المعلم خالد الحاج... تحيات من بعد طول غياب وأرجو أن تكون والعائلة بخير
فعلاً في حاجات كتيرة مدهشة في أداء نانسي عجاج ... أول حاجة فيها إنها بتغني بوجدان سوداني سليم.. من دون أي تنظير موسيقى بعد كلام أستاذ موصلي... فقد أوجز ولكنه أوفي وكفى..وتاني حاجة مدهشة ملاحظة معتصم وقد أسماها إدراكاً موسيقي.. لكن أنا شايفها هي في رقبتها نوتة موسيقية بنت موسيقي ضليع .. وقد غنت بإحساس العازف ربما... لذلك كانت منزعجة بعض الشئ من عدم تجويد الفرقة المصاحبة لبعض اللزمات الموسيقية في هذا العمل الأصيل...
آخر حاجة قبل ما أمشي من هنا... خالد الحاج وعلى طريقة الخواجات اختار ليها الفاميلي نيم عجاج يعني لو قال نانسي بدر الدين كان الموضوع اختلف...دي ما الحاجة المدهشة... بل المدهش أنني أخطأت قراءة عنوان البوست لمدة كم ثانية كدا... اتخيلت إنه نانسي (عج)رم هي من غنت عازة الفراق بي طال..ملعون أبو الاستعجال يااااااااااااخ... لكن بعذري موش؟؟ يعني الإسم قرب يكون مطابق لحدي نص الإسم الثاني.. يعني حقنا آخره (اج) وحق اللبنانيين آخره (رم)... غايتو بالطريقة دي يوم بتضيعوا ليكم زول يا خال...
تخشينة:
إلى الأمام نانسي.. شكراً على هذا الجمال ،،، والتحية عبرك للأسرة الكريمة.. لكن والله لو قلتي كدي جربتي تغني وإنتي لابسة التوب السوداني...إن شاء الله على طريقة النيو لوك ساكت.. والله حا تكون فعلاً إضافة حقيقية للأداء السوداني الأصيل بتاعك دا...
ربنا يحفظك.... وشكراً الخال خالد
|