نعي أليم - فيصل سعد في ذمة الله !!! عكــود

آخر 5 مواضيع
إضغط علي شارك اصدقائك او شارك اصدقائك لمشاركة اصدقائك!

العودة   سودانيات .. تواصل ومحبة > منتـديات سودانيات > نــــــوافــــــــــــــذ > الســــــرد والحكــايـــــة

إضافة رد
 
أدوات الموضوع انواع عرض الموضوع
قديم 12-06-2010, 12:12 PM   #[1]
الطيب رحمه قريمان
:: كــاتب نشــط::
 
افتراضي الراية البيضاء .... !!!

ان تجلس على "بنبر" فى رحراحة و يضرب "رقراق" الشمس وجهك يمنة و شمالا ...
و على نافوخك التى يتصبب عرقا و يتنتقل الجميع من ظل الضحى الى ظل الظهر ...
و لا تستطيع البعض تحويل بنابرهم التى كانوا جلوسا عليها...
إلا بعد انات و اهات تخرج مثقلة من صدرهم و كروشهم التى ملئت تمامابالمربسة ...
و الذباب يأتيك من كل كوشة قد خلت من الفطاسي سويعات مضت ...

و بعد ذلك تاتيك " التومة" ست الانداية ...

و هى تتبختر فى تثاقل مقصود يدل على الفتونة و القدرة على ضرب و سحل كل هارب من دفع سعر العبار و هى ترتدى فستان مختلف الوانه , و على جانبيه جيبان كبيران لتضع فيهما ما تتحصله من قروش ... و يهمس أحد الجلوس ... هيييع عضات تبش ... !!!

و تنادى التومة بأعلى صوت لها لفتاة تعمل معها و ذلك لتقدم للزباين مزيدا من المريسة ...

او "المريسة بيضة"
او "العسلوب"
او "الكانجى مورو" الذى صنع من سمسم هذا الموسم ...

والناس من حول الانداية أفرادا و جماعات ...
فمنهم الصامت الذى لا يريد حديثا لانه استوى الى اخره...
و قد سكر حتى الثمالة و يريد من يتجرأ ليقول له كلمة ...
و على الطرف الاخر من الانداية مجموعة من الشباب الذى قدموا من حصاد السمسم لتوهم ...
فهم لا يكفون عن الكلام و الحكايات التى مرت بهم و هم فى "الكمبو" ...
و الكمبو هو القطاطى التى يسكنون فيها أثناء موسم الحصاد فى المشروع الزراعى ...

و الكلام يكون تارة خفية و من بعده تأتيك الضحكات الخبيثة ...
و فجاءة و بدون مقدمات و بكل جراءة يقف أحدى ليحكى نكات عن غفير المشروع الذى وثق فيهم فضحكوا عليه و اطعموه معهم لحم البعشوم تارة
و تارة اخرى لحم المرفعين
و من لحوم الطير المشوى شاركهم فى اكل لحوم...
الحبارى و الصقور و الغربان

و ينفجر الجميع ضاحكا حتى يقع البعض منهم على قفاه على الارض من شدة الضحك ...

فينهض شاب يعتمر عمامة و بيده عكاز مضبب ...
و ظن البعض انه سوف يحكى نكات مثل الذى سبقه ... !!!
فتخرج الكمات متلعثمة من فمه الذى لا يستطيع التحكم فيه ...
لا لسكر بين و لكن لغضب قد سيطر عليه ليقول ...

اتقو ا الله يا جماعة الخير كيف تأكلونى الحم الحرام ...
و أنا كنت امامكم وبصلى بيكم الفجر حاضر ... !!!


نواصل



الطيب رحمه قريمان غير متصل   رد مع اقتباس
قديم 12-06-2010, 12:13 PM   #[2]
الطيب رحمه قريمان
:: كــاتب نشــط::
 
افتراضي

و انبرى لهم واقفا فى خطبة عصماء تخللها كثير من آيى القرآن الكريم و الاحاديث ...
و الجميع فى صمت رهيب دون ان يحرك أحد منهم يدا وقدما او حتى يتنحنح جبرا او اختيارا ...
و قد اجهش الكثيرون فى بكاء عميق دون ان يسمع لهم صوت وقد تحولت عيونهم مثل عيون الديكة تماما لحمرتها و الذى زادها احمرارا السكر الذى بدا واضحا على بعض منهم ...
و مما قال :

يا أيها الناس من تاب تاب الله عليه و تعلمون ان خير الخطاؤون التوابون ...

فتوبوا الى ربكم فانه غفار ...

ثم صمت الخطيب برهة و قال لهم فى صوت رخيم بعد ان عدل عمامته و وضع عكازه جانبا :

يا أخونا بلبدى كده الله كبير و غفار و رحيم ...
ثم تلفت حوله فراى أحد البنابر و قد خلى ...
فجلس وأمسك يداه حول صدره و تحلق الناس من حوله فقال لهم :

الله كريم و رحيم و بعدين أنا ما زعلان منكم...
و أنتو عارفيم الكاتبا الله فى الحجر بتقوم...
و كل شيئ قسمة و نصيب ...
و الفات مات...
و ياالله جماعة الخير نبدأ صفحة جديد...
من هنا و لقدام من غشنا ليس منا
هسى الزول الفيكم الشبع صحى صحى منو ...؟
فلم يرد عليه أحد فواصل الخطيب كلامه ...
و تقدم اليه أحدهم و وسوس اليه فى اذنه :

يا مولانا حاجة التومة دى باين عليها حاتعمل عنكبة ...



فطأطأ راسه ثم نهض و نادى باعلى صوت :

يا حاجة التومة تعالى أنت و كل الناس المعاكى فى الراكوبة يجو برة هنا ...
و اسمعو كلامى و بعدين أحكموا عليه ...
فتقدمت حاجة التومة و من حولها عدد من الزباين الذين لم يعجبهم كلام مولانا ...
و يتمنون ان لو حاجة التومة فلعته فى راسه حتى يدمى ...
فقال احدهم بصوت عال:
عشان يجى البوليس ...
و تكون المحكمة يوم الاثنين الجاى ...
و ينجلد مولانا قدام كل الناس عشان يبطل دجل ...
فصمت صاحبنا فجاءة ... !!! لما رمقته حاجة التومة ...
فقال الذى بجواره : امك تانى تجى المولد ...

أما التومة فقد امتلاء وجها إبتسام بمكر و خبث و دهاء ...
يرسل رسالة مبطنة الى مولانا و قد أدخلت كلتا يداه فى جيبى القمص اياه ...
و قد ملئيت جيوب بقروش لا حد لها ...

أها يا مولاى فى شنو ... ؟ و شن بيدور ... ؟؟؟

فرد عليها بصوت صارم أنت يا حاجة التومة عارفة معنى الكلام ده ...؟

و تلى عليها الاية التالية :
( يَا أَيُّهَا الَّذِينَ آمَنُواْ إِنَّمَا الْخَمْرُ وَالْمَيْسِرُ وَالأَنصَابُ وَالأَزْلاَمُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ)


نواصل



الطيب رحمه قريمان غير متصل   رد مع اقتباس
قديم 12-06-2010, 12:14 PM   #[3]
الطيب رحمه قريمان
:: كــاتب نشــط::
 
افتراضي


فردت حاجة التومة بسخرية متناهية و استنكار بين :
لا ما عارفة الكلام ده ...
هو أنا لو كنت بعرف زى كلامك ده كنت بقعد فى "الجو" ده و اصفى فى المريسة للزيكم ديل ... !!!
"الجو هو مجمع الانادى "
و الله هانت الزلابية يا مولانا هسع عليك الله
و امانة تجيك
و تشرط هدومك
تجى تسوى كلام الله ده هنا فى اندايتى دى ... !!!
داهية تخمك ...
ما تتلم يا ابن الحلال و تشوف ليك جامع و خلوة تسوى فيها وعظك ده ...
و الله تانى اشوفك تعتب الجو ده و اندايتى دى بالذات ... !!!! هاهاها ...
الله قال بقولك ... !!!
و صمتت التومة

فبادرها مولانا يا حاجة التومة أنا لما سألتك عن الكلام داك قصدى اقولك ليك ...
و قاطعته بصوت عالى
قول يا سجم الرماد ...
قول ...
أبقى راجل و قول ...
و أخذ مولانا نفسا عميقا و من ثم قال :
شوفو يا جماعة انتو كلكم شاهدين ...
الشاهد الله...
أنى ...
أنا بتكلم عن الخمر و الميسر و الانصاب و الازالام و بس ...
يا أخونا قولو الحق ...
و انتو عارفين كوبس انو الساكت عن الحق شيطان ...
الله يعلم و الناس ديل شاهدين ...
أنا ما جبت سيرتك يا أختى حاجة التومة ...
و لا قلت مريسة و لا عسلاية ...
و بالتحدبد يا جماعة أنا ما جبت طارى الكانجى مورو ...
كله... كله ...
يا أخونا هسى مش نحن اللجبنا السمسم و بعناه لحاجة التومة ... ؟؟؟
و السمسم ده مش زرعتو أنتو ... ؟؟؟
فكيف نجى و نقول انو الكانجى مورو دا ....
و ظل الجميع يستمع الى كلام مولانا فى صمت و تعجب شديد ...
الكانجى مورو ده ...
هو عبارة عن سمسم و بس ...

و لا شنو يا التومة ... ؟
و لم تنطق التومة بكلمة و إنما اشارت برأسها دليل على الايجاب ...

و واصل مولانا حديثه :

لا خمرة و لا يحزنون ...
هسع دى أنتو سكرانيين ... ؟
لو أنتو سكرانيين قولو ... !!!
و بعدين أنا عندى دليل تانى على صحة كلامى ...
الفكى ابكر قال شنو ... ؟
أى ... الفكى ابكر زاتو متذكرنو و لا ... لا ... ؟
فرد عليه احدهم :

الفكى ابكر قال هناك ... فى بلد بتاعم ...
ممكن زول يشرب مريسة بيد و فى يد تانى يمسك لوح ...
و فى هذه اللحظة و من وسط الحضور تقدم شاب فى مقتبل العمر و قال :

أسمع يا جيك ...
كدى خلينا من كلام بتاع ابكر بتاعكم ده ... !!!
انت رائ بتاعك شنو ... ؟
ما تدخل فى اللحم الحى و تقعد تنطط ساكت ...
و الله تبور مريسة بتاع مرة ده ...
إلا يفورك ...
بعدين من المعلوم وزى ما قرينا فى مدرسة ...
خير الكلام ما قل و دل ...
ادخل فى موضوعك دغرى ...
و خلى الجرجرة ...

كانجى مورو دا حلال و لا حرام ... ؟
عشان نمشى نشوف لينا غراب نجزو ...



الطيب رحمه قريمان غير متصل   رد مع اقتباس
قديم 12-06-2010, 12:16 PM   #[4]
الطيب رحمه قريمان
:: كــاتب نشــط::
 
افتراضي


ضاقت حاجة التومة زرعا بالتطويل الذى يفتعله مولانا و كان ذلك واضحا من وقفتها ...
حيث مالت الى اليسار و بدأت تهز راسها بالتزامن
مع الجزء الايمن من جسدها و يدها على مقربة من فمها ...
و فى هذه الاثاء وضح لمولانا ان حاجة التومة و رجالها سوف يفتكون به ...
اذا أصدر فتوى بحرمة الكانجى مورو على وجه التحديد لانها التومة هى المتخصصة الوحيدة فى صناعته دون نساء و شيخات الجو ... و ان الذين يردون الى اندايتها أناس من مختلف المشارب و يدفعون ما تطلبه دون تردد ...

و فى هذا الجو المشحون يردد مولانا فى نفسه :

اللهم كما انقذت نبيك يونس من بطن الحوت ...
فانقذنى من شرور حاجة التومة و رجالها ...
و لا تخذلنى ...
لا ملجاء اللهم إلا اليك ...
يا فراج الكرب ...
و كما نجيت يارب ذلك الو القنفد من الذبح ...
حينما قرار عدم الهرب من الموت ايمانا منه بان
البتقع من السماء بتلتمها الواطة ...
و قال القنفد كما روت لى جدتى ...
" سلة السكين ليها مئة فرج "
فاسألك ان تفرج عنى يا الله .
و فجاءة ظهر "الكومر" و من على ظهر جاء صوت الشاويش أحمد الاجش ...

يالله اى واحد فيكم ينكشح و يشوف ليه شغلة ...
و عادت حاجة التومة الى داخل الراكوبة و قد نفد مولانا من اصدار تلك الفتوى
التى كادت ان تخرج من صدره ...
و التى كانت سوف تطيح بسمعته


نواصل



الطيب رحمه قريمان غير متصل   رد مع اقتباس
قديم 12-06-2010, 12:16 PM   #[5]
الطيب رحمه قريمان
:: كــاتب نشــط::
 
افتراضي


بعد ذلك توجهت حاجة التومة الى مقرها و تملؤها نشوة الانتصار على مولانا
الذى كاد أن يطيح بها و بمصدر رزقها و طلبت من يريد البقاء فى انديتها
ان يدخل الراكوبة و إلا سوف تقوم بضربه فاستجاب ما تبقى من الناس و دخلوا
الى الراكوبة الكبيرة الحجم و التى تقترن بالكنك الذى يصنع فيه الكانجى مورو
و قبل ان يمضى وقت طويل سمع صوت أجش و عالى :

أها يا التومة كيف كده تمام حليتك من الفكى ...
يا لا ادينا حقنا ...
تستهال يا الشاويش أحمد ...
و طلبت منه الجلوس فى بنبر حتى لا يرى بزيه الرسمى و هو يحتسى الكانجى مورو ...



نواصل



الطيب رحمه قريمان غير متصل   رد مع اقتباس
قديم 12-06-2010, 12:17 PM   #[6]
الطيب رحمه قريمان
:: كــاتب نشــط::
 
افتراضي


وبحضور الشاويش أحمد دار حوار بين الحضور :

بالله خلينا من حكاية مشروب السمسم ده و شوفوا لينا حاجة ثانية ...

كلامك سليم يا أبوها ...

العديل رائ و الاعوج رائ ...

يا اخى أتكلم كويس ...

عديل شنو و اعوج شنو ... ؟

كلام بتاع فلسفات بتاعكم ده ...

خليوه لبنات بتاع مكتب بتاع ما هنا ...

و حيرتونا ... !!!

الواحد ما يقول كلمة ...

بس تنطو فى حلق بتاعو ... !!!

يا أخى أنت قائل الكديس ده حلال و لا شنو ؟

كديس بتاع سنو يا زول ... ؟

و الشية ده بتاع شنو يا ود العم ... ؟

و يجابهه آخر بضحكة ساخرة و رد فى المليان

اكل و بس يا عمك ... و لا يهمك

ما كله حرام فى حرام ...

كيف لكن ... ؟

كيف ... ؟ ههههههههه


" و بالتتحنطرو من الصباح ده كان حلال "

"الكونق" ده ... كان حلال ...

ما كله حرام فى حرام ...

و يأتى صوت من اقصى ركن فى الراكوبة التى تكتظ بالناس

يأخى بطل ...

أنت لو كنت عاوز حلال و حرام الجابك هنا شنو؟


نواصل



الطيب رحمه قريمان غير متصل   رد مع اقتباس
قديم 12-06-2010, 12:18 PM   #[7]
الطيب رحمه قريمان
:: كــاتب نشــط::
 
افتراضي

و بدون مقدمات يرفع أحدهم عقيرته بصوت ندى مغنيا :

و فى الضواحى و طرف الانادى ..........

يالا نشرب............. دقة الصباح

و كان شربنا بنشرب مرايسسسسسس

و كان الكلنا بنأكل كدايسسسسس

و كان عشقنا... بنعش عجااااااااااااائز

و فى الضواحى و طرف الانادى
يالا نشرب ... دقة الصباح

يردد الحاضرون بصوت واحد من بعده المقطع تلو الاخر ...

و كان شربنا بنشرب مرايس
و فى المرايس الدقة التقيلة

و فى الضواحى و طرف الانادى
يالا نشرب دقة الصباح

و كان اكلنا .... بنأكل كدايس
و فى الكدايس .... القطط السمينة

و فى الضواحى و طرف الانادى
يالا نشرب دقة الصباح

و كان عشقنا... بنعشق عجائز
و فى العجائز .... الجقق الكبار

و فى الضواحى و طرف الانادى
يالا نشرب دقة الصباح

و تنطلق زغرودة حادة و عالية من حاجة و التومة و اخريات ...


نواصل



الطيب رحمه قريمان غير متصل   رد مع اقتباس
قديم 12-06-2010, 12:19 PM   #[8]
الطيب رحمه قريمان
:: كــاتب نشــط::
 
افتراضي


و لم ينفض لهم سامر الى ان شارفت شمس ذلك اليوم الغروب
و بدأت حاجة التومة تتململ لان التعب قد أخذ منها مأخذا كبيرا
و قد شبع الناس مريسة و شبعت التومة قروشا
و قد عادت الفتيات الى الانداية بعد ان قمن يتوزيع الكانجى مورو
على مدمنيه الذين لا يريدون الظهور فى الانداية لمكانتهم الاجتماعية ...

و بدأ السكارى ينسلون من الانداية الواحد بعد الآخر
فمنهم من يتمثل القوة فيذهب الى بيته بعد ان "شبع"
و امتلاء من مشروب حاجة التومة لينعم بنوم عميق ...
ومنهم من لا يقوى على المشى فيقوم الاخرون باركابه على ظهر حماره
و الحمار بدوره شبع "مشك" ...
و منهم من يقود دراجته مشيا ...
و منهم من يتوسد يده ملتحفا الارض سكرانا...



الطيب رحمه قريمان غير متصل   رد مع اقتباس
قديم 12-06-2010, 12:19 PM   #[9]
الطيب رحمه قريمان
:: كــاتب نشــط::
 
افتراضي


و تأمر حاجة التومة أحدى بناتها ان تنزل

الراية البيضاء

من على قمة الراكوبة

معلنة بذلك انتهاء الخدمة لذلك اليوم ...

و فجاءة ترى حاجة التومة كل من

مولانا و الشاويش أحمد

نيام يشخرون فى داخل الكرنك و فى سريرها ...

و تنفجر ... باعلى صوت لها :

" قوم يا راجل شوف ليك مكان تانى ... و لا اقوم عليك ؟ "


انتهت



الطيب رحمه قريمان غير متصل   رد مع اقتباس
قديم 08-03-2011, 03:48 PM   #[10]
آدم صيام
:: كــاتب نشــط::
الصورة الرمزية آدم صيام
 
افتراضي

اقتباس:

ان تجلس على "بنبر" فى رحراحة و يضرب "رقراق" الشمس وجهك يمنة و شمالا ...
و على نافوخك التى يتصبب عرقا و يتنتقل الجميع من ظل الضحى الى ظل الظهر ...
و لا تستطيع البعض تحويل بنابرهم التى كانوا جلوسا عليها...
إلا بعد انات و اهات تخرج مثقلة من صدرهم و كروشهم التى ملئت تمامابالمربسة ...
و الذباب يأتيك من كل كوشة قد خلت من الفطاسي سويعات مضت ...

و بعد ذلك تاتيك " التومة" ست الانداية ...




ولضمي ما ياهو ده الحكي تحسبو بعيد؟
ولدكو ساكن حكى محبة السقدان عموم صار في مصاف الطيب صالح
قسما بشوية مصابرة تصير ماركيز السودان وما وراء أفريقيا والشرق الحر!



آدم صيام غير متصل   رد مع اقتباس
قديم 17-03-2012, 06:12 AM   #[11]
الطيب رحمه قريمان
:: كــاتب نشــط::
 
افتراضي

ولد عمى الفاضل الاستاذ آدم صيام

لك كل الود و لك الشكر و ما عدمناك .



الطيب رحمه قريمان غير متصل   رد مع اقتباس
إضافة رد

تعليقات الفيسبوك

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

التصميم

Mohammed Abuagla

الساعة الآن 07:06 AM.


زوار سودانيات من تاريخ 2011/7/11
free counters

Powered by vBulletin® Version 3.8.8 Beta 2
Copyright ©2000 - 2024, vBulletin Solutions, Inc.