محن سودانية 26..... المنطق السوداني
محن سودانية 26..... المنطق السوداني
الدول مكونة من افراد ولهذا تتصرف الدول في كثير من الاحيان مثل الافراد, خاصة في حالة الديكتاتورية . لان الفرد او الافراد هم الذين يقررون بدون الرجوع الى الشعب . .
ولكن بالرغم من كل هذا نحن السودانيون نحير الما بتحير. حكومة الانقاذ تهلل وتكبر وتفرح وتنتشي بقرار لاهاي بخصوص ابيي . والانقاذ دي هي المشت للتحكيم . طيب ليه.. الناس تاكل الراس وتخاف من العينين.. لاهاي دي زاتا هي القررت تقديم البشير لي محاكمة. طيب ليه هنا كويس وهنا بطال.
ليس هنالك اتفاقية او عقد يضمن حق الجميع مية في المية. واحسن عقد في الدنيا هو النية الصادقة. فكل الاتفاقيات والعقود يمكن التلاعب بها. والانقاذ لم تعقد اي اتفاق او معاهدة بدون ان تضمر شرا . وآخر مثال هو الاتفاق مع الصادق. ولا ادري اي منطق قد مارسته الانقاذ لكي تقنع الصادق بانهم جادين . ولا بد ان الصادق اراد ان يمارس الخداع على الذات وهذه احدى هواياته وقد نجح. سيعود الصادق وآخرين للاتفاق مع الانقاذ. لان المنطق السوداني معوج..
الامم المتحدة دي العساكرها في كل ركن وتحت كل راكوبة في السودان. واهل الانقاذ غنو من بيع المواد الغذائية والعفش والاساس وتاجير البيوت والمكاتب للامم المتحده. ما هي دي نفس الامم المتحدة البتنبز فيها الانقاذ صباح ومساء .
عندما فجرت انابيب البترول. وصرح الفريق عبدالرحمن سعيد في القاهرة بان التجمع مسؤول من هذه العملية. الانقاذ ما مشت للامم المتحدة ووصفت العمل ده بانه ارهابي وطالبت مصر باخراج الفريق من ارض الكنانة. ده كلو مش باسم الشرعية الدولية والقانون الدولي. وترك الرفيق ارض مصر . وهذا كله باسم الشرعية الدولية. وعندما تاتي الشرعية الدولية وتطالب بتسليم كوشيب واحمد هارون والبشير . يجعل المنطق السوداني الامر مؤامرة استعمارية واستهداف لسيادة السودان. لانه يرفع شعار الدين الاسلامي وكانما السعودية ترفع راية لاينزمان.
عبدالعزيز خالد لمن طالبو دبي بتسليمه. وهل سلم عبدالعزيز خالد تحت اتفاقية شجرة العرديب ولا بالقانون الدولي والاتفاقيات الدولية. والغريبة ناس الانقاذ لمن تتكلم معاهم ما بيجدوا اي غرابة, او اي تعارض في المنطق ديا. وهذه طبعا احدى فلسفات الترابي التي لم تمت بعد موت صاحبها . وحسب المنطق السوداني كل شي صاح زي ما نشوفو نحنا. والترابي كان يهلل ويعقد للشهداء ويحتفل بعرس الشهيد . ويتشنجون ب فلفتسل منهم دما ولتسل منا دما بل فلتسل كل الدماء . وفجأة وبكل بساطة يغير الترابي الموجة ويقول انو هؤلاء فطائس . ولم يطالب اي انسان بادخاله لمستشفى امراض عقلية. فليس من المعقول ان يغير انسان اتجاهه 180 درجة بدون ان يعاني خلل ذهني . والاعجب ان البعض لا يزال يعتبره عبقري زمانه. انه فقط المنطق السوداني .
الترابي الذي خان العهود والمواثيق وسرق السلطة , ثم عذب وسجن وصفى وقتل وقال انا فرعون ربكم الاعلى. هذا الشخص اعلن حرب جهادية على الجنوب. وسحل وقتل وفتك بالاسرى الجنوبيين وهذا ما لا يبيحه شرع او قانون . وملك الاراضي والمصانع ومؤسسات الدولة لاهله ومريديه . وبعد كل هذا يذهب كمال الجزولي وفاروق كدودة الشيوعيان لزيارته لشرب الشاي وتبادل النكات والمجاملات والقفشات. هذا منطق لا يوجد الا في السودان. والاظرط والاضل من كل هذا هو زيارة نقد لهذا الشخص . وهذا فوق المنطق السوداني المعوج.
بعد الاحصاء الذي نفشت قطنه وترته ونسجته الانقاذ ثم فصلته قال بعض رجال الانقاذ ان الاحصاء وضح ان عدد الجنوبيين اقل من ما ذكر في نيفاشا ولهذا يجب ان تنقص حصتهم لاقل من 28% فقلت لهم اذا كان التعداد وضح انو عدد الجنوبيين اكثر من ما ذكر في نيفاشا . هل كنتو حا تنقصو جزء من نصيبكم وتدوهو لي الجنوبيين. وكان الرد بسرعة وبتشنج ليع نديهم. هو مش كفاية انو نحنا اديناهم اي حاجة. هذا هو المنطق السوداني فالقاعدة الذهبية تقول اذا اعطيت سقف لاي اتفاق يجب ام يكون هنالك حد ادنى. ولكن منطق الانقاذ ومنطق كثير من السودانيين هو ان تفسر الامور كما تريد . في الثمانينات. اردت ان ادفع لصفقة في الخرطوم. ولم يكن عندي سوى جنيهات استرلينية. والدولار كان بخمسة جنيهات سودانية بنات حفرة . والجنيه الاسترليني كان يساوي 1.55 دولارا . وحسب القوم وضربوا وصار الجنيه سته جنيه وثمانين قرش سوداني. فسالتهم اذا كان الجنيه الاسترليني يساوي اكثر من 1.5 دولار. فوافقوا ولكن راسهم والف سيف ما يدفعوا اكثر من سته جنيه وثمانين قرش فذهبنا لاحدى الصرافات الذين اكدوا المنطق السوداني . وعندما سالت لكن ليه الموضوع ده ما منطقي قالوا آي ما منطقي لكن نحنا بنحسب كده. والمنطق بتاعنا كده. وبس كده دي هي ام القوانين في المنطق السوداني.
احد الاخوة هنا تربطني به صلة لاكثر من اربعة عقود . وهو طبيب اخصائي , كان يتحدث فى الثمانينات عن رغبته في طلاء منزله . وانه قد اتفق مع احد العجائز الدنماركيين وهو نقاش متقاعد وانه سيقوم بعملية الطلاء مقابل عشرين دولار في الساعة. وتصادف وجود سوداني . كان مكتب العمل قد ارسله كورس لتعلم الطلاء وتركيب ورق الحائط. وكنت قد استعنت به انا وآخرين من قبل . فسالني الدكتور فقلت له بطريقتي العادية . كنقاش هو كويس لكن كانسان هو زول كعب جدا. وهذا امام الاثنين حتى اخلي طرفي.
وبعد مده كان الدكتور يتصل بي ويقولي ياخ صاحبك جنني اكون في عملية , في اجتماع, مع مريض عيان تجيني السكرتيرة جارية وتقول لي في زول قال عاوزك لمموضوع مهم جدا وعايزك تتكلم معاهو دي الوقت. و يجد صديقنا (النقاش) يصر على فلوسه. وكل ساعات العمل كانت عشرين ساعة عمل بمعنى انه يستحق اربعمائة دولار . والدكتور كان يترك عمله لاخذ السوداني من العبارة ولا يحضر . ثم يحضر في منتصف اليوم ويتصل تلفونيا وبعد خراج روح واسبوعين من الطوحة خلص البيت . والدكتور عملها خمسمائة دولار. ولكن النقاش طالب بثلاثة الف. وصار اصدقائي اليوغسلاف عندما يقابلونني يسألوننى . كيف تسمح لصديقك الدكتور الغنى بان ينهب صديقنا المسكين. اي شخص هذا. وتعاطفهم مع النقاش لانه يتكلم اليوغسلافية. فاقحمت نفسي في المشكلة اللتي اردت ان اتجنبها من الاول . وسألت النقاش لماذا يطالب بثلاثة الف دولار .
منطق الاخ (و) كان . بعد ما انا ضربت البيت بوهية البيت بقى جميل ومؤكد البيت زاد في ثمنه خمسين الف دولار . وانا ما ممكن باقل من ثلاثة الف دولار . وكنت اقول ياخ انت مش شريك والبيت ما حقك. وانت الطلبت انو الراجل ده يديك الشغل . وانت عارف انو كان في دنماركي بجي في مواعيده وبعربيته ويخلص الشغلانة بدون وجع راس. وبعد ما يستلم قروشو حا يشكر الدكتور جزيل الشكر.
ولكن الاخ (و) . كان مصرا على انه مظلوم . فقمت باعطائه ثلاثمائة دولار لكى اطيب خاطره . الا ان الشكوى ازدادت. وصار الناس يلومونني لان الدكتور صديقي. وصار اصدقاء الدكتور يلومونني لان الدكتور تعرف بالنقاش في مكتبي. فقمت بمواجهة النقاش وسط مجموعة كبيرة . واصر على منطقه بان المنزل قد زاد خمسين الف دولارا في سعره وكأنما بيكاسو قد قام بالطلاء ¨ فسألته طيب اذا كان البيت ده نقص في سعره. هل انت كنت حاتعوض الدكتور. فغضب النقاش ونظر الي كانني مجنون وقال لي اعوضو ليه انا مالي وملو, وانا عندي قروش عشان اعوضو. وهذه احدى المحن السودانية. وواصل النقاش شكواه واتهامه بالتقصير لان صديقي قد اكل حقه.
عندما سمعت بكلام اهل الانقاذ عن تخفيض حصة الجنوب تذكرت منطق الاخ النقاش ..وتذكرت ان المنطق السوداني ...يمحن . البشير يهلل ويقول ان التحكيم اعاد للسودان عشره الف كيلو متر مربع وهذا يساوى مساحه لبنان . لاحظ اعاد للسودان . يعنى الجنوب ده ما السودان . بالمنطق الاعوج ده معناه مافى لزوم للاستفتاء لانو البشير عمل استفتاء للشعب السودانى وفصل الجنوب .
طيب العاد للشمال عشره الف كيلو متر مربع . حلايب دى البشير ما قال لينا كم مره قدر لبنان . والربع الخالى او صحراء بيوضه كم مره قدر لبنان . الكلام ما فى المساحه موناكو ما قدر فريق فنقر فى امدرمان هل فى مقارنه ؟ .
وكشف البشير عن وجه الانقاذ الابشع وقال لان هجليج صارت خارج ابيي . فلن تدفع الانقاذ لحكومه الجنوب . وان عمليه ايقاف نفقه الجنوب ستبداء من اصدار القرار يوم الاربعاء . ولكن لم يقل لنا هل اى ساعه فى يوم الاربعاء . وهل هذا بتوقيت حوش بانقا ولا مكه المكرمه . طيب هجليج دلوقت تابعه لولايه الوحده وولايه الوحده تابعه للجنوب . والمفتاح عند النجار والنجار عاوز فلوس . والحل عند الامم المتحده . طيب لو الامم المتحده افتت بانو هجليج تابعه للوحده . وقال سلفا كير قال ما حندى الشمال الخمسين فى المائه من يوم الاحد الساعه اتناشر بتوقيت راجا . هل البشير حيقول ليهو ينفعك يا ود عمى وانشاء الله يدخل عليك بخير وبركه . ولا حنسمع تحت جزمتى وحنعمل وحنعمل وحنقطع الاوصال ونكسر الرؤوس . عالم عندها منطق عجيب . واذا طالب الجنوب بتعويض بعد الانفصال لما سببناه من قتل وجرائم حرب . هل سيكفى كل المال فى السودان او البترول لتغطيه جزء ضئيل من حق الجنوب .
شوقى ...
|