عودة. ابوخلود

[عبد الله مساعد]

-- ------------------------------------------------------------------------------

ــ عــــــودة ــ

أريد أن أقف فى قمة عالية لأخاطب وطنى وأحكى له
عما أجد فى نفسى فليس لى سوى هذه المشاركة االوجدانية
الصامتة التى تحكيها الكلمات بلسان حالى إلى الوطن
والوجدان والجداول والخمائل والمواسم والأعراف .

مشيت ومرقت
متحزم وعارف
السكة ماضهبان
ومااتلفت شفت
وراى
وراى عزة
ورجال وأمان
لفحت الشنطة
فوق ضهري
وقلت سلامه
ياجيران

مشيت ومشيت
قطعت بحور
وعشت الغربة
مامجبور
وزى يومى
المرقت قبيل
قايل الرجعه
مابطول

وعدت فاتت
السنوات
سواقي الغربة
راحت وجات
ورغم مسيرة
السنوات
مشت محمولة
بالآهات

* * *
رجعت لقيت وطن
مشتاق
سلام وعناق
لقيت النيل وزى
ماكان
لقيت طلحتنا
والجيران
وليكي وفيكي
يا أمدرمان
محبة وغيره
بالمليان

* * *
ولون النيل
وصوت النمه
وسط الزان
ينادي يقول أنا
السودان
قلوب بمساحة
الأوطـان
مشاعر فايضة
وطنية
حقيقة مجسدة
بإيمان

* * *
أنا الزنجية
والنوبة
وفى تاريخي
مكتوبة
أنا السودان
مطارق زان
وظل هجليج
وصرخة زاندي
فى غابة
وقدح مليان

* * *
وشوك بلدات
وقفة دوم
وحفلة وسيرة
بالمردوم
وليلة طرفة فى
دوكا
وخرير خيران
وتقابة ولهب
عيدان
وخلوة وقبة فى
أمدرمان
فتحنا صدورنا
للنيران
عشانك إنت
ياسودان

* * *
وبالسيف والدرع
والتوب
وحبات سبحة
اللالوب
ركبنا متارس
العاديات
ظهور الخيل
وشقينا السدر
بالليل
هزمنا جيوش
وسال السيل
واتقلد التراب
بالدم
وغنت ريلة
بت العم
ودوبا الناي
يجر النم

* * *
أنا السودان
وزى ماكنت
كل زمان
طبيعتي السمحة
معروفة
أصالة وعزة
بالمليان
بعز الخالة
والعمة
وبكرم سابع
الجيران

* * *
وساعة الحارة
بتحزم
بشق النار
بجيب التار
بشيل الدية من
ولدي
أخوك يافاطمة
بت بلدي
وفيك ياشرقي
ياحبوب
مآثر دقنة ود
أدروب

* * *
وفيك القاش
وفيك التاكا والهبباي
وفيك تاجوج
وصوت النمة
والدوباي

* * *
قضارفنا الذهب
خيرات
مسور سمسم
كديب بلدات
وعيش الريف
وأهل الريف
ونترة وطرفة
كل خريف

* * *
شمالنا الساقية
والشادوف
أرضنا روية
فيها جروف
شمالنا العزة
والباوقه
شمالنا النيل
شمالنا العجوة
والبركاوي
والقنديل
وطمبور شايقي
بترنم
مساهر الليل

* * *
جمال وادينا فى
دارفور
غباشه وفرصة
فى منقور
وفى حمرة
حفير الوز
وصرعة تور
وفى مردوم
بنات بارا
ونفرة صيد ولمة
سوق ونقاره

* * *
شمالنا جنوب
جنوبنا شمال
وفيكى أملنا ياملكال

[الجيلى أحمد]

ياسلام على وقفتك ياأباخلود ,
كلنا واقفين على رتم ذات النداء
يد بيد وكتف بكتف

[واحة]

الله عليك الله عليك

يسلم راسك ولك الف شبال


واحة


ياريت لو خلوه لينا كده

[بابكر مخير]

المشاركة الأصلية كتبت بواسطة عبد الله مساعد

شمالنا جنوب
جنوبنا شمال
وفيكى أملنا ياملكال

الحبيب عبد الله
إتا يابا ظنيتك لسة في الغربة
دآ زماااااااااان
لمن كان جنوبنا شمال
ولمن كنا نتنسم أمل في ملكال..
يابا ما قطعوها وفصلوها
وبشتنوا حال البلد
فرقوا الحبان
وشوهو كلمة الأخوان
بقوها حكر للكيزان..
قولك جميل وحلو
شكرن ليك كتير
يديك العافية ونديك مننا محبة وترحاب من تاني

[أبوجنزير]

المزيد يا أبوخلود