داليا كباشى :يا شيخنا انت بتتكلم معانا كدا ليه؟
داليا كباشى :يا شيخنا انت بتتكلم معانا كدا ليه؟
*كتبت: داليا كباشي على صفحتها تعليقا على حديث حميدتي الأخير في تدشين شحنة صادر الذهب:-*
وليه كل ما تمسك ليك مايك تشبكنا انا دفعتا وانا عملتا وانا سويت وحا نتحاسب والحساب ولد وما بعرف شنو؟
احساسك ان بتمتن على الشعب السوداني ب انك بتدفع ولا بتعمل ولا بتشتغل دا ما مقبول ابدا!
#الحقيقه_العلميه_الاولى
انت قائد (مليشيات) (غير نظاميه) تم انشائها في عهد النظام البائد.. يعني مفروض تكون ساقط مع النظام داك زاتو.. لكن الحسابات السياسيه جابتك في موقعك دا.. ف انت المفروض تكون حامد وشاكر وتسجد لي ربنا ليل نهار انك ما قاعد في السجن هسا في الزنزانه الجمب المخلوع!
#الحقيقه_العلميه_الثانيه
انت قائد مليشيات متهمه ب ارتكاب (جرائم حرب)!
منها احداث في دارفور ومنها قضيه مجزرة فض الاعتصام وقضيه طلبه الأبيض!
التهمه دي لو صحيحه او ما صحيحه (دي يفصل فيها القضاء) لكن هي تهم موجودة!
يعني انت ما مجرد (زول شارك النظام البائد) يوما ما..
لا لا.. انت قائد قوات ستخضع هذه القوات للمحاسبه..
ومن هنا لحدي ما القضاء يفصل فيها لازم تقدم خطاب مقبول وتحس فيهو بالاسى لما حدث للضحايا...
#الحقيقه_العلميه_الثالثه
انت احد افضل الناس تعاملا مع فكرة (العداله الانتقاليه) والترميم.. ودا مسار تشكر عليهو.. ونشجعك تستمر فيهو.. لكن ما تمتن علينا انك بتصلح وبتشتغل!
البتعملوا دا جزو منو شغلك وواجبك (ك عضو مجلس السيادة في الحكومه الانتقاليه) وجزو منو عمل جاد ل اثبات حسن النوايا في التعامل مع القضايا السابق ذكرها.. ف ما تكورك فينا!
#الحقيقه_العلميه_الرابعه
الناس البتتكلم معاهم بالكواريك ديل (ارتضوا) انك تكون شريك في الحكومه دي لموازنات سياسيه!
شايف في اي تجاوزات حكوميه ناقشها معاهم داخليا ك حكومه في بعضيكم..
شايف في فساد اتبع المسار القانوني!
واتذكر انو اي واحد فيهم من ولدوهو وهو بينافح ويقاتل ضد النظام البائد داك.. واعتقلوهو وسجنوهو وعذبوهو.. وفيهم اللي حياتو كلها مرت وهو بيناضل ضد الإنقاذ في الوقت اللي انت كنت فيهو كنت (بندقيه) النظام داك!
ف ياريت تحترم الحاجه دي!
الشغل بالطريقه المحترمه اذا نافع معاك اهلا وسهلا
ما نافع معاك ممكن ترجع تقعد في بيتكم وتدي السما طلقه!
السادة في الحكومه الموقره + الحريه والتغيير
من غير المقبول ان تدار خلافات بالطريقه دي..
احترمونا واحترموا الثورة واجبروا أيييييا زول يحترمكم بالممارسة الراشدة!
الموضوع لو كبر (حلاقيم) ورونا!
#نحن_البنقول_لنعامه_المك_تك!
|
