صيد الكاميرا .. (3) ... الدافوري ...
[media]http://dc.indymedia.org/usermedia/video/11/daforee1.wmv[/media]
اول كسرة لي يدي اليمين كانت وانا عمري 8 سنين نتيجة شوتة (طرشة ) من الباقر ود حلتنا .. هم كانوا كبار بلعبو الدافوري في شارع من شوارع ودنوباي ..ونحن كنا صغار بي برا معاي اولاد من عمري .. وفووووو
الكورة في يدي اليمين .. طرت ابعد من الكوره ..وبطني وجعتني وجع شديد .. ما قدرت ابكي عشان ما يقولو بكي .. وما قدرت اسكت .. والم عجيب في يدي اليمين .. جاء الباقر ويوسف وضغطو لي يدي قالو لي بتوجعك قلت ليهم .. لا ... وانا ميت من الوجع .... ما فضحني الا الورم الظهر في يدي بعد يومين من التغطية ... ولم تستطيع الوالدة او الاخوان اخد اعتراف عن الفاعل .. وسجلت الحادثة ( وقعت في المدرسة من الشباك ) .
اجمل ما في الامر كان المعاملة الخاصة في المدرسة بعد الجبس وعدم الوقوف في صف الفطور او صف الموية
واعفاء من نظافة الفصل .. ونظرة اولاد الحلة المليانة احترام لعدم كشف الفاعل ... واسواء ما في الامر بعد الوجع كان اخفاء الامر عن الاسرة و .. كمية الترمس الاكلتها .
دا اول اعتراف مكتوب عن الفاعل ... والدافوري ليهو حكاويهو ..
|
