غايتو ياشوقي بقيت زي حميد صيام ألله يطراهو بالخير..حميد يحكي قدامي انو مشي بيت عرس هو والحلبي الهو أنا مع العلم بأني ما حل مشيت معاهو بيت عرس.. ويستمر يحكي ويقول في بيت العرس في واحد استفذ فتحي وفتحي ما كضب أدا الزول بونية جندلو..البونية الأولي دي كانت رشوة عشان ما أطلعو كضاب لكن بعد داك أنا دوري بكون انتهي وحميد بدق بيت العرس براهو وأنا ساكت..
شوقي هنا اشتغل بذكاء خلاني ما عارف كلامو دا شكر ولا نبذ وبعد داك دخل في أبوي وهنا أنا ما بقدر أقول حاجة مع انو اتناسي نتيجة الاشتباك مع المرحوم عبدالله محمد زين والكانت ان المرحوم اقتنع بأن الأغنيتين من كلمات الوالد رحمة الله عليه والسبب كان شوقي والعجيب ان شوقي ما كانت بتربطو علاقة بعبدالله الزمن داك والعلاقة بدأت من الوقت داك..
الغريب في الموضوع ياشوقي حكاية عجيبة حصلت وأنا في السودان من كام شهر.. في حفلة من حفلات منتدي الوافر كنت بتكلم مع أخونا عبد الحفيظ خال المرحوم محمود عبد العزيز وجبنا سيرة الأغنيتين ديل وكان موجود أخونا خالد الفنوب وهو للعلم حقيبة فن متحركة..عبد الحفيظ قال ان بدوي أبو صلاح اعترف ليهو قدام الفنان الجقر ان الأغنيتين من تأليف مسعد حنفي وطلب من أبناءه مافي زول يجيب سيرة الكلام عن الأغنيتين..قي نفس الليلة كانت الليلة بالفنان الجقر وأنا أصريت أسألو وهو برضو أكد لي الكلام دا بشهادة دكتور أحمد محمد زين..
الأنا ما فاهمو لبه بدوي هو المتصدر الحملة ضد مسعد حنفي ومصر ان الأغنيتين من كلامات أبوهو..موش حاجة تجنن..
ياخ انت نسيت صديق مشترك كان لامن يجيب سيرتي وسيرتك بقول أولاد أمينة.وأنا قاصد أخونا طه امام عبدالله شقيق القاضي عبد المجيد امام الرجل الذي أعلن العصيان المدني الذي أسقط حكم عبود..بالمناسبة ياجماعة شوقي برضو اسم أمو أمينة وهذه المرأة العظيمة رحمها الله أنا عرفتها قبل ما أعرف شوقي وكنت بمشي أزورا في البيت في حي البوستة..
شكرا ياشوقي فأنت بالفعل بمثابة الأخ الذي لم تلده أمي وصداقتي بك أفخر بها أمام الكل..
|