العزيز جدا عزيز خطاب
تجدني من حيث المبدأ اتفق معك تماما وليس في مجال الفن وبس بل في كل مجالات العطاء انو اي انسان شعر بانه غير قادر علي العطاء عليه بالتنحي لاتاحة الفرصة لمن بعده
طيب نرجع لموضوعنا ....
وهو الجيل الحالي من الشباب الصاعد .. دون ادني شك يتمتعون بأصوات جميلة بتسوق الواحد لحتات عجيبة جدا فهذا ان لم يكن جميعا... فأغلبهم .. ولكن للأمانة استمتع عندما يتغنون بأغاني الفنانين الكبار .. ولمّن يدخلوا في المحك الحقيقي لانتاجهم الخاص تختلف حاسة تذوقي التي ابت ان تتسربل عباءة ما يقدمه هذا الجيل من فن ..
الاغنية يا عزيز خطاب هي مزيج من ..... الكلمة – اللحن – الاداء – الموسيقي ....
نمسك الاخيرة .. انا ما عارف تسمية الاشياء عندكم كيف بحكم انكم اهل الشي زاتو .. لكن استحملني شوية في تسمياتي دي وياريت تصححني لانو احتمال كبير اكون غلطان بحكم اني بناقشك من منطلق المستمع العادي جدا ..
دائما في جواي بقسّم الموسيقي لحاجتين .... واحد / احساس .... اتنين / تكنيك ... ولا احّبذ غياب اي من الاتنين في اغنية الجيل الصاعد بحكم الطفرة التي يشهدها العالم في هذا المجال وإن كنت افضل مساحة الاحساس تكون كبيرة في الاغنية .. فعندما استمع للشباب وهم يتغنون بإنتاجهم الخاص اجد غياب الاحساس في الموسيقي وتحولت لتكنيك فاستمع لشكل الاغنية فأجدها باهتة ..
ولغياب هذا الجانب المهم في الموسيقي لا اجد متعة اللحن المكوّن الثاني بالنسبة لي .. زي ما ذكرت ليك .... والشي التاني .... فكل من استمعت لهم من الشباب اجد غياب الاداء الدرامي في الاغنية وده قاعد اتلمسو اكتر حاجة عند مصطفي سيداحمد مثلا في اغنية بين مريم الاخري والمجدلية لمّن يقول بالتّّّ.. وهنا يجسد شكل التعب والمعاناة ثم يكملها .. تعب .. في اداء درامي فريد وبرضو في اغنية مدن عينيك لمن يقول .. لمحتك .. و تحس انها زي اللمحة فعلاً وكذلك في .. اقول يا انتي يا ....اغرق .. فشكل اداء الراء بكون خليط بين اللام والراء يعني زي الزول لمن يكون جوة الموية ويحاول ينطق حرف الراء .... وبغياب الاداء الدرامي يغيب الاداء وده في رأيي طبعاً .
ثانياً .... الكلمة ... في الحقيقة يمكن انت قطعت شوط كبير في الحتة دي ووضحت انو لا بد من التمتع بالفكر النيّر وده بمكّن الفنان من اختيار الكلمات التي تعبّر عن واقع المجتمع لأنو الاغنية اليوم ليست للتطريب فحسب بل هي مخاطبة للأنسانية والعقل لأن التطريب في اعتقادي شئ مؤقت والعقل شئ مستمر او دائم وهذا ما يتتوق اليه مجتمعنا اليوم ... ولكي يكون الفنان صاحب فكر نير يتوجب عليه التثقيف والتثقيف الذاتي كي يؤمن بلفسفة معينة تكون له ارضية ينطلق منها ويتسلح بقناعاته حتي يتمكن من الدفاع عن ما آمن به .. ولكن مااراه في اغلب هذا الجيل عند اجراء اي حوار .. ردود غير مقنعة شكل بتاع حوار ضعيف وغير مقنع .... عشان كده ياعزيز ح تخوضوا صعاب كتيرة لإخراج جيل فني قوي يكون جدير بهذا الارث الضخم .
ولك من التقدير ما يزن جبال ...