شنو يعنى تدشين ديوان

[ازهري الحاج شرشاب]

اعجب لظاهرة انتشرت وهى ظاهرة تدشين ديوان والسؤال من يقوم بـدفع تكاليف ايجار قاعة الشارقة او قاعة الصداقة وبقية تكاليف الاحتفال ... ثم من يحضر من الشعراء والمسؤولين هل تمت دعوتهم من قبل الشاعر نفسه ام دعاهم ابداعة ام هى علاقات شخصية ..
الابداع لايحتمل المجاملة سادتى ..
رايكم شنو ولا انا غلطان

[خضر حسين خليل]

تحياتي يا مولانا ووين الحي بيك

[أبوبكر عباس]

سلام مولانا شرشاب،
غايتو بالنسبة لتدشين المجموعة الشعرية الثالثة لبروفسور معز عمر بخيت هو من قام بالتمويل والحضور كان من المعجبين والأصدقاء وعكس الريح
أما بالنسبة لتدشين أرضا سلاح للمرحوم محمد الحسن سالم حميد، فالتمويل من شركة زين والتنظيم من مجموعة الدليب، والحضور بالإضافة لقوش وناس زين، كان من المعجبين.
ديل غايتو التداشين الحضرتهن في حياتي:
الأول ممكن أقول عليهو، شغل علاقات عامة وحركات مثقفين مولعين بجمال الحياة وبروف معز دوما بحب يجيّه حاجاتو ويبتهج.
التاني دا، عبارة عن تقاطع إعجاب بين حب جماعة الدليب لحميد، تجارة زين، إلتقاط الإنقاذ (قوش) للسلاح الفي عنوان الديوان زايد انو اليوم داك ربنا أكرم بعض المعجبين الحقيقيين يسمعوا ويشوفوا حميد في حته نظيفة.
ونرجع ونردع السبب في العولمة.

[ازهري الحاج شرشاب]

الاخ خضر لك تحياتى
موجودين فى الواسعه وضيقه دى
حتما سنلتقى باذن الله

[ازهري الحاج شرشاب]

الاخ بابكر لك مودتى
لا انكر الحق فى الاحتفاء من شخص بحقه كماقلت فى حق الشاعر المعز عمر بخيت ... كما لا انكر الاحتفاء من مجموعات او جهات رسمية لمبدع من بلادى قدم من الابداع كل جميل ... ولكن الاعتراض ان تقوم مؤسسات او جهات رسمية بالاحتفاء بشخصيات لم يسمع بهم ( حتى ابناء عمهم ) وهناك من اباءنا المبدعين من يتمنون كلمة طيبة وشكر وعرفان .
مادعانى لكتابة الموضوع تدشين الديوان الاول لشاعرة وقد حضر الاحتفال فلان وفلان وفلان ...ومن هى هذه الشاعرة وماهى مساهمتها فى الادب السودانى ؟
تحياتى

[حسين أحمد حسين]

يا دكتور تحياتى،

إنتَ اليومين ديل مأجِّزْ ولاّ شنو،

السِّر يا حبيبى يكمن فى تعطيش شين التدشين. فإنْ أفلحتَ فعطَّشتَها، فدشِّنْ إنَّما أنتَ مُدشِّن.

(تدشيناً ما لِقاهو محمد الجزولى سنهورى؛ دنيا بِتْ لَذين).

بالمناسبة، كلمنى الصادق الرضى قال عاصم محمد حنفى عندو ديوان جديد إسمو حصاد الحمى؛ ما تجى ندشِّنو ليهو فى سودانيات كان عندك منو نسخة.

الشوق شعقيبة وشخاليب.

[ازهري الحاج شرشاب]

الاخ حسين الاشواق بحر والله
تعرف الايام دى فاضى ومعطشين السوق ذاتو وعطش مابسقيهو بابور واحد داير كلتود
السنهورى ضاع حقوا لأنو تابعنا ولو تابع كما قال ليهو عاصم حنفى : سبحان الذى اعطاك كرشا وعلمك الحديث من الاذاعه ... اسه كان عييييييييييييييييييك
الولد الصادق الرضى ده وين هو ؟؟؟؟
بعدين ديوان حصاد الحمى لعاصم حنفى ديوان قديم انطبع مع ديوان لمياء فى 1984 لكن حقيقة مفروض يتم الاحتفاء بعاصم واظهار ابداعاته
لك تحياتى .

[ازهري الحاج شرشاب]

ام التيمان صباحك خير
اها شن قولك ... مافهمنا

[ام التيمان]

المشاركة الأصلية كتبت بواسطة ازهري الحاج شرشاب

ام التيمان صباحك خير
اها شن قولك ... مافهمنا

سلامات شرشاب
البروف دا عندو جيكس كثير من النساء و الصبايا الحناكيش
و كثير من الرجال الوجيهين
يا اخوى الدنيا سمع و شوف
شعر حميد دا شنو كمان البستفك حزن و فقر
اخليك تشوف الدنيا ضلمة
معى انها عندهم منورة

معليش حاولت اعمل تعديل فى المداخلة السابقة
قامت طفشت

[جيجي]

المشاركة الأصلية كتبت بواسطة ازهري الحاج شرشاب

اعجب لظاهرة انتشرت وهى ظاهرة تدشين ديوان والسؤال من يقوم بـدفع تكاليف ايجار قاعة الشارقة او قاعة الصداقة وبقية تكاليف الاحتفال ... ثم من يحضر من الشعراء والمسؤولين هل تمت دعوتهم من قبل الشاعر نفسه ام دعاهم ابداعة ام هى علاقات شخصية ..
الابداع لايحتمل المجاملة سادتى ..
رايكم شنو ولا انا غلطان

دا بروموشن لتسويق اجتماعي
حتى نسوان ابوظبي كل واحدة بتروج لصاحبتها اجتماعيا ولو ماعندك صاحبة معناتها حقك راح ماحتبقى نجمة مجتمعات

[tahmoi]

بسمك اللهم

يحدثُ أحيانا أنْ أفتح نافذتي للغيم
فتأتي " ريما " تسألني هل ناديتُ عليها
يحدثُ أنْ تزحمني النشوة حين تضم كفاىَ
سنبلتين .. دافئتين .. ثم أفاجأ أن كفيّ
تشدان علي كفّيها
يحدثُ أنْ أتهجى لغة أجهلها .. أعني أتأمل عينيها
يحدثُ أنْ يصدحَ طيرُ الجنةِ .. أنْ ينبتَ في ثانيةٍ
ورد .. ثم أفيقُ فلا ألقى طيراً أو ورداً
بل ألقاها والبهجة ملك يديها
يحدثُ أنْ تحتبسُ الكلماتُ ولا ألقى صمتاً يفصح عنَّي
حين تجيءْ ولا أدري كيف أُحييها
يحدثُ أن يهمي مطرٌ .. وأحسُّ بأني أغرقُ حين أراني
أسعى - عبر الحزن – إليها
يحدثُ أن أمشي فوقَ الماءِ .. و أنْ أرقصَ في النار
وما كانت معجزتي .. بل كنتُ أناجيها
يحدثُ أنْ يشتبك الأيقاعُ وما كان سوى خفقي
يتناغمُ وخطى قدميها
يحدثُ أنْ أدخلَ في أحوالٍ شائكةٍ

يا للغربةِ كيف أداريها
يحدثُ أنْ .... يحدُثُ أنْ ...
يحثُ أني أهواها حتى يحترق نبضي
لكنْ لستُ ألاقيها ...!



استاذنا ازهرى سلااااااااااااامات يا جميل
الحسين نراجكم تدشنو لي عاصم حنفي وسنهورى
حصاد الحمي كما قال ازهرى ديوان قديم كان متوفرا بمكتبة الفارابي وابن رشد
مع ديوان لمياء لو متذكر

حدث الشارع عن شعبى عن التاريخ قال
احذروا كيد اللئام الخونة
وعصابات الكلاب النتنة
والاعيب التيوس السدنة
***********

زعموا هويت سواك ... قد كذبوا يمينا وأفتروا
فهواك يا ليمياء .. مثل الموت لا يتكرر
وهواك لي قدر،،، علي القلب الجريح مقدر
وهواك لي نبض... فكيف علي سلوك اقدر
لمياء بركان الحروف بخافقي يتفجر
وبحبك المشبوب قلبي في الأضالع يهدر
،،،،، ودماي دونك تهدر

[جيجي]

ياا الله ياخ
دي براها مدشنة نفسها ومعلنة عن ذاتها في حياء يسلب اللب

[حسين أحمد حسين]

المشاركة الأصلية كتبت بواسطة ازهري الحاج شرشاب

الاخ حسين الاشواق بحر والله
تعرف الايام دى فاضى ومعطشين السوق ذاتو وعطش مابسقيهو بابور واحد داير كلتود
السنهورى ضاع حقوا لأنو تابعنا ولو تابع كما قال ليهو عاصم حنفى : سبحان الذى اعطاك كرشا وعلمك الحديث من الاذاعه ... اسه كان عييييييييييييييييييك
الولد الصادق الرضى ده وين هو ؟؟؟؟
بعدين ديوان حصاد الحمى لعاصم حنفى ديوان قديم انطبع مع ديوان لمياء فى 1984 لكن حقيقة مفروض يتم الاحتفاء بعاصم واظهار ابداعاته
لك تحياتى .

تحياتى يا د. أزهرى،
أشواق حنيذة مع بُرمة حنين (وإن شئت دُبَّة حنين، حالة كونك مُختلج بالخليج).

أربكنى يومئذٍ الصادق الرضى (والذى كان فى زيارة أدبية لبريطانيا، وما لم تُمدد، فستكون قد إنتهت فى نوفمبر الفائت)، حينما قال لى بأنَّ ديوان عاصم الجديد هو حصاد الحمى. ولكن أُذهِلَ هذا الإرباك بشوقى الطارف والتليد للصادق الذى لم أره منذ ربع قرن.

فنعم أعرف ذلك الديوان، ولكن قلت ربما هناك ديوان جديد لعاصم قد يكون لك به علم، فتصحح لى معلومة الصادق. وبالفعل عاصم يستحق أن يُفضحَ أمر عشقِهِ لهذا الوطن، وكذلك السنهورى، وكل تلك الكوكبة.

من حاطف لا قاطف.

المشاركة الأصلية كتبت بواسطة tahmoi

بسمك اللهم

يحدثُ أحيانا أنْ أفتح نافذتي للغيم
فتأتي " ريما " تسألني هل ناديتُ عليها
يحدثُ أنْ تزحمني النشوة حين تضم كفاىَ
سنبلتين .. دافئتين .. ثم أفاجأ أن كفيّ
تشدان علي كفّيها
يحدثُ أنْ أتهجى لغة أجهلها .. أعني أتأمل عينيها
يحدثُ أنْ يصدحَ طيرُ الجنةِ .. أنْ ينبتَ في ثانيةٍ
ورد .. ثم أفيقُ فلا ألقى طيراً أو ورداً
بل ألقاها والبهجة ملك يديها
يحدثُ أنْ تحتبسُ الكلماتُ ولا ألقى صمتاً يفصح عنَّي
حين تجيءْ ولا أدري كيف أُحييها
يحدثُ أن يهمي مطرٌ .. وأحسُّ بأني أغرقُ حين أراني
أسعى - عبر الحزن – إليها
يحدثُ أن أمشي فوقَ الماءِ .. و أنْ أرقصَ في النار
وما كانت معجزتي .. بل كنتُ أناجيها
يحدثُ أنْ يشتبك الأيقاعُ وما كان سوى خفقي
يتناغمُ وخطى قدميها
يحدثُ أنْ أدخلَ في أحوالٍ شائكةٍ

يا للغربةِ كيف أداريها
يحدثُ أنْ .... يحدُثُ أنْ ...
يحثُ أني أهواها حتى يحترق نبضي
لكنْ لستُ ألاقيها ...!

الحسين نراجكم تدشنو لي عاصم حنفي وسنهورى
حصاد الحمي كما قال ازهرى ديوان قديم كان متوفرا بمكتبة الفارابي وابن رشد
مع ديوان لمياء لو متذكر

حدث الشارع عن شعبى عن التاريخ قال
احذروا كيد اللئام الخونة
وعصابات الكلاب النتنة
والاعيب التيوس السدنة

***********
زعموا هويت سواك ... قد كذبوا يمينا وأفتروا
فهواك يا ليمياء .. مثل الموت لا يتكرر
وهواك لي قدر،،، علي القلب الجريح مقدر
وهواك لي نبض... فكيف علي سلوك اقدر
لمياء بركان الحروف بخافقي يتفجر
وبحبك المشبوب قلبي في الأضالع يهدر
،،،،، ودماي دونك تهدر

الحبيب العزيز معز،
ألف تحية وشوق يا زول يا ساس.

من عجبٍ أملك الديوانين بتوقيع عاصم، بالسودان. ولكن قلت، كما ذكرتُ لِأزهرى بعاليه، ربما تتم الإشارة لديوان آخر جديد غير الذى أعرف من دواوينه، فقد بعثرتنا السنون يا معز.

وبالحقيقة أنا راجيكم إنت وأزهرى تجودوا علينا بما كتب هؤلاء الأحباب فى فترة شتاتنا المزمن هذا. وقد كنتَ وعدتنا يا معز من قبل، أن تشرك السنهورى ود. محمد عبد القادر محمد خير فى المنتدى، فماذا تمَّ بخصوص هذا الأمر؟

معلوم المعزة والوداد.

[ازهري الحاج شرشاب]

شكرا الاخ معز والاخ حسين
السنهورى حايم فى الفيس كل يوم عندو ومضه بنزلها .. كلمتو بى التدشين والاقتراح منك

[حسين أحمد حسين]

المشاركة الأصلية كتبت بواسطة ازهري الحاج شرشاب

شكرا الاخ معز والاخ حسين
السنهورى حايم فى الفيس كل يوم عندو ومضه بنزلها .. كلمتو بى التدشين والاقتراح منك

يا مولانا صباح الخير، ومسئول من الخير،

إنتا أحمد طه دا، هذا العبقرى الذى يدفن نفسه فى مقابر التواضع، معقول لابِد الزمن دا كلّو، ما سوَّالو شيتَنْ يِنْدَشَّنْ. ياخى الزول دا عافرو كان يمرقلو قصيدة فَرِدْ وحيدى ندشنة ليهو. عليك الله أمْرُقْ لَنا منو بُشارة ياخى.

الشوق، صهاريج صهاريج، من هنى للخليج.