اقتباس:
المشاركة الأصلية كتبت بواسطة أسعد
العزيز محب
الماورائيات دي لا بتنحصر في مسيحيتك ولا في اسلامية العم حسين ولا في بوذية الدالاي لاما ولا يهودية ديفيد ولا معزولة عن الحاد دارون
دي حاجة موجودة في طايوق الانسان، والانسان شاء ام ابى ح سيتخدمها غصباً عن ميتين ابو حلتو.
ودعني اعطيك مثالا مكملا لمثالك الذي صوغته اعلاه عن المتعة باحساس شرب مشروب بارد في نهار ساخن.
وخلينا نجيب فلان ونقعدو في ميدان جاكسون، ونسفر علان الى صقع في شمال سيبيريا.
ونقوم ندي فلان عصير عرديب باااااارد، ونقوم نتصل علي علان الكائن في شمال سيبيريا ونقول ليهو (اتخيل) انك اسي قاعد تشرب في شوربة فطريات سااااخنة.
صدقني ممكن متعة علان الناتجة من (خياله) تتفوق على متعة فلان الناتجة من (واقعه).
سيبك من مثالي دا يمكن ما يعجبك. وخليني اديك تجربة حقيقية اتعملت لي طفلين، الولد الاول دخلوهو غرفة مليانة العاب وقفلوا عليهو الباب، الولد التاني دخلوهو غرفة فاااااضية بس فيها علبة مليانة قش، بعد تلاتة ساعات فتحو غرفة الولد الاول لقوهو يبكي وسألوهو مالك بتبكي؟ قال ليهم لييييه تخلوني براي في الغرفة وتقفلوا علي الباب. لمن فتحوا الباب التاني لقوا الولد مطلع القش كلو من العلبة وقاعد يفتش في الغرفة فرحااان لمن شافهم قال ليهم، الارنب ختيتو وين؟ قالوا ليهو ارنب شنو؟ قال ليهم هادي علبة وفيها قش يبقى اكيد في ارنب.
فيا عزيزي المتعة لا ينبطق عليها قانون الفعل ورد الفعل -وهذه نعمة من نعم الله في بديع خلقه- لانو لو كانت المتعة هي رد فعل للفعل كانو المساكين والفقراء اكلوا خرا في متعة حياتهم.
ولكن المتعة هي نتيجة (تفسير) لرد الفعل، فممكن فلان كانت متعته اقل من علان في مثالنا اعلاه لانو فلان (فسر) رد فعله لشرب المشروب البارد في نهار قائظ بانو حاجة طبيعية وكل يوم قاعد يشربها وشايفها حاجة عااااادية، لكن علان (فسر) رد فعله بان اندمج مع خياله وعاش المتعة بكل تفاصيلها.
يبقى السؤال هنا من وين بجي (التفسير) اللي هو المصدر الحقيقي للمتعة، وخليني اتفلفس ليك واقول ليك انو التفسير بجي من العقيدة او الايمان
العقيدة والايمان هي المصدر في حكمنا على الاشياء.
متعتك انت محب عندما تشرب الماء المقدس زي متعة عمنا حسين لمن يشرب ماء زمزم وزي متعة الدالاي لاما لمن يمارس اليوجا وزي متعة الملحد لمن يتأمل الدنيا في عبثيتها واكتشافه انه مافي رب يحكمها.
لذلك يا عزيزي نقول لك ما قال القديس اوغسطين (لن تفهموا حتى تؤمنوا)
عليه نأمل انك تستمتع بي ايمانك وتأخذ بعين الاعتبار حقوق الاخرين بالتمتع بي ايمانهم بدون ما نقعد نطاعن في ايمانهم لانو في الحالة دي انت خليت متعتك بايمانك وبقيت تستمتع بافساد متعة الاخرين .
|
اسعد ..
شكرا علي المشاركه ..
انا لا احاول ان امنع احد من الاستمتاع بايمانه وارفض الاتهام المبطن او المباشر .. وليس هنالك ماء مقدس ولكن في تقاليد بشر وفي الغالب ليست لها علاقه بالحقيقه او بالاوبجكتف الرباني ..
..
قلت اشياء جيده في بقيه مداخلاتك ولكن انا بحب اوضح نفسي قبل ان ارد ..انت لو عندك
misconceptions
عني انا بحب اوضحهم ليك ولي غيرك قبل ما امشي لي قدام وبرفض اسلوب الاتهامات ..
..