سودانيات ليست علي الإطلاق صدقة جارية

[خضر حسين خليل]

كتب أخونا مسيكين في هذا البوست :
http://sudanyat.org/vb/showthread.php?t=26232&page=7
الآتي نصه :

قلنا من قبل أن الموقع من المفترض أن يكون صدقة جارية
لمؤسسه - عليه الرحمة - وذلك بتواصل الأعضاء وتواددهم وتراحمهم
ونشر العلم والمعرفة لا أن يكون مكب لنفايات الملاحدة ويا ريت لو وقفت
على الإلحاد ، كمان معاها سب وإساءة لذات الله و للرسول صل الله عليه وسلم

وجارية لي وين كان سألتك أخانا مسيكين ؟

[خضر حسين خليل]

في سبتمبر والعام 2005 م قدمت لهذا المكان بعد تواصل حميم كنت قد بدأته مع الراحل المقيم خالد الحاج بسودانيزأونلاين ، لازلت أذكر المراسلات التي تمت بيننا وقتها ، صوته في الهاتف ، ضحكه ، جده وهزله .
كبيراً كان خالد ، كبيراً كان .

[خضر حسين خليل]

لا أدري وأنا أقرأ مداخلة أخونا مسيكين تمنيت خالد الحاج بيننا . ولا أبالغ لو قلت إنني إنتظرت تداخله . ليفض إشتباك الحاجات القاعدة تحصل في سودانياته التي طالما حلم به منبراً للرأي والرأي الآخر .

[خضر حسين خليل]

لا أدري متي إجتمع ناس سودانيات ليقرروا عن خالد أن تتحول سودانيات لصدقة جارية ؟
خالد الحاج الذي أعرف كان أنبل من تقبل ترهاتنا وكتاباتنا وحاجاتنا وحاجاتكم القاعدين تسوا فيها دي . كان يؤمناً علي الأقل بالرأي والرأي الآخر .

[خضر حسين خليل]

أرجوا صادقاً انو ناس الادارة علي الأقل يوضحوا لينا الحاصل شنو لأنو كان القصة دي صدقة جارية سألتزم أنا خضر حسين لأن أخصص ما تبقي من حياتي الإسفيرية في سودانيات للدعاء والترحم علي روح خالدنا الذي ما برح المكان لأنه يستحق .

[طيبان]

سلامات يا خضر ، عسى حالك زين ..
وين المشكلة في كلام مسيكين ؟؟
هو يرى أن سودانيات صدقة جارية لخالد الحاج ،،والكلام دا ما أوّل مرّة يتقال هنا ولا هو غريب ،،ليه بالذات لمّا قالوا مسيكين بقى مزعج ؟
ثم ياخي رايو عن الملاحدة وسب الرسل برضو موجود في لائحة سودانيات الإتدقّت في المنتدى دا من حياة خالد عليه الرحمة :
لائحة بتقول :

10/ احترام الذات الإلهيّة و الرُسُل والأنبياء و كريم المعتقدات والمقدّسَات وعدم التعرّض بصورة سلبية للتنوع ( الدينى و العرقى و الاثنى و الثقافى ) .

ومسيكين بقول :

كمان معاها سب وإساءة لذات الله و للرسول صل الله عليه وسلم

قبل تشدّها لي مسيكين يا خضر كان الأولى تشدّها للائحة في رقبتا لأنو كلامو القالو في إطار الرأي ،،لم يخرج من عباءة اللائحة ..

خالد لا يضرّه رأي يُكتب في هذا المكان فله ما صنع ،،والزج به في الهينة والقاسية ليس من الحكمة في شئ ،، سأقولها لك هنا : دعوا خالد ينام مطمئناً ،، فالمنى بعودته ليرى ما يحدث في سودانيات لن ينحصر في رأي مسيكين أعلاه ،، على الأقل ليس هو الأولى في رأيي .
ناس الإدارة في الحقيقة مطالبين بتطبيق اللائحة على حتة سب الرُسل والذات الإلهية قبل ما يكونوا مطالبين بوضع تعريفات للصدقة الجارية ..
__

كن بخير ..

[حسين عبدالجليل]

صدقة جارية أم لا بيحددها رب العباد.

كمسلم أؤمن بالحديث " إذا مات ابن آدم انقطع عمله إلا من ثلاث: صدقة جارية، أو علم ينتفع به، أو ولد صالح يدعو له "

سودانيات إن شاء الله صدقة جارية لعزيزنا خالد كما أن فيها علم ينتفع به .

شايفك منزعج شديد من بوستي أمين و أشرف .

[خضر حسين خليل]

المشاركة الأصلية كتبت بواسطة حسين عبدالجليل
صدقة جارية أم لا بيحددها رب العباد.

كمسلم أؤمن بالحديث " إذا مات ابن آدم انقطع عمله إلا من ثلاث: صدقة جارية، أو علم ينتفع به، أو ولد صالح يدعو له "

سودانيات إن شاء الله صدقة جارية لعزيزنا خالد كما أن فيها علم ينتفع به .

شايفك منزعج شديد من بوستي أمين و أشرف .

أتمني أن تطلع علي ردي علي أمين يا عزيزي حسين بخصوص الصدقات .
أما بخصوص الإنزعاج فياريت توريني الشئ الخلاك تتأكد إني منزعج شنو من مداخلات أمين وأشرف ؟

احترامي

[Ishraga Hamid]

المشاركة الأصلية كتبت بواسطة خضر حسين خليل

في سبتمبر والعام 2005 م قدمت لهذا المكان بعد تواصل حميم كنت قد بدأته مع الراحل المقيم خالد الحاج بسودانيزأونلاين ، لازلت أذكر المراسلات التي تمت بيننا وقتها ، صوته في الهاتف ، ضحكه ، جده وهزله .
كبيراً كان خالد ، كبيراً كان .

كانت ايام حميمة يا خدر
كانت ذات الايام التى قدمت فيها لهذا المكان الاليف الذى اول من تفتحة تقابلك تلك الجملة الحميمة وكأن سودانيات تفتح بكل ناسها احضانها لك..

لتكن سودانيات صدقة جارية ياخدر لمن يريد ذلك
ولتكن فضاء لك لتسأل اسئلتك المشروعة

خالد خالدا يا خدر

[خضر حسين خليل]

إشراقة أخت دمي

قد لا يكون الكلام ده وكتو يا صاحبة (الكلام أعلاه) لكنني تعودت علي ذلك ترباية أسافير والورح واحدة كما تعلمين .
اليوم أكثر من أي وقتٍ مضي إحتجت حضور خالد في حوليتو القاطعنها ناس مسكين وسارة وامين وبقية المساكين من راسهم .


ـــــــ
يا سارة ومسكين وامين ما تتضايقوا من مساكين الوردت اعلاه رجاءاً فكلنا مساكين في هذه اللحظة وما أحوجنا لنكون مساكين دروب علي الاقل

[خضر حسين خليل]

يا أخوانا مسيكين
يعني هسي بقت علي اناده الفاتح بوست بي جاي وكان في امكانه الرد بهناك او كما تتناضمون في الاسافير والله انا آسف خالص خالص

[مسيكين]

المشاركة الأصلية كتبت بواسطة خضر حسين خليل

يا أخوانا مسيكين
يعني هسي بقت علي اناده الفاتح بوست بي جاي وكان في امكانه الرد بهناك او كما تتناضمون في الاسافير والله انا آسف خالص خالص

الظاهر إنك ما فهمتني يا خضر ، أنا أعني أنك تعلم ماهي
الصدقة الجارية و أعلم أنك تعلم كيف يمكن أن يكون بعض
ما نكتب أو نفعل من خلال هذا المنتدى يصب في ميزان حسنات
الراحل خالد الحاج على الأقل من باب الوفاء يا رجل ،،،،
أيضا لا أستنكر أن تفتح بوست جديد بالخصوص ،،،

[Ishraga Hamid]

المشاركة الأصلية كتبت بواسطة خضر حسين خليل

إشراقة أخت دمي

قد لا يكون الكلام ده وكتو يا صاحبة (الكلام أعلاه) لكنني تعودت علي ذلك ترباية أسافير والورح واحدة كما تعلمين .
اليوم أكثر من أي وقتٍ مضي إحتجت حضور خالد في حوليتو القاطعنها ناس مسكين وسارة وامين وبقية المساكين من راسهم .


ـــــــ
يا سارة ومسكين وامين ما تتضايقوا من مساكين الوردت اعلاه رجاءاً فكلنا مساكين في هذه اللحظة وما أحوجنا لنكون مساكين دروب علي الاقل

خدر يا عزيزى العزيز
الديمقراطية دى محكاتها صعبة شديد
انا بصراحة ماشايفة فى مشكلة انو اخونا مسكين شايف انو الموضوع حسب وجهة نظره صدقة جارية والمحك هو فى فكرة القبول له كما هو.
المنبر ده جمالو جاى من التعدد اللى فيهو واللى مفروض نحافظ عليه طالما حقوق المواطنة هى اللى حاكمانا.
تعرف وانا صغيرة فى سن عشرة سنوات كانوا ناس بيتنا لمن مايلقونى بيكونوا عارفين يا اما انا مشيت ساحة الرقيص فى الرديف فى كوستى
او واقفة على رصيف الجيران اشاهد باعجاب وانسراب برضو فى الرقص المحموم فى النوبة او الحولية.
دى كانت حلتنا يا خدر فيها كل ده وظل الشكل ده عنوان لمحبة هى شعار سودانيات.
خدر تعال نقرأ تانى اصلاح الخطأ بين الجماهير... ياخ ده من اجمل ادبيات الحزب الشيوعى اللى قريتها وبسببها حبيت عبدالخالق زى ماحبيت زيدان ابراهيم.

[خضر حسين خليل]

كأني هسي يا شرووق كافر بإصلاح الخطأ في العمل وسط الجماهير ـ أنا دفاعي العملتو لي روحي هسي للمكان ده هو ما نتاج لموقف فكري بعينو وأنا واحد من الناس البخش هنا خاتي قوميتي ولغتي ولهجتي وبلبس قبال أخش علي الخال وضيوفو سودانيتي يا شروق .
انت كان حاسبة مداخلاتك الهنا دي كصدقة جارية لي خالد انا شخصياً ما حاسبها كده لأنو لي يوم هسي دي مافي حاجة اسمها فتوي دينية عشان نضمن الأسافير دي بمداخلات الناس الشتراء منها والصالحة في عداد الصدقات .

بعدين انا مستغرب من حكاية الصدقة الجارية الالكترونية دي
باقية لي زي السبح الصينية الاكترونية البشوفها في ابهام الناس في المواصلات
طرقك طرقك طرقك سبحان الله سبحان الله

بلعبوا لعب يا اشراقة ياخ

[أمين محمد سليمان]

خضر حسين ... يا صديق المدارات البعيدة ... سئيلي الله مشتاق ليك زي السمح .... و جيتي السودان الفاتت مشيت ليك الدكان، كنت في البلد ما عارف حليم كلمك ولا لا ....
بالنسبة لده :

المشاركة الأصلية كتبت بواسطة خضر حسين خليل

وجارية لي وين كان سألتك أخانا مسيكين ؟

جارية لربنا زي ما قال ليك حسين ...ولا كمان عندك إعتراض علي حديث " إذا ما ت بن آدم إنقطع عملة إلا من ثلاث " واحدة منهم صدقة جارية ....
كلام مسيكين حبيبنا ده واضح و شرحو ليك ...الما واضح كلامك إنت عن سودانيات لمن تقول بوستي عن هشام منشور في سودانيزاونلاين ليه أنا اعدت نشرو هنا ؟!!
العلاقة شنو بين سودانيات و سودانيزاونلاين البتخلي الكلام الهناك ما يتجاب هنا باعتبار إنو أي زول بقرأ هناك ...ده الإستوساخ الحقيقي لسودانيات ما كلام مسيكين المبني علي حديث الرسول صلي الله عليه و سلم !!