ذكراكا ما ذكراك لو أستطيع أنساها وأعرف السلوان

[ود الحبوب]

د/عفاف الصادق حمد النيل
ترثي مصطفي إنسـان بقامة وطن شامخ
يالكحلته عيـوون الدنيا بلـوون الغنـووه
يالضفرته ضفاير إحسـااس الكلمه الحلـووه
يالشتته نجـووم الليل في وش النيــل
عقداً فوق القمره بيقدح فينا الضو
يالطقطقته أصابع السُحب الشالن جـوو
دفق عسل المطره و نقط ..كبت شـوو
نضمته .. غنت .. سكته .. صنت
مرقته .. دخلت .. قامت .. قعدته
شن بتســوو ؟؟؟
تقشقش فووق رقراق الدمع الكاسي العين بهدمه دم
كل ما أتعرى يجدد تـوبـوو يضاري الريحه الكست الجـوو
تساسكـ بين تيار المـووج الكسر الجدول ودفق شـوو
تسارق فوق نجماتا برقنْ هجنْ لجنْ ..باتنْ قـوو
تضاير فوق وديانا شبعن .. رضعن ضرع السحب الشالن برا ..جـوو
تصنت غنوة سيره عريسه مهقد .. مكسي .. مجرتكـ
يفوح الصندل .. وعطر المحلب منـوو مدفق
أمو تعدل .. وأختو الرقصت .. وخالـووو يبشر ...
وعمـوو بيعرض وسط السهله .. وخيرو مدفق
غنـووه بتعزف نغم أتشتت .. رعداً صفق
برداً هز اتباطن صوتـوو
أتطانن حر لوح و هـووا
وظهر فارساً تب ما إتلـووى
وزغرد ليكـ ايقاع المطر إتلبب
حضن الارض ونــام
(ود سيد أحمد) دق المحلب جوه الفكـره
وخت الذكرى
ذكرى الليله وذكـرة بكــره
ابيه و حـره
مبدأ و عـزه
سيما وعبره
درايا و خبره
شموخ بيت عازه الما بتنهزه
برغم الضيم
وليد ضكـران
هز ورز تب ما فـز
اتقطر نـز
ادفق ضي
ود (سيد أحمد) شال الريشه
ورسم اللوحه
وشتت لونها
وتيرب بيهو سمـا السودان
وكانت النبته عصارة الغنوه الفيها
ثقافه .. وحب .. وسياسه
مزيجها بلدنا وفيها ولدنا اتعطن الريد
والبت الحلوه .. الوطن الغالي
وسرج بيهو و شد ضهر سودانا القـاام
وكيف بتفوت ؟؟
وكيف بتفوت ؟؟
يالولد الغنى وشنه ... ورنــه ...
وخالداً ... حـي
ما بتتضارى !!!
بشوفكـ قاعد بين الرمش الفوق عيني
يالدفيت أعضاء الكلمه في ليل
البرد .. الريح .. الصي
يالنديت أغصان الحرف بصيفاً
حًرا و شد الكي
وكيف بتفوت يالولد الضوا وشيشو قليب الوتر
الغني وطرب غطى فجاج الحي
تمرق بين ورتاب الزرع الفرهد
تمرق بين حبات المطر الطقطق نقط
يحضن ليلاً سود .. هج .. وهود
تمرق بين النيل الكتر ادفق و نمرق
تمرق بين الوتر الصفق غنا و زغرد
تمرق بين صفقات الشجر أخضر و
ورق ...
قام أتشابى و عانق كتف الليل
اتطاول باس القمره و قبل عين الشمس
كيف نبكيكـ يا راجل الليله وبكره وأمس
كيف نبكيكـ ونحنا بنسمع صوتكـ
سراً .. وجهراً .. وهمس
كيف نبكيكـ و أنت معانا تشيل و تخت
ترص ... و ... تقص
تفج السهله وتحكي الغنوه اللبست صوتكـ
وشالت .. حسك .. ونفسك .. وروحكـ
وسمحت زي
وأنت معانا بقيت جوانا و ماكـ بتفـووت
حتلت حنيناً جوه القلب
بصمت عليهـوو وجـوود موجـوود .. برغم المـووج
وسفر الجسد الما محدود
غلبته ... تفـووت
كسرت الحاجز الراكز جسرو على المسدود
رقعت الهدم الراسي خيوطـوو على المقدود
مسحت .. مسحت البعد الأرضي المامحدود
نسفت مسافة الزمن الروح و ما معدود
سكنت مسام النغم المن إيقاع النبض
بقيت الدم .. و الروح .. و القلب
هزمت الموج .. غلبته .. تفوت
تفوت لى وين ؟؟
وأنت الزول الباقي وحي
أنت النور الوج الضي
وأنت البحر الدفق ري
تفوت على وين ؟؟..
ونحنا زرعنا لسع ني !!
النيل الأبيض لاقى وعانق حضن الأزرق
باس الأبيض خد الزنجي
اتقلدوا .. اتقادوا
اتوحدوا .. فاتـووا
مات العنصر و داب الفارق
من بيناتن
صدر العين اتملى بالعبره
اتنهد نفس الكلمه الحلوه .. اتـأوه
آهة طفت القمره و نفخت قلب الجمره
وكبت فينا ضلام
يا إنسان .. يا فنان يا لقاومت الذاكره و النسيان
دخلت بوين ؟
سكنت الدم الجاري على الشريان
لوليت جوانا عصاية الكلمه .. الشرف .. العزه
العايش فينا في كل زمان
جرجرت علينا حروف النغم الطرب
يهز يفرح كل مكان
ختيت الرأي صريح قولاً و فعلاً و فكراً
سجل اكتب يا تاريخ
يا أستاذ .. يا ممتاز
ختيت الدرس مفيد و صحيح
درساً ما دايرلو وسايلاً للتوضيح
ونحنا فهمنا كتبنا درسنا على الكراس
انتهت الحصه و ناحن سكلبن الأجراس
مرقت صحيح ؟
مشيت بى وين ؟
وكيف خليتنا بدون تصحيح ؟
نصحح وين؟
شلنا الهم
نصحح وين ؟؟
جينا الكم
نصحح وين ؟؟
وكل أقلامنا تقطر دم
كل أحمر دفق لونو فحم
ونحنا كبرنا وعينا و زدنا فهم
عرفنا أهداف الدرس تمام
ختينا النقطه الهمزه الشوله , الأستفهام ؟
خلصنا خلاص
جمعنا قلمنا حبرنا كُتابنا مع الكراس
يالوحدته بسفرك كل الناس
يا مقياس
يا ميراث
وأساس المعنى
الحب .. المبدأ .. و الإحساس
نعم الإرث الباقي و أعظم ساس
وكيف بتفوت ؟
وأفتش ليكـ أنا جاي بى جاي
وأهلكـ و ناسكـ مرقوا يكوسو عليكـ معاي
وأنادي عليكـ ارثي عليا
فـووت بى وشكـ ارجع جاي
وفجأه ...
و فجأه بتطلع من جـوواي
متل النـوور الضوا حداي
ومـووج النيل الرايح جاي
وهج العين الفكر الراي
ومن الشمس بريق ضـوواي
وصدر الأم الليكـ غطاي
حديثها يناغم فيكـ لولاي
وصوتها يهدهد فيكـ هداي
هوها ..يا هوها
واحد .. اتنين .. تلاته
إبرة الخياطه
فيها م
وفيها ص
وفيها ط
و ف
وفيها جميع المصطفى

ألا رحم الله الفنان القامة والراحل المقيم مصطفى ود سيد احمد
ولي عودة
الحبوب