سودانيات ليست علي الإطلاق صدقة جارية

[خضر حسين خليل]

كتب أخونا مسيكين في هذا البوست :
http://sudanyat.org/vb/showthread.php?t=26232&page=7
الآتي نصه :

قلنا من قبل أن الموقع من المفترض أن يكون صدقة جارية
لمؤسسه - عليه الرحمة - وذلك بتواصل الأعضاء وتواددهم وتراحمهم
ونشر العلم والمعرفة لا أن يكون مكب لنفايات الملاحدة ويا ريت لو وقفت
على الإلحاد ، كمان معاها سب وإساءة لذات الله و للرسول صل الله عليه وسلم

وجارية لي وين كان سألتك أخانا مسيكين ؟

[خضر حسين خليل]

في سبتمبر والعام 2005 م قدمت لهذا المكان بعد تواصل حميم كنت قد بدأته مع الراحل المقيم خالد الحاج بسودانيزأونلاين ، لازلت أذكر المراسلات التي تمت بيننا وقتها ، صوته في الهاتف ، ضحكه ، جده وهزله .
كبيراً كان خالد ، كبيراً كان .

[خضر حسين خليل]

لا أدري وأنا أقرأ مداخلة أخونا مسيكين تمنيت خالد الحاج بيننا . ولا أبالغ لو قلت إنني إنتظرت تداخله . ليفض إشتباك الحاجات القاعدة تحصل في سودانياته التي طالما حلم به منبراً للرأي والرأي الآخر .

[خضر حسين خليل]

لا أدري متي إجتمع ناس سودانيات ليقرروا عن خالد أن تتحول سودانيات لصدقة جارية ؟
خالد الحاج الذي أعرف كان أنبل من تقبل ترهاتنا وكتاباتنا وحاجاتنا وحاجاتكم القاعدين تسوا فيها دي . كان يؤمناً علي الأقل بالرأي والرأي الآخر .

[حسين عبدالجليل]

صدقة جارية أم لا بيحددها رب العباد.

كمسلم أؤمن بالحديث " إذا مات ابن آدم انقطع عمله إلا من ثلاث: صدقة جارية، أو علم ينتفع به، أو ولد صالح يدعو له "

سودانيات إن شاء الله صدقة جارية لعزيزنا خالد كما أن فيها علم ينتفع به .

شايفك منزعج شديد من بوستي أمين و أشرف .

[خضر حسين خليل]

أرجوا صادقاً انو ناس الادارة علي الأقل يوضحوا لينا الحاصل شنو لأنو كان القصة دي صدقة جارية سألتزم أنا خضر حسين لأن أخصص ما تبقي من حياتي الإسفيرية في سودانيات للدعاء والترحم علي روح خالدنا الذي ما برح المكان لأنه يستحق .

[أمين محمد سليمان]

خضر حسين ... يا صديق المدارات البعيدة ... سئيلي الله مشتاق ليك زي السمح .... و جيتي السودان الفاتت مشيت ليك الدكان، كنت في البلد ما عارف حليم كلمك ولا لا ....
بالنسبة لده :

المشاركة الأصلية كتبت بواسطة خضر حسين خليل

وجارية لي وين كان سألتك أخانا مسيكين ؟

جارية لربنا زي ما قال ليك حسين ...ولا كمان عندك إعتراض علي حديث " إذا ما ت بن آدم إنقطع عملة إلا من ثلاث " واحدة منهم صدقة جارية ....
كلام مسيكين حبيبنا ده واضح و شرحو ليك ...الما واضح كلامك إنت عن سودانيات لمن تقول بوستي عن هشام منشور في سودانيزاونلاين ليه أنا اعدت نشرو هنا ؟!!
العلاقة شنو بين سودانيات و سودانيزاونلاين البتخلي الكلام الهناك ما يتجاب هنا باعتبار إنو أي زول بقرأ هناك ...ده الإستوساخ الحقيقي لسودانيات ما كلام مسيكين المبني علي حديث الرسول صلي الله عليه و سلم !!

[طيبان]

سلامات يا خضر ، عسى حالك زين ..
وين المشكلة في كلام مسيكين ؟؟
هو يرى أن سودانيات صدقة جارية لخالد الحاج ،،والكلام دا ما أوّل مرّة يتقال هنا ولا هو غريب ،،ليه بالذات لمّا قالوا مسيكين بقى مزعج ؟
ثم ياخي رايو عن الملاحدة وسب الرسل برضو موجود في لائحة سودانيات الإتدقّت في المنتدى دا من حياة خالد عليه الرحمة :
لائحة بتقول :

10/ احترام الذات الإلهيّة و الرُسُل والأنبياء و كريم المعتقدات والمقدّسَات وعدم التعرّض بصورة سلبية للتنوع ( الدينى و العرقى و الاثنى و الثقافى ) .

ومسيكين بقول :

كمان معاها سب وإساءة لذات الله و للرسول صل الله عليه وسلم

قبل تشدّها لي مسيكين يا خضر كان الأولى تشدّها للائحة في رقبتا لأنو كلامو القالو في إطار الرأي ،،لم يخرج من عباءة اللائحة ..

خالد لا يضرّه رأي يُكتب في هذا المكان فله ما صنع ،،والزج به في الهينة والقاسية ليس من الحكمة في شئ ،، سأقولها لك هنا : دعوا خالد ينام مطمئناً ،، فالمنى بعودته ليرى ما يحدث في سودانيات لن ينحصر في رأي مسيكين أعلاه ،، على الأقل ليس هو الأولى في رأيي .
ناس الإدارة في الحقيقة مطالبين بتطبيق اللائحة على حتة سب الرُسل والذات الإلهية قبل ما يكونوا مطالبين بوضع تعريفات للصدقة الجارية ..
__

كن بخير ..

[خضر حسين خليل]

يا أمين إزيك :
اللغة بتاعت الاستوساخ والاستنكاح دي افتكر انو ما بيننا من حاجات لا تسمح حتي بإيرادها في مكاتيبنا الإسفيرية وعموماً :
دعني أقول لك إنو المحبة والأخوة في مكانها ما انهبشت بالرغم عن ردك لمداخلتي ديك في البوست ده . وبالرغم من ما فهمته وما وصلك من حاجات جراء مداخلتي ديك وما علينا فأخوك مقتنع انو البني آدم متي ما إتلاقي مع أخيه البني آدم خارج الأراضي الإسفيرية دي الأمور بتتضح أكتر . وطالما إنت جبت الحاجات بي جاي فخليني أناضمك دوغري يا صديقي : بوستك بتاع السرقات ده ما عجبني ومفروض ما تفهم انو ما ما عجبني لأني مع (السرقات) والعياذ بالله وأنت والله أعلمان بحالي ياصديق . الماعجبني فيهو يا أمين إني شميت فيهو ريحه تشفي شميت فيهو ريحة انتصارات لي انتصارات وفتوحات قديمة سبقت فيها جمهور سودانيز اونلاين وجبت حاجات ضقلها يكركب والشهادة لله انني لم أقرأ حتي ساعتي هذه رأياً لهشام آدم في الذي جلبت يا أمين .
المرضني يا أمين لوليحك بالبحث عن الله ومحاولتك لنسف هشام بطرائق لم أعهدها في تفاكيرك ، زول كان بجاري الواطة الواطة ويجاري الرزق بالرزق كيفنهو يجاري الإلحاد بإقامة الحد علي جرائم السرقات ؟؟؟

ـــــــــــــ
بخصوص الصدقات جارية لي ربنا يا أمين مافي خلاف أنا بفتكر انو الأرض بما رحبت وسعت وبقية الكواكب الشمسية وكل مافي الكون ميقات له .
لكن سودانيات دي جارية لي ربنا كيف يا أمين ؟ هوذا السؤال وليس الصدقات يا صديق .

[خضر حسين خليل]

بالمناسبة يا أمين :
أنا سودانيات دي بفتكر إنها من أنضر وأجمل الأشياء الإتخلقت للسودانيين ولا أقارنها لا بي سودانيز أونلاين ولا حتي بي منتديات قريتي (مسقط رأسي) . سودانيات حاجة مختلفة خالص وأدخلها دوماً لأقرأ لا لأكتب .

[خضر حسين خليل]

المشاركة الأصلية كتبت بواسطة حسين عبدالجليل
صدقة جارية أم لا بيحددها رب العباد.

كمسلم أؤمن بالحديث " إذا مات ابن آدم انقطع عمله إلا من ثلاث: صدقة جارية، أو علم ينتفع به، أو ولد صالح يدعو له "

سودانيات إن شاء الله صدقة جارية لعزيزنا خالد كما أن فيها علم ينتفع به .

شايفك منزعج شديد من بوستي أمين و أشرف .

أتمني أن تطلع علي ردي علي أمين يا عزيزي حسين بخصوص الصدقات .
أما بخصوص الإنزعاج فياريت توريني الشئ الخلاك تتأكد إني منزعج شنو من مداخلات أمين وأشرف ؟

احترامي

[خضر حسين خليل]

المشاركة الأصلية كتبت بواسطة طيبان
سلامات يا خضر ، عسى حالك زين ..
وين المشكلة في كلام مسيكين ؟؟
هو يرى أن سودانيات صدقة جارية لخالد الحاج ،،والكلام دا ما أوّل مرّة يتقال هنا ولا هو غريب ،،ليه بالذات لمّا قالوا مسيكين بقى مزعج ؟
ثم ياخي رايو عن الملاحدة وسب الرسل برضو موجود في لائحة سودانيات الإتدقّت في المنتدى دا من حياة خالد عليه الرحمة :
لائحة بتقول :

ومسيكين بقول :

قبل تشدّها لي مسيكين يا خضر كان الأولى تشدّها للائحة في رقبتا لأنو كلامو القالو في إطار الرأي ،،لم يخرج من عباءة اللائحة ..

خالد لا يضرّه رأي يُكتب في هذا المكان فله ما صنع ،،والزج به في الهينة والقاسية ليس من الحكمة في شئ ،، سأقولها لك هنا : دعوا خالد ينام مطمئناً ،، فالمنى بعودته ليرى ما يحدث في سودانيات لن ينحصر في رأي مسيكين أعلاه ،، على الأقل ليس هو الأولى في رأيي .
ناس الإدارة في الحقيقة مطالبين بتطبيق اللائحة على حتة سب الرُسل والذات الإلهية قبل ما يكونوا مطالبين بوضع تعريفات للصدقة الجارية ..
__

كن بخير ..

متفق معاك يا طيبان في حتة انو الادارة تطبق اللائحة ومختلف معاك برضو في حتة انو هو يري (سودانيات صدقة جارية) وكنت اتمني انك تواصل بي نفس النفس اللائحي الكنت بتنضم بيهو .
خالد الحاج أجمل وأبهي وأنضر من أن يزج به في صراعات كهذه
اتفق معك في هذه ايضاً .

دمت يا طيبان

[أمين محمد سليمان]

خضر يا حبيبنا ...

أنا ما رديت ليك بهناك ولا رديت لزول لانو مستني بوست هشام،و وجهة نظرك دي علي العين و الراس، يعني عشان نحن أصحاب مفروض رؤيتنا للحاجات تكون وحده ؟ طبعا لا !!
بالنسبة لهنا ده ... إنت فاتح بوست بتنتقد في مسيكين رغم إنو كلامو أعدل من عديل و بالعكس كلام سمح في حق المكان ده و حق سيدو عليه رحمة الله ... أنا انتقدت حساسيتك تجاه كلام مسيكين الما فيهو شئ ده و إنت - بكل فخر - بتفتكر إنو لانو في كلام - بغض النظر عن هو شنو - اتقال في سودانيزأونلاين ما مفروض يتقال هنا ... أنا ما شككت في حبك لسودانيات و احترامك للناس هنا ... أنا سالتك عن العلاقة شنو بين هنا و هناك البتخلي كلام إتكتب هناك ما يتجاب بهنا ؟!
و لو كلمة إستوساخ دي زعلتك ... امسحها لي في صلعتي دي !!

[خضر حسين خليل]

أها يا أمين الأقوليك :
كان سودانيات صدقة جارية وإنت محتسب كتاباتك دي كصدقة جارية لي روح خالد الحاج أنبئك إنني لا أتعامل مع هذا المكان كتبروقة وسبحة .
أنا بتعامل مع المكان ده كمنبر للوعي كمنبر ساهم فيهو خالد الحاج عليه أفضل الرحمتات لأن يظل كمكان يجتمع فيه السودانيين لمناقشة امور سودانهم وليس كمكان لممارسة الشعائر الدينية .
كلام مسيكين وكلامك ده بخليني اصر انو الادارة تحضر وتورينا المكان ده شنو بالضبط ؟ يا أمين ياخ بتعرفني كويس أنا أمور الدين دي فارزها كويس ولا محتاج أزعمط روحي نص الليل عشان أدافع عن إستقلالية المنابر وأهدافها .

ـــــــــــــــ
بالغ المودة ما علمت منها وما خفيت عليك وما خفي كان أجمل

[Ishraga Hamid]

المشاركة الأصلية كتبت بواسطة خضر حسين خليل

في سبتمبر والعام 2005 م قدمت لهذا المكان بعد تواصل حميم كنت قد بدأته مع الراحل المقيم خالد الحاج بسودانيزأونلاين ، لازلت أذكر المراسلات التي تمت بيننا وقتها ، صوته في الهاتف ، ضحكه ، جده وهزله .
كبيراً كان خالد ، كبيراً كان .

كانت ايام حميمة يا خدر
كانت ذات الايام التى قدمت فيها لهذا المكان الاليف الذى اول من تفتحة تقابلك تلك الجملة الحميمة وكأن سودانيات تفتح بكل ناسها احضانها لك..

لتكن سودانيات صدقة جارية ياخدر لمن يريد ذلك
ولتكن فضاء لك لتسأل اسئلتك المشروعة

خالد خالدا يا خدر