كد الدوم،،،،،
*بي📝 الحنين،،،،،*
*د. علي الشيخ ،،،،،،*
*كد الدوم،،،،*
دايماً اي كلمة من حرفين بتكون خطيره جدا،،، في النطق، و في الفهم، و برضو في المعنى،،،
كد الدوم ده سباق مارثون عديل كده،،،،
فيهو تحدي،،، و فيهو فنيات،،، كيف تمسك الدومه،،، و كيف تكدها،،،
شوف معاي،،،
زول سنونو ملخلخات،،، و لا ماعنده ضرس عقل،،، قوي،،،
ما يجازف،،،
ما يفكر،،،،
ما يحاول،،،
بعدين،،،، ما اي دومه،،،، بتتكده ،،،
الزول كان دايرين يشكروه بالقلبه،،، بقولوا ليهو *امشي عامل راسك كده زي الدومه،،،*
وفي ناس بكتروا ليهم المحلبيه،،، *امشي يا ابودومات،،،*
في ناس بتكد و بتاكل ،،،
في ناس بتكد و بتدس ،،،
في ناس من قامت بتكد،،،
و في ناس لسه بتحاول،،،
اها نشوف التفاصيل دي،،،
كل زول و دومته،،،،،
المفلس دومته براها،،، أصله أموره كلها مكدوده،،،
و المرطب دومته بتشبهه،،،، تشهيك تكدها ،،، مغصه ساااااااكت ،،،،
و تقول،،،، اسكت كد،،،،
و دومه لي دومه بتفرق،،،
البزعلنا ،،،
جماعه قاموا من هم صغار بكدوا الدوم،،، هسه كبروا و اتنكروا،،،،،
حاولوا يمسكوا الشوكه و السكين،،، بدل ما ياكلوا بيها،،، طعنوا الوطن بالسكين،،،
العكلته بتحصل وين،،،،
زول عمره لا شاف دومه ولا بعرف يكدها،،، ،،،
مالك علينا،،،، خلينا في دومنا و برانا بنعرف نكدها،،،
الزول ده شايل الدومه و قعد يتجاري بيها من بلد لي بلد،،،
هو شن عرفهم بي كد دومنا،،،
برانا بنعرف مستوانا،،،،
شوف دومه ما اتكدت في بلدها و بي ناساه ،،،، الله اعلم زول تاني يعرف يكدها،،،
بالعربي كده،،، دومتنا دي غلبتك،،، رجعها لينا بنعرف اول حاجه نوريك ليها تتمسك كيف،،،، و تتكد من وين،،،،
مش دومتنا،،، و حقتنا،،،،
بعد نكدها،،، نعملها علاقة مفاتيح،،،، ندقر بيها باب الشارع،،، نحشرها في شراب و نلعب بيها البرمه و الحراس،،،، و لا نقول ليها،،،، نعلقها،، ،،، و نخليها ذكرى،،،
زمان الدوم بنوموا بيهو الشفع،،،،
النوم،، النوم،، بكريك بالدوم
النوم،، النوم،، دومتين حلوات،،
دومتين مرات في البحر عايمات،،
مع العولمه،،، بدل كد الدوم بقى في عصير دوم،،،
Delivery,,,, and take away,,,
بتعرفوا المثل ده،،،،
طاسه طمنطاسه،،،
في البحر غطاسه،،،
بطنها لؤلؤ،،، و ضهرها نحاسه،،،
*دومه ما دومتك ما تكدها،،،،*
*د. علي الشيخ*
*الحنين*
*امدرمان*
*٢٤ أبريل ٢٠٢٢*
|
