البدينقا والمحجان

[شوقي بدري]

بعض الأهل كانوا يحضرون من الصعيد محملين بشرموط القرنتى وجلد التمساح وجلد العينسيد فى شكل شرائح لتشكل سيطان عنج . ويمتلىء جيبهم بالمال ، ويكرمون الأهل ، وينزلون البيرق فى الأنادى اشارة الى أن الانداية محجوزة . والبعض يعيش حياة بسيطة قانعا ببعض الخراف والغنم ومحجان طويل لهز الشجر خاصة زهرة القرض (الأكاسيا) المعروفة بالشبش . هذا أعطانى فكرة أن الدنيا هى مخاطرة وركوب الصعاب وحمل البدينقا أو الاكتفاء بالمحجان . ونحن الآن نعيش فى الزمن الضايع ، ولأبنائنا وبناتنا نقدم هذه القصيدة . وأنا الآن أعيش وجع فقد توأم الروح بلة ( جاك ) أو أحمد عبدالله فارس أمدرمان .

البدينقا والمحجان

خسران البدل البدينقا بالمحجان
قمحان الخلا السَلب وشايل القيطان
الطير والجرى ما ببقو ليك يا نعام
الاسد الما ً برافق كمان خسران

البتسوى الليله بتلقه كله لا قدام
البجر خيشك بتجر حريرو كمان
السيف إن طلع ببين السجمان
الحريق ان كِبر بِلزموه بالنيران

كان لميت السجم تكون غلطان
الميز والفهم ما بوزنوه بميزان
ان عز السرج ايه فايده البَطان
الكتف البرف ما بكشفو لى بُطان

الناس العزاز ما بقسمون كيمان
الجوع والشبع بيحسبا المصران
الفارس الراكز بقول كمان وكمان
الكلمه الحنينه بتفرح الحردان
الزول السفيه ما بسوو ليهو بيان
نلف وبندور والدنيا هى امدرمان

ما كضبوا القالوا الولف كتال
وين شفتوا قلباً كتفو بحبال
اهم من الجمال والخصل فى خِصال
الفارس بيركز و متناوشنو نبال
الخَلِق تتبدل لمن يعز المال
اول رشاش التَبسَ بِغير حال

اللعوت بتلاقا فى الحرق والموت
الجايبوا الدرب يوماً بقوم ويفوت
القام فى الخلا ما بمسكنو بيوت
كَدَب القلب ما بِبرطنو زيوت


الشرف العريض عِبارو ما الفدان
الجود والكرم ما بس كبر قيزان
الناس ما بهمها شن كنت انت زمان
البتقاسمو مالك بدورك كمان جيعان

الشارى السمك لا بد يلاقي زفاره
الدايرك بدورك و راسمالك الشُماره
الاهل التمام ما بتفقدم فى الحاره
الغدر الكريم ما يحسبها شطاره

البعشوم مخرجو وسيع ببلعو اللالوب
بعد فرحه العرس كل واحد بقول الروب
البحر ان طمح لازم يجيبلو خبوب
الفقرى ان شبع بحوجك لصبر ايوب

البتشترى بى قرش ببيعك بى تعريفه
الزول الهميم عداوتو ذاتا نظيفه
فى الدنيا فى الما لاقى ملح ورغيفه
لكن الروح سمحه حلوه عفيفه

الباعك مره ببيعك كمان مرات
الما بسوى هين ما ترجا فى الحارات
مين قال الصدق بيحل من الورطات
ولا حتى الكضب بيقلل الشمات

الحموها الكلوميت ما بتشد العرقى
بعد الهدر ما يجوز الفحل يرغى
الخواف بيحسب كل المرض بعدى
حتى الكلس ما بتقصد الجدرى

الما بفارق الفريق بشدو ليهو حصان
الفرش الوهيط مـــــا بمّدو للفتران
الشبعان بضبحولو ويدمسو الجيعان
يساعدو القوى وما بهمهم تعبــــان

عصر السرج ما بوجّــــــع العرقوب
والزول المحّدر ما بذكّروهو الطوب
المهلة والوقوف دوام طلب أقروب
وخلفت كراعو الدرش بقول الروب

كيفن عكولا ما بتعرف السفروق
ومع الضبيحة بمسخ السبروق
وما كل المطر بيجبلو بروق
الشرف ان وقع ما برفعنو مروق

الضايع بيضهب حتى فى تنقور
المتيقّن بيرضا كان سكّنو كركور
النافربفندّر كان حكّرو فى قصور
اللئيم بغدرك ويوريك أمور وأمور

اختا مجرى السيل كان بنايتك الضانقيل
ما ترافق الاضينه ، لانه ما بشد الحيل
الهمباتى ما بتدبا ويسرق بهم بالليل
وما بقرب إبل عوين والسيدا مالو قليل

الساكن راس جبل ما تقصدو لى حاجه
والزول الكريم تلقاهو وش الباجه
واهل الفضل ما بعرفو ليه ولجاجه
وبت الاصل فى الفقر منور تاجا

ما تقنع من اصيل حتى اللكان بابكول
درب الخير قصير حتى أكان يكمل حول
ودرب الشر طويل لو اخدلو قلبه قول
والرجال ً ما بقيسوها بالعرض والطول

وكتين عندك غزلان الخلا امات زيق
شن بوديك تمعط غنمايه من طرف الفريق
وايه فايدة الراكوبه وكتين يطالا حريق
والبروسه تجبدا بدرى قبال تغرز غريق

الاروتى الفوق التكم ما بنفع يكون انقيب
الداير الدواس بالصح ، عكازتو ما سوريب
مغايص خلق الله ما بفشها المحريب
وكضب الرمالى ، وغير الله ما بعرف الغيب
.................................................. .......
.................................................. .......

(البدينقا .. حربه لصيد التمساح وفرس البحر )
( المحجان . . عصا الراعى المعكوفه لهز الشجر )
(البطان .. بفتح الباء الحزام الذى يربط السرج )
( البطان .. بضم الباء الجلد بالسوط فى حفلات العرس )

( التبس .. الشجيرات الصغيره . اشاره لضغار القوم )
( القيزان .. القدور الكبيره )
( الشماره .. بضم الشين خرقه تستعمل كازار للطيانى التربال او المزارع )
( اللعوت .. اشجار تنمو كفروع طويله من الارض لا تلتقى فروعها )
( الكلوميت .. مشروب مسكر يخمر )
( الهدر .. صوت الجمل عندما يكون غاضبا ومتهياءً للعراك )
( الرغى .. صوت الجمل وهو يتألم كنوع من الشكوى )
( المحدّر : المسنود لمرض أو لجرح )
(الطوب : هو القبـــر)
(أقروب : الماشى راجلا وسط القافلـــة )
( خلفت الكراع : المقصود بها الركوب )
(الدرش : الجمل القــوى )
التنقور : كلمتان وتعنى درب- البقر فى الساقية
عكولا أم تشر : الأرنب البرى
السفروق : عصا معكوفة تطلق لصيد الأرنب أو الغزال
السبروق : نبات ( ملاح)
بابكول : الرجل الذى يخدم فى الأنداية
الضانقيل : الطوب الأخضر
البروسة : النبات العشوائى
الأروتى : سائق البقر فى الساقية
التكم بضم التاء : مقعد الأروتى
الانقيب : راعى الابل وحاميها
الباجا : الساحة أو الأرض المنبسطة

شــــــــــــوقى

[خالد الحاج]

الكتف البرف ما بكشفو لى بُطان

الشارى السمك لا بد يلاقي زفاره

الزول الهميم عداوتو ذاتا نظيفه

الاهل التمام ما بتفقدم فى الحاره

ما تقنع من اصيل حتى اللكان بابكول

ده كلام جميل يا شوقي والله وكل صدر بيت وكل عجز بيت عبارة عن حكمة بذاتها
لكين بيني وبينك يا إبن عمي الزمن بقي صعب والله شفنا كتوف ترجف ذي قالب الجلي وسيدها
يكشفها للبطان ..

وشفنا الفيهو الزفارة وصيدو قرقور.

وحليل الناس العاداواتهم نظيفة بقي الضرب تحت الحزام وفوق الحزام
أما الأصيل فوا شوقي ليه..
حليل أيامك يا صديقي أنت لمحة من زمن جميل أخشي عليك من تبدل الزمن وأخلاق والرجال.

الله يديك العافية أيقظت مواجعنا

[عجب الفيا]

فوق الى حين عودة

[عجب الفيا]

رحم الله تؤام روحك المرحوم بلة (جاك ) فارس امدرمان ،
ولعل فراسة بلة هي التي اوحت لك ان ترثه بهذا الفن الخالد ، فن المناحة ،
فادب المناحات عندنا فن رفيع جدا يزخر بالتغني بالقيم النبيلة والاخلاق الفاضلة
ويتحول فيه الحزن على الميت الى دعوة الى مناجزة الحياة والتسامي فوق الصغائر ،
والمناحة دائما للفارس ، لذلك تجد المناحة تكتفي بتعداد ماثر الميت
والحض على الاخذ بهذه الماثر ولا تميل الى التعبير الفج عن الحزن .
دائما اجد نفسي مسلوبا امام ادب المناحة حيث ينتابني حنين الى زمن ما لا ادري ما كنهه
جاء في هذه المناحة :

عصر السرج ما بوجّــــــع العرقوب
والزول المحّدر ما بذكّروهو الطوب
المهلة والوقوف دوام طلب أقروب
وخلفت كراعو الدرش بقول الروب

توقفت في عبارة : خلفت كراعو :
هل المقصود خلفة كراعو : اي خلفة كراع الفارس فوق الجمل الدرش ما بنزل منو لما الجمل يقول الروب .دلالة على شدة باس الفارس وبطشه .فهو دائما هميم نشيط لا يعرف المحركة لذلك لا يمشي اقروب اي راجلا .
كلمة محدر هنا كلمة فصيحة من التحدر والانحدار ويسبب التحدر للنائم وجع في الرقبة عقب النوم لانه لم ينم مستقيما او لوجود ميلان في السرير لذلك بعض الناس وانا منهم لا ينام الا بعد ان يرفع السرير بطوبتين والا تحدر .

لي عودة

[عبد الوهاب هنداوى]

ود البدرى.... اليك ودى ايها المبدع ...

. واحر التعازى فى فقدانك توأم روحك العزيز ......

لقد احسستنى بدفء روح المرحوم..ومقامة ...وقامتة ...وشهامتة. ورجولتة
..
فأنت تعيش فى زمن انتهى منه مثل هؤلاء بدليل من كتبت فية كلماتك العميقة المعنى السامية المحتوى

قد ترك الدنيا بما تحمل من جماليات وطيب وزخارف وذهب الى حيث الحقيقة المرة ......

.فأنت دللت بأنك نعمة الصديق ..............وانت منحت ونعت صديقك ولكن ذكرت حقائق قل من يتذكرها

فى زمن انعدمت فيه اقل الأشياء وانتهت فيه المثل والقيم والأخلاق المنتمية لسودانيتنا واصولنا التى

تمتد الى اعماق الأرض ...............

ولك التقدير .................................................. ...........هنداوى

[عجب الفيا]

الاخ الاستاذ شوقي
واضح ان غياب التشكيل ادي الى صعوبة في قراءة النص ودا واحد من مشكال عدم معرفة الطباعة وهي واحدة من المشاكل التي لم استطع ان اتغلب عليها حتي االان . التشكيل عند الكتابة باللهجة السودانية مهم جدا . لان غياب الشدة مثلا ممكن يضيع المعنى . كما في : " بدل " في هذه الابيات :

خسران البدل البدينقا بالمحجان
قمحان الخلا السَلب وشايل القيطان
الطير والجرى ما ببقو ليك يا نعام
الاسد الما ً برافق كمان خسران

جميل انك شرحت بعض المفردات ، انا شخصيا اول مرة اسمع بالبدينقا والمحجان ،
نحن عندنا ، السفروق والحنفة والقرجة والفرار والمطرق الخ ...
لكن عجبتني جدا كلمة قمحان ، وتعني عندنا الخسران ، الذي لم يربح او يكسب في ( القنيص ) .
واظنها تعني هنا والله اعلم - ان االخسران الذي يسلب ثم لم يجد عند من سلبه سوي القيطان (الملابس ) من القطن .

[عجب الفيا]

هنالك شبه كبير بين اخلاق الفرسان واخلاق الهمباتة
لانو الهمباتي اصلو فارس تنكب الطريق ،
والهمباتة عندنا يشبهوا الشعراء الصعاليك في الزمان القديم ،
امثال عروة بن الورد والشنفرى وتابط شرا وغيرهم .
جاء في مناحة استاذنا شوقي في صديقه بلة :

اختا مجرى السيل كان بنايتك الضانقيل
ما ترافق الاضينه ، لانه ما بشد الحيل
الهمباتى ما بتدبا ويسرق بهم بالليل
وما بقرب إبل عوين والسيدا مالو قليل

يعني الهمباتي بسوق بهائم الناس عديل عينك عينك ،
لكنه ما بسوق بهائم المساكين وما بسرق حق النسوان .
وهذه من اخلاق الفرسان .الفارس لا يغدر ولا يقاتل الضعيف الاقل منو .
العوين : النساء . لا زالت مستخدمة بكثرة عند اهل كردفان ولعلها من العون . اي انهن في حاجة الى عون الرجال خاصة في المجتمعات الابوية

[شوقي بدري]

العزيز عجب الفيا
لك التحية والمودة

أعرفك ببله الفارس قليلا...

كما ذكرت في كتاب أمدرمان أن محمد نور سعد الضابط المشهور خرج من منزل شقيقته الرضية في حي السردارية أمدرمان وسب كل أهل الحي وتحدي أي رجل أن يبرز له أثر إهانة لحقت ببثينة صديقة شقيقته، وبثينه كانت زميلة الرضية وهن من كورس الإذاعة (شيالات) ومذكورة في الأغنية الدكاكينية في أمدرمان (يا أستاذ وبالقزاز ) تقول الأغنية :

"بثينة أم سدر في السرير الدبل
البيرة أم جمل والشراب سكوب
كب يا علي في كبابي الشب "

ولم يبرز له سواء بله وكان وقتها في السادسة عشر ووقفت انا وكنت حينها في الرابعة عشر متحفذآ خلف بله وبله وقتها ملاكم جيد إلا أنه لم يكن في حجم أو قوة محمد نور سعد الذي وقف محتارآ وانتهي الأمر بأن خرج العم الطيب جبارة الله وزجرنا. وفي أول مايو 69 كان محمد نور سعد في زيارة بله في منزله في شارع الأربعين وبينهم كثيرا من الود.

بينما كان مجموعة من الشباب يتحدثون عن أخيهم الذي غرق في النيل ويذكرونه كملاكم جيد أشاد بله بالمتوفي وذكر أنه التقي به عدة مرات في حلبة الملاكمة وعندما سئل عن النتيجة قال المرحوم كان ملاكم كويس وانتصر علي في كل مرة وما كان بينهزم إلخ..
وعندما ذهبنا لغسيل الأيدي عند الماسورة سألت بله : ده مش الراجل الإنت (ظبطو) في حلقة سلاح المهندسين؟ قال محرجآ : أي لكين ما ممكن تقول ليهم أنا فزت علي أخوكم.

بله كان من أول المهاجرين إلي ليبيا وبعد أن كان يعمل في الشركة الأميركية (ولش) للإنشاء التي شيدت طريق مدني بورتسودان وكان في الستينات يتقاضي ما يقارب ال 100 جنيه وهو مرتب خمس موظفين حينها وهو مثلي لا يدخن ولا يشرب وكان يصرف هذه الفلوس علي الآخرين.
وهو في الطائرة عائدآ إلي السودان من ليبيا خطفت الطائرة ولم يخبرني بله بالقصة وسمعت بها من الآخرين أن بله كان يهدئ الناس ويشد من أزر النساء والأطفال وعندما رجعت الطائرة إلي ليبيا وجد المسافرين تعنتا وتحقيقا
ومضايقة من السلطات الليبية كان بله بشجاعته وأدبه ومعقوليته يتدخل . كان بطلا بحق . ثم بدأ بله رحلات الشاحنات إلي ليبيا وبعض هذه الرحلات كانت مثل ركوب الأهوال انقطاع في الصحراء بالأسابيع وعربات تنكسر . وبله في كل الوقت يرفض أن يكتفي بما عنده ويقعد في أمدرمان يكتفي بالمحجان لأن رسالته كانت أن يقدم للأهل والعشيرة إلي أن استهلكته تلك الرحلات فمات وهو علي ظهر أحد اللواري.

نعود للقصيدة
القصد من السلب هو الحبال الغليظة وإشارة لمن يترك الشيء القوي ويكتفي بشيء سهل بسيط كالقيطان.
وعندما أقول :
المهلة والوقوف دوام طلب أقروب
وخلفة كراعو الدرش بقول الروب

القصد انه الإنسان عندما يكون ماشيا في القافلة (أقروب) يطالب بالتمهل والوقوف وما أن يعتلي أو يركب الجمل الدرش (القوي) ينسي التوقف والتمهل إلي أن يقول الجمل الروب وهذا حال الإنسان عندما يصيب سلطة أو ثروة .

العزيز عجب الفيا
أنت من يحب الكلمات السودانية ولا أزال أحتفظ بموضوعك عن الكلمات النوبية في اللهجة السودانية الذي كتب قبل أربعة سنوات وأحاول أن أحافظ علي الكلمات القديمة التي تكاد تنقرض

شكرآ أخي عجب الفيا .

[شوقي بدري]

العزيز هنداوي

لك التحية والشكر علي المداخلة
يا ريتك لو شهدت بله أو عاشرته ، الناس في بلادنا قديما كانوا جميلين عظيمين الآن تغيرت الدنيا وتغير الناس ولم يتبقي لنا سوي الذكري
التحية

شوقي