اقتباس:
المشاركة الأصلية كتبت بواسطة صديق عيدروس
تحياتنا لاخونا الفاتح
يبدو انني انزلت مداخلتي الاخيرة رقم (6) متزامنة مع مداخلتك ، فهي تجيب على ماتفضلت به ، ورغم ان الرابط لم يفتح معي ولكني تقريبا اعرف محتواه ، ويمكن ان يحوي بعض الصور والاصابات البشعة لبعض المدنيين ، رغم ان هذه الصور لايعرف مصدرها ولا مصداقيتها ، ولكن لايمكن ان ان تكون دليلا على ممارسة الابادة الجماعية ، لان ميدان المعركة بين الطرفين هو المدن والقرى وحولها ، وقد تطال قذائف ومدافع المتحاربين المدنيين هنا وهناك ، والطرفين المتحاربين يتساوون في المسؤلية عن ذلك ، ولكن الفرق ان صناع (الهلوكست السوداني ) يستثمرون ويوظفون هذه الصور لنفس الغرض
|
مرحبا يا صديق..
كدي نمشي خطوة لقدًام ..
رفضي وإستنكاري لأيتها نوع من أنواع الإبادة الجمعية ، ما بيعني قبولي لتوظيفها لخدمة أية غرض.. الرفض ده ناتج لإنو السلوك ده ما بيقرو أي وازع أخلاقي أو ديني أو خلافو..
الرابط فيهو صور صادمة ، ما عندي رغبة أنزل ليك عينات منها ، لكن إذا كنت راغب في البحث والتقصي ، أفتح الراكوبة ، معرض الهولوكوست بتلقى النماذج.
معاك في إنو نتائج الحرب بتكون فيها خسائر في الأرواح ، لكن سين سؤال ما بوجهو للزول البيضغط على تيتيك البندقية ، بل للجهات التنفيذية البتصدر أوامرها بإنو (أكسح ، ما دايرين جرحى ، إلخ ):
الفكره شنو من إنو تعتلي كرسي العرش بتاعك على جماجم مواطنيك ؟ وأبواق النظام البتبارك ليهو سلوكو ده من صحف وخلافو.. ما فكًرت يوم من الأيام إنها تخت نفسها في موقف إنها غير مرغوب فيها.. ( نوباوي ، فوراوي، دينكاوي ، هوساوي ، إلخ ).. أحزمة سوداء بتعيش في هامش المليون ويل مربًع ، لافي حكومة مركز إشتغلت بيها ، لافي تنمية ، لا صحة لا تعليم ، لاخلافو.. وإتكيفو مع الوضع ده وعايشين في الكراكير.. لمن تضربهم بالسلاح العجزت عن إنك تدافع بيهو عن بلدك في حلايب وشلاتين والفشقه ، وتدافع عن سماء الخرطوم ضد الهجمات الإسرائيلية.. ده بيعني شنو.. بيعني ( حقيرتي .. في بقيرتي ).. أيوه.. اللون الأسود المتوسًط الجهجه هويتنا لا خلانا عارفين نحن عرب ولا زنوج.. نشيلو برًه..
إنت يا صديق لو كنت في محل أحزمة سوداء زي دي ، وشفت أشلاء أبوك وأمك قدًامك.. ما بتسكت على الظلم ده ، بتشيل السلاح وتحارب عشان تحافظ على وجودك.. صاح !
فحقو ما نفتش على النتايج.. بل نفتش على الأسباب اللي أوجدت الإبادات الجماعية..
أول شي نقدًم الناس الإرتكبوا المجاذر الجماعية دي للمحاكمة عشان يكونوا عظة وعبره لأي زول تسوًل ليهو نفسو إنو يوظًف أجهزة الدولة التنفيذية من أجل إبادة مواطنينو..
نسائل صحيفة الإنتباهه عن العنصرية والقبح البيصدر منها ، وإللي هو السبب الأول في فصل الجنوب ، وإللي حيكون السبب لإنفصال أقاليم تانية مستقبلاً..
نعمل على خلق تنمية متوازنة بين المركز والهامش ، عشان نحافظ على النسيج الإجتماعي العلى العليهو مهلهل ، وبالمرًه نزيح ألغام فكرة إنو إنفصال أقاليم مستقبلاً..
نهندم القضاء ، نعيد المفصولين ، نحاسب المرتشين ، إلخ
لكن نغض الطرف عن الحاصل ده ، ونستكين لإعلام النظام بإنو في مخطط إسرائيلي داعي لتقسيم البلاد وبلابلابلا - مع إنهم شغالين يقسموا في البلد وبلابلابلا - بتلقاهم بعد شوية بيقسموا ليك في عدد أنفاسك.