بوست ساي

[شبارقة]

المشاركة الأصلية كتبت بواسطة شبارقة

هو : طيب أذكر لي الباقيين

أنا (بعدما أدوني كباية موية) : دكتور علي حسن تاج الدين - محمد الحسن عبد الله ياسين - مرغني النصري - إدريس البناء

والله تذكرت إسماءهم (وكأنها نزلت علي من السماء) يمكن السبب هو وجود تلك الأسماء في عقلي الباطني (غصبا ً عني) وذلك بسبب كثرة ذكرهم في نشرات الأخبار

بعدها عمك قال لي : أها .. السؤال ده كان مدخل لسؤالنا الأساسي .. والآن حاسألك السؤال الأساسي بتاع المعاينة .

قلت في نفسي أكان ده المدخل بس .. الغريق يكون كيف؟ وقام سألني السؤال الأساسي

يتبع ..

المشاركة الأصلية كتبت بواسطة حافظ حسين

بالله تبعنا سريع أنا منتظر
هو بالله محمد عثمان دا طلع اسم مركب ؟
كويس أنك عرفتهسنة 1987 انا والله عرفته هسي يا شبارقة ههههههه

أها بعدما ذكرت ليهو أسماء أعضاء مجلس رأس الدولة قام قال لي : طبعا ً ده كان سؤال تمهيدي لسؤال المعاينة الأساسي .. والسؤال هو : الناس ديل كانوا شغالين شنو قبل ما يكونوا في المجلس؟

بلعت ريقي وطلعت لي منديل وقشيت بيهو عرقي وقلت ليهو : د.علي حسن تاج الدين أستاذ جامعي .

هو : طيب .. وأحمد علي الميرغني.

أنا : ----- (لا إجابة)

هو: ومحمد الحسن عبد الله ياسين

أنا : ----- (لا إجابة)

هو : ومرغني النصري

أنا : ----- (لا إجابة)

هو : وإدريس البناء

أنا (وبعد تفكير قليل) : أظنو كان شغال شاعر .. (أي والله)

هزّ رأسو بطريقه إستفزازية وضرب كفيه (كفا ً بكف) وشكلو بطنو طمـّت مني.. والله زعلت زعل شديد من نفسي ومن الموقف الختاني فيهو الزول ده .. وعرفت الحكاية خربانة وأنا راسب راسب وقمت طوالي قلت ليهو :

أنا : أنا دخلت المدرسة في 1969م (إشارة لعهد مايو) وكمـّلت التعليم العام في 1981م (إشارة لمايو أيضا ً) .. تعمدت ذكر مايو بالرغم من إني لست مايويا ً (بس عشان أغيظو) وواصلت كلامي : الناس ديل كانوا وين ؟ ما سمعنا بيهم ..

ذم شفتيه ولم يرد .. وحولني لدكتور الجيولوجيا وسألني أسئلة بسيطة جدا ً وعادية يستطيع المثقف البسيط أن يرد عليها .

الخلاصة : لم أنتظر نتيجة المعاينة وساقتني الأقدار إلى خارج الوطن وإلى يومنا هذا .. وإلى يومنا هذا لا أعرف أعضاء مجلس رأس الدولة كانوا شغالين شنو ! وما عايز أعرف