ حسين]

يا أشرف يا خي عليك ناغم مهند و ماجد تاج, و زول الله و كل الشباب ديل نمشي علي الزول يا خي اتأخرنا شديد.... هكذا صاح الجيلي في أشرف و رد الأخير ب:
والله يا الجيلي أنا جاهز جتي عمتي كووها لي, الا انت قلت لي الجاي يتكلم في بت موقابي دا منو؟
الجيلي: والله دا طيار ود ناس اشوك لكن اسمه طار لي , لكن يا حبة ح يكون عرس رابي
أشرف: لا ما أظن موقابي دا بخاف من الجرايد و شيل الحال.....
و قبل ان يستفرغ الجيلي الكلمة التي عارضت في حلقه عالجهم ماجد تاج صائحاً:
يا أخوانا انتو لحد هسي بتسوا في شنو , قالوا اهل العريس ديل قراب و هسي ناغمني موقابي ....
الجيلي: خلاص مشينا مشينا لكن مهند و باقي الشباب ديل وين
أشرف: لا حيلحقونا هناك يلا خفوا كرعينكم
و إنصرف ثلاثتهم ناحية بيت موقابي قدس الله سره و حفظه

يتبع و بالمساعدة بالله

[حافظ حسين]

السلام عليكم
هكذا صاح ثلاثتهم في كورال سلامي و قبل أن يواصلوا التحايا صاح ماجد في زول الله و مهند معاتباً: يا خي إنتو قاعدين هنا و نحن منتظرينكم بغادي
تبرع زول الله بالرد قائلاً: والله انا و مهند دا ماشين علي دكان عمر الفراوي نشرب لينا حجر شيشة علا جوالي رنة و لقيته السيد الريس و قال لي إنتو وين؟, قلت لمهند الشيشة طايرة في السماء الريس بنادهن يلا من دربنا دا عليه .....
زين موقابي فدقيه بابتسامة صفرا تقول متين انا قاولتكم
أها وين النور و العمدة و الشباب البقية .... دا كان سؤال مهند
الجيلي: والله ما عارفهم لكن جايين, هسي انا شايف أمال و أم التيمان و نبراس خشن علي بيت الحريم كدا اضرب لأمال اسألها لو كانت خابراهم

[حافظ حسين]

فجاءة إمتلات ساحة الديوان بالحضور و السلام بالربت علي الضهور و حق الله بق الله و الخ من سلام بدون غرض و طيبين بلا مرض, حتي موقابي السلم علي ناس أشرف بأصبع واحد و قال ليهم (اتفضلوا استريحوا), قام علي طول و شارك في كرنفال السلام ما قلتو نوبة , و النسيب عين شمس و كسرة العين صعبة ترا ....
المهم قعدوا الضيوف و من حوش الحريم إنطلقت الزغاريد و منها ميزنا زغرودة تماضر حمزة ..... الضيوف قعدوا و ناس خال فاطنة و وجدي الأسعد, الرشيد اسماعيل و الخ من الأحناك العاضة دي شغالين يجيبوا في الشربات و التلج , يتبسموا بلا سبب, يشوفوا في وش موقابي الامه ما ممكن تبتسم ليه يتبسموا و العجب العريس و لو ما خايفين من اللايحة كان كبروا الابتسامة و اللفة.....
بعد الضيافة و كدا واحد من أعمام العريس قال لموقابي
و الله يا ريس جيناك خير
ديل يخلوا موقابي يرد, كلهم بصوت واحد زي الطلبة الخايفين من الاساتذ ردوا (الفيها الخير الله يسويها)
عم العريس: والله بندور بتنا بونا لولدنا الطيار
و سكت القوم و بحلقوا في موقابي الذي رد بابتسامته القديمة: والله انا ما عندي بت, البت دي ديل أعمامها لو ادوكم انا تمامة خير بس.....
أشرف عشان لفيف داك و يفتقر لاي أوتوكيت قال للعم: يا زول علي بركة الله بس عندنا شوري ....
موقابي صرة ليه صرة كدا أشرف ما فهمها لكن انقذه مهند وقت قال:
يا أخوانا خير البر عاجلة و الشوري فوق شنو, الولد ولدنا وو البت بتنا
و رجعت لموقابي الروح المفوتة كمين وقت .....
علي بركة الله يلا نقرأ الفاتحة
و قروها باخلاص عالي

يتبع

[حافظ حسين]

بعد قراية الفاتحة طلع العم من الكمر الرابطه في صلبه صرة و ختاها قدام موقابي قال ليه .... يا ريس دي 35 الف دولار فتحة خشم .....
تجهم وجه والد العروس في حيرة و نظر الي مستشارية نظرة عرفها علي طول زول الله و توجه بالسؤال الي العم قائلاً:
يا زول مبروك علا ال 35 الف دولار دي بياتو حسبة؟
العم: لا يا أخوي دا دولارأمريكي عديل .... و قرب يقول قايله دولارات زي القش الهنا دا الا انه رأي برهان موقابي و صرف نظر عن التعريض بالعملة المحلية....
صاح الجميع بعد ان عرفوا سر العملة, صاحوا (يا زول مبروك مبروك, و انشاء الله بيت مال و عيال)
و واصل العم قائلاً: و بعدين في 15 بقرة برضو موقفنهن برا
و في الحال أوكل لأشرف أمر البقر و شال حباله و مشي علي البقرات
سأل العمدة بقعيد قائلاً: أها يا أخوانا العرس متين
عم العريس: والله كان علي العريس الليله دي يدخل , علا قلنا نديكم شهر ما كفاية...
هز موقابي رأسه قائلاً: لا شهر ما كفاية, العرس دا خلوهو للحول في الدرت لانو أهلي كتار و لازم كلهم يحضروا يا أخوي و لو ما كلمتهم من بدري بزعلوا....
يتبع مع حوش الحريم الظلامي

[ندى]

المشاركة الأصلية كتبت بواسطة حافظ حسين

يا أشرف يا خي عليك ناغم مهند و ماجد تاج, و زول الله و كل الشباب ديل نمشي علي الزول يا خي اتأخرنا شديد.... هكذا صاح الجيلي في أشرف و رد الأخير ب:
والله يا الجيلي أنا جاهز جتي عمتي كووها لي, الا انت قلت لي الجاي يتكلم في بت موقابي دا منو؟
الجيلي: والله دا طيار ود ناس اشوك لكن اسمه طار لي , لكن يا حبة ح يكون عرس رابي
أشرف: لا ما أظن موقابي دا بخاف من الجرايد و شيل الحال.....
و قبل ان يستفرغ الجيلي الكلمة التي عارضت في حلقه عالجهم ماجد تاج صائحاً:
يا أخوانا انتو لحد هسي بتسوا في شنو , قالوا اهل العريس ديل قراب و هسي ناغمني موقابي ....
الجيلي: خلاص مشينا مشينا لكن مهند و باقي الشباب ديل وين
أشرف: لا حيلحقونا هناك يلا خفوا كرعينكم
و إنصرف ثلاثتهم ناحية بيت موقابي قدس الله سره و حفظه

يتبع و بالمساعدة بالله

إت يا اللخو مسعول من الخير الشئ دة عقد ولا شنو رجال صررررررررر عليكم

أها كلو خلينا الدولارات والملايين ما خاسينا بيها الشيلة دي كان الليلت الملابس أو الماكولات برضو بتشيلوها براااكم ... شكيتكم على الله ...

وقالو يا أخوي البياكل براهو بخنق أدو إخياتكم معاكم كان خلعو عليكم شئ من الدولارات دي


الجيلي يا أخوي الدولارات نستك إخيتك


حافظ
جميل الحكي والله تسلم
ياداب بديت وعصرتني المداخلة دي
بواصل وأكيد بجيبني الدرب تاني ، وللأمانة إني هنا حااااااااااتلة ألا هل بلغت

[ام التيمان]

قبيحة جدآ
لا تستحق كل الاموال
التى صرفت عليها

[أمين محمد سليمان]

المشاركة الأصلية كتبت بواسطة ام التيمان

قبيحة جدآ
لا تستحق كل الاموال
التى صرفت عليها

يعني يا ستهم لو كانت شديدة جدآ كانت تستحق ؟!!

إتذكرت مسرحية العيال كبرت ... لقو جوب غرامي في جيب أبوهم .. متفق مع وحده انهم يتزوجو و يهربو ... قامو إجتمعو يحاولو يعرفو أبوهم بحب منو... يونس شلبي قال ليهم أنا شاكي في عمتي ...سعيد صالح قال ليه أبوك مش ممكن يهرب مع عمتك لانها متجوزة !!
أحمد زكي - العاقل الوحيد في الأخوان - قال ليه يعني لو ما كانتش متجوزة ...أبوك كان ... سعيد صالح قال ليه : على سنة الله و رسوله !!

هسي بت موجابي دي لو كانت سمحة ... بتستاهل يشيلو ليها من قروش الشعب المزعوط ده 5 مليون دولار على سنة الله و رسوله ؟!!

[ماجد تاج]

المشاركة الأصلية كتبت بواسطة أمين محمد سليمان

يعني يا ستهم لو كانت شديدة جدآ كانت تستحق ؟!!

إتذكرت مسرحية العيال كبرت ... لقو جوب غرامي في جيب أبوهم .. متفق مع وحده انهم يتزوجو و يهربو ... قامو إجتمعو يحاولو يعرفو أبوهم بحب منو... يونس شلبي قال ليهم أنا شاكي في عمتي ...سعيد صالح قال ليه أبوك مش ممكن يهرب مع عمتك لانها متجوزة !!
أحمد زكي - العاقل الوحيد في الأخوان - قال ليه يعني لو ما كانتش متجوزة ...أبوك كان ... سعيد صالح قال ليه : على سنة الله و رسوله !!

هسي بت موجابي دي لو كانت سمحة ... بتستاهل يشيلو ليها من قروش الشعب المزعوط ده 5 مليون دولار على سنة الله و رسوله ؟!!

ـ





ـ

[ناصر يوسف]

المشاركة الأصلية كتبت بواسطة حافظ حسين

قال ليكم يوم الجمعة الفاتت زيمبابوي دي رابة ربة
عرس بت موقابي الوحيدة إسمها بونا و العريس طيار
أها قال ليكم العرس كلف 5 مليون دولار امريكي بالجديد
شفتو كيف؟
و العريس دا السنة الفاتت فتح الخشم دافع 35 الف دولار و 15 بقرة .... هسي البقر لزومهم شنو يا الجيلي؟
ما كدا بس عملة زيمبابوي كالاتي:
الدولار الامريكي بعادل ما بين 3-4 ترليون دولار زيمبابوبي
دا معلومة ختوها ساي كدا
في 7 مليون مواطن زيمبابوي محتاجين لأغذية حسب قوالة برنامج الغذاء العالمي
يعني بالعربي كدا جعانين

http://www.akhbarak.net/articles/149...8A%D9%88%D9%85

أهااااااااااا وقوووووووم يا ود يا ناصر أقع وإتفنقل تِتِّرِب علي قفاك بعد ما عملت عمليات حسابية دقيييقة كده وقارنتها بالقريشات الدفعهن ليك احمد زين نظير توثيقك للحدث الخرافي داك

العرس كلف 15.000.000.000.000 دولار زيمبابوي

5.000.000 دولار ،،، معاك الواحد ،، نطلع بالتمانية ونشيل السِتَه ،، معاك الواحد يبقي يساوي ،، يساوي بالجنيه السوداني بالقدييييييم حواليييييييييي حوالي حواليييييييي

ديشششششششششششششششششششششك ،،،

يا احمد زين ويا طارق كانديك يا ( مُعفنيييييييييين)

40 مليار حِتَّه واااااااحده كِده وأنا دافعين لي 100 دوراااااااار بالسوداني يعني 800 جنيه بسسسسسسسسسس ؟؟؟ يا ( مُعفِنييييييييييييييين)

ما بصور ظاتو ياخ ،،

وخرج من باب الدخول آيباً خائباً بلا دولارٍ واحد حاملاً كاميراته وتأسفاته لبني جلدته من الــ ( غُبُش) الذين لا يزالون يكتوون من حكوماتهم الرشيييييييييييده وهي تُتاجر بقوتِ أطفالهم جهاراً نهار،،

بمثل ما يفعله سياسيو زيمبابوي الشقييييييييقه ،،،

مُش هي بلد إفريقي ونحن ظاتنا إفريقيين ؟؟


وتيييييييييييييييب



حافظ حسين ،،،

ديشك ظاتو ياخ