[QUOTE=منال;
الغالية لنا
انا غايتو اخذت كباية شاى و جيت ... لكن من غير اى حساسيات و حسب شوف عينى و شوف العين قاسى ح ارد
وعلى هذا النسق شفت فى عام 88 فى السيول التى اجتاحت الخرطوم و كنت شافعة بخوج فى المطر و عندى ضفائركمان
شفت نقد بعنيى الاتنين خايج مع الناس و يفتحو فى المجارى و اظنو كان نائب الدائرة اللت الديم و باريناهم كورجا من العيال من بيت الى شارع يحسب و يعد فى اليوم التقيل داك لا اندس و لا انضارى و لا جاء بعربية مصفحة ... المشهد فى عيونى من اليوم داك و كان جنب سوق الديم فى مسجد كبير فتحو ودخل فيهو الناس الفقدو المأوى و خمينا العفش حقهم شفت المروة دى... و كمان مشنق البنطلون و يتناول مع الناس ... الا هسه ياختى الرجا ل ديل كبروا و عجزوا على العمل الانسانى و كمان بذكر قعدتوا فى ضل و شرب مع العامة شاى العصر ... و بشوفو ما كان متعالى .. و فى كم خيمة عزاء و فرح كان مع الناس حتى اكان معاهو حرس او بودى قارد ... و ناس كتار عندهم جنس الحكى ده الخابرين نقد...
[size=4]
منولة
ود وتحايا
اسمعي ياختي انا مازولت حساسيات والله وأسالي عمك فتحي
قلتي لي الكلام ده كان سنة 88 وده طبعا بعد انتخابات 86والانتخابات دي كان نقد مرشح وتم انتخابه كنائب عن دائرة الديوم الشرقية .....صح؟
ذاك المشهد لم احضره لكن تم نقله وتصويره من قبل ناس البيت ونحن كنا في الخرطوم3 يعني جيران الديم وعارفة انه نقد كان عنده مواقف في دائرته الانتخابية العتيدة لكن كده احكي عن برامجه الاجتماعية التي يقوم بها الآن ؟ يامنال مواقف معدودة وجهوية وغير دائمة لاتنتج مناضل وقائد
انا كلامي ليس عن نائب برلماني خدم دائرته يامنال .......
انا اتحدث عن مواصفات قادة وبس
نقد خدم دائرته الانتخابية وفي مناسبات محددة وانا لااحكي عن ذلك
انا اتحدث عن قائد وزعيم شعبي يضع السودان كله تحت جناحيه وانت قزمتي لي صورة قائدي لي سياسي عمل من اجل دائرته الانتخابية!!!!
نقد بنفسه هل بمقدوره الاضراب عن الطعام من اجل الدارفوريين او من اجل من تهددهم الآن الانقاذ بالسدود
واعني اهلي في الشمال ! هل نقد زارهم ؟ هل واساهم ؟هل مشى ليهم ؟ هل رسل ليهم رسالة تضامن حتىاو غيره
هل نقد اعتصم من اجل مدنيي ابيي ؟ هل خرج في تظاهرة او اضرب او خاطبهم كبسطاء
الناس دي يامنال مامحتاجة محامين ! الناس ديل محتاجين ناس تعالجهم بي نظام الشوك ثيرابي
انا نقد بحترم بعض مواقفه لكنه لاينفك عن آسار البرتوكولات و بيروقراطيات هو احد المساهمين فيهاو
الحديث العاطفي مساهمة في الجريمة ضد الوطن ....
وعبد الخالق مات ولم يحذو حذو غاندي وهو رحمه الله اخذ فرصته ولا اريد ان اظلمه ولا احب ان اتكلم بغيبته
الجانب الانساني في قادتنا ماموجوووووووووووووووود
غايتو يا لنا فى دى شالتك قومة النفس كيفن يا اخية حواء السودانية ما عقرت و حاتك اجمل الاطفال قادمون وفى تقديرى لو كتب عمر لعبد الخالق الولدتو امو (زعيم كبير) اكان حالنا بقى حال و دى ريدة منى لراشد الكان راشد صحى... و شوفى حتى الشهيد جوزيف قرنق راسو اى فكرو كان كيف و اظنك قريتى الدايلاما الكتبا او اقريها تانى كدى ... والشهيد جون قرنق برضو زعيم رغم الهنات لايمانى مافى زول كامل... اها النقوليك كلامى ده فى حواء الظلمتيها و لسه ما عقرت (رحم السرور يا يمة) تجيب اشكال و الوان (طبعا الجنس للجنس رحمة و انتو دى تطلعو منها ) بس اتفالو هناك ضوء ... وده كلو ... كلو .. بنتهى زى ما قال محجوب شريف ]
سؤالي يامنال بوضوح
هل لدينا غاندي بروح سودانية صميمة ؟ في زول عارف مواصفات سياسي سوداني في صورة مدافع عن حقوق مدنية بالفعل لابالقول وليس من اجل لغف اموال منظمات المجتمع الدولي؟ عندنا قائد واحد في تاريخنا كله قال انا حزبي بس السودان ؟ هل لدينا قائد او زعيم سوداني افترش العراء مع الفقراء والمعّوزين ومشردي الكوارث والحروب؟ هل لدينا ثوري واحد رفض الترف والبودي قاردات والمخصصات والهبات وما اليها ونصب خيمته لتكون وجهة المغلوبين والمنكوبين والحفاة العراة؟؟
هل قام احد قادتنا بعمل نفير شعبي من اجل بناء بيوت سكان الاطراف الذين شردتهم السيول مثلا؟
هل ذهب احدهم لتخومنا الغارقة في الفقر والجهل والمرض والتخلف يوما وأعلن ان هذه هي غايته وليس الكرسي او البرلمان؟ وان حربه تبداء من هنا
فهمتيني يامنال؟؟؟؟؟؟؟؟؟
حب الشعوب لقادتها يأتي من رؤية الشعوب لقادتها وهي تقاتل المعارك لاجل الشعوب وليس لرؤيتهم وهم ينامون في الاقطاعيات وصباحاتهم انس واولاد بيقرو في اوروبا وامريكا وخزاينهم ملاينة واقل واحد فيهم لو ماعندو قروش خلق لي نفسه مكانة اجتماعية واسم وبقى سوبر استار
نحن قادتنا التقليديون يفترعون ويشترعون حروبا سفسطائية وبيزنطية بلامحتوى والناس تقتتل والعنصرية تستشري والناس تموت جوعا ورعبا وعوزا وجهلا
خليني أسالك سؤال تاني تفتكري ليه نقد نزل انتخابات في الديوم الشرقية ؟؟؟؟؟؟؟؟
ليه ما مشى قلع النحل مثلا ولاّ شلّعوها الخوالدة ولا الطينة ونزل هناك؟؟؟؟
ليه ينزل في دائرة انتخابية معظم قاطنيها متعلمين وعندهم حد من الخدمات وليه ينزل في سنتر جغرافي وماطرفي ؟
ببساطة لانه ساكن الاطراف عنده هموم لانقد ولا برنامج نقد بيحلوها ليه ....ولانه هذا الطرفي عندو السياسة ترف في وجود معضلات تتعلق بالاختيار بين البقاء والفناء!!!!!!!!
ولانه نقد او حزبه لاحفرو لي الناس دي بير ولا لقطو ليهم ساكت قش يبنو بيهو قطية تسترهم
كل اليسار موجود الآن في سنتر الخرطوم لانه عاجز وفاشل في انتاج برنامج سياسي واجتماعي فاعل في الاطراف المنسية ....
والاحزاب الدينية ايضا لاتقدم لاولئك خدمة البتة لكن واثقين انهم سيظلوا مخزونهم الانتخابي لانهم على الاقل يمتلكون خطابا قدريا مؤثرا لم تستطيع احزاب اليسار الفاشلة اقصائه!!!!وده فشل فكري ينسف عقدية اليسار لانه وفي اكثر من مناسبة تم هزمه بالقاضية يامنولة!!!!!
عرفتي انا قلت ومصرة انه الارحام السودانية عجزت عن ان تأتينا بقائد؟
نحن عندنا يامنل ازمة في القادة وفي الخطاب وفي تحديد الاولويات وقبل كل هذا لدينا ازمة ثقة كبرى في انفسنا وفي الآخر
وما العنصرية الا غطاء
وعشان اربط كلامي ده ببوسن عز المزار حاابداء من هنا المرة الجاية
انا ما بعرض برة الحلبة يااخوان انا بحاول الملم في أطراف مأساتنا
ودي يامنال وماتزعلي مني [/size]