نظرية المؤامرة
بسم الله نبدأ
كان لدينا جار هادي بشكل يلقي عليك التحية ويكتفي بابتسامه فاترة ويمضي في حاله وكان يعمل في احدي المصالح الحكوميه وعند المساء يطلع النخلة ويسكر خمره فيتحول لشخص آخر يبدأ برش الحوش و يرتب سريره ويضع كرسي قديم الطراز وطربيزة ويخفي قزازة الخمر تحت رجل السرير يضع كبايه عثمان حسين علي الطربيزة ويخلف رجله ويبدأ صوته يخرج من فوهة بركان غاضب يشجب ويندد ويصب جام غضبه علي من رفع العلم مع الزعيم الازهري عمنا الجاك بخيت لو ماكان رفع العلم الله كان رفعنا هسع كنا بقينا زي جنوب أفريقيا...يملا كاسه ويرفعها عاليا وعند دنو الكأس من فمه يبدأ بتكشيرة ويبدأ بشتم بايعة الخمر الله لا كسبها أصلها ما بتاكل حلال حليل عرقي زمان كلو تأمني مويه .. يضع الكأس كختم المحكمه طاخ يغير من خلفة رجله وينتهر زوجته حاجة زوبه المراءة الطيبه نمتي تنوم فيكي حيطه فهمتي كلامي القلتو دا ؟ ترفع راسها والناس يغالب صحوها ايوة ..يا عمر بالغ الجاك بخيت شغلتو فيو شنو وتضع راسها وتغدو في نوم اشبه بتنويم مغنطيسي وتتاهب للسؤال القادم
عمي عمر كان من مظهره رجلا بسيطا ولكن كان موسوعة و ليلا يحكي تاريخ السودان بادق تفاصيله كل يوم يفتح باب لنقاش يفيد يحلل يشيد يندد يعارض كمحلل سياسي بارع وكل ما تنوم يرسل سبابه ويرفض نومها لان حال البلد مايل .ترد بصوت خفيض ارقد نوم يحلها ربنا الحلة كلها سامعة صوتك يا حاج عمر .
يسمعوا الطرش النايمين ليها شنو ونحن مستعمرين من الاستقلال لليله
دا ما استقلال دا استغلال من التكنوغراط والنخب الزفت
ما كفايه البلد حاكماها المقابر وكان ابي وجدي (وبيضة الديك)
يبدأ الصوت في التلاشي مع همهمه وصوت شخير لتبدا قصة اخري كنا نسترق السمع ونغالب النوم كي نستمتع بحديثه الثر
قلبو عافيه
التعديل الأخير تم بواسطة وجيده ; 31-10-2022 الساعة 12:05 AM.
|
