أبــــــو أمـــاني .. يريد أن يعـرف !!!

[أبو أماني]

درجنا في مسيرة حياتنا اليومية على المرور على بعض الأشياء مرور الكرم .. ونثق فيما بيننا بأننا نعرفها ولكن عند سؤالنا عن معناها أو مرماها قد نتلجلج وقد لا نحر جوابا .. وإليكم الأمثلة:-

* كلنا في الغالب الأعم كنا (أطفالا) لحوحين في مطلع حياتنا بدافع التعرف على الحياة وتفاصيلها .. وكنا عندما نطلب أمرا من حبوبة وهي مشغولة بعمل ما.. تطنشنا فنردد في نزق طفولي .. حبوبة أديني .. حبوبة أديني .. وتزهج حبوبة فتنهرنا بغضب (مفتعل).. بتدور شنو يا شافع .. يديك .. الكود ووجع اللغود ..!

* السؤال :-
ما هو الكود .. وما هو وجع اللغود؟؟

* كذلك عندما يكون الزول مسطح .. وما (ناقش حاجة) .. يقال له .. فلان ده .. إطيقش ساااكت .. ما عارف كوعه من بوعه..

* السؤال :-
ما معنى إطيقيش .. وإن عرفنا الكوع فما هو (البوع) ؟؟

* عندما يصيح الطفل في أمه بإلحاح.. يمة أنا جعان .. ويكررها يجي خمسين مرة.. تنفعل أمه وتدعوا عليه قائلة .. أريتك بجوع الكرشة ..

* السؤال :-
ما هو جوع الكرشة وكيف تجوع؟؟

قبيل الختام .. من منكم يروى لي واقعة مرور الكرام التي نقولها لكل من يمر على شئ دون أن يحدث أثرا إيجابيا ؟؟

هذه بداية ولا شك هناك الكثير .. فتناولوا هذا إلى حين ظهور ذاك .. ولكم أحلى الأماني .. وتحيات بنتي أماني فهي صاحبة فكرة البوست .. يلا .. تشششااااووو .. وإلى لقاء قريب بإذنه

[ندى]

سلامات أبو أماني
قريت البوست وجيت أطيقش ساااكت ما عارفة كوعي من بوعي مش أحسن من مرور الكرام ... الكحة ولا صمة الخشم يا أبوها ...

عليك النبي ما عارف؟ gap

[فتح العليم]

سلام واحترام
والتحية إلى الابنة امانى صاحبة البوست .
البوست رائع للوقوف على لغة الحبوبات والاهل من كلام معظمه خارم بارم وهي برضو كلمة عاوز التوضيح (خارم بارم ) عاوز ليها شرح ولكن المحيرنى في ترجيح سكن بنتك العمارات والمعلومة موجودة في بروفايل ابوامانى وناس العمارات بنقول عليهم ناس مرطبين ومرتاحين وما قاعدين اعرفوا حاجة عن لغتنا المشاترة بتاعت ناس الجزيرة من وين عرفت بنتك تلك اللغة ؟
التحية لها لتناول تلك الكلمات والتى لا اعرف مصدرها ولنتعاون جمعيا في ذلك الموضوع .
مع احترامي وتقديري

[معتصم الطاهر]

عارف يا أبو أماني دا بوست دسم من زول دمث

و أزيدك

شنو ولادة السجم و الرماد .. و ليه بقولوا دا ولادة السجم والرماد .
و لو عرفنا الرماد شنو السجم.
و انتو سجيمان وين ؟

[معتصم الطاهر]

نديها صنّة ولا نجاوب

خاصة نحن الاتجاوزنا "الستينات" ..

.

[أبو أماني]

اقتباس:
المشاركة الأصلية كتبت بواسطة ندى
سلامات أبو أماني
قريت البوست وجيت أطيقش ساااكت ما عارفة كوعي من بوعي مش أحسن من مرور الكرام ... الكحة ولا صمة الخشم يا أبوها ...

عليك النبي ما عارف؟ gap

سرتني مداخلتك الظريفة وتشريف مقامنا المتواضع .. واسعدتني أصلا روحك المرحة البائنة بين السطور.. مادام حلفتيني بالنبئ .. اعترف بأني عارف البعض .. لازم تحرقونا يعني؟.. لك خالص معزتي .. تشششاااووو

[أبو أماني]

اقتباس:
المشاركة الأصلية كتبت بواسطة فتح العليم الإمام
سلام واحترام
والتحية إلى الابنة امانى صاحبة البوست .
البوست رائع للوقوف على لغة الحبوبات والاهل من كلام معظمه خارم بارم وهي برضو كلمة عاوز التوضيح (خارم بارم ) عاوز ليها شرح ولكن المحيرنى في ترجيح سكن بنتك العمارات والمعلومة موجودة في بروفايل ابوامانى وناس العمارات بنقول عليهم ناس مرطبين ومرتاحين وما قاعدين اعرفوا حاجة عن لغتنا المشاترة بتاعت ناس الجزيرة من وين عرفت بنتك تلك اللغة ؟
التحية لها لتناول تلك الكلمات والتى لا اعرف مصدرها ولنتعاون جمعيا في ذلك الموضوع .
مع احترامي وتقديري

العزيز الغالي فتح العليم .. سلام حار وبالدفار .. كيفك يا حبيب؟ عنوان المنشية والعمارات جاء مؤخرا فهما إرث قديم .. أما الأصل ومسقط الرأس فهو مدينة البراري (بعيد عنك) المدينة المثلثة محس / درائسة/ ولاماب يعني بتي في الألفية الثالثة بتعرف .. التكل والمنقد والقطيع كمان .. تكون بتي كيف يا فردة لو ما كانت بت بلد جد؟ .. وأنا البعتز بسودانيتي حتى النخاع الشوكي؟ أما كلمة (خارم بارم) فحقيقي أعرف مرماها ولا أعرف معناها وهي في إعتقادي كلمة مرادفة لعامية إنجليزية : hagger mager أو كلام الطير في الباقير .. ولا أجزم إن كانت إيرلندية أم إسكوتش .. أفتكر ناس أمال ممكن يفتوا لينا .. لها التحية ولك صادق مودتي تشششاااووو

[أبو أماني]

اقتباس:
المشاركة الأصلية كتبت بواسطة معتصم الطاهر
عارف يا أبو أماني دا بوست دسم من زول دمث

و أزيدك

شنو ولادة السجم و الرماد .. و ليه بقولوا دا ولادة السجم والرماد .
و لو عرفنا الرماد شنو السجم.
و انتو سجيمان وين ؟

الحبيب تكعيب المعتصم الطاهر .. يا أخي إسمك ظاااطو يعبر عنك حق وحقيقي .. معتصم وطاهر .. بورك فيك وفي أبو أهلك كمان .. مشتاقين .. ولا أقول ليك سارة مأثرة فوقي .. مشتاقوووووون ! طبعا سؤالك حرقني بلحيل عشان كده دخت السبعة دوخات لما لقيت الحل عند واحد قريبنا (كهنة) يعني أزغر منك بعشرة سنة كده الرماد معروف .. أما السجم فهو مجاور للرماد وهو السكن الذي يتجمع أسفل صاج العواسة .. والله أعلم ! عليك الله كل ما تلقى نصيبة زي دي تعال جاي ..وأنا بتحداك لحدي ما نشوف البقيف ويفتر منو .. موافق؟ طيب يلا تشششاااووو

[أبو أماني]

* وردت في الذكر الحكيم آيات كريمات تفيد بأن الأرض مسطحة .. وجاء ذكر البسط والبسيطة والطي .. وغيرها من الآيات الكريمة التي تشير لآن الأرض منبسطة فما هو تفسير العالمين بالأمر؟.. هذه الفاصلة أوقفني عندها أخ مسيحي كان يساجلني في كون القرآن الكريم مواكب لكل العصور وبكل أسف لم يكن لدى العلم التام للرد عليه..! أغيثوني أغاثكم الله ...

[أبو أماني]

اقتباس:
المشاركة الأصلية كتبت بواسطة معتصم الطاهر
نديها صنّة ولا نجاوب

خاصة نحن الاتجاوزنا "الستينات" ..

يا معتصم يا أخوي بطل تواضع وإنت عارف روحك ثمح إنك في سودانيات زي الملاحة في الصينية الكنا بنأكل فيها زماااااان .. جاووب .. وشوف حتحرك المواضيع كيف .. ! يلا .. تشششاااووو

[ندى]

المشاركة الأصلية كتبت بواسطة أبو أماني

اقتباس:
المشاركة الأصلية كتبت بواسطة ندى
سلامات أبو أماني
قريت البوست وجيت أطيقش ساااكت ما عارفة كوعي من بوعي مش أحسن من مرور الكرام ... الكحة ولا صمة الخشم يا أبوها ...

عليك النبي ما عارف؟ gap

سرتني مداخلتك الظريفة وتشريف مقامنا المتواضع .. واسعدتني أصلا روحك المرحة البائنة بين السطور..

سلامات أبو أماني
أخجلتني والله بكلماتك ... شاكرة وسعيدة بالتواجد هنا ...

[ندى]

المشاركة الأصلية كتبت بواسطة أبو أماني

اقتباس:
المشاركة الأصلية كتبت بواسطة معتصم الطاهر
نديها صنّة ولا نجاوب

خاصة نحن الاتجاوزنا "الستينات" ..

يا معتصم يا أخوي بطل تواضع وإنت عارف روحك ثمح إنك في سودانيات زي الملاحة في الصينية الكنا بنأكل فيها زماااااان .. ! يلا .. تشششاااووو

ملح ساااااااااي ولا بالشطة يا ناس زمااان gapgap

نحنا غايتو في الزمن دة بنحب الاتنين سوا

[ندى]

المشاركة الأصلية كتبت بواسطة أبو أماني

اقتباس:
المشاركة الأصلية كتبت بواسطة ندى
سلامات أبو أماني
قريت البوست وجيت أطيقش ساااكت ما عارفة كوعي من بوعي مش أحسن من مرور الكرام ... الكحة ولا صمة الخشم يا أبوها ...

عليك النبي ما عارف؟ gap

مادام حلفتيني بالنبئ .. اعترف بأني عارف البعض .. لازم تحرقونا يعني؟..

مدام عرفتك نص نص القشرة وجبت

هاك دي لحدي ما أجيك راجعة يا أبوها ...

http://youtu.be/bcq62751R5w

[أبو أماني]

اقتباس:
المشاركة الأصلية كتبت بواسطة ندى
سلامات أبو أماني
أخجلتني والله بكلماتك ... شاكرة وسعيدة بالتواجد هنا ...

ما قلته بحقك أنتى أهل له يا الثمحة .. وأقل من حقك كمان رجاء عطري وجودنا بأريج مدادك الرائع وشكرا مقدما على الرابط الذي يوضح كروية الأرض ويثبتها .. بس لسع عاوزين تفسير علماء الدين للتناقض في المعنى المشار إليه والذي يفيد بأنها مسطحة أو منبسطة .. رجاء من المشاركين عدم اللجوء للذواكر المعلوماتية .. نريد إرادة ذاتية في الرد ولنا عودة .. شكرا ندى أسعد الله اوقاتك بخير .. تشششاااووو

[أبو أماني]

بيان هام

قد ينظر البعض لهذا البوست بعين السخرية والإستهجان على أساس أن المعلومة صارت في متناول اليد أو بالأحرى الإصبع عن طريق عمنا (قوقل) حفظه الله أو أي موقع معلوماتي متمكن .. ولكن ..! لو فكرت قليلا تجد أن ما يرمي له أبو أماني هو أبعد من كل ذلك ببعيييد يا أخوانا التقنية الإليكترونية جعلت المعلومة أشبه بالغذاء المعلب .. يمكن الحصول عليه دون عناء يعني ما حاسين يا جماعة بالتجميد والضمور الذي أصاب عقولنا؟؟ يا أخ الواحد لو موبايله كضم ساي .. ما يقدر يضرب لزوجته أو أقرب إنسان لديه .. لانه ما حافظ الرقم .. ويحفظه ليه ؟ وفي شان شنو؟ ما بكبسة أصبع و.. (كليك) بجيب آخره .. ويكون العقل في حالة إجازة مفتوحة .. عودوا إلى رشدكم ونشطوا أدمغتكم ووسعوا ذاكرتكم .. ولا تعتمدوا على التخدير المعلوماتي الذي تمارسه معنا الحضارات المكتسبة .. شايفين براااكم .. الفرق الشاسع بين الطالب الجامعى الزمان وهسع .. على الطلاق لما كنا في سن الجامعة كنا علماء في الحي .. العنده روشتة دواء يجيك .. العنده ترجمة يجيك ..الجاهو خواجة عاوز يتفاهم معاه يجيك ..وإتا يا الحبيب كان ختوك محل الشمس تغطى نورها .. مش زي أولادنا بتوع الزمن ده .. ولدك جامعي تقول ليو ده وضع (كريتيكال) .. يقول ليك ببراءة طفل رضيع يعني وضع إجتماعى؟؟ لعن الله معطيات هذا الجيل التي أفرزت لنا فقمات كالراقص .. وأبو ريالة .. ومامون حميدة .. وجامعته الفلتة .. ساقط أدبي .. أبوه مرييش .. يدخل طب .. المهم يدفع ال8 ألف دولار والرهيفة تنقد عليكم الرسول في مغصة أكتر من دي؟ .. ولدك إنتا العدمان الصرمان يقراء ويتألق ويحقق التفرد ويتخرج يسوق ركشة .. وولد الما يتسماش .. يمتلك سيارة بقريب مليار ثمنها .. غير البيوت والشركات ..والسفريات وعييييك ... وإنت يا حبة عيني .. تنضرب عربية بورتسودان يقولوا الطيارة جاءت طافية نورها .. وكت صلاة العشاء الناس ما شافوها .. ينضرب اليرموك .. يقولوا ليك الطيارات جات من (كدي) والكلام ده يقولو الليمبي أبو ريالة .. ومندوب القناة لازال في حيرة من أمره أين تقع كدي من الخرتوم .. أصحى يا .. بريييييش ....