علام أفتِّش عن إجابة؟؟
إذا كنت مديني اليقين ..
فعلام أفتش عن إجابة ..
مادام غُناك صحى البلد
سالم شقا الناس الغلابة
صحى الشوارع في السما
في كل تقاطع ,, بشبهك ..
صوتك,, حمامات السلام ..
ضلك بيشبه - ليّ - سحابة
ضحكك .. فرح كل الطفولة ..
يا السكاتك ما بيشبه إلا صبرك
انت لونك فيهو بسماتك .. حبابا
فيهو تربالا بنادي اللوبي مهلاً
لابقة الحنين - جوَايا دابا -
شايلة بي كفي المحنّة ..
زارعة واطاتك .. محبة ..
ناس تغني وليك تريدك ..
وريدي " أروتِّي " الربابة ..
هي البتعرف كيف تسالمك ..
كفي مابتعرف .. حرابة
أنا ماتركتك للمدينة الغايبة في ضل الرتابة
و ماتركتك للغياب ..
روحي تعلن يوم تغيب - برضك - غيابا
بس منحتك سر عيونك ..
غصب عنك ..وغصب عنِّي..
إت عيونك..كل سؤالاتهم مُجابة,,
أنا جد لفيتك .. في الأماني الكاملة
بي بلداً بِرتِّب صوت مشيك
دروب مشتهية تنزل في رحابا
القدرة لو كانت تفوتك
ماكان بيعجزنا المزار
لو كِمِل حد الصبر ..
برضو تكتمل المشاوير الصغار
لو الزمن إزداد عِناد ..
عشمي الرِضا السكن الديار
غربة الأشواق بلادك
غربتك لو قاسية .. دار
حنينة لمتنا فــ ربوعك
فرقتك في خاطري .. نار
خاطري لو بطفيو سلامك
ذكرتك تملاهو .. نار
السمحة لو مالت دروبا
ينعدل بيك المسار ..
أبقى جاي على الحقيقة
وببقى جاي .. لو حق أشار
أبقى مارق .. و ماتخاف ..
لو دليلك .. فينا حار ..
نبقى سكة زول نريدو
فيهو أحلامنا الكتار
يا بلاد بالإلفة غنّت ..
فرحة صِبحت لينا جار .
|