بوست بدل فاقد لعناية سجمان.

[تماضر حمزة]

مرقنا مسااافة


نتلولح معاي شوقين
شوقاً للسمح وكتو البحجيك زييين
وشوقاً ما عارفاهو يا سجمان مقبل وين
بريد الريدة شان شالت هواك سنين
وأموت في الفرقة لو بتزيد شويقك هين
معاك اتواصل المشوار
علي درب الهدب والعين
علي مهلك خطيواتك
فلا تجرح مشاعر البين
وأنا العارفاك زول حساس وعمرك مدّي غيرك دين
ولا بتسأل
عن رجوعو في يوم
ولا هاميك تعرفو متين
دقّة صدرك العاجبك
وعرضة عزتك عزين
فلا تطرا الموالفية عشان باكر حتنساهن
وترجع تاني تطراهن
كما بنتذكر الماضي
بشي من شوق وحنية
لزولة بشر وجنية كما وصّفت انت في يوم
فذكرى تجي وتاني تفوت
ذي ال نار تهب..... وتموت.

[سجمان]

المشاركة الأصلية كتبت بواسطة تماضر حمزة

سيبك من لقاي
وأجدل حروفك ساي
وما بنساو صباح زايد حلاهو مساي
يا دغري الحروف صف القصيد واساي
ما بنساك هن متَّ وبياخدو عزاي

أمسك سيف عيونك وما تقرّب جاي
وحياة المعنّج في الضهر زازاي
وحياة الفرح اللينا كان لولاي
ما بنساك يا البعدك بسوِّي أذاي

المشاركة الأصلية كتبت بواسطة تماضر حمزة

مرقنا مسااافة


نتلولح معاي شوقين
شوقاً للسمح وكتو البحجيك زييين
وشوقاً ما عارفاهو يا سجمان مقبل وين
بريد الريدة شان شالت هواك سنين
وأموت في الفرقة لو بتزيد شويقك هين
معاك اتواصل المشوار
علي درب الهدب والعين
علي مهلك خطيواتك
فلا تجرح مشاعر البين
وأنا العارفاك زول حساس وعمرك مدّي غيرك دين
ولا بتسأل
عن رجوعو في يوم
ولا هاميك تعرفو متين
دقّة صدرك العاجبك
وعرضة عزتك عزين
فلا تطرا الموالفية عشان باكر حتنساهن
وترجع تاني تطراهن
كما بنتذكر الماضي
بشي من شوق وحنية
لزولة بشر وجنية كما وصّفت انت في يوم
فذكرى تجي وتاني تفوت
ذي ال نار تهب..... وتموت.

في يوم لقاي
حدثت النجوم بالليل تغبّو سماي
ما دام الحبيب بالنور شلع ضوّاي
من فاطرو بيشع حرقوصي لي كاواي

فاطرو لي كاواي
وجيداً ليو حزوز موزونة متل الياي
يالصلاح عموم ألفوني شوفو دواي
من حِسِّو اليفوق حِس الرباب والناي

منو الجاب هسة ضاري الفرقة
منو الكايس مع الأشواق
وكت تجتاحو للمرقة..
منو الغرقان مطوطر تب
ويسرق في الغميد سرقة
ومنو القال ليك أنحنا بعد
زينة حياتنا الدنيا نهمل
فيكي ريدتنا..
وننسى معاك حديثاً
في السموات يرقى..
وحاتك ما عرفتي البي
ولا قربتي للفيني
كتير جداً..
ولا بتشيلو فد ورقة..
حديثنا وكت هدوء البال
تقارير يومنا بالمِلّي
حكاوي زمان
وكل الكان بيحصلي
صكوك بتقرب الفَرَقة..
فما بت فوت معاي ذكرى
"ممورقة" فيني بالفطرة..
ولا بت موت معاك نار ريد
مهبهبة في القلب خلقة..
ولوفاً غيرك إنت ندر..
فما بننساو..
فكيف دايرنا نتذكر..
مخالتة الدم تواريبك..
وصمام قلبي في دوبك
مساهر في سراريبك
وهو المارق تقاويكي
عشم جوايا زاد أكتر..
فكيف بتقول موالفية..
وريدك فيني ني واخدر..
إذا ما سحنتك جواي
مدوبة فيني كالسكر..
فما مطيقي فوقك ساي
ولا صِنِّيتي شان أسكر..
براك بتخشي في الشريان
مسارقة.. نحن بس نضطر..
نواجه طلعتك في البال..
نواجهو مصيرنا كان نقدر..

سليلة الفي القزاز كاللجة اتوارالا
كشفت ساقة متبورة الوصوف تارّالا
صاحب العلم في لمحة اتحرالا
جاب الفي القلب ريدتو العيون قارّالا

مهيلة وراسية جيوش من كفل جارالا
دهجت قلبي والكلوات نقر ناقرالا
إن بهلت حديث أحواسي ست بارالا
شنات العسل من الشفاه دارالا

تعالي معاي..
نفتّح بالأمل نفاج
نسوق غنواتنا لي بكرة
نيقن بيها طفطيفنا..
تعالي معاي..
نسيب هم بكرة لليقّن
زغاب العش..
وساق الغيم
علي المحل الـ يتور قش
وبرّد بيهو حر صيفنا..
تعالي معاي..
عشم في ريد خرت قدرة
بواقي الحيل..
وشوق لي طلعتك زايد..
بدون لقيانا ما بنفش..
ولا بتنطاق معا جنيفنا..