المناضلة فاطمة أحمد إبراهيم "ولا تقربوا الصلاة" .!!!؟؟

[خالد الحاج]

بين الحين والآخر تتعرض الأستاذة فاطمة أحمد إبراهيم لهجوم من البعض وهو في معظم الأحيان هجوم مغرض وغير مؤسس إلا علي تحريف أقوالها لغرض يفهمه مهاجميها.
نوقش في برلمان الإنقاذ مسألة القوات الدولية وبدءا أقولها بكل وضوح كشيوعي ساءني وجود ممثلين للحزب الشيوعي في برلمان الإنقاذ وقد صرحت برأي هذا للأستاذة فاطمة في لقاءنا معها في لندن والذي نشر في سودانيات قبل فترة في بوست مذبحة القصر وكان لها دفوعاتها الغير مقنعة لي حينها ولكنني لم أملك إلا إحتراما لها :

ما أثير أخيرا هو رأيها الذي صرحت به حول مسألة دخول القوات الدولية وقد أخذ البعض قولها جزئيا وبتروه بطريقة (ولا تقربوا الصلاة) ليناسب هواهم تساءلوا باسم من تتحدث فاطمة أحمد إبراهيم؟؟ وحتى يكون الأمر واضح هذا هو رأي فاطمة دون تحريف :

http://sudaniyat.net/vb/showthread.p...&page=30&pp=15

:[align=center][/align]

الأستاذة فاطمة أحمد إبراهيم

سودانيات :
أستاذة فاطمة نسألك عن البرلمان ومشاركتك فيهو ؟ البرلمان الحالي الناس غير راضية عنه وهو يمثل نظام غير شرعي ، شنو الممكن تقدميه بهذه المشاركة ؟


الأستاذة فاطمة :
الحقيقة لما الحزب عرض علي المشاركة ما كنت مقتنعة لكن قلت أستشير ناسي وأهلي بالذات ، إستشرت دكتور الهادي أحمد الشيخ وزوجته وبنات اخواتي وأزواجهم وقلت ليهم حتى لو دخلت البرلمان ما حا أخد منهم ولا مليم ، كلهم كوركوا فيني قالوا لي يا فاطمة إنت طول عمرك بتشتغلي مجانآ والقروش دى ما طالعة من جيبهم . دخلت وإكتسبت من تجربتي السياسية حكمة إنه الواحد لو لقي خرم إبرة عشان ينفذ بيه ويحقق شي من مخططاته ما يتواني علي الإطلاق ، قد يعارضوها لكن لما يدخل ويحقق الأهداف الما مقتنع بيقتنع .
قمنا مشينا المجلس ومن البداية جابوا لينا الميزانية قسموا لينا الأوراق وقالوا بكرة أو بعده تناقش، رجعنا للميزانية نلقي لا فيها سيرة للبترول ولا الذهب ؟ ما بيخجلوا !! قايلننا غنم أو حمير ما عارفة !!
وقف سليمان حامد وقال ليهم غريب أن تخرج حكومة ميزانية فيها دخل ومنصرف وما تجيب سيرة للبترول والذهب؟ أين يذهب دخل البترول والذهب؟ ! سليمان حامد قال ليهم ديرين رد مكتوب عشان نعرف الحقائق والأرقام.

طبعآ معناه بيدخل في جيوب الحكام ! دي حاجة غريبة ! قبل كده هم رفضوا لسلفا كير وزارة الطاقة مع العلم أن البترول بيطلع من الجنوب وكل مرة يقولوا ليه أديناكم حقكم قام قال ليهم تجيبوا لينا دخل البترول والذهب الكميات والدخل وإنصرف وين؟ طبعآ لحدة ما جيت هنا بيقولوا بنحضر في الرد ! بس الجرايد نشرت الموضوع وده إنجاز في حد ذاته .
الثانية جونا ووزعوا لينا ورق رئيس الجلسة أحمد ابراهيم "أستغرب ناس ذي ديل الواحد يقيف تلاتة ساعات يقرأ قرآن وبعد كده يقولوا للمسيحيين ممكن تقروا برضو وبعد القرآن ده تلقاهم بيغشوا وبيسرقوا ويكذبوا !!!"
بعد ما قرأ القرآن قال نفتح باب النقاش؟ رفعت يدي وما إنتظرت حتى موافقة قلت ليه يا سيدي رئيس الجلسة
ده شنو البتعملوا فوقو ده ؟ الورق ده وزعوه لينا أسه قدامك؟ تقوم تفتح باب النقاش فيه؟
قال : أنبه مرة أخري يجب توزيع الأوراق فبل وقت كافي!!
وقف واحد وقال ليه الموضوع ما يتناقش الليلة وقال ليه تؤجل المناقشة. وحمدت الله علي دخولنا لأنو حا تنكشف أشياء وأشياء.
في مرة جابوا موضوع دارفور واكتشفت فيهم شي أنهم الحاجة الهم عايزنها يختوها قدامنا ويعارضوها ..
ختو موضوع دارفور وقالوا الأميركان دايرين يدخلوا دارفور ويجيبوا لينا قوات دولية لا قوات الأمم المتحدة ولا غيره . هم دايرين الأميركان!! قمت رفعت يدي وقلت ليه سيدي الرئيس أنت النساء ما قاعد تديهم فرصة؟ قال لي إتفضلي قلت ليه عندي إقتراح يا سيدي الرئيس قضية دارفور لا يحلوها لينا الإنجليز ولا الأميريكان تتكون لجنة من الممثلين للمجلس ده بكل فئاته وممثلين للحكومة ونمش دارفور نقعد مع أهلنا ديل بكل الفرق بتاعتهم
فإذا قرر المجلس إنه مطالبهم عادلة نلزم الحكومة بتنفيذها كاملة وبعد كده نجردهم من الأسلحة ما عايزين أميريكان كفاية الموجودين ولازم يتم تجريد الجنجويد من السلاح. الناس في المجلس صفقوا والجزيرة نشرته
بعد وصولي هنا (لندن) سمعت أن الرئيس البشير كون لجنة من ناسهم هم مش من المجلس يعني صاروا هم الخصم والحكم.

سودانيات :
هل تتفقي معي أستاذة فاطمة أنه بعد إتفاق نيفاشا وأنه المؤتمر الوطني عنده 51% من مجموع العضوية في البرلمان هل بتتفقي معي أن القوانين يمكن تمريرها بغض النظر عن وجودكم داخل البرلمان وخاصة المسائل الكبيرة مثل قضية دارفور والميزانية ومشكلة مثل إشكال الميزانية وحدها كفيلة بحل أي حكومة؟

الأستاذة فاطمة :
أولآ كلامك صاح هم بينفذوا أي شي عايزنوا لكن زمان بينفذوا دون معرفة الشعب السوداني والفائدة حاليآ أننا بقينا نشوف الأوراق ونعرف الأسرار كقضية المنصرفات بتاعة البترول والذهب أيضآ من حق الصحافة أنها تنشر يبقي مش محليآ الشعب بيعرف الحاصل فقط أيضآ عالميآ بينكشفوا وبكده بنخلق رأي عام وده زمان كان مافي بالإضافة لأننا حين نعترض علي بعض الأشياء وهم يتخلوا عنها بنكون وفرنا علي شعبنا الكثير من المآسي
وحقيقة أنا ما كنت عايزة أدخل لكن من التجربة الآن تعلمت أن المعارضة يجب أن تستفيد من أي فرصة للنفاذ ولو خرم إبرة ، وين كنا نعرف تفاصيل الميزانية ؟ وين كنا نعرف البيحصل في دارفور. الناس دي إتغلغلت
وضربوا المعارضة وعملوا تغيير كبير في البلد جذريا واقتنعت أن دخولنا كان مهم والمقاطعة غلط وعدم دخولنا بيديهم فرصة يعملوا أي شي في الخفاء والشعب لما يعرف التفاصيل بيعرف لما يضرب يضرب وين.

في مرة جابوا موضوع دارفور واكتشفت فيهم شي أنهم الحاجة الهم عايزنها يختوها قدامنا ويعارضوها ..
ختو موضوع دارفور وقالوا الأميركان دايرين يدخلوا دارفور ويجيبوا لينا قوات دولية لا قوات الأمم المتحدة ولا غيره . هم دايرين الأميركان!! قمت رفعت يدي وقلت ليه سيدي الرئيس أنت النساء ما قاعد تديهم فرصة؟ قال لي إتفضلي قلت ليه عندي إقتراح يا سيدي الرئيس قضية دارفور لا يحلوها لينا الإنجليز ولا الأميريكان تتكون لجنة من الممثلين للمجلس ده بكل فئاته وممثلين للحكومة ونمش دارفور نقعد مع أهلنا ديل بكل الفرق بتاعتهم
فإذا قرر المجلس إنه مطالبهم عادلة نلزم الحكومة بتنفيذها كاملة وبعد كده نجردهم من الأسلحة ما عايزين أميريكان كفاية الموجودين ولازم يتم تجريد الجنجويد من السلاح.

قالت فاطمة رأيها هذا تحت قبة البرلمان قبل عام أو يزيد.
شاهدت الأستاذة فاطمة في التلفزيون تتحدث(تسجيل قديم ) ولم يخرج حديثها عن قولها هذا وهو رأي حكيم إن أردنا الحق إن صدقت النوايا في سلام عادل فلدارفور قضية وقضية عادلة وجب الجلوس مع أهلها والوصول لحلول تمنع تدخل الأجنبي فدخول القوات الدولية ليس نزهة رغم تفهمي شخصيا لتلك الدعوة فحماية المدنيين والعجزة والأطفال فوق كل شيء . وطبعا لم يلتفت أحد لقول الأستاذة فاطمة حينها ولن يلتفتوا لها الآن فهي للأسف تؤذن في مالطا فقادة النظام يخافون من جرجرتهم بواسطة القوات الدولية للماحكم الدولية واثرياء الموت لا مصلحة لهم في إيقاف الحرب.
فاطمة يا سادتي إنسانة شريفة تقول رأيها ولا تخشي فيه لومة لائم وهي شاء البعض أم أبوا تتحدث بإسم الحزب الشيوعي السوداني وباسم الإتحاد النسائي السوداني.

يريد البعض من الأستاذة فاطمة ترديد كلام "السيد" وحزبنا لا يفرّخ ببغاوات. وستبقي الأستاذة فاطمة رمزا للطاهرة والصدق، عنوانا للمناضلة التي تتحدث بضميرها ومحبتها للوطن رغم أنف البعض ونفوسهم الوسخة.