مصابيح السماء التامني وطشيش

[mahdy alamin]

وكان أسمح .. لو تفتّح
نفّاج ما بينك وما بينو
عوّانك وعوّانو يشبوا
عاصرين على بعضِ
ويتربوا ..
من شطرٍ عربيٍ واحد
راضعين ..
في الأول ينحبوا
وفي الآخر .. راح يرموا الحيطة

[ود الريس]

المسافة

كل التحايا ...
وعدتك بالعودة والمشاركة ، لقدام ...
قبل كل شىء اريد تصحيح والفصل بين الاغانى :-
اولا :-
اقتراح هى الاسم الصحيح للحظة شهيق،نهاية تلك الاغنية وسارق لحظة انى افكر...المارق منك...مارق منك...او منى...
الاغنية الثانية:-
شهيق...
تبدأ من :- ماتتضارى وراء الدعوات...

وبعد داجيتك واحدة واحدة
دمت...

[ود الريس]

جالوص

]معتوهه،معتقه،ومنعتقه
نوافير انتشا،حشمه،وحمار العين
تنقى من القيور السكلبة
ومن بيت بكاك زيف المعزين
تضحك كلما وقعت مصيبه
تمشى على العجين وتلخبطو،
ترطن اذا جاها الحنين
يا بت!
بيوت الهجعه كيف؟
وغبار شوارعك ماشى وين؟
زقاق يفتش فى زقاق
كتمه وضلمه..
وانعتاق
أنا فيكى لامونى المساجين
سكاتك منازل حلال الحرام
سكاتك على حين اهش الحمام
سكاتك عليك لما تصحى المسام
سكاتك عليهم سكوت والسلام
صوتك وقت قطع البحر ، قبال مراكب العمده
ضهر النيل عرق
والشمس فوق حبل النجوم
شرت جلاليب النعاس
ناشف غرب، مبلول شرق،
والمطره زى شفع العيد، تدخل غرف كل البيوت
حكمة الجوع الشرح للارضه
كيف تقرأ المرق
وقبال يقع فوقك سقف
يتنحنح الجالوص
امرق على مهلك،
مروق الحنا من ضفر العروس
واصعد على مهلك،
صعود البذره والروح والشموس
مبنيه مدن الخوف
من طينة آخر الليل
وانا فى سقالة الشوف
قدح البصيرة تقيل
فاتح زريبة الجوف
تمرق تخش الخيل
على كيفا،كيف معلوف
ضهر المظنه يشيل
وانا ظنى ظنيتو
للنيل غريق فى النيل
الليل ولا فى بالو ليل
ساكت يغنوا على القمر
واجعنى فى البحر السكات
وسكتنى فى الوجع البحر
يا بت صباح الطير،
وين البلد ركت؟
ماعاد هواك يفتح ،فى الكتمه
شباك النزيف
وين تكيتك فى الغيمه
شطيف النجوم
ريف الجسد-صدرك-سبلوقة اللبن الحريف
داسينى فيكى ندر
والانبياء فاتوا
وانبياء بين بين
قاعدين فى ضل النار
داسينى فيكى ندر،
وفى الغفله جوا الكفار
طارت حمامة الغار
لاقونى ناشف ومر
ما ذنب جلد الطار لو غنوا بيهوا شتر
ماتخافى الله معاك
وكل الملايكه سمر

[ود الريس]

حوار

تانى النهارات عاودتنى
وكان الخاطر ماطر،وشهوة صحو
من وين عرفتنى وضارتنى فى ضو
لا...منى...ولا...منو...والورطنى فى الموت لا اذكر
غير شارع وحمى الكاكاو....ومشيت

اترك فى النهر كما هو
يتفاءل بيك الموج،يشيلو يدسو بعيد
فى شاطىء من عين الموت شان ترجع

موزع بين شاطىء وقوز رمله
زى قريه

والطيور الداخله فى دمك
تنقد بارتياح...باقى الصباح

يأتونى كالعاصفه
يأتونى زى صقر المواعين والتسوس
ارجاك؟
اتأخرت قافلة خريفك والرياح
وانا فى رصيفك
ومن قطاراتك تطل من كل شباك امسيه

وتدهسنى شجرة حنا
وادخل فى اضافرين الغناوى
وانتى ماشه يعترك جواى أسف

تعال
ما بجيك وفى حضن كل المسافات سكتين
وفى ضهر كل المشاوير خنجرين
وفى خيال خيلك وتد
بلقاك محل داهمنى السما
وانا فى طريقى الى الغياب
صارى الرياح فى طرحتك،
وفى طرفى جمر المستحيل،
فوقى من دوخة الارض!
انا هسه مديون للسحاب

والتعرج فى جسد الحله
دا زقاق ولا وريدك، اريدك
ادبنى صوابعك،ضارينى من الغربه
شان ارقص حبه،واهش نحلك حولى
يتفتح توبى نوافذ
واتساقط
يتلقانى سما

يا محبوب
كم عام من رغبه،وانت تأجل بيناتنا تساب
كم عام اتعلق فى كتف السكه
وصلنا!شجر الحنا
نلفاك نيزك فى رحم الكون مبذول
للحمى والدوران
وصلنا!!
نلقاك قطار يخدش صمت القريه
بالضجه وريحة الغربه
كم عام من رغبه،وانت تأجل بيناتنا تساب
عكر سكر قهوتنا
واشربنى...
ودخن...

الدنيا كانت مراهقه وبتغمر
اذا فوقا حلق طفل الفراش
وانجبت انبيا بحجم الهوا
وناس للرحيل

يا عاق
نهرين فى دمك للصحراء
وبلدين فى نهرك ياولدى!!
احزانك جواك لبلاب
وافراحك فى كفى تبلدى

شقيش تتكسر لقطتك
دسيتك منك لى بكره
هدهدتك،حجيتك

بت فى عيونك ، معاك وبدونك
خوفك عليها يشيلا ويغتغت
فوقا ويحتحت دواخلك صفق
تنوم تشتهيها
تقوم تلقى فيها منامك صدق

ونمت...! خلاص اتمطقت بهار القدره وقمت !!
بيناتك وشجر الحنا الجواك
سكه تفوت جنازة الليل الفبنى
دفنتك،اتلفت لقيتنى براى
صحيتك...
اتونسنا عن الموت
والفرقه الفى الغيب
وتعيش ياكتفتنى بالخيالات الجموحه
ندهت على
نفضت ايدى من القصيده وجيت
لقيتك والملاحم فى الوريد
للقلب مشواركن
بابين وشباك مرحلى ...وهامش

حضرت ولن اعود للخلف
ماتسافر
هدت فيك السكه وشجر الشوك
الموت اداك بس اسمه
بتفتش ليه عنوانو؟
مسكونه انا بيك
وعرقانه عتبة البيت
خطواتك وانت معاى
منديل،منديل
فانوسك نومنى وساهر
اطفى النور

عاطف خيرى...

[عمر مجذوب خطيب]

واصل يا مسافة - فمصطفى واعماله في القلوب والعقول والوجدان - وتصدق بالله عملت مرثية يوم مات مصطفى وانا الدخيل على عالم الشعر ساحاول نشرها لاول مرة في بوستك هذا
مودتي

[ود الريس]

الاخ / عمر

الليل سهى وملت نجومو الانتظار ...






وقفتنا برانا...





سافر...





بطاقات دعوة الرجعة ...




المرثية...




اوعك...

[فيصل سعد]

[align=center]مراحب ود الريس و عمر و في انتظار المرثية.


غيابات الخليل
يحي فضل الله


بالأمس ،، كان غناؤنا عذبآ
و كنت تتخذين قافيةً
لها طعم التواصلِ ،، و التبادلِ بين قمحٍ و خصوبة
فلماذا تأخذين الآن شكلاً يرتدي لغة الظهيرة
يقتفي ظل الفجيعةِ
تختفي منه العذوبة؟

إنها اللغة التي عمقت فينا التداعي
و غلغلت بين العظامِ
تزامن الوجعِ المعبأ بالضياعِ ،،، و بالرطوبة

فأخترنا من بين الزحام
خرائط الفرح الملون
بالطبول العازفات مقاطعآ تنمو علي عين الحبيبة

بادرتني هواجسي
فأستعرت من الشوارعِ عظمةً كانت تحدقُ في الحياةِ
و تعتريها الأمنياتْ

و سمعتُ من مدنِ الخرابِ حكاية الآتين منك
يلعقون السمّ
من شفةٍ تدندنُ بالرخيصِ من التباكي ،، التشاكي ،، الأغنياتْ

فيا بنتُ المسافةِ والرجوعْ
و يا بنتُ الخريطةِ و الدموعْ
إذهبي مني ،، تمنِّي
و أمنحي القلب التجلِّي

و غادري اللغة التي ظلت تموتْ
أغرزي فيّ الثباتْ
الله يا وجعآ تمدد في العشيةِ ،، و الصباحْ
الله يا حلمآ تناثر بين افواهِ الرياحْ

و يا طفلةً ظلت تفتشُ عن ضفيرتها
تحدقُ في حطامِ الأمسياتْ
سافري
سافري
سافري
سافري فيّّ ،، شموسآ و وتر
عمقي جرحي اقترابآ و سفرْ
لأغنيكِ التماسك
أبتغي منكِ الوصول
أمنحي القمح الخصوبة
أمنحيني نفسي ،، دون خوفٍ ،، دون همس
وأمنحي المدن الدليل

فيا طفلةً ظلت تفتشُ عن ضفيرتها
بين دمعٍ ،، و رحيلْ
هل يكون الموت نوعآ من تآلف
في غياباتِ الخليلْ ؟
[/align]

[فيصل سعد]

[align=center]
لما وطاك
ما خِبِر البوت
برفع قدرك للملكوت
مافي القِدْرَك حتى الموت
حيَّر قَدَرَك
هادي الصوت
حيّر صوتك
هادي الروح
حيّر روحك
عشق الناس
الوين ما تروحك
تأبى تفوت
من يتأمل فيك
يتجمل
من يتجمل
بيك يتكمل
إنو الحق مبسوط مبسوط
يا الخلِّيت الزمن الأطرق
زمن الموت
مضبوط
مظبوط[/align]

[منصور الطيب]

الواحــــــد سعيد بأن أول مشاركه ليه تكون تعقيبآ على الرائع أستاذنا المبجل حُميد
عليه الرحمه

في قصيدة أشبه بالملحمة التاريخية يعكس فيها الحُميد آثار ألوطن ومتطلباته حب الوطن بتكرير الكلمه لأكثر من مره
الوطن عند حميد هو الإنتماء هو التضحية ( تغني من التعب لامن كلاك دمن)
حُميد لو لسه فينا خير مفترض نعلم أبنائنا من هو الحميد ومن هو مصطفى
في وقت اختفت المدارس بخجل عن بناء الجانب الثقافي

[خالد الحاج]

[media]http://sudaniyat.net/Agani/Humeed.wmv[/media]
[align=center](مبدعنا - حميد)[/align]

المسافة العزيز
ليتني أجد الوقت لمعاونتك في التوثيق
ولكني ساحاول من حين لآخر

محبتي

[mahdy alamin]

[فيصل سعد]

[align=center]
الاخ الاكرم/ خالد الحاج

كل سنة و انت طيب
و مشكور علئ انزال قصيدة و اغنية
"بين الموجة والخزان" الخالدة.
و نعشم في الكثير منك دون استعجال
كلما تسمح ظروفك و عارفنك شيال تقيلة
جرابك مليان و كلس و سداد.


بين الموجة والخزان


سنّى على النضال إيدى
سوّكى بى الهتاف .. فمّى
شوارعك لى .. دويها .. على
إذا ما آخر العلاج الكى ...
مراويدك حُمر يا أمْى

هردت لهاتى بى الغنوات
وقتْ يبرد حشاك .. يا أمّى
من التعب البلا صالح
تفيقى .. تروقى .. تنجمّى
تسوّى مكانسك المطرة
تضوى البيت وتنجمّى
تمرقى صبوحة لى الجيران
قدح فوق إيد ... (وفْيد) ألمى

يلاقوك شفّع الكتـّاب
نضاف وظراف بلا النسمى
يغنولك غناوى السـاب
وفى بيوضة مافى سراب
جبال كجمى وفيافى الكاب
تميد بى الخضرة ...منقسمى
فيافى الصّى وبيوضة
البراسيم فيها مفروضة
خدارا يرارى شوف عينى
على الأبواب .. طواريها وحواريها
بقت روضة
بقت تشرب من الحامداب
تشوفى رهاب ... بُعُد نجمى
بشوفو قريب قُرُب نضمى
بشوف العالم التحتانى
هيلاهوب وقف ناهض
وهدّ عمايد الفوقانى ..
جوّة الجُب رمى العارض
وفى الساقوا الدمار أفراد
عريق الحب نبض قابض
متل قبض الحروف فى إسمى
وغناوينا القبيل .. رقراق
علينا تصب برد .. قارض
وأجر نمّى
أدوبى لهاتى بى الغنوات
عُقُب يبرد حشاك .. يا أمّى



وطنى ولا ملى بطنى
سكاتى ولا الكلام النّى
بليلتى ولا ضبايح طى
قليلتى ولا كُتُرْ سمّى
سلام يا أمّى
سلام لا هكمى
لا دكْمى[/align]

[فيصل سعد]

[align=justify]
[align=center]هل يكون الموت نوعاً من تآلف
يحى فضل الله [/align]


[align=center]سافرى فىّ شموساً ووتر
لأغنيك التماسك
أبتغى منك الوصول
أمنحى القمح الخصوبة
أمنحينى نفسى دون خوف
دون همس
وأمنحى المدن الدليل
فيا طفلة
ظلت تفتش عن ضفيرتها،
بين دمع ورحيل
هل يكون الموت نوعاً من تآلف
فى غيابات الخليل؟ [/align]

فى هذا النهار ، نهار 21/6/96 أستمع إلى مصطفى وهو يدخل منطقة خوفى الميتافيزيقى ويغنى هذا السؤال: "هل يكون الموت نوعاً من تآلف..فى غيابات الخليل ؟"

ترى هل أملك المقدرة على أن أحيل كل ذلك إلى عمق التواصل الذى يجعل من الموت نوعاً من تآلف ... ذلك التآلف المجازى بين الموت وبين غيابات الخليل ؟.....

كنا نستمع ــ خطاب حسن أحمد ، بثينة محمد نصر التى خصتنا بهذا الإستماع إلى صوت خليلها الذى غاب ،، بشير لا يملك إلاّ أن يهرب من الغرفة خائفاً من دموعه .. كل ذلك كان بالإسكندرية ، حى الإبراهيمية حيث تسكن الأخت الحميمة بثينة محمد نصر زوجة مصطفى سيد أحمد ــ وولديه سامر وسيد أحمد ... بعدها غنى مصطفى قصيدة العميرى ذلك الذى تآلف مع الموت من قبل ....

"مكتوبة فى الممشى العريض شيلة خطوتك لى البنية "

لا أستطيع أن أصف ذلك الفرح الذى تداخل مع الحزن فى وجه خطاب حسن أحمد حين إكتمل غناء مصطفى لقصيدة العميرى كاملة لأننا كنا نبحث عن تكملتها حيث إستمعنا إليها ناقصة فى عدد من الأشرطة وأخيراً وجدنا تلك القصيدة كاملة هنا فى الإسكندرية بين ثنايا خطاب مسجّل من مصطفى إلى بثينة ... أعفونا من زخم المشاعر حين كنا نستمع إلى الغائب الحاضر وهو يتحدث أعفونى من أن أصف تلك المشاعر ... حقيقةً ليست لدىّ هذه القدرة .[/align]

[فيصل سعد]

[align=center]
واحد جميل
سيدأحمد الحردلو


تانى قام واحد جميل
فى بلدنا ماتْ
وكان بغنى للمساكين
والمسولتين والحفاتْ
وكان بغنى للمنافى
والعصافير والرعاتْ
وكان بغنى لى بلد
فى الحلم جاي أغنياتْ
وكان بطنبر
وكان بدوبى للحياةْ

تانى قام واحد
ملك روّح وفاتْ
وكان ملك فى الريد
وإنسان فى الصفاتْ
وكان مهاجر
فى دموع كل البكاتْ
وكان وتر مشدود
ومسكون دندناتْ
وكان - عليه سلام -
تقول مازول حياةْ


يا مصطفى
فاكر الجماعة
الكانوا ساكنّك دوام
من منفى لى منفى
ومن عود .لى سفرْ
فاكر العصافير
المسافرات دون جواز
فاكر اللى داجّين فى المطرْ
عبدالرحيم .. وهلم جرْ
فاكر القطر
فاكر النخيل .. فاكر الحراز
الليلة كانوا جميع هناك
قسماً يمين ..
كان الجميع باكين عليك
كان المطار فارش عليك
كان الجميع مشتاق إليك
ياسلام عليك
لمّان تكون زولاً عزيزْ
عنْ ناس عزازْ

يعنى كان لازم تفوتْ
والحزن مشرور فى البيوتْ
والدنيا مازال فيها حوتْ
وفيها لسع .. عنكبوتْ !
يعنى كان لازم تفوتْ
وتخلّى أوتارك سكوتْ
ولسة عندنا ريد جديدْ
ولسة عندنا ليك قصيدْ
يعنى كان لازم تفوتْ
وتخلى هذا الحب يموتْ
ياسلام عليك
لمّان تكون زولاً عزيزْ
عنْ ناس عزازْ
يا سلام عليكْ[/align]

[فيصل سعد]

[align=justify]
المشاء الأعظم بروح أيوبية
أسامة الخواض


هكذا كان " مصطفى سيدأحمد" المشـّاء الأعظم .. مشى بين الناس بالغناء فى الأندية والمعاهد والجامعات ودور التحالف ... ومشى وسط حقول الكلام يلتقط فى فرح ما طاب من بنفسجها وسوسنها وفلها .

ومشى فى قلب هموم الناس العاديين يلتقط بؤسها وأشواقها للحرية وللعشق .. وكان فى المشائين من فئة المتفائلين ..... يبشر " بالبنت الحديقة " والإنسجام وأن نكون " أهل البلد بالجد " ... كان أمة وحده وسط فوضى الواقع المهترىء .

وحين أصبح الوطن طارداً لمصطفى العذب ، حمل صوته وأمراضه وحقيبة معاناته ، وهرول فى إتجــاه صوت الوطن العمودى .

ما مر بأرض إلاّ وبكت شوقاً لصوته الممزوج بنكهة الألم والعذوبة ..." كانــت طرابلس والقاهــرة والدوحــة " تهتف فى جلال : " مصطفى سيدأحمد مرّ من هنا " .

كان يكتم عذابات مرضه العضال ، ويصر على الغناء .. كان حين ينهــض مــن غيبوبة غسيـل الكلى الممض ــ كمـا يروى مــلازموه ــ يحتضــن عوده ويغنى مسابقاً الموت ... كان يتشح دائماً وفى أقصى حالات الوجع .. بروح أيوب .

وفى موته كان ــ أيضاً ــ مشاءً عظيماً ... إستقل صندوقه المعقم ، ومشى وحوله المشــاؤون العـظام إلى بيـتـه الأثير لديه " معهد الموسيقى والمسرح " ...

وحتى حين سكن جسده " ود سلفاب " مسقط رأسه ، لم يركن إلى الراحة الأبدية ، ولكنه بدأ مشيه الحثيث الطويل فى مسارب الخلود والأسطورة كأعظم المشائين فى ذاكرة الشعب السودانى .[/align]