تميمة الحظ
العاده انه لمن انزل البلد بشوف فرح الناس بي من خلال الضحكات والجبنه العاملنها بقلوب صافيه نية ونديانا رضا رغم انه دائما في احساس بشي قاعد في قلب الكل والشي دا يمكن ما عنده معني بس احساس بكون اكيد جا من حته ما انتبهت ليها، بس امنه بت عمي عمر ماكانت بتدس غيظه من جيتي وطوالي كنت بتخيل انها خاته عينه علي واحد من ولاد الفريق فشفقت اخده منها ...كنت بتبسم لمن اشوف غيظه هي متخيلاني هبله انا كان اااااااخر همي اخد ود عمها والا غيرو كنت متذكره انو ريحة ابوي متحكره في الفريق فلمن اجي طوالي يمكن يرضا بالبعمل فيهو ..مع اني ما كنت بعمل في شي بس بحاول اعرف في شنو خلاه يرمينا الرميه الغريبه دي ... اي خمسه سنه خلانا وفات لا هو قال شي ولا امي ضوت دربنا ...بس امي عندها ودعه غريبه لمن جات تموت لبستني ليها في رقبتي في سلسلة دهب وقالت لي بتجيب ليك البخت وفي نفس الوكت ما تعرفي يمكن قدرك تكون كاتباه الودعه دي ..قلت ليها امي استغفري كيف يعني القدر دا مش بيد الله اي اي ما قلت شي بس الودعه دي حافظي عليها فيها بختك ..وسبحان الله فعلا كنت متوفقه شديد في الحياة ما بعرف هل اشان انا مجتهده والا عندي تميمة حظ!
|