القرآنيون

[أبوبكر عباس]

القرآنيون: أقصد بهم الذين يعتقدون بأن القرآن الكريم هو المصدر الوحيد للتشريع...

لي تجربة نقاش طويلة مع أحد هؤلاء الناس و هو:
خالي الأستاذ علي محمد الحسن

[أبوبكر عباس]

في بداية عهد الإنقاذ قُدم للمحكمة بتهمة الردة، و ذلك لإنكاره صلاتي الظهر و العصر....
في المحكمة أنكر هذه التهمة و تمت إستتابته و أعترف بعدد الصلوات الخمس داخل المحكمة...

إلتقيته بعد الإستتابه و قلت ليهو دا شنو يا خال العملتو دا؟ هرشوك؟!
قال لي: (أنا لا أُسلم رقبتي لكافر)

[أبوبكر عباس]

في مرة قلت ليهو يا خال رائك شنو ألمك في حوار مع د. الحبر يوسف نور الدائم
قال لي: إتناقشت معاهو، و هو لا يفقه شيئا.. الزول الوحيد العندو شوية فهم منكم انتو الكفار ديل هو حسن الترابي علي الأقل بستخدم عقلو، لكن الناس المبارينوا ديل ما عارفنوا بقول في شنو!

[أبوبكر عباس]

كنا في سيرة عرس من مدني لكسلا،
بص السيرة وقف في الخياري لصلاة الظهر
الناس كانت بتصلي جماعة و الاستاذ علي محمد الحسن كان جالس في كرسي خلف المصليين..
في الاثناء دي جا واحد من ناس المنطقة و قال لعلي: يا أخي ناسك ديل القبلة بتاعتم غير صحيحة، كلمم يلفوا شوية لليمين..
علي قال ليهو: خليهم... دا جمباز ساكت!

[ماهر حسن محمد بيك]

المشاركة الأصلية كتبت بواسطة بابكر عباس

في بداية عهد الإنقاذ قُدم للمحكمة بتهمة الردة، و ذلك لإنكاره صلاتي الظهر و العصر....
في المحكمة أنكر هذه التهمة و تمت إستتابته و أعترف بعدد الصلوات الخمس داخل المحكمة...

إلتقيته بعد الإستتابه و قلت ليهو دا شنو يا خال العملتو دا؟ هرشوك؟!
قال لي: (أنا لا أُسلم رقبتي لكافر)

تقابلت مع القرآنيين وتناقشت معهم ودخلت موقعهم على الشبكة عدة مرات .... أتفق معهم في أشياء وأختلف معهم في أشياء أكثر..... الأحاديث التي لا تطابق العقل أو القرآن الكريم كلها لا أعترف بها ولا أعمل بها ولو إتفق أئمة الحديث على صحتها....أتفق معهم في عدم وجود حد للردة..... هل ورد حد للردة في القرآن الكريم؟؟ لا يوجد أبدا....... هل يوجد حد رجم الزاني والزانية في القرآن الكريم ؟ لا يوجد...ولكن....حد الرجم مذكور في شريعة موسى للزناة بغض النظر إن كانوا محصنين أم لا...ورحم الله غير المحصنين فنص في القرآن الكريم على جلدهم بدلا من الرجم....أي جريمة ليس لها حد في القرآن الكريم نرجع للتوراة فإن ورد بها حد يطبق فورا .... وبالعدم تطبق عقوبة تعزيرية مهما كانت شدتها لا تصل الى القتل أو البتر...... أوجعت رأسكم...سلام

[خالد الحاج]

المشاركة الأصلية كتبت بواسطة بابكر عباس

كنا في سيرة عرس من مدني لكسلا،
بص السيرة وقف في الخياري لصلاة الظهر
الناس كانت بتصلي جماعة و الاستاذ علي محمد الحسن كان جالس في كرسي خلف المصليين..
في الاثناء دي جا واحد من ناس المنطقة و قال لعلي: يا أخي ناسك ديل القبلة بتاعتم غير صحيحة، كلمم يلفوا شوية لليمين..
علي قال ليهو: خليهم... دا جمباز ساكت!

ليتك أفضت يا بابكر في شرح ماهية الفكرة عند القرآنيين..
أعلم أنني ممكن أقوقل الاسم لكني أريدها تجربة شحمانة لي زول محاور ذكي
أقولها من غير نفاق والله الشاهد .

[رأفت ميلاد]

توجد جماعية دينة يكثرون فى منطقة الأكراد فى الشريط بين تركا وسوريا والعراق وإيران .. نسيت أسمهم (ويا ليت يذكرنى بهم أحد) ..

فى أوربا من المصنفين بجماعة مضطهدة بدوان نزاع .. عندما يحضر أحدهم عليه فقط إثبات إنتمائه للجماعة ويُمنح حق الحماية .. غير الجنسيات والجماعات الأخرى حيث يتطلب أن يثبت الشخص الخطر الشخصى الذى يتهدده قبل منحه اللجوء ..

رأيت أحدهم فى السودان وكنا فى زيارة عمنا حسين الكردى فى بحرى .. بعد أن تناولنا الطعام جلسنا فى حديقة المنزل العامرة .. حانت مواعيد الصلاة وفضلت الجالس الوحيد والجميع توجهوا لصلاة جماعية .. لحظت أحدهم تقدمهم بعيداً فى (النجيلة) وصار يصلى وحده .. يكثر من الوقوف ونادراً ما يركع .. سألت صديقى عبدالعظيم الكردى فقال لى (ده على كيفه ده من ....) وذكر أسم الجماعة .. وكانت أول مرة أسمع بهم .. وعرفت عنهم هنا أكثر ..

هل يا ترى هؤلاء هم القرآنيين الذى تعنى يا بابكر ؟؟

[بابكر مخير]

بمناسبة الصلاة
بتذكر في القاهرة، كنا بنصلي جماعة وكنتا أيامها عندي عرق النسآ مطلع " ي" وعليه كنتا حتى الكرسي صعبان عليا القعاد فيهو ومسجل غياب وكان الامام دقن وهيلمانا..
بعد فترة الزول طلع بيبلع ويسحِت وكلهو على كله..
لمن انكشف أمره المرحوم الغالي عمي عبد الحميد صالح قال ليا:
والله يا إبني ربنا بريدك ما خلاك تقيف ورآ المصيبة ده..

واحد من مواطني دولة الامارات الطيبين، شيد مسجد في جمب بيته والحق بيهو سكن للامام..
بعد مدة طلع أنه الامام كان بيسخمت الخدامة السيرلانكية..
السيد دآ التقيته في قسم الشرطة حيث كان بلاغ الز . وكان بيقول؛ حسبي الله منه..
يعني السنين الخمس الفاتت وصلاتي وراه ما واصلا حتى سقف المسجد..
"دآ كان في فترة عملي الاولى بالمارات 78-86"

[أبوبكر عباس]

المشاركة الأصلية كتبت بواسطة ماهر حسن محمد بيك

تقابلت مع القرآنيين وتناقشت معهم ودخلت موقعهم على الشبكة عدة مرات ....

ود البيك (2)
كويس وجودك معانا هنا يا حبيب
و كدا الواحد لقى ليهو زول يحول ليهو بعض الاسئلة الصعبة الممكن يرشونا بيها الرشيد و أميري ...

المشاركة الأصلية كتبت بواسطة خالد الحاج

:
ليتك أفضت يا بابكر في شرح ماهية الفكرة عند القرآنيين...

لم أتحاور مع أي واحد من القرآنيين غير مع أمير المؤمنين علي محمد الحسن (كما يسمي نفسه)، و حضرت نقاشات طويلة و كثيرة له مع شخصيات متنوعة....
الراجل بالو سلبه و لا يمكن أن يخرج من طورو أثناء النقاش و من كثرة نقاشه للناس جود الشغل بتاعو بمنطق قوي...
ما عندي فكرة أطرح فكرة القرانيين بشكل متكامل، لكن فكرة البوست مبنية علي طرح الاسئلة و أختبار مدى قوة طرحهم من خلال النقاش ...
حا أمثل الاستاذ علي محمد الحسن في النقاش، و مرات ممكن اتحول لمحاور لو ماهر مسك الراية....
الحوارات كنا بنبداها معاهو في مناسباتنا خاصة في بيوت البكيات، الأعياد و الأفراح بالطريقة دي:
نشوف لينا واحد من المولانات و يكون علي قريب مننا... نقول لمولانا:
عليك الله يا مولانا ما تهدي لينا الزول الكافر دا، الزول دا بصلي تلاتة صلوات بس!
مولانا: أستغفر الله... صحي الكلام دا يا شيخنا؟
- أيوه
- أها و الكلام دا جبتو من وين؟
- من القرآن
- القرآن قال شنو؟
- (إقم الصلاة طرفي النهار و زلفا من الليل)
- لكن الرسول (ص) شرح المسألة دي بعد معراجه للسموات..
- ما في حاجة إسمها معراج...
- مولانا يخت يدو في راسو... لا حول و لا قوة إلا بالله ... إستغفر يا راجل.. الكلام دا كلام شنو! كدي خليني أجيك بهناك و تبدأ حلقة النقاش

[أبوبكر عباس]

المشاركة الأصلية كتبت بواسطة رأفت ميلاد

توجد رأيت أحدهم فى السودان وكنا فى زيارة عمنا حسين الكردى فى بحرى .. بعد أن تناولنا الطعام جلسنا فى حديقة المنزل العامرة .. حانت مواعيد الصلاة وفضلت الجالس الوحيد والجميع توجهوا لصلاة جماعية .. لحظت أحدهم تقدمهم بعيداً فى (النجيلة) وصار يصلى وحده .. يكثر من الوقوف ونادراً ما يركع .. سألت صديقى عبدالعظيم الكردى فقال لى (ده على كيفه ده من ....) وذكر أسم الجماعة .. وكانت أول مرة أسمع بهم .. وعرفت عنهم هنا أكثر ..

هل يا ترى هؤلاء هم القرآنيين الذى تعنى يا بابكر ؟؟

هم بالظبط و في واحد من ناس الكردي ديل منهم ما مستحضر إسمو و علي محمد الحسن يا رأفت ساكن المسالمة..

[الرشيد اسماعيل محمود]

المشاركة الأصلية كتبت بواسطة بابكر عباس

القرآنيون: أقصد بهم الذين يعتقدون بأن القرآن الكريم هو المصدر الوحيد للتشريع...

لي تجربة نقاش طويلة مع أحد هؤلاء الناس و هو:
خالي الأستاذ علي محمد الحسن

بابكر سلامات..
في فقه الناسخ والمنسوخ في القران في ايات نسخ حكمها وبقيت تلاوتها
فهل القرانيون ديل بياخدوا بحكم اية موجودة في القران ومنسوخ حكمها؟؟
ثم اذا هم بياخدو بس بالقران..
القران بيقول في غير ما موضع واحد:
(واطيعوا الله والرسول لعلكم ترحمون)..ال عمران
(وما اتاكم الرسول فخذوه ومانهاكم عنه فانتهوا)..الحشر
المعادلة البسيطة:
اذا انت بتاخد بالقران..يبقي القران لايتجزأ..
كل احكامه ملزمة..
يعني الالتزام بالسنة وطاعة الرسول جاء بنص القران ولم يجعل
للطاعة حدودا معينة وانما تركها مطلقة.
وبعدين خالك ده يابكور:

عليك الله يا مولانا ما تهدي لينا الزول الكافر دا، الزول دا بصلي تلاتة صلوات بس!

التلاتة صلوات ديل بصليهن كم ركعة كم ركعة..؟؟؟
لأنو القران ماحدد عدد الركعات..

[أبوبكر عباس]

المشاركة الأصلية كتبت بواسطة الرشيد اسماعيل محمود

(واطيعوا الله والرسول لعلكم ترحمون)..ال عمران
(وما اتاكم الرسول فخذوه ومانهاكم عنه فانتهوا)..الحشر
المعادلة البسيطة:
اذا انت بتاخد بالقران..يبقي القران لايتجزأ..
كل احكامه ملزمة..
يعني الالتزام بالسنة وطاعة الرسول جاء بنص القران ولم يجعل
للطاعة حدودا معينة وانما تركها مطلقة.
وبعدين خالك ده يابكور:
التلاتة صلوات ديل بصليهن كم ركعة كم ركعة..؟؟؟
لأنو القران ماحدد عدد الركعات..

الرشيد سلامات
1/ أطيعوا الله بإمتثال أوامره و إجتناب نواهيه و أطيعوا تطبيق الرسول لكلام الله فيكم...
2/ ما آتاكم الرسول فخذوه أي القرآن
3/ عدد الركعات اثنتان و مأخوذات من الآبة بتاعة صلاة الخوف و هي تشمل الخوف و المرض و المطر و السفر
(وإذا كنت فيهم فأقمت لهم الصلاة فلتقم طائفة منهم معك وليأخذوا أسلحتهم فإذا سجدوا فليكونوا من ورائكم ولتأت طائفة أخرى لم يصلوا فليصلوا معك وليأخذوا حذرهم وأسلحتهم ود الذين كفروا لو تغفلون عن أسلحتكم وأمتعتكم فيميلون عليكم ميلة واحدة ولا جناح عليكم إن كان بكم أذى من مطر أو كنتم مرضى أن تضعوا أسلحتكم وخذوا حذركم إن الله أعد للكافرين عذابا مهينا‏) سورة النساء
صلاة الخوف ركعة واحدة و الصلاة العادية ركعتان
بالنسبة للناسخ والمنسوخ عليك الله أضرب لي أمثلة، هم بعتبروا في تدرج في الاحكام
مثلا الصوم بدأ إختياري ثم تحول الى فرض....

[الرشيد اسماعيل محمود]

المشاركة الأصلية كتبت بواسطة بابكر عباس

الرشيد سلامات
1/ أطيعوا الله بإمتثال أوامره و إجتناب نواهيه و أطيعوا تطبيق الرسول لكلام الله فيكم...
2/ ما آتامك الرسول فخذوه أي القرآن
3/ عدد الركعات اثنتان و مأخوذات من الآبة بتاعة صلاة الخوف و هي تشمل الخوف و المرض و المطر و السفر
( وإذا كنت فيهم فأقمت لهم الصلاة فلتقم طائفة منهم معك وليأخذوا أسلحتهم فإذا سجدوا فليكونوا من ورائكم ولتأت طائفة أخرى لم يصلوا فليصلوا معك وليأخذوا حذرهم وأسلحتهم ود الذين كفروا لو تغفلون عن أسلحتكم وأمتعتكم فيميلون عليكم ميلة واحدة ولا جناح عليكم إن كان بكم أذى من مطر أو كنتم مرضى أن تضعوا أسلحتكم وخذوا حذركم إن الله أعد للكافرين عذابا مهينا‏) سورة النساء
صلاة الخوف ركعة واحدة و الصلاة العادية ركعتان

بابكر صباح الخير..
طبعا الموضوع مستهويني شديد..
الكنت عارفو انو القرانيين ديل بياخدوا بالسنة الفعلية للرسول زي الصلاة والحج والزكاة
ومابياخدو بالسنة القولية لعدم الصحة كما يقولون..يعني صلاتهم ماكنت فاكر انها بتختلف عن الصلاة العادية في حاجة.
سؤال:
انت القرانيون ديل يابكور..وبما انو مرجعيتهم القران..هل هم متفقين في تفسيرهم للقران؟؟؟
ولا في تفاسير مختلفة حتي في داخل اطار المجموعة..؟؟

[أبوبكر عباس]

انت يا أمير المؤمنيين في الحج بترمي الجمرات؟
- جمرات شنو! ما في حاجة إسمها رمي الجمرات و لا لبس إحرام..!
عليك الله دا ما شغل جن الواحد عريان و بجدع بالحجار..

[رأفت ميلاد]

لقيتم ليك يا بابكر (اليزيدين) أو الأزيدين بالكردى ..

من ويكيبيديا، الموسوعة الحرة


الإيزيديين أو اليزيديين (بالانجليزية:Yazidi) ,(بالكردية: Êzidî أو ئێزیدی) هم أتباع طائفة دينية في الشرق الأوسط ذات أصول قديمة.ويعيش أغلبهم قرب الموصل ومنطقة جبال سنجار في العراق. وتعيش مجموعات أصغر في تركيا ,سوريا، إيران، جورجيا وأرمينيا. ولم يحدد اصل واضح لليزيدين فاللغة الرسمية لديهم هي الكردية ويتحدثون بالعربية أيضا، أزيائهم الرجالية قريبة للزي للعربي وازيائهم النسائية سريانية ومن الاراء أن اصولهم آشورية بسبب وجود تماثيل ورموز في ديانتهم مشابها لما موجود بالديانة الآشورية القديمة وان أماكن سكناهم الحالية حول مكان عاصمة الآشوريين الأثرية نينوى. وكما تجد ان هناك الكثير من الامور المشتركه بينهم وبين السريان.

قريت مقال عنهم غريب ويقال أن نسبهم بعود (يزيد إبن أنيسة الخارجي ) فى هذا الرابط: الأيزيدية .. طائفة مضطهدة مركباً..!
غايتو كان فعلاً ناس جدك ده .. تبقى حاجة غريبة .. لأن وصفهم هنا (جنس) أكتر من طائفة ..