اقتباس:
المشاركة الأصلية كتبت بواسطة طيبان
سلام يا آمال .
أنا برضو من الملاحظين زيادة عدد العضوية النشطة والنشاط دا مرتبط بالإنتخابات بالذات ،،أقول ملاحظ لأنّي لا أملك إحصائية للعضوية النشطة ،،فكل البتوفروا بيانات الموقع هو عدد المسجّلين إجمالا ،، زمان كان في حصر للعضوية النشطة بالمنتدى ،،الحاجة دي أسة ما لاقيها وحتى في حال وجودها فليس لها معنى فعلى ما أذكر أن نشاط العضو يسجّل من تسجيله للدخول فقط ولا يشترط مشاركتو بمداخلة أو غيرا.
وعليه أنا أثنّي طلب نشر قوائم المصوّتين - طالما اللائحة ليس فيها ما يمنع نشر أسماء الذين قاموا بالتصويت ومفهوم طبعا أن إتجاهات رأيهم لا تنشر ولا نعرف من صوّت لمن ..
وجود القوائم دي بيدعّم أو ينفي رأي أسامة بي جانب ،،وبي جانب تاني بيخت أسامة في محك تعيين العضوية ذات الإتجاه السياسي المعيّن وبي جانب تالت بيدعم أو ينفي كلامك عن إنو العضويّة النشطة زادت فعلا بدليل استشهادك بالأعضاء النشطين حاليا في الصفحة الأولى .. لا أرى سبباً يمنع نشر قوائم الأسماء وأرى أن نشرها يسهم في تقييم التجربة ككل ..تجربة إنتخاب الأمانة العامة وتجربة إنتخاب المجلس .
ممكن ببساطة نكتشف أن العضوية التي انتخبت هي ذاتها العضويّة النشطة ،،مع إننا كلنا عارفين إنو عدد الأعضاء النشطين كتابة ومشاركة لا يصل للمائة وخمسين عضو ولا يقتربون حتى من المائة .
قلت لائحيا ما في أي غضاضة من تصويت غير النشطين ولا في معيار محدّد للمسألة دي ،،ولكن لما يكون في ما يشير لتنادي عضوية معيّنة للتصويت لشخص محدّد ،،وبدا اتهام زي دا يظهر للعلن كما تم التلميح والتصريح به في بوستات سابقة إضافة لكلام أسامة في هذا البوست فمن الخير أن تتختّ الحاجات على بلاطة وبدون زعل ،،لأننا جميعا سنخرج بنتيجة واحدة ،،ياحصل أو ما حصل ..إذا الكلام دا ما حقيقي يبقى على أسامة الإعتذار عن إشارتو ،،وإذا بقى حاصل اليجوا اللاحقهم طرف السوط يورّونا الفهم شنو في التداعي لترجيح كفّة مرشّح معين للفوز في إنتخابات موقع إسفيري ،،كل البقدر يعملو إنّو يطبّق لائحة متفق عليها ،،أو بيتم تعديلا بإتفاق الأغلبية ..
__
مع التحيّة ..
|
شكرا يادكتور
دا بثبت كلامي عن نشاط العضو وانها كلمة vague وصعب ضبطها وقلت قبل كدا في عضو متابع وفي قارئ بس او زائر حسب احصائيات المنتدي بكون الزوار اكتر كتير من العاملين ساين ان اها دا مابتعدا نشاط ليه وفي ناس ظروفا بتحتم عليها ما تتواجد بكثافة وديل كلهم ماعندنا ليهم احصاء دقيق ولا غيرو
اقتباس:
شايفك طرقتي الجانب الإيجابي في دعوة العضوية للحضور والمشاركة ولكن المشاركة والتفاعل شي والحضور أيام الإنتخابات شي تاني ،،خصوصا إن ارتبط بغياب العضو عن الساحة مباشرة بعد التصويت ..المسألة دي لائحيّا مافيها أي مشكلة لأنو اللائحة قاصرة في حسم المسألة من الأساس ،بمعنى طالما لم تجي سيرة نشاط صاحب الباسويرد كشرط ، فمن حقو يشارك وقتما يحب ولو يدخل يصوّت ويمرق ،الكلام القالو أسامة دا هو إفتراض قائم ترجّحه شواهد - زي الملاحظة - وحقائق زي ما بيقول هو ،، يبقى عشان الصورة تكون واضحة نمشي مع أسامة دا لحد الميس
|
انا شايفة انو الانتخابات مناسبة جيدة لتنشيط العضوية مهم جدا الناس تجي وتبقي شهود علي التجربة دي والادلاء بالصوت متروك للعضو بعد دعوته يعني نجيب الحصان للنهر ونخليه يختار يشرب ولا لا ~مثل انجليزي بتصرف~ بس النسألك الايجابي دا ولا انك تقيف الف احمر وتقول ''الغايبين ''ما يختاروا لينا نحن ''القاعدين'' ياخ قول لاسامة دا الاغتراب يابونا ماطول الغياب
وفي ناس هنا نشاطهم زي قلتو ووجودهم اخير عدمو وكل المتوفر ليهم وكت وانترنت وكيبورد قادنا بيه لمن قلنا الروب اها ديل يختاروا ليك مافي مشكلة بس لانهم ,,قاعدين،،
مبر ازيك ياخ
قبل الكلام في الغضاضة نثبت الحالة البنتكلم عنها
ونضع ليها ضوابط ونعرف قدر شنو مؤثرة علي النتيجة
الحالة هي عضوية ماعندها علاقة باللمنتدي غير الباسويرد
يتم استنفارا للتصويت لمرشح معين وتقبل صادا
عددا كم من اجمالي المصوتين؟
مامدي تأثيرا
يعني هي الفوزت فلان ولا علان ؟؟
هل الناس ديل حدهم بس التصويت فعلا
ومابشاركوا في اي فعل تاني -المراقبة او سحب الثقة؟؟؟
دي اسئلة يامبر صعب جدا الاجابة عليها
والهجكي دا كلو وحتي الان المصوتين 120 من 1800عضو!!!
دمتم بالف خير