اقتباس:
المشاركة الأصلية كتبت بواسطة أمين محمد سليمان
والله يا ريت يا خالد !!
بكة الموضوع دي مؤزمو تماما ... نحن على إتصال و أنا عارف حجم دهشتو التي وصلت حد الفجيعة في مواقف كثير ممن ينسبون أنفسهم للديمقراطية، عارف حجم الفجيعة تماما لانو ده نفس الحاسي بيه أنا !!
|
طيب تمام يابروف
خلينا نناقش المسألة دي بي رواقة وبدون احساس بخيبة الظن
اولا من المفترض ان تستصحب التجربة المرة جدا المرينا بيها كلنا من حكم الكيزان، عدم وضع التجربة دي في الاعتبار فيهو ظلم كبير لو تعلمون
اها مرارة التجربة دي يابروف هو المخلي الناس ديل يلقو تبريرات موضوعية للحصل في مصر ده، مرارة التجربة دي بتخليك تعرف تماما انو اي خيار غالبا حايكون افضل من انو الناس تمر بالتجربة كلها استنادا على مبدئية الديمقراطية واحترامها وتحملها،
المهم وعشان ما اخش في تفسيرات كتيرة واستخدام جمل كثيرة غالبا حاتزيد من خيبة ظنك خليني اسوق ليك التبريرات الموضوعية القلتها ليك فوق
الحصل يابروف باختصار غيرر مخل، انو بعد الثورة المصرية وايام الانتخابات القوى السياسية في مصر اتوزعت اصواتها بين مرشحين كتار جدا، وده اتسبب في انو الجولة التانية تكون بين مرسي وشفيق الانت عارف رمزيتو تعني شنو، ولمن وعت القوة الثورية للحاصل كان قدامهم الخيارين الكل واحد امر من التاني ده، انا عندي اصحاب كتار جدا مصريين وكنت بتناقش معاهم في الفترة ديك وكان كلامهم كده ( حانصوت لي مرسي، وحاننضم للمعارضة مباشرة !!) ده هو راي الاغلبية الصوتت لمرسي يابروف ودي عينة الناس الانتخبت مرسي، بالمناسبة المصريين واعين جدا، والتزموا تماما بالمعارضة الديمقراطية الصحيحة، لكن للاسف مرسي هو الدفع الناس للتصعيد ده، مرسي يابروف ولانو قاري كويس الطريقة الجابتو للرآسة ابدا ما عوّل عليها كتير في تثبيت حكم الاخوان في مصر، كان عارف كويس هو وحزبو انهم في اول انتخابات حايتزيلو القائمة بلا منافس، عشان كده استخدم طريقتهم التقليدية في تثبيت الحكم (التمكين) وعمل خطوات كتيرة جدا انت عارفها كويس ابتداء من انتخابات مجلس الشعب والاعلانات الدستورية والدستور نفسو وتحصين نفسو ضد اي حاجة متجاوزا بمراحل كبيرة التفويض المنحو ليهو الشعب، وده في حد ذاتو انقلاب على الشرعية وانقلاب على الديمقراطية، الشعب المصري والسياسيين المصريين ماعبطا وعارفين كويس انو لو كان في قنوات رسمية ومؤسسات حقيقية ممكن بكل سهولة يكسبوا قضيتهم عن طريقها، لكن مرسي قضى على المؤسسات دي وبقى حقيقة مافي اي طريقة غير القيام بثورة تانية لاستعادة الديمقراطية والمؤسسية، ودي الحاجة العملوها شباب تمرد، تدخل الجيش ممكن يكون مستعجل شويتين، لكنو كان لابد حايحصل طال الزمن او قصر لانو وانت عارف كويس الكيزان لايمكن يسيبو السلطة باخوي واخوك، من الظلم اعتبار تدخل الجيش انقلاب عسكري لانو مافيهو اي مظهر من مظاهر الانقلاب العسكري، الحشد الفي رابعة العدوية هو حشد الكيزان وطبيعي انهم يأيدو مرسي سوا كان صاح او غلط المهم انو زولهم وبتكون شايف براك نوعية الحشد ونوعية الخطب القاعدين يقولو فيها
المهم يابروف ... انا اتفق معك انو مرسي جا بي طريقة ديمقراطية سليمة( مع الاخد في الاعتبار الاسباب الموضوعية الخلت الناس تصوت ليهو) لكن الاسئلة هي
هل فترة حكم مرسي كانت فترة حكم ديمقراطي؟
هل قراراته كانت ديمقراطية؟
هل كانت الديمقراطية في يد امينة في فترة حكمه؟
هل كان في ضمانات لاستمرار الديمقراطية والانتقال السلمي للسلطة بعد نهاية فترتو؟
الاجوبة على الاسئلة دي يابروف لو ما اقنعت بوجاهة الحصل في مصر ده، المفترض على الاقل تزيل عنك احساس الفجيعة وخيبة الظن في الناس الكنت تحسبهم ديمقراطيين
تحياتي