التقيت بمحض الصدفة الشاعر الراحل "صلاح احمد ابراهيم" في ابوظبي العام 1989 وانا اقضي معاملة مصرفية و كان برفقة منصور بارودي مدير فرع بنك النيلين في ذلك الوقت ، و صاح فيني بارودي - يا ود الاستاذ تعال سلم علي عمك دا - استأذنت الاخ ازهري الموظف بالبنك و ذهبت خلف الكاونتر و القيت عليهما السلام و صافحت الرجلين، و بعد ان عرفته بنفسي ، وقف صلاح ناهضا و قلدني و سألني عن بعض الاعمام و الخيلان و الجدود و اعطاني تلفون و عنوان اقامتة، تم كل ذلك في اقل من خمسة دقائق و الصفوف مزدحمة داخل بنك النيلين ، و في دوامة الغربة و مشاغلها و مشغولياتها لم اتمكن من لقياه مرة اخري. و كان ذلك اللقاء الاول و الاخير.
و يتواصل ابداع شاعرنا الراحل و تظهر رهافة الحس
و الاشجان في مقاطعة عن الغربة و لواعجها...
[align=center](حنين)
صلاح أحمد ابراهيم
قلبى على الشهيد
تحت التراب دافننو
وقلبى مع السجين
خلف الحديد رامنو
وقلبى مع المواطن
الحر اذى ملاحقنو
ديل سودانا
والباقين
يمين ما منــــــــو
كل يوم يمر بالمر
أشيب فى همومو
الليل اتلت سهران
اعد فى نجومو
شاعرك يا وطن
فى الغربة حرقان يومو
متين يروق ويضوق
القدلة فى خرطومو
يمكن مافى غير
الرجعة فى صندوق
ويمكن يقولو لا
من وين يعرفو الذوق
مهما كان
نفوسنا عزيزه أنفنا فوق
وآخرتها مافى
غير الذكرى للمخلوق
يا طير ان مشيت
سلم على حبانى
جيب خبر الوطن
يمكن قليبو طرانى
جيب نسام زلالو
المنو مره روانى
جيب لمحات جمالو
الاصلى مو برانى[/align]
|
