[ramv]http://albrkal.com/upload/uploads/shagori_nasri.wmv[/ramv]
رجاء عمل (Stop) توقيف الملف -المدحة- ثم تشغيل الملف الريل.
ولامن صفت رغوة شخيبات اللبن
في حلتها المبنية من طبق السكن
واقفي في حوش البهايم
ولسع تكورك يالحسن
تلاوي في الحمل العنيد
جاها حسآ من بعيد
مارق من القاطوع ورا
قاليها خير آلحاجي خير
قالتولو خير تعالي جاي
دايراك تعنون لي جواب
يالراسي لي ولدي الخدير
لا تبقي زي شافع السرير
يقولي زين يا يمه زين وتبقي بعد شهير
وإن جاني يكتب فد سطير
أقولو يا سجم السجم
أنا زي قرايتك ما قريت لكن عويناتي بيفرزن
الوريقي البيضا من لون القلم...
وبعد المغيرب بي شوي
جاها الحسن تعبان يسير
العشا غنمو من الدرب وسرقت ندي وشو الهجير
سوتلو شايآ بي لبن
قرض معاهو حرف فطير
قالتلو بسم الله قول واكتب وصيتي أنا للخدير
الزمن يا ولدي شايلاهو السنين
والبعيش في الدنيا ما بعيش مرتين
العمر فاضلي بس منو اليقين
وإنت طول في البنادر يالحبيب لا متين
تعال نوريك حق أبوك الجنب حقيق حاج الأمين
إن عرفتو بلا عمار يقولوا ولدآ عندو طين
العلاج لا تنسي رسلو لي دحين
والعوينات ياجناي شوفن ضنين
سلامي أنا ليك مطرز للبنيات والبنين
الأرض لو يا ولدي تتشال في الإدين
أنا كت برسلها ليك في لوري الخزين
الشاعر خالد شقوري
|